Ebedeo 3

III. ESUQUIDISTU NUQUIN PAPA MATSES BËDAMBUEN ISMEQUID NEC, CAID

(3.1—5.10)

Moises dëniacquid Esus iquec, caid

1Cun utsibo, Nuquin Papan: Cun matses nec, queshun ambi tantiacpadombuen Esus tantiamiaido mibitedi nec. Adoaido icquin Esuquidistu tantiaquionona. Nuquin Papan: Ubi chuibenneta, caid Esus nec. Adecbidi matses Nuquin Papa bëdambuen ismenuen nëish iua cuessunneshun pichicaquidon chuiquid tapabimbuecquid Esus nec, queshun aidquio tantiaquionona. 2Moisesën Nuquin Papan chiacpadombuen Nuquin Papa tabadte shubumpi uashun nuquin matsestedi namepampic. Adombuembidi Nuquin Papan chiacpadombuen chieshtoenquio icquin Esusën nabampanëdash.#3.2 I.T. 12.7 tantiaquin nëid dada uapanëdash. 3Esusquio abitedishun Icbombo icsho: Bëdamboshëcquid nec, matses dadpenshun caindac. Moisesien aden chuitiapimbo icpampic. ¿Mitsipadquio shubu uaquid icpec? Shubu uaquid yec shubun icbo nec. Adquidën aton shubun icquido namec. Shubun icquid namiaidbimbuecquid Moises nec. Esusien shubu icbobimbuecquid yec abitedimbo namequidquio nec. 4Shubu abitedi abi shubu uaquidën naid nec. Adombuembidi Nuquin Papan abitedimbo uapampic. 5Adquid icquin Nuquin Papan namiac aton iuambo Moises Ambi cun matses caido nashunquidquio icpampic. Adembidi Nuquin Papan ambi chuite tantiamequin oncamiac nuquin matses Nuquin Papan nate chuibampampic. 6Padnuen Esuquidistu Nuquin Papan Madombo nec. Adquid icquin aton Papan shubun icquido namequid nec. Aden aton shubun icquido dayun uacbimbuen nuqui dayun uaindac. Adoac aidën shubun icquidbimbuecquid nebi, queshun chieshtoenquio icquin Nuquin Papan chiacpadombuen nuqui naindac. Aden naquido icsho abi yacno nuqui tabadmendac, quiash cuishonquequin abi cainquido Esusën dayun uaindac.

Nuquin Papan chiacpadombuen naquidquio icnuna, quequin chiaid

7Aden Esusën dayun uaid icsho Nuquin Papan Chiaid aton Mayan Bëdan naden chuiquin dada uamepampic:

Nëid uëshëmbi Nuquin Papan Chuibued tantiashumbi

8tantienquio yanampicpadec tantiesa yanenda.

Nuquin tsusedpabon shubu nibëdacno capucuennequin Nuquin Papan chiacpadombuen nainquio icpampicpaden tantiesa yanenda.#3.7-8 Nëidtedi tantiaquin nëid dada uapanëdash. Nëidic Buan. 17.1-7. Nëidic I.T. 20.1-13. Aidtedi isbanta.

9Shubu nibëdacno seta 40ted matanmec capucuennequin

tsusedpabon umbi nadatiambocquin nadennesho isquimbi:

¿Ambi Chiaid niacshodabi Nuquin Papan ubitedi cuidnuc?

queshun chieshquin min tsusedpabon umbi chiacpadombuen nate bunenquio icpampic.#3.9 I.T. 14.20-35 tantiaquin nëid dada uapanëdash.

10Adec tabadsho isash nëishash:

Umbi chiaid chieshënec ambi tantiacpadembi icsambuen nadednequiopec.

Umbi chiacpadec bëdambuec tabadte bunenquio iquec. 11Adquid icsho issun chushcain: Umbi chiondaid nidaid bëdambocquidën mibi tabadmenquio iquendambi.

Ambo tabadec mibi matses utsibëd cuesnanenquio yec mibi bëdambuec tabadtsenoc,#3.7-11 Aidtedibimbuec Chotaquën onqueten Cuëd. 95.7-11 dada uapampic. Aidtedi ista.

quequin Nuquin Papan nuquin tsusedpabo chiampid nec.

12Tantia, cun utsibo. Bëdambuen tantiec tabadta. Uënëstiapimbocquid yec Nuquin Papa abi iqueque. Nëbi aidën chiacpadombuen nanuna, quebuedi: Tantiesa yanshun icsambuen naic cuëshëdchitomane, queshun ënenquio icquin Esus tantiaquiota. 13Nuquin Papan chiacpadec bëdambuec tabadnuna, quec badiadquidën badiadquidënquiec utsibobëd chuinannuna. Nuquin Papan dada uamequin chiacpaden nëbimbobi nanuna: Icsambuen namianquidën muaquin icsambuen namiac Nuquin Papan chiacpadombuen nainquiocquid icmane, queshun. 14Tauambuen nuqui Esus tantiabenondacpadombuen chieshtoenquio icquin tantiec uënësabi yacpadembi ënenquio icquin tantiaquido yec Esusbëd tabadtequido nuqui nendac. 15Tantia. Nuquin Papan Chiampid nad iqueque. Mibi padpiden chuinu.

Nëbimbobi Nuquin Papan Chiaid tantiashumbi tantienquio yanampicpadec tantiesa yanenda.

Nuquin tsusedpabo shubu nibëdacno capucuennequin Nuquin Papan chiacpadombuen nainquio yampicpaden tantiesa yanenda.#3.15 Chotaquën onqueten Cuëd. 95.7-8 isbanta.

16¿Tsuntsin Nuquin Papan chuisho tantiashumbi aidën chiaid niac niacshunquin chieshëmpampic? Equipito yacnoshon Moisesën buanaidon aden napampic.#3.16 Isadaidbon nate iste bunquin Buan. 14.1—20.26 isbanta. 17Aidobidi seta 40ted matanmequin Ambi Chiaid tantienquio icquin chieshëndednesho isash Nuquin Papa nëishtednepampic. Aden nëishënac shubu nibëdacno capucuennequid icsambuen naquidotedi uënësbudnepampic. 18Aidobidi chiec Nuquin Papa: Muatiapimbocquid icquin mibi abimbo naden chiembi: Umbi chiondacno nidaid bëdambocquidën mibi nidmenquio icquin ambo tabadmenquio iquendambi. Ambo tabadec mibitedi utsibobëd cuesnanenquio yec mibi bëdambuec tabadtsenoc, quequin Umbi Chiaid niac niacsho chiondambi, capampic Nuquin Papan. 19Aden tantiesabo icquin ambi chiacpadombuen nainquiocsho issun ambi chiacno Nuquin Papan tabadmenquio icpampic.

Currently Selected:

Ebedeo 3: mcfNT

Highlight

Copy

Compare