Uan 1
1
I. NUQUIN PAPAN MADONQUIO NIDAIDËN CHOSHON CHUIBANAC TANTIABENTE CHIAID
(1.1—12.50)
1. Bedanquin chiaid
(1.1-18)
Nuquin Papa tantiamianquid chiaid
1Ëndenquimboshë abitedimbo uabi yequi Nuquin Papabëd Esus icpampic. Aidi Nuquin Papapadquidquiobidi yec aid tantiamianquidquio nec. 2Ëndenquimboshë abitedi uabi yec Nuquin Papabëd Esus icpampic.#1.2-3 Nuquin Papan nidaid uaid istiadquio icquin Ene. 1.1-26 isbanta. 3Aidëmbi Nuquin Papan namiacpadombuen abitedimbo uapampic. Ambi uacmaid utsi nibëdec.#1.3 Nuquin Papan nidaid uaid istiadquiocquin Ene. 1.1-26 isbanta. 4Aidquio Nuquin Papa yacno tabadmianquid nec. Nuquin Papapadquidquiobidi yec: Nadquio Nuquin Papa iquec, quec tantiamianquidquio Esus nepondash. 5Nuquin Papan bëdambuen iste matses chuibanquidquio icsho Esus chieshënquin ënmetiapimbo icpondash.
6Aden Esusën chuibenniabi icnuc dada Uan cuëmëdquidba Nuquin Papan chomepanëdash. 7Uanën chuibanac Esus chote ma matsesën tantianu, quequin Nuquin Papan aidba chuibanquid icmepanëdash. 8Aidëmbi Nuquin Papa yacnouësh choacmaidëmbi: Nuquin Papan Chomiaidquio choendac, quequin chuiquidquio nepondash. 9Nidaidën choshon cuëte dëbedmequin ismiacbimbuen matses Nuquin Papambo tantiamendac, quequin chuibampondash.#1.9 Ëndenquimbo Nuquin Papan abi tantiamianquid Esus chuiquin Isayas dada uamepampic. Isa. 49.6 ista.
10Adec Nuquin Papa tantiamianquid choash aidobëd tabadsho ambi uaidombi matsesën aid tantienquio icpondash. 11Adembidi Nuquin Papan: Cun matses nec, caidombi isadaidbon Esus tantiate bunenquio icpondash. 12Adquid icnubien utsibon: Nuquin Papan Madombo nec, quequin aid tantiabenquid icsho Nuquin Papan: Cun mado nec. Cun champi nec, capanëdash. 13¿Matsesën tantiacpadenuidi tantiaquidta adopanëdash? Adembidi: Nuquin Papan Mado nebi, quequin ¿ambembi chuiquidta Nuquin Papan cun mado capanëdash? Padenquio. Nuquin Papan tantiamiacpadombuen aton Madombo Esus tantiaquid icsho dada cun mado caquimbi chido cun champi capanëdash.
14Aden abimbo chuiquin Nuquin Papa tantiamianquidquio Esus matsespanëdash. Nuquin Papan Mado abentsëcquiobi yec bëdamboshëcquid nepondash. Aidëmbi ubitedibëd tabadquin nadatiambocquin nabanquin matses tantiaquin nashunquid yec bëchamauanquiecsho ispondambi. Aden Esusën Nuquin Papambo tantiamepondashi. 15Aidi Uan acten mentoanquidën naden chuiuapondash: Umbi: Cun tsiuec choendac, quequin chiannebuedquio nec. Ubi udictsëcquid yec bëdamboshëcquidquio nec, umbi cabuedquio nec. Ubi tishabi icnubi aidi ëndenquimboshë icpampic, quepondash.
16Uanën chiacpadquid icquin abi tantiaquido Nuquin Papan bëdambuen isaido icmeshun adenuidi Nuquin Papa nuqui bëdambuen ismec. 17Ëndenquimboshë Nuquin Papan: Naden nata, quequin Chiaid Moises dada uamepampic. Padnuen Esuquidistunuidtsëqui Nuquin Papan bëdambuen iste tantiamequin: Nadquio Nuquin Papa iquec, quequin matses abimbo tantiamepondash. 18Matsesën isacmaidquio Nuquin Papa nec. Padnuen aton Mado abentsëqui abipadquidquiobidi yec aton dayun tsadquidënquio matsessun Nuquin Papa bëdambuen nuqui tantiamepondash.#1.18 Ëndenquimbo Nuquin Papan Moises aton dada ismepampic. Aton bëtantete ismiambo. Aid chiaid iste bunquin Buan. 33.18-20 isbanta.
