Tito 3

Esus tantiaquidon nabante chiaid

1Esuquidistu tantiaquido ma bëshunenquio icnu, quequin naden chuibanta, Tito. Min nidaidën icquid min chuiquid tapan chiaid naquimbi adembidi min chuiquid utsibon chiaid chieshenquio icquin bëdambuen nabanta. Adembidi utsibo tantiaquin bëdambuen nashunta, quequin chuibanta. 2Adembidi: Utsi icsambuen chuishunec onquenda. Adecbidi: Utsibobëd tantiananec bëdambuec tabadec menenanta. Adembidi: Umbi tantiacpadombuenuidi nata, quenquio icquin utsibon chiaidtsen tantiaquin nabanta, quequin chuibanta.

3Ënden Esus tantiesa yec nadquio nuquitedi icpondac. Nuquin Papan chiacpadombuen naisa yec nuqui bunacpaden naic tabadec bënnudacbimbuec nuqui icpondac. Adecbidi nuqui bunacpaden nabanquin ëntiapimbocquin nuqui icsambuen nadednepondac. Icsambuec tabadquido yec utsin bëdambuen isquin namesho isash nuqui nëishpondac. Adecbidi utsibobëd nëishnanash nuqui chieshënnampondac. 4Adquid nuqui icsho issumbien Nuquin Papan matses abitedi tantiaquid icquin aton matses icmenuen nuqui icsambuen naidtedi bedshunash abided cuidadtequid Esus chomepanëdash. 5Aidëmbi matses icsambuen naquid icshobi cuidmenquio icte bunquid icquin bëdambuen isquin nuquitedi mënchicpondash. Adshumbic nuqui icsambuen naidtedi ucmenuen nuqui utsiacbimbuecnuc chuca icmequin aton Mayan Bëda meniac. 6Aden abi bëdambuen ismequid Esuquidistu uidtsëqui tantiasho Nuquin Papan cudasenquio icquin aton Mayan Bëda meniaidombo nuqui nec.#3.5-6 Pabadon nëid chiacbimbuen Dan. 9.18 chuipampic. 7Adec aton Mayan Bëda nuquibëd icsho issun: Cuidenquio icquin bëdambuen isquin bëdambocquid icmeshun aidtedi ubëdi tabadmendambi, quequin Nuquin Papan tantiec, quequin ënëdenquio yec abëd tabadte nuqui cainec.

8Umbi: Aden chuita, quequin chiaidtedi abimbo chiaid nec, Tito. Aid tantiaquin ënenquio icquin chuibanta. Nuquin Papa tantiaquido yec ma bëdambuen nabanec tabadnu, quequin umbi chiacpadombuen Nuquin Papa tantiaquidtedishun nac bëdambo ictsiash, queshun chuibanta. 9Adec tabadec min tsusedpabon ambembi chiampid chuinanec utsibëd nëishnanash icsambuec tabadenda, quequin chuibanta, Tito. Adembidi isadaidbo Moisesën: Naden nata, quequin chiampid chiec chushcanansho issun: Adec tabadenda, cata. Aden chiaidtedi Nuquin Papa yacno mibi puduedmetemaid nec, quequin chuibanta.

10Aden icsambuen chuiquin Esus tantiaquido cuëshëdmete bunquid icsho bëdambuen tantiamenu, quequin chomeshun chuita. Aden chiaqui niacbidanquin adombuembidi padpiden chuiuasho tantiashun aidi bëdambuen chuibanquin tantiameuata. Aden chiaqui padpidembuen niacbidanquin adombuembidi chuiuasho tantiashun Esus tantiaquido iccuededacno puduedmenda, Tito. 11Adquid ambi icsambuen tantiacpadenuidi naic tabadquid neque. Padi: cata. Mimbi abimbo chiaid chiaqui tantiatiapimbocquin naic tabadquid Nuquin Papa yacno nidtiapimbo yec ambi nabanaidtedi tantiec cuidadtequid nendac.

Naden chuibanta, quequin Tito chiaid

12Tantia. Mibi chuinu. Adtemasbëd Tiquico ubëd iquec. Aid daëd icnuc abentsëc Quedeta yacno nidmembi. Aid mibi yacno nidacsho issun: Pabado isec nidnu. Mimbitsen nëmbocquido chuibanta, quequin chianec Nicopodis yacno nidta, Tito. Nicopodis yacnoshon ue taëquid matanmete bunebique. Ubi ambo istuidec nidta. 13Nëid daëd bëdambuen nashunta. Abentsëc: Naden nata. Aden nainda, quequin chiaid tantiaquin utsibo tantiamequid Senas mibi isbidanec Apodobëd udi nidec. Aid daëdi mibi yacno nidacsho iuedta. Nidnu, quesho atona nibëdsho issun menequin bëdambuen nidmeta. 14Adec nashunnanec nuquitedi bëdambuec tabadquin ismiac adecbidi utsibo nashunnanec tabadec Esuquidistu tantiaquid yanendac, quequin chuibanta.

III. ËNQUIN CHIAID

(3.15)

15Mibi tantiembi, quequin Tito chuita, quequin ubëd icquidotedishun: Chui, cacpadombuen mibi chuiquin dada uaic nebi. Adembidi mibëtan Esus tantiaquido: Mibi tantiembi, quec Pabado, quequin chuiban.

Nuquin Papan ma mibitedi tantiaquin bëdambuen ispanuna. Amen. Aidted chuiquin dada uaombi.

Currently Selected:

Tito 3: mcfNT

Highlight

Copy

Compare