Mateo 1
MCF

Mateo 1

1
I. ESUQUIDISTU TISHAID
(1.1—2.23)
Esuquidistun tsusedpabo chiaid
(Duc. 3.23-38)
1Esuquidistu chuiquin dada uanu. Aidën tsusedpa Abadauan nepampic. Aidën tsusedpabidi Abadauanën tsiuecquid Dabid nepampic. Abadauanën tsiuecquidobëta Dabidën tsiuecquido chuiquin Esusën tsusedpabotedi chuinu. Tantia.#1.1 Nuquin Papan Abadauan chiampid tantiate bunquin Ene. 12.3 isquinc Ene. 17.1-27 isquinc Ene. 22.15-18 isquinc caquin isbanta.
2Abadauanquiobi bedanquin chuinu. Abadauanën mado Isac cuëmëdpampic. Isaquën madobic Acobo cuëmëdquid nepampic. Acobon mado dadpen icpampic. Abentsëc Uda cuëmëdnuc aton buchiado utsi utsiec cuëmëdpampic.#1.2 Isac tishaid yec Acobo tishaid yec Acobon mado dadpen icpampic. Aden chiaid tantiate bunquin Ene. 21.13 isquinc Ene. 25.24-26 isquinc Ene. 29.31-35 isquinc Ene. 35.16-18 isquinc caquin isbanta. 3Adnubien Acobon mado Uda caidën chido Tamad caid abentsen chudaqui bacuë usundoshon aton mado daëdpambo tishpampic. Abentsëc Pades cuëntanquin utsi Seda cuëmpampic.#1.3 Udan naid tantiate bunquin Ene. 38.1-29 isbanta.
Padesën mado Esdon cuëmëdpampic. Esdonën madobic Adan utsi cuëmëdquid. 4Adanën madobic Aminadad cuëmëdquid. Aminadadën madobic Nason cuëmëdquid. Nasonën madobic Sadmon cuëmëdquid icpampic. 5Adshumbic Sadmonën aton chido Daba bedshun aton mado Bos tishmepampic. Adoac canishumbic Bosën aton chido Dud bedshun aton mado Obed tishmepampic.#1.5 Bosën aton chido Dud bedaid iste bunquin Dud 1.1—4.22 isbanta. Obedën mado Ese cuëmëdquid icpampic. 6Adshumbic Esen aton mado Dabid isadaidbon chuiquid tapa ictequid tishmepampic. Adoac canishun Dabidën dada utsi Udias caid cuessunnemetanquin aton chido Betseba bedshun aton mado Sadomon tishmepampic.#1.6 Aden Dabidën naid chiaid tantiate bunquin Sam.2. 11.1-26 isbanta.
7Sadomonën mado Doboan nepampic. Doboanën madobic Abias cuëmëdquid. Abiasën madobic Asa cuëmëdquid. 8Asan madobic Osapad cuëmëdquid. Osapadën madobic Odan cuëmëdquid. Odanën madobic Osias cuëmëdquid. 9Osiasën madobic Otan cuëmëdquid. Otanën madobic Asa cuëmëdquid. Asan madobic Esequias cuëmëdquid. 10Esequiasën madobic Manases cuëmëdquid. Manasesën madobic Amon cuëmëdquid. Amonën madobic Osias cuëmëdquid. 11Osiasën aton mado Econias cuëmëdquidbëta aton utsibo tishmepampic. Aid Econias caid aton matses isadaidbobëtabi iuanuen Babidonia yacnocquidon aton nidaidën buampampic.#1.11 Babidonia yacno buanaid tantiate bunquin Ch.D.2. 25.1-25 isbanta. Econias Oaquimbidi cuëmpanëdash.
12Aden buanac shubu dadpen icquid Babidonia yacnoshon Econiasën aton mado Sadatied tishmepampic. Sadatiedën mado Sodobabed cuëmëdpampic. 13Sodobabedën madobic Abiud cuëmëdquid. Abiudën madobic Ediaquin cuëmëdquid. Ediaquinën madobic Asod cuëmëdquid. 14Asodën madobic Sadoc cuëmëdquid. Sadoquën madobic Aquin cuëmëdquid. Aquinën madobic Ediud cuëmëdquid. 15Ediudën madobic Edeasad cuëmëdquid. Edeasadën madobic Matan cuëmëdquid. Matanën madobic Acobo cuëmëdquid. 16Acobon madobic Ose cuëmëdpanëdash. Aidquio Madian bënë nepanëdash. Madian Esus usundoshon tishpanëdash. Esus Nuquin Papan Chomiaid yec isadaidbon cainaidquio Quidistu caid yec Mesias quequin cuënaid nepanëdash.