2. Nuquin Papa tantiamequin nadatiambocquin nabanquin dadpen Esusën chuibansho tantiashun tantiabenaid
(1.19—3.36)
Chuiquidon chuimiac Uan acten mentoanquidën chiaid
(Mat. 3.11-12; Madc. 1.7-8; Duc. 3.15-17)
19Uanën Nuquin Papa tantiabenquido acten mentobannubien Edusaden yacnoshon isadaidbo chuiquidon: ¿Tsutsi neque? Chuimetan, cac Nuquin Papa ismequin nëish iua cuessunneshun pichicaquidobëd Nuquin Papa tabadte shubu dapa yacno nacnenquido Debin tsiuecquido chochoshon Uan chuituidpondash.#1.19 Nuquin Papa tabadte shubu dapa yacno nacnenquido isadaidbon tsusedpa Debin tsiuecquido nepanëdash. 20Chochoshon: ¿Tsutsi ne? Nuquin Papan Quidistu caid chomendac, quequin dada uaquin ¿nuquin tsusedpabon chiampidta ne? capondash. Adoaquien: Padenquio. Aidpenquio nebi, capondash. 21Adshobien: ¿Tsutsimbo ne? ¿Nuquin Papan oncamiampid Ediasta ne? caquien: Padenquio. Aidpenquio nebi, queuapondash. Adshobien padpidembuen: ¿Tsumintsimbo ne? Nuquin Papan oncamiampid utsi choendac ¿campidta ne? caquien: Padenquio. Aidpenquio nebi, queuapondash.#1.21 Mad. 4.5-6bëta M.I.Ch. 18.15-18 tantiaquin nëid dada uapanëdash.
22Adsho tantiashumbien padpidembuen: ¿Tsumintsimbo ne? ¿Mimbenquiobida nai? Ubi: Chuimetan, cabuedo chiec nidnu. Baded ubi chui, caquien: 23Nuquin Papan oncamiampid Isayasën naden chiampid nebi.
Shubu nibëdacno capucuennequin cumapenen cuënac matses chochosho:
Chuiquid tapambo choeque. Podquied nacnenshunta, cacbimbuen
Nuquin Icbombo choeque. Mimbi icsambuen naid ënash bëdambuec tabadta,
quequin chiendac, campid nebi, quepondash Uan.#1.23 Isa. 40.3 tantiaquin nëid dada uapanëdash.
24Adshobien padiseobon chomiaido icquin Uan naden chuipondash: 25Ubi chui, cac: Quidistu caidpenquio nebi. Adecbidi Nuquin Papan oncamiampid Edias caidpenquio nebi. Adecbidi Nuquin Papan oncamiampid choendac, campidpenquio nebi, mibi quioc. ¿Mitsi padquidquio icquin acten mentobanquin nai? capondash. 26Adoaquien Uanën: Nuquin Papa tantiabenquido icsho acten mentoquiduidtsëqui nebi. Adobannubi nëmbobi utsi mimbi isacmaid 27cun tsiuec choquid ubi udictsëcquid iquec. Aidëmbi umbia chuibambon nadatiambocquin nabanquin chuibanendac. Adquid icsho isash icsaquid yec dacuëdquin abi tapucudaid chictiapimbo iquebi, quepondash Uan acten mentoanquid.
28Acte Odan caid ëquëmatsiucshun ambi acten mentobanondaid shubu dadpen icquid Betania caid yacnoshon aden Uanën padiseobon chomiaido chuipondash.#1.28 Betania: shubu dadpen icquid utsi nepanëdash. Edusaden anoentsëqui icquidpenquio nepanëdash. Acte Odan uëshë choaucquid nepanëdash.
Obecabimbuecquid Esus nec, caid
29Badiadshun padpiden Uanën matses acten mentobanuapondash. Aden mentobannubien Esus chopondash. Chosho isashien Uan mentoquid nadpondash: Is. Nuquin Papan Chomiaid yec obecabimbuecquid choeque. Aidi matsesën icsambuen naid bedshunec abided cuidadec uënësendac.#1.29 Ënden isadaidbon Nuquin Papa ambi icsambuen naid cuidmenquiocnoen obeca bacuëded cuidquin uënës uapanëdash.#1.29 Buan. 12.1-24 icquidën Nuquin Papan aden obeca caniactsëc cuidaid tauambuen chuipampic. Nuqui icsaid bedshunaid Nuquin Papan Isayastsen dada uamepampic. Isa. 53.4-7 isbanta. 30Umbi: Cun tsiuec bëdamboshëcquid choendac, quequin chiannebuedquio nec. Ubi tishabi icnubi aidi ëndenquimboshë icpampic, quiash: Ubi udictsëcquid yec bëdamboshëcquidquio choendac, quepobi. 31Aid choacsho cun matses isadaidbo tantiamenuen Nuquin Papan acten mentobanquid icmiondashi. Adondaid icquimbi: Nuquin Papan Chomiaid nec, quequin badedquio tantienquio iccondambi, quepondash Uan.
Esus mentoaid
(Mat. 3.16-17; Madc. 1.9-11; Duc. 3.21-22)
32Adashic abi onquec: Nuquin Papan ismiac aton Mayan Bëdamboshëcquid oshpodcobimbuecquid abucuësh budec Esusbëd icnuec tsadtosho ispombi. 33Adsho isash tantienquio yec: ¿Tsutsi nepec? queshobi Nuquin Papan: Acten mentoanquid icta, ubi cabuedën: Cun Mayan oshpodcobimbuec budec tsadtobuedën abi tantiaquidobëd cun Mayan tabadmendac, Nuquin Papan cabuedshenda nepec, quiobi Esus caic. 34Aden ismeboc tantiaquin: Nuquin Papan Madombo nec, quequin mibi chiec nebi, quepondash Uan acten mentoanquid.#1.32-34 Ambi namiaid aton Mayan menete Nuquin Papan Isayas dada uamepampic. Nëidtedi Isayasën Dada uaid isbanta. Nëidic Isa. 11.1-2. Nëidic Isa. 42.1. Nëidic Isa. 61.1.
