Uan 11
11
Dasado uënësaid
1Adnubien Dasado cuëmëdquid nënec uënëstiadtsëcquio yampanëdash. Aidi shubu daëdpactsëcquid Betania caid yacnocquid nepondash. Aidbëd icquid aton chuchu Madtabëd Madia icpondash. 2Madia danoshquete bëdambo nuadquidën Esus tachiuinshun aton manëdaidën tauccondaid nepondash. 3Adnubien aton chuchun: Esus chuitan, quequin nidmiaidën naden Esus chuituidpondash: Mimbi cun utsi cabued Dasado nënec uënëstiadtsëcquio yanoshe. En isec cho, capondash. 4Adoaquien Esus: ¿Uënësash pisenquionoshida Dasado nepash? Matses: Nuquin Papa bëdambo iquec. Ambi Chomiaid aton Madotsen bëdambo iquec, ma quenu, queshun naindambi, quequin tantiec adpondash. 5Adash Dasadobëta aton chuchu abidaëdi tantiaquidquio iquequi: 6Dasado nënec uënëstiadtsëcquio iccosh, quequin chiaqui badedi nidenquio yec anobi daëdec Esus ushpondash.
7Daëdec ushshumbic Esusën: Nuqui icbocno Udea yacno padpidec nidnunid, capondashi ubitedi. 8Adoaquimbi ubitedishun: Icbo, ma mibi ashunquio isadaidbon chuiquidon cuënoten sesequin cuessunnetsempaboc. ¿Adoboquida ambo nidte bune? capondac. 9Adoaquien utsi chiacbimbuen chuiquin: Badiadën uëshë chënquenuc capuec tocoshquetanec uebudesa nec. 10Inchëshën capuequien tocoshquetanec uebudquid, quequin Esusën chuipondash.#11.9-10 Naden tantiaquin Esusën chuipanëdash. Nëbi ubi cuessunnetiapimbo iquec. Badiadën nidacbimbuen Cun Pan tantiaidtedi nainabi icsho ubi cuessunnetiapimbo iquec. Inchëshën uebudacbimbuen ambi tantiaidtedi nainshobini ambi tantiacpadënquiobi matsesën ubi uënës uaindac, quequin tantiaquin aden chuipanëdash Esusën.
11Adshumbic Esusën padpiden naden chuiuapondash: Umbi cun utsibimbuecquid nec, cabued Dasado ushtoshe. Isucunmec nidnunid, quepondash 12Adsho tantiashumbimbi ubitedishun: Icbo, ma ushnuna. Ushash bëdambuec isucunquid neque, capondac. 13Esusën Dasado uënësaidquio chuinubi abëd icquidobëtan: Dasado ushaidquio chiec nec, quequin tantiabededpondambi. 14Adshobien Esusën: Dasado uënësosh, quequin cuembo chuipondash. 15Ma mibitedishun ubi bëdambuen tantianu, quiash Dasado uënësso isec nidambo yec bëdambo iquebique. Nëbi aid isec nidnunid, 16caquien: Ai, aidbëdquiobi uënësec nidnunid, quepondash Tomas anin abi uëshëmbi daëdpambo tishaid. Adanec abitedi nidpondash.
Uënësaid uincuenmequidquio nebi, quiaid
17Adashic uënësaidën shubu anoentsëqui Esus chopondash. Choshon: Uënësacsho chococash 3tedec ushac, quec onquecuededsho tantiatuidpondash. 18-19Esus choabi icnuc shubu daëdpactsëcquid Betania yacno cun matsesado dadpen Dasado uënësaid shubiuaquin sedencanuec Edusaden yacnouësh chochopanëdash. Uënësaid yacnouësh podquied nidquid 3 quidometedo cactiontsëc icquidën badedquio chochopanëdash. Chochoash uënësaidën chuchu Madtabëd Madia shubiec sedenquec tabadpanëdash. 20Adnubien: Esus choec, quesho tantiash Esus bëquedec Madta chopondash aton chibi Madia shubuno shubiec sedenquec tsadnubi. 21Choquimbi Esus bëquedash Madta: Icbo, mibi nëmbo icnuc cun utsi uënësenquio ictsenosh. 22Mimbi chiacpadombuen Nuquin Papan nëbi mibi nashuntsiash, quequin tantiembi, quepondash Madta. 23Adoaquien Esusën: Min utsi uincuenendac, capondash. 24Adsho tantiash: Ai, iuecash uënësaido abitedimbo uincuenmete uëshën cun utsi uincuenendac, quequin tantiembi, quepondash Madta.#11.24 Chotaquën onqueten Isa. 26.19bëta min onqueten Dan. 12.1-3 tantiaquin aden chuipanëdash Madtan. 25Adsho tantiashun Esusën: Matses uënësaid uincuenmequidquio nebi. Adquid icquin ubi tantiaquid uënësacsho uincuenmendambi. 26Umbi adoac Nuquin Papa yacno ubëdi tabadendac padpidec uënëstiapimbo yec. Umbi aden chuisho tantiash: Ai, abimbo mimbi caic ¿quequinda tantie? capondash Esusën. 27Adoaquien Madta: Ai, Icbo, adembi tantiembi. Nuquin Papan Chomiaid Quidistu Mesias caid yec aidën Madombo mibi nec. Nidaidën choec, quequin cun tsusedpabon dada uaquin chiampidquio nec, mibi caombi, quepondash.
