Santiaco 5

Dadpen dayun uaquido chiaid

1Tantia. Mitsana dadpen bedbanquin dayun uaquido icsho mibitedi chuinu. Natiamiantequid chonoc: Mëyadtequidquio nebi, quequin tantiec cumapenec shubiquiota. 2Mimbi dadpen dayun uaid chodquequid nendac. Adembidi min dashcute capishton petequid nendac. 3Mimbi bedaid min piucquid tsasicquid icsaic chunidtequid nendac. Aid chunidaid tantiaquin abitedi cuidte uëshën aid dayun uaquid chiendac. Utsibo menenquio icquin min piucquid dadpenquio mimbi dayun uaoc. Aden mimbi icsambuen naoc, quequin mibitedi chuishun cuidendac. Cute nëdënquequidën nibëdanmiacbimbuen mibitedi nibëdanmendac 4Adembidi min tiedën caniquid bedquin chonoadquido icsho mimbi dayun uaid piucquid menenquio icac aido shubiec tabadquin: Piucquid menianenquio iquec mibi icsambo iquec, quec cuëdcuededquin chuisho Nuquin Icbo Nadatiambocquidën abitedimbo tantiec.#5.4 Nëidtedi chotaquën onqueten dada uaid D.N.Ch. 19.13; M.I.Ch. 24.14-15; Ede. 22.13 aidtedi isbanta. 5Aido bunec nëid nidaidën tabadnubi mibitedi piucquid dadpen menequin bëdaidquio bedbanec tabadec. Adecbidi nua piash nëish iua nua tsënënacsho cuessunnete yanacbimbuec abi cuidtequid uëshë yanendac.#5.5 Nëid chiacbimbuen Ede. 12.3bëta 25.34 isbanta. 6Mibitedishun icsambuen nabi icquidobi: Mibitedi cuessunnenu, cac uidëntiapimbo icsho mimbi cuessun secamepoc.#5.6 B.T.Ch. 1.11-13 isbanta.

Chieshtoenquio icquin cainte chiaid

7Tantia, cun utsibo. Mibitedi chuinu. Nuquin Icbo choec, quequin tantiec chieshtoenquio yec tabadta. Pete nitsinash: Ue chodednequin canimiac bacuëacsho bedembi, quequin ue cainec tied icbo tabadec. 8Adecbidi mibitedi chieshtoenquio yec tabadquin: Nëbimbobi Nuquin Icbo choec, quec bëdambuec tabadquin caimbudta. 9Cun utsibo, Esus tantiaquid yec utsibobëd chushcananec tabadenda. Adec tabadsho Nuquin Papan cuidnushe. Cuidte Chuiquid yec nëbimbobi choeque.

10Cun utsibo, natiamiantequid icnubi Nuquin Icbon namiaid yec Nuquin Papan oncamiaido Aidën chiaid chuibanec chieshtoenquio icpampicpadquid icta. 11Natiamiantequid icnuc chieshtoenquio yec cuishonquec tabadsho issun Nuquin Papan bëdambo icmendac, quequin nuquitedi tantiec. Natiamiantequid dadpen icnubi chieshtoenquiocquid Obo icpampic. Adquid icsho issun daëd uaquin Nuquin Icbon nashunquin meneuapampic, quequin chiampid mibitedishun tantiec. Matses cuidte bunenquiocquid yec uënësquio icquin tantiaquin nashunquidquio Nuquin Icbo nec, quequin mimbi tantiec.#5.11 Obo 1.21-22; 2.10; 42.10-17; Buan. 34.6; Cuëd. 103.8 aidtedi isbanta. 12Tantia, cun utsibo. Abimbo chuiquidquio icta. Nuquin Papan tantianubi abimbo caimbi, quequin naden chienda. Abu chuiquin: Abimbo chuinu, quequin chienda. Adembidi nidaid chuiquin: Abimbo chuinu, quequin chienda. Adembidi utsibi cuënquin: Abimbo chuinu, quequin chienda. Utsin: ¿Ada natsia? cac: Ai, queshun nabanta. Adembidi utsin: ¿Ada natsia? cac: Padenquio, queshumbi nabanenda. Aden abimbo chienquiocquid icsho Nuquin Papan cuidnushe.#5.12 Santiacon Mateon chiacpadombuen chuibanac. Mat. 5.34-37 isbanta.

Nuquin Papambo tantiaquin chiannete chiaid

13Mibitedi utsi utsiec ¿natiamiac uënësquio icquidta icpec? Adquid icquin Nuquin Papa chianneta. Utsi: ¿Bëdambo iquebi, quiash cuishonquequidta icpec? Adquid icquin Nuquin Papan naid chiec cuëdënta. 14Nënec aton dada icsabudquid icsho issun Esus tantiaquidon chuiquido naden chuiquin: Aid tantiaquin Nuquin Papa chiec cho, cata. Adoac choshon Nuquin Icbo Esuquidistun namiaid icquin bëchin manoshcaquin: Mibi tantiaquid nebique. Nëid bëdanme, Icbo, quequin chiendac. 15Nuquin Papa bëdanmianquidquio nec, quequin tantiaquioquin chuinuc nënquid Nuquin Icbon bëdanmendac. Adembidi nënquidën icsambuen naidtedi tantienquio yec bëshunquin Nuquin Papan bëdambuen isendac. 16Adquid icnuc mimbi icsambuen naid tantiaquin mibëtan Esus tantiaquid utsibobëd chuinanta. Adoshon: Nënec aton dada daicsabudquido ma bëdanmenu, queshun Nuquin Papa chuibededta. Ambi chiacpadombuen naquidën chuisho tantiashun nadatiambocquin aid nashunendac.#5.16 Chotaquën onqueten chiaid B.T.Ch. 28.13 isbanta.

17Nuquin Papan oncamiaidquio Edias nuquipadquidquiobidi matses nepampic. Aidëmbi Nuquin Papa chuiquin: Ue secamenda, quequin cumapenen chuipampic. Adoac seta 3ted matanmetanec seta utsi choaid poctsembo yec ue sequenquio icpampic.#5.17 Ch.D.1. 17.1bëta 18.1 isbanta. 18Adoshombic padpidembuen chuiquin: Ue secame, quequin chiac ue sequepampic. Adnuc tiedën icquidtedi caniash bacuëpampic.#5.18 Ch.D.1. 18.42-45 isbanta.

Icsambuen nabanquidëmbi Esus tantiabente chiaid

19Cun utsibo, mibitedi utsi utsiec: Esus tantiaquid nebi, quebuedi aid tantienquio yanquin icsambuen nabanec cuëshëdendac. Adsho issun Esus tantiaquid utsin padpiden tantiabenmeuaindac. 20Aden tantiabenmequidën chian annëdënquequid nësecaidi bedacbimbuen naindac. Adshobien ambi bedaidën icsambuen naid tantienquio yec Nuquin Papa bëshunendac.#5.20 Chotaquën onqueten B.T.Ch. 10.12 isbanta. Aidted chuiquin dada uaombi.

Currently Selected:

Santiaco 5: mcfNT

Highlight

Copy

Compare