Ducas 21
21
Niante piucquid nibëdquidën meniaid
(Madc. 12.41-44)
1Adashic Nuquin Papa tabadte shubu dapa yacno puduedash tsadquin Esusën: Nuquin Papa tabadte shubu dapa nacnente nec, quequin tantiaquin aid shubun piucquid sandote tabëcaidën atona dadpen icquidon utsin utsinquien piucquid sandobededsho ispanëdash. 2Aden isquimbic nianten atona nibëdquidëmbi aton piucquid tsasicquidëmpi daëd ictsëcquid sandosho ispanëdash. 3Aden sandosho isash Esus: Abimbo chuinu. Tantia. Nianten aton piucquid abitedictsëqui sandoquin meneposh, aden utsibon sandoenquio icnubi. 4Adosho: Utsibon aton piucquid dadpen abi icnubi uesenquio icquin sandobededosh. Adquidpenquio niante nec, quequin tantiembi. Adembidi: ¿Tedtsimbi dayunuapeba? quenquio icquin atona daëdquiobi ictsëcquidi ambi bedtequid nibëdquiocnoc nianten sandosho isombi, quepanëdash Esus.
Abitedi naimëdte uëshë choec, quequin chiaid
(Mat. 24.1-2; Madc. 13.1-2)
5Adshumbic Nuquin Papa tabadte shubu dapa caic: Cuënote bëdaidquio nacnenaid iqueque. Adecbidi matsesën Nuquin Papa meniaid utsi shocosh nacnenaid shubun didicaid bëdamboshë isadquid iqueque. Is, capanëdash utsibon.
6Adoaquien: Nëbi mimbi isaidquio cuënote bëdambuen nacnenaid chicchicte uëshë chonoc matses utsibon nibëdquiecnuc abitedimbo chicchiquendac, quepanëdash Esus.#21.6 Esus uënës uan seta dadpen matameshun Doma yacnocquidon chuiquid tapa Sesadën isadaidbo nëishënshun aton sondado dadpen nidmiac Nuquin Papa tabadte shubu dapa nibëdquiecnuc chicchicpanëdash.
Abitedi nibëdte tantiametequid chiaid
(Mat. 24.3-28; Madc. 13.3-23)
7Adoaquien: Icbo ¿Tedectsicshun Nuquin Papa tabadte shubu dapa chicchicte icpec? Aid uëshë anoentsëqui yannuc ¿Mitsipadquid ismiantequid icpec? quequin abëd icquidon chuipanëdash.
8Adoaquien Esusën: Tantia. Mibi chuinu. Muaquidoba choendac. Aidon chuisho tantiash: Abimbuen cachitec, quec mua uadenda. Adquido choshon: Nuquin Papan Chomiaidquio Quidistu caid nebi, quequin muaquin chiaqui matses dadpenshun: Ai, abimbo mimbi caic, capendac. Aden chuibanquido icsho tsibanenda. Adembidi utsin: Nuquin Papan matses abitedi cuidte uëshë nëbi nec, quequin chuisho tantienda. 9Ubi choabi icnuc: Matses dadpenquio cuesnan cuesnannubi nidaid utsi utsiec yacnouësh cuesnantiadpambo tabadac caosh, quesho mimbi tantiendac. Adsho tantiash dacuëdenda. Nidaid nibëdanmiabi icnuc adec matses adonanec tabadendac, quepanëdash Esus.
10Aden chiashic abi onquec: Adec matses utsi dadpen icquidobëd nidaid utsi utsiec yacnocquid matses utsibobëd cuesnanendac. 11Adecbidi nidaid utsi utsiec yacno cumapenec nidaid ishcudtednendac. Adecbidi nidaid utsi utsiec yacno pete nibëdnuc bunquiotequid iquendac. Adecbidi nidaid utsi utsiec yacno daicsabudnec nëntequidquio iquendac. Adecbidi mibi dacuëdmetequid iquendac. Mimbi isacmaid abuc ismiantequid icsho mimbi isbededendac.
12Aidtedi yanabicnuc ubi tantiaquid icsho utsi utsien bedshun mibitedi mëyanmendac. Adoshombic: Icsambuen naquid neque. Ma cuidnu, queshun Nuquin Papan Chiaid chuibante shubu yacno mibi buanendac. Adembidi quënën tsadunmendac. Utsi utsien isadaidpembon chuiquid cobednadodbëd aidon chuiquid tapambo tabadacno buanac: 13Aidontsen ma tantianu, queshun umbi naid mimbi chuibanendac. 14Aden buanaqui: Icsambuen nambo iccombi, quequin ¿atotsimbi chuiquid tapa chuipeba? quequin tantiec tsadenda. 15Umbi tantiamiacpadombuen mimbi bëdambuen chuibanendac. Adoac: Icsambocquid mibi nec, quetiapimbo yec mibi chieshënquido tabadendac. 16Adembidi ubi tantiaquid icsho min shubun icquidëmbi mibi bedmeshun cuidnuequid yacno buanshun: Cuidquin cuessunneta, caindac. Aton papambi adoendac. Animbi aton mado adembidi adouaindac. Aton buchimbi aton utsi adouaindac. Aton chuchumbi aton chibi adouaindac. Abëd tantiananquidëmbi adouaindac. Utsi utsien mibitedi cuessunnendac. 17Aden nidaid utsi utsiec yacno tabadquido dadpenshun ubi tantiaquido icsho chieshënquiendac. 18-19Aden chieshënquin: Mibi cuessunnemenu, cac dacuëdenquio yec: Esus tantiaquid nebi, quequid icta. Adquid yec uënësash ënëdenquio yec Nuquin Papabëd mibi tabadendac.