17Aidtedi Esusën tsusedpabo icpampic. Abadauan bedanquin aidën tsiuecquido 14tedi chuiquin Dabid ënquin chiombi. Adoshombic Dabid ënquin chuibued aidbidi chuiuaquin padpiden bedanquin aidën matses tsiuecquido 14tedbidi chuiquin Econias buchibobëta Babidonia yacno buanaid ënquin chiombi. Adoshombic Econias ënquin chuibued aidbidi chuiuaquin padpiden bedanquin aidën tsiuecquido aton matses 14tedbidi chuiquin Esusquiobi ënquin chiombi.
Esuquidistu tishaid
(Duc. 2.1-7)
18Nëbi Esus tishaidquio chuinu. Esus tishabi yec aton tita Madia icpanëdash. Abi bednu, quequid Osen chudabi icshobi Nuquin Papan Mayan Bëdan nadatiambocquin Madia bacuë usundomepanëdash. 19Aden usundomiacsho issun: Abi bednu, quequidën Osen dada utsin chudaid danquin: Mibi bedenquio iquembi, quequin dada uashun Madia menenu, queuidpanëdash. Aidi Nuquin Papan chiacpadombuen naquidquio yec bëdambocquid icquin naden aton matses chiambo icpanëdash: Umbi bedabi bacuë usundoaque. Cuidquimbien ictiad, quequin aton matses chienquio iquequi: Bedenquio icnuen dada uaid menenu, queuidpanëdash.#1.19 Dadan aton chido cuenmete chiaid iste bunquin M.I.Ch. 22.23-24bëta M.I.Ch. 24.14 isbanta.
20Aden Osen tantiasho Nuquin Papan abëd icquid budmiaidën naden chuiquin Ose ushquin ismepanëdash: Dabid yampidën tsiuecquid icsho mibi chuinu. Tantia, Ose. Chudenquio icquin Nuquin Papan Mayan Bëdan Madia bacuë usundomiaque. Dacuëdenda. Dacuëdenquio icquin Madia min chido icmequin min shubuno buanta. 21Adoshombic dada bacuë tishacsho Esus cuënta. Aidëmbi matsesën icsambuen naid bedshunquin Nuquin Papa aton matses cuidmenquio iquendac, quequin Esus cuënta, quequin Nuquin Papabëd icquidën Ose ushquin ismepanëdash.
22Aden Nuquin Papabëd icquidën Esus tishte chiaid Nuquin Papan ambi oncamiaid Isayas naden chuiquin dada uamepampic:
23Dadan inacmaidëmbi bacuë usundoshon dada bacuë tishendac.
Aidi Emanued cuënendac.
Nuquin Papapadquidquiobidi matsesbëd tabadnuec choaid nec, quequin Emanued cuënendac,
quequin Esus tishte chuiquin Nuquin Papan dada uamepampic.#1.23 Isa. 7.14 tantiaquin nëid dada uapanëdash. Nuquin Papa nuquibëd iquec, quequin Emanued caic.
24Aden Nuquin Papabëd icquidën chiac isucunshun aidën chiacpadombuen Osen aton chido icmequin aton shubuno Madia buampanëdash. 25Aden buanshun Osen chudabi Madian aton bacuë tishpanëdash. Tishacsho Esus cuëmpanëdash.

© 2021, Wycliffe Bible Translators, Inc. All rights reserved.


Learn More About El Nuevo Testamento en matsés

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.