Uambëd icquido Esusbëd yanaid
35Adashic badiadash ambi acten mentobambocno abëd icquid daëdbëd Uan niduapondash. 36Adec nidquin Esus cuensho isashien: Nuquin Papan obeca bacuëbimbuecquid nec, umbi cabuedquio cueneque. Is, quepondash Uan.
37Adsho tantiatanec Uambëd icquido Esus chinunec nidpondash. 38Nidquin chinunac bidiadquin istanequien: ¿Atotsi quec ne? quepondash Esus. Adshobien: Dabi, mibi isec nebi. ¿Mitsimbo icco? Mibi isnu, capondash. 39Adoac: En isec cho, cac abi icacno isec nidondash. Uëshë budambi puduedash aidbëd onquetanniash inchëshbudtsëqui chondash.
40Uanën chuisho tantiashun Esus chinunondaid abentsëc Andedes nepondash. Aidi Simon cashumbic Petedo caidën utsi nepondash. 41Adanec Andedes aton buchi chiec badedquio nidpondash. Adec nidquin Simon Petedo istuidash: Nuquin tsusedpabon chiampid Nuquin Papan Chomiaid Quidistu Mesias caid istuidombique. En isec cho, buchi, capanëdash.#1.41 Nuquin Papan Chomiaid Quidistu nec, quequin cun onqueten Mesias capanëdash.
42Adshumbic Andedesën aton buchi buanac Esus isec chopanëdash. Chosho isash Esus: Uanën mado Simon mibi nec. Utsi uain cuënquin mibi Sepas cashumbic Petedo caimbi, capondash.#1.42 Isadaidbon onqueten nidaid moco cain Sepas capanëdash Esusën. Quidieco matsesën onqueten Petedo quepondash. Aden chuiquin nidaid moco utsi uatiapimbo icquidbimbuec Petedo ambi tantiaidquio naquin badedi chieshtotiapimbocquid nec, quequin chuipanëdash.
Esusën Uedipebëta Natanaed istuidaid
43Badiadash: Nidaid cuëshë Cadidea caid yacno nidnu, quianec Esus nidpondash. Adec nidquimbi Uedipe istuidshun: Nuquibi icnu. Cho, capondash. 44Aidi shubu dadpen icquid Betsaida yacnouësh caniquid nepondash. Adecbidi Andedes aton buchi Petedobëd auëshquiobidi caniquid neuapondash. 45Esusbëd icquid yanash Natanaed chiec Uedipe nidpondash. Adec nidquin istuidshumbien: Isec cho. Moisesbëtan Nuquin Papan oncamiaidon chuiquin: Bëdamboshëcquid choendac, quequin dada uaquin chiampid iccoshe. En isec cho. Aidi shubu dadpen icquid Nasaded caid yacnouësh caniquid Esus Osen mado nioshe, capanëdash. 46Adsho tantiash: ¿Nasaded yacnouështa bëdamboshëcquid chopatsiash? quepanëdash Natanaed. Adsho tantiashumbien: En mimbimbo isec cho, capanëdash Uedipen.
47Adoac choshobien Esusën: Is. Isadaidbombo iquec. Muauadesambo nec, caquien 48Natanaedën: ¿Mitsipaden ubi tantie? Mabi mimbi isacmaidquio neyoc, capondash. Adoaquien: Uedipen: Cho, cambo icnubi mibi cute icueda caid tayun tsadsho isombi, capondash Esusën. 49Adsho tantiashumbien: Icbo, Nuquin Papan Madombo mibi nec. Nuquin matses isadaidbon chuiquid tapambo ictequid mibi nec, capondash Natanaedën. 50Adoaquien Esusën: Cute icueda caid tayun tsadsho mibi isombi, ubi quesho ¿tantiashta: Aidquiobi nec, badedquio mibi quepe? Nadatiambocquin udictsëc nabansho mimbi isendac. 51Tantia, mibi abimbo chuinu. Mibitedishun abu yacno bëcaduadacsho isendac. Adembidi auëshquio ubi Matsesën Tishaid cun dadan ictanec Nuquin Papabëd icquido bud budashic dectatonesho#1.51 Nuquin Papan Chiaid tantiaquidonquio dadpenshun nëid chiaid issun naden chiec: Matsesën Tishaid yec Nuquin Papan Madombo icsho aid tantiaquid Nuquin Papa yacno puduedtequid nendac, quequin chiaid nec, quequin chuinëdash. mimbi isendac, quepondash Esus abëd icquido chiec.#1.51 Acobon isampid istiadquiocquin Ene. 28.10-17 isbanta.
Currently Selected:
Uan 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.