20Adecbidi shubu dadpen icquid Edusaden yacno sondado dadpen chochoshon tsicatetuidsho isash: Edusaden ambocquidbëta nibëdanmete uëshë nëbi nec, quequin mimbi tantiendac. 21Aden tantiash ma nidaid cuëshë Udea yacnocquido macuësh tapa yacno cuempanuna. Adecbidi Edusaden yacnocquido ma auëshquiobi cuempanuna. Adecbidi aton tied yacnocquido ma Edusaden yacno chouainquio icpanuna. 22Aid uëshë icnuc Nuquin Papan ambi chuiquin dada uamiampicpadombuen cuidtequid iquendac. 23Aid uëshë icnuc chidobo bacuë usunquidobëd bacuë chishmequido badedquio cuentiapimbo yec mëyadec natiaquiendac. Adembidi Edusaden yacnocquido abi tantiesabo icsho Nuquin Papan natiamequioquin cuidtequido iquendac. 24Edusaden yacnocquido utsi utsien chështen seshun secaquin cuessunnendac. Utsi utsien bedshun nidaid utsi utsiec yacno buanshun matses utsibon iuaid iquendac. Nuquin Papa tantiesabo icquin matses utsibon Edusaden uesquin nibëdanmendac. Nuquin Papa: Aden namenu, quenuc adec tabadendac. Padi. Aidtedi namiombi, quenuc nidendac.#21.24 Isa. 63.18bëta Dan. 8.13 ista.
Matsesën Tishaid yec padpidec chote chiaid
(Mat. 24.29-35, 42-44; Madc. 13.24-37)
25Aden Nuquin Papan ismiacpadec badiadën uëshë yec inchëshën uëshë yec uispa yec quec yacno ambi nadatiambocquin naid ismiantequid iquendac. Aidtedi yacno ismiantequid uinsadpambo icsho isash cumapenec dacuëdec matsestedi tabadcuededendac. Acte dapa mad caid natiambo bocquec cuëdsho tantiash adquiecbidi cumapenec dacuëdec matsestedi tabadcuededendac. 26Adecbidi abuc icquidtedi shëquëquecuededsho isash matses abitedi nidaid nibëdante tantiec dacuëdec padishec uebudcuededendac. 27Adnubini Matsesën Tishaid yec ubi dasiuidaid bëchamauanquiec uëshë chënquiacbimbuec uëshëmbo iquec nadatiambocquin nabanquidquio yec abu ushun ubi chosho matses abitedishunquio isbededendac.#21.27 Dan. 7.13 tantiaquin nëid dada uapanëdash. 28Adquidtedi yansho issun: Nuquin Papa yacno ubi iuedte uëshë anoentsëqui yanec, quequin ënenquio icquin Nuquin Papa tantiaquin abuc istedneta, quepanëdash Esus.#Dan. 7.13; Mat. 16.27; 26.64; E.Ch.N. 1.7; Tes.1. 4.13-18.
29Aden chuishumbic: Ambi chuibued uëshë yante tantiamenuen Esusën naden chuipanëdash: 30¿Mitsipaden: Seta taëec, quequin matsesën tantiapec? Suc seccuduquiaid issun: Nëbi seta taëec, quequin matsesën tantiec. 31Adombuembidi umbi chuibuedtedi yansho issun: Nuquin Papan namiacno matses tabadte uëshë nëbi yanec, quequin mimbi tantiendac. 32Abimbo chiembique. Tantia. Umbi chuibambuedtedi yanabicnuc nëbi matses icquido uënësec naimëdenquio iquendac. 33Abubëd nidaid nibëdanendac. Padnuen Umbi chiaid nibëdantiapimbo icquid icnuc umbi chuibocpadquio iquendac, quepanëdash Esus.
34-35Adembidi chuinu. Tantiata. Nëishën: Nëbi ubi sec, quequin tantienquio yec capusho badedquio siac cuentiapimbo yec uënësendac. Adecbidi: Natiate uëshë choec, quequin tantienquio yec tabadquin badiadquidën badiadquidënquien acte paë uaid actednepec. Adecbidi atona bednuec abi bunaiduidi tantiec tabadpec. Aden nabanec tabadnubi ¿Nëbida Nuquin Papan matses abitedimbo cuidte uëshë chopeba? Aid choec, quequin tantiaquin caimbudec bëdambuec tabadta. 36Ënenquio icquin aid uëshë chote cainec tabadquin Nuquin Papa naden chuidoneta: Chieshtomenquio icquin mibi tantiaquidquio ubi icmeta, Papa. Adembidi natiamequin cuidte uëshë choec, queshun ubi mënchicta, Papa. Aid uëshë chonoc ubi bedshun mimbi Chomiaid Matsesën Tishaid bëisquid ubi icmeta, Papa, quequin chianneta, capanëdash Esusën.
37Aden chuishumbic badiadquidën badiadquidënquien Nuquin Papa tabadte shubu dapa daquënë uaidën puduedshun matses tantiamenuen Esusën chuibandednepanëdash. Adashic inchëshquidën inchëshquidënquiec macuësh Odibos caid yacno nidash tabadtednepanëdash. 38Adecbidi badiadnuc badiadnucquiec Esusën chuibansho tantianu, quequido Nuquin Papa tabadte shubu dapa yacno choded chodedpanëdash.
Currently Selected:
Ducas 21: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.