Dasado tantiec Esus shubiaid
28Aden chiashic aton chibi Madia chiec Madta nidpondash. Nidshun aton chibiuidtsëqui chuiquin: Esus choash mibi iste bunoshe. Isec cho, chibi, caquien 29badedquio nidtoanec choquin Esus istuidpondash. 30Shubu daëdpactsëc yacnombo choabi icsho Madtan bëquedacnobi Esus tabadsho Madiantsen istuidpondash. 31Adec Madia badedquio nidsho issun chococacnouësh shubiec sedenquec nida danquin: Abëd shubiec sedenquetannu, quec tabadquidon tsibanampanëdash. 32Adnubien Madia Esus istuidtanec dannëshën tinquebudash: Icbo, mibi nëmbo icnuc cun utsi uënësenquio ictsenosh, quepondash.
33Adnubien Madia tsibanec chochobuedo cun matses isadaidbo shubiec sedenquetuidpondash. Madiabëd shubiec sedenquecuededsho istanec: Ai, uënësquio icnuc nec, quiash aido tantiec abitsen uënësquioshë yanec shubiantiadtsëcquio Esus icpondash. 34Adec shubiantiadtsëcquio yacnouëshien Esus: ¿Mitsimbo mimbi chococaoque? Isnunid, capondash. Adoac: Isec cho, quianec nidannenubien 35Esus shubiampondash. 36Adec shubisho issumbien: Ma aton utsibimbuecquid Dasado tantiec shubiec neyoc, capondash chochobuedon. 37Adnubien utsibo: ¿Atotsi queshun bëshuaid bëdanmiondaidëmbi Dasado uënëstiadtsëcquio icshobi bëdanmiambo icpec? quecuededpondash.
Dasado uincuenmiaid
38Nidquimbi chococacno istuidequi Esus shubiantiadtsëcquio yanuapondash. Macuësh cuënoteuidpambo icquid tsitsuno shëcuë uaidën uënësacsho nauedshun cuënote dapan bëtinacsho istuidpondash. 39Adashien Esus: Cuënote dapa bidiacquin shëcuë shëcne, quepondash. Adsho tantiash uënësaidën chuchu Madta: Padi, Icbo. Ënden pisenashe. Chococash mabi 3tedec ushboc, capondash. 40Adoaquien Esusën: Mambi mibi chuipaboc. Mimbi: Nuquin Papan Madombo mibi nec, ubi casho: Nuquin Papan namiac umbi nadatiambocquin nasho mimbi isendac, mambi mibi capaboc, capondash. 41Aden chuitanquin: Baded bëcunne, cac cuënote dapan shëcuë bëtinaid shëcnequin bëcunnepondash.
Adsho istanquimbien Esusën abuc isquin: Papa, mibi bëdambo iquec. Umbi nëbi chuisho mimbi tantiec. 42Umbi otacquio chianniaid mimbi ënenquio icquin tantiec. Ubi datsidadquido tantiamequin nëbi cumapenec onquequin mibi chiembi. Mibi chuitanquin umbi nadatiambocquin nasho issun: Nuquin Papan Chomiaidquio nec, quequin ma nëidon ubi tantianu, queshun cumapenec onquequin Nuquin Papa chuipondash. 43Adtanquimbien cumapenen cuënquin: Dasado, puduen, capondash. 44Adoaquien Dasado badedquio choec abi dashcute dataniacchobi puduempondash. Uënësacsho uesquin dashcuten datanetanquin dashcute cuëshën bëpucacchobi chopondash. Adec chosho istanquin: Baded dashcute dachic. Ma nidnu, capondash Esusën.
