Uan 10
10
Abi iuaquidbëta obeca chiaid
1-2Adshumbic Esusën utsi chiacbimbuen naden chuiuapondash: Tantia. Mibitedi chuinu. ¿Mitsipadec nuquin matses aton iua obeca dadpen dayun uaquid icpec? Ambi obeca tsicatiaid puduedte shëcuënquio icbo puduedquid nec. Padnuen ampe tsicatiaid mayadec puduedquid nendac. 3Obeca icbon: Puduednu. Shëcne, cac ambi: Cun iua ista, caidën shëcneshunquid. Aden shëcneshunac puduedtanquin ambi obeca cuëmëdquid cuëmëdquidquien cuëmbanquin: Cho, cac icbo tsibanquid obeca nendac. 4Aden abitedi umanuc niecunmeshun abi buanec bëyuc nidsho aton iuan icbo tsibanquid. Cun icbo cuëmbocpadquiec cuëdec, queshun icbo tsibanquid obecan. 5Padnuen utsibon cuënac aid tsibanenquio yec: Cun icbo cuëdbocpadpenquio cuënec, quiash dacuëdec obeca cuenquid. Icbouidtsëqui tsibanquid obeca nec, Esus quesho tantiashumbien: 6Tantiadenquio icnuc mimbi chiec, capondash padiseobon.
Esus obeca icbobimbuecquid nec, caid
7Adsho tantiashun Esusën padpidembuen naden chuiuapondash: Tantia. Mibi abimbo chuinu. Obeca tsicatiaid puduedte shëcuëbimbuecquid nebi. 8Icbo choambo icnuc ampen cuënac obecan tantienquiocquid. 9Adquid icnuc: Obeca puduedte shëcuëbimbuecquid nebi. Ubiuidtsëqui tantiash Nuquin Papa yacno puduedtequid matses iquendac. Adquid icsho obeca icbon bëdambuen pemiacbimbuen bëdambuec tabadmendambi. 10Padnuen ampe choshon cuessunniacbimbuen ubi tantiesabon matses bëdambo icmetiapimbo iquec. Umbien ubi tantiaquid bëdambuen tabadmeshun Nuquin Papa yacno tabadtequid icmenuec chondac.
11Adashic Esus padpidec onqueuapondash: Obeca icbobimbuecquid nebi. Obeca icbo aton iua cudasacbimbuec ubi tantiaquido cudasnuec ubided cuidadec uënësendabi.#10.11 Aden Isayasën Nuquin Papan naid chuipampic. Aid istiadquio icquin Isa. 40.11 ista. 12Padnuen utsibo piucquid bedteuidi bunquin obeca isquid iquec. Adquidën bëdi dapa chosho issun: Cunapenquio nec, quetanquin badedi obeca nianquid. Adoacsho bëdin obeca pequid. Utsi pesho istanec abimaisi obeca niquequid. 13Piucquid bedteuidi tantiaquin isquidien obeca tantienquio icquin nianec cuenquid nendac.#10.13 Nuquin Papan Chiaid tantiaquidënquio utsin utsinquien naden chiec: Esusën naden aton matses chuiquido tantiamenuen chuipanëdash: Nuquin Papa tantiate bunquido ma mimbi Nuquin Papambo tantiamenquio iqueyoc. Mimbi naiduidi mimbi tantiendac, quequin aden ompoacbimbuen chuipanëdash Esusën.
14Adashic abi onquec: Obeca icbobimbuecquid nebi. Cun obecan abi tantiaquin namequid icsho aidon ubi tantiec. 15Nuquin Papabëd ubi tantiananacpadquiec ubi tantiaquidobëdtsen tantiananquiebi. Aden ubi tantiaquido tantiec Cun Pa aido cuidmenquio icnuec ubided cuidadec uënësendabi. 16¿Nëid matses isadaidbouidtsëqui tantiectabi adec uënëspadi? Padenquio. Matses utsibontsen adembidi ubi tantiendac. Aidobëta nëid matses cun matses caquin nëish yua obecabimbuecnuc abitedi bëdambuen dayunuaic aidon icbouidtsëqui iquendabi. 17Cun Pan tantiacpadquiequi ubided cuidadec uënësash uincuenuaindabi. Aden ambi chiacpadombuen umbi nasho Cun Pan ubi tantiaquiec. 18Matsesën ambembi ubi uënës uatiapimbo ictsiash. Umbi tantiacpadquiequi matsesën uënës uadendabi. Adecbidi nadatiambocquid yec ubibi uincuenuaindabi. Adec Cun Pan chuibocpadec iquendabi, quepondash Esus.
19Adsho tantiash cun matses isadaidbon chuiquido dadpen nadec chushcanancuededpanëdash. 20Aido dadpen: Mayan Icsa Satanasën iua podobitsi icsa dapuduedash tantienquio yec onquequid nec. ¿Atotsi quequin aid tantiashune? quenubien 21utsibo: Mayan Icsa Satanasën iua dapuduedashta ¿adec onquepatsiash? Ma bëdambuec onquepaboc. Mayan Icsa Satanasën iua podobitsi icsa dapuduedaidën aden bëshuaid bëdanmenquio ictsenosh, quepanëdash.