Nëbien Esus cuessunnemetiad, quiaid
(Mat. 26.1-5; Madc. 14.1-2; Duc. 22.1-2)
45Aden Esusën ënden uënësaidi uincuenmesho isash Madia tsibanec shubiec sedenquec chochobuedo cun matses isadaidbo utsin utsinquien: Nuquin Papan Chomiaid Esus nec, quequin tantiabededpondash. 46Adnubien utsibon Edusaden yacno nidshun: Esusën ënden uënësaidi uincuenmiosh, quequin padiseobo chuituidpanëdash. 47Adsho tantiatanequien nëish iua cuessunneshun pichicaquidon chuiquido yec padiseobo yec Moises dada uamiampid tantiamequido yec isadaidbon chuiquid utsibo yec quenuc chochomiash tabadec nadec onquecuededpanëdash: ¿Mitsipadotiad? Nuquin matses ismequin nadatiambocquin dadpen nabanac caoshe. 48Aden Esusën nabansho isquimbi nuqui ënmenquio icsho issun nuquin matses abitedishunquio aton chuiquid tapa Esus icmetsiash. Adnubien nuqui iuaquid Doma yacnocquidon ambi chuiquid icmiacmaidquio chuiquid yansho isash nëishshun nuqui cuessun secauantsiash. Adotanquin Nuquin Papa tabadte shubu dapatsen uesquin chicchicquin icsa uatsiash, quepanëdash.
49Adnubien nëish iua cuessunneshun pichicaquidon chuiquid tapambo aid setan icquin Caipas cuëmëdquidëntsen naden chuipanëdash: Tantiadenquio icnuc ma mimbi chuipayoc. 50Tantia. Mibitedi chuinu. ¿Atotsi quec: Abitedi cuessun secaindac, mibi quepe? Ma nuquin matses abitedi cuessun secainquio icnu, queshun matses abentsëc cuessunnemenuna, quepanëdash Caipas abëtan chuiquid utsibo chiec. 51Aden ambibi tantiacpaden chienquio icquin Nuquin Papan oncamiac aden chuipanëdash. Nëid setan abëtan nëish iua cuessunneshun pichicaquidon chuiquid tapambo nec, queshun Nuquin Papan oncamiac: Nuquin matses isadaidbo abitedimbo cuidmenquio icnuec Esus abided cuidadec uënësendac, quequin Caipasën chuipanëdash. 52Aden Caipasën chuinëdaid tantiaquin umbitsen chuinu. Tantia. ¿Isadaidbouidtsëqui cuidmenquio icnuecta Esus abided cuidadec uënëstiondash? Padenquio. Matses utsibontsen abi tantiaquido yansho Nuquin Papan: Cun mado nec. Cun champi nec, caido icsho abëdi tabadmenuec Esus abided cuidadec uënëspondash, quequin tantiembi.#11.52 Isa. 11.12bëta Ede. 23.3 ista. 53Aden Caipasën Esus cuessunnemete chuisho tantiashien cun matses chuiquido: Esusien cuessunnemetiad, quecuededpanëdash.
54Chuiquid tapabon mibi adosh, quesho tantiatanequien aido ismenquio yec Esus cuempondash. Cuenequi nidaid cuëshë Udea yacnouësh nidash shubu nibëdacno anoentsëqui shubu dadpen icquid Epadain caid yacno nidpondash. Ambo abëd icquidobëd tabadpondash. 55Ambo tabadnubien tsusedpabon: Ma cun mado uënësmenquio icnu, queshun obeca caniactsëc cuessunniampid tantiate uëshë anoentsëqui yannuc Edusaden yacno cun matses nidannepondash. Cuëdënquin bedanabi icnuc mishtemaid mishquidoba Edusaden yacno nidannepondash. Mabi nëish iua cuessunneshun pichicaquidon nesmenu, quiash mishtemaid mishquid nëish iua cuessunneshun pichicaquidën nesmiabi icquid cuëdëntemaid nec, quedennec, quianec nidannepondash. 56-57Adshumbien Edusaden yacnoshon Nuquin Papa tabadte shubu dapa tsicatequin daquënë uaidën puduedtanquin Esus istuidnuen nibëmbennepanëdash. Aden nibënsho isash utsi utsiec chuinanec: Nuquin chuiquid tapabo padiseobobëd nadpac caosh. Esus istuidshun ubi chuita. Bedshun cuessunnemechitono, quepac caosh, quesho tantiashien: ¿Ada nëmbo Esus chopec? Cuessunnemenushe, quiash choenquien icchitec, quecuededpanëdash.
Currently Selected:
Uan 11: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.