Udiobon chuiquidon Esus uënës uate bunaid
22Iuecpactsëc ictanec iquenuanquid icnuc cun matses setan setanquiec Edusaden yacno chochoash cuëdëncuededpondash. Nuquin Papa tabadte shubu dapa nacnenquin nainampid tantiec adec cuëdëncuededpondash.#10.22 Babidonia yacno buanampido aton nidaid yacno chouashun isadaidbon tsusedpabon Nuquin Papa tabadte shubu chuca uapanëdash. 23Adnubien Esus Nuquin Papa tabadte shubu dapa daquënë uaidën puduedash shubu nuntanquio puduedabi cuishubu uaquin Sadomonën nacnenampidën Esus capupondash. 24Ambo Esus capusho isash datsidadshumbien cun matses isadaidbon chuiquidon: En cuembo chui. Tantienquio yec tabadtiapimbo iquebique. ¿Nuquin Papan Chomiaid Quidistu caidta ne? Aidquio nebi, quequin nëbimbobi ubi chui, capondash. 25Adoaquien Esusën: Mambi mibitedi chuipaboc. Adoaqui ma mimbi ubi tantiashunenquio icboc. Mibi bëdambuen tantiamenuen Cun Pan nadatiambocquin namiac nabanombi. 26Adosho isashi mibitedi: Ai, Nuquin Papan Chomiaid nec, quetiadquidëmbi mimbi tantienquio iccoc. Adquido yec cun obecabimbuecquidopenquio mibitedi nec. 27Cun obecabimbuecquidien ubi tantiaquido nendac. Adshun obecan aton icbo tsibanacbimbuen umbi chiacpadombuen naic bëdambuec tabadquin tantiendac. 28Aido uënësacsho Nuquin Papa yacno tabadmendambi padpidec uënëstiapimbo icnuc. Uënësabi icsho bëdambuen dayun uaindambi. Umbi adosho icsamianquidën: Iuanu, quequin ubi bedshuntiapimbo iquendac. 29Ambi tantiamiac ubi tantiaquido icsho Cun Pantsen dayun uaindac. Abitedishun Icbombo icquin Cun Pan ubi tantiaquido dayun uasho adembidi bedshuntiapimbo icuaindac. 30Cun Pabëd abentsëc yacbimbuecquid yec aid padquidquiobidi nebi, quepondash Esus.
31Adsho tantiashun cun matses isadaidbon chuiquidon nëishtanquin cuënote bedshun Esus sesetiadquio icuapondash. 32Adsho isashien: Sianenda. Cun Pan nadatiambocquin namiacpadombuen mibitedi dadpen nabanquin ismebanombi. Aden umbi naid ¿mitsicquid abentsëc icsambo icsho issun ubi sesenu, caquin naic? quepondash Esus. 33Adoaquien isadaidbo: ¿Bëdambuen nabanshodambi: Mibi sesenu, cadi? Matses iquequi: Cun Papadquidquio nebi, quequin Nuquin Papa icsambuen chuiquin mua uasho tantiashumbimbi mibi sesenu, caoc, quepondash cun matses chuiquido.
34Adsho tantiashumbien Esusën: Nuquin Papan Chiaidquio chuiquin nuquin tsusedpan naden dada uampid iquec: Min matsesën umbi chiacpadombuen nasho: Ubibimbuecquid nec, caombi, queposh Nuquin Papa, quequin chuipampic.#10.34 Aden dada uaid iste bunquin chotaquën onqueten dada uaid Cuëd. 82.6 isbanta. 35Ambi chiaid chuibanquido matses caic: Ubibimbuecquid mibi nec, quequin Nuquin Papan Chiampid issun: Nuquin Papan icsambuen chiac, quequin mimbi chushcambo iquec. Nuquin Papa adoambobida ¿ubi chushcai? 36Nuquin Papan tantiacpadec abi yacnouësh chondaid nebi. Adquid yec: Nuquin Papan Madombo nebi, ubi quesho tantiashun ¿atotsi quequin mibitedishun ubi chushcai? ¿Nuquin Papadambi icsambuen chuiquin muauadio? 37Cun Pan nadatiambocquin namiacpadombuen nabanenquio icsho issun mibitedishun ubi tantiashunenda. 38Umbi chiaiduidtsëqui tantiatiapimbo icquin Cun Pan namiacpadombuen nasho issun: Ai ambi chuibocpadquidquio nec, quequin ubi tantiata. Adshun: Aton Pabëd abentsëc yacbimbuecquid yec aid padquidquiobidi nebi, quequin abimbo chiec, quequin tantiata, quepondash Esus.
39Adsho tantiash padpidec chieshtotanquin cun matsesën chuiquidon: Quënën tsadunmenun bedchitono, caqui bedadenquio yec Esus cuempondash. 40Adashic acte Odan caid ëquëmatsiuc potiash Uan acten mentoanquidën tauaquin matses acten mentodednecno Esus niduapondash. Adash ambobi tabadpondash. 41Adshumbic matses dadpenquio chochosho issun Esusën nadatiambocquin nabanquin ismequin chuibampondash. Adsho tantiashun: Uan acte mentoanquidën nadatiambocquin nabanquin ismenquiocquimbi Esusën nabantetedi abimbo chuipadennec, cabededpondash. 42Adshumbic: Nuquin Papan Chomiaidquio nec, quequin dadpenshun Esus tantiabempondash.
Currently Selected:
Uan 10: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.