Ebedeo 13
13
Esus tantiaquidon nate chiaid
1Esuquidistu tantiaquid iccuededquidotedi: Cun utsibimbuecquido nec, quiash aidobëd ënëdenquio yec tantiananec nashunnanta. 2Shubu utsi yacnouësh choquid bëdambuen isquin iuedshun mibi yacno ushmeta. Aden nate bëshunenda. Aden nashunquin utsin utsinquien: Nuquin Papabëd icquido aid yacnouësh choquido nëido nec, quequin tantienquio icquin matses danquin aton shubun iuedshun ushmepanëdash.#13.2 Aden Nuquin Papabëd icquido matses yacno chomiaid iste bunquin nëidtedi isbanta. Nëidic Ene. 18.1-33. Nëidic Ene. 19.1-29. Nëidic C.Ch. 6.11-23. Nëidic C.Ch. 13.2-21. Aidtedi isbanta. 3Adembidi mibi quënën tsadunacbimbuecnuc quënën tsadunaid tantiaquin istan istanta. Adembidi chieshënquin mëyanaid ictsiabi, quequin tantiaquin utsibon chieshënquin mëyanaido tantiec tabadta.
4Min chido bedash aidbëd abentsëc yacbimbuec bëdambuec tabadta. Adquid yec: Cun chidopenquio chudnu, quesa iquec chido utsi isuidquid icta. Adecbidi chido yec: Dada utsi chudmenu, quesa icta. Adecbidi abitedishun natemaidi naic chudnanquin nanu, quesa icta. Aden mimbi isuidenquio icquin nabansho issun Nuquin Papan mibi cuidendac. 5Adecbidi piucquid dadpen bedteuidi bunec tabadenda. Adenquio iquec: Cuna icnuc bëdambo iquebi, Adecbidi cuna daëdpactsëc icnuc bëdambo iquebi, quec tabadta. Adec tabadquin Nuquin Papan ënden naden chuiquin dada uamiampid tantiata.
Mibëd iquendabi.
Mibi nianenquio icquin dayun uaimbi,
quepampic.#13.5 M.I.Ch. 31.6-8 tantiaquin nëid dada uapanëdash.
6Aden chiaid abimbo caic, quequin tantiec:
Cun Icbombo ubi nashunquid nec, quiash dacuëdenquio iquebi.
Adec dacuëdenquio icsho matsesën ubi icsa uatiapimbo iquec,
quequin chiampid nuqui tantiendac.#13.6 Chotaquën onqueten Cuëd. 118.6 isbanta.
7Adembidi Nuquin Papan Chiaid mibi tantiamenu, quequin mibi chuibanquidon chiaid bëshunenda. Aido Esus tantiaquiec bëdambuec tabadpanëdash. Aidon tantianëdacpadombuen tantiec bëdambuec tabaduata.
8Nuquin Icbo Esuquidistu utsitiapimbo icquid nec. Ëndenquimboshë yampidquio yequi nëbi abi iquec. Aidi nibëdantiapimbo icquid yec abi tabadec. 9Esusën naidquio chuinu, quequidën utsi chiec muaquin chuibansho tantienda. Padnuen mibi bëdambuen isquin nashunquid: Nuquin Papa tantiaquidquio ma yannu, quequin mibi chuibanquidën chuibanacpadombuen nabanta. Utsibic: Nëid petemaid nec. Nëid petequid nec, quequin tantiaquin naquid yec Nuquin Papa tantiaquidquio yanenquio mibi ictsiac.
10Nëish iua cuessunneshun pichicaquido icquimbi Esus abided cuidadec uënësaid nuqui tantiaidquio tantiesa icquin: Bëdambo iquec, catiapimbo iquec. Adsho Nuquin Papan aido bëdambuen istiapimbo iquec.#13.10 Isadaidbon nëish iua pichicate iste bunquin chotaquën onqueten dada uaid D.N.Ch. 7.6bëta I.T. 18.9 isbanta. 11Ënden setan setanquien nëish iua cuessunneshun pichicaquidon chuiquid tapan aton matsesën icsambuen naid bëshunmequin: Ma Nuquin Papan bëdambuen isnu, quequin nëish iua cuessunneshun aton intac bedshun Nuquin Papa tabadte shubu quënë bëdamboshëcquid yacno puduedshun daseccabandednepanëdash. Adoshombic ambi intac bedbued nëishën dada umanuc matses nibëdacno buanshun pichicadednepanëdash. 12Adembidi shubu dadpen icquid tsicatiaid umanuc matses tabadenquio yacno Esus buanshun uënësuac aton intac chididiquec uënëspanëdash. Adec uënësaid tantiaquido icsho icsaisabimbuecnuc bëdambuen isquin Nuquin Papan: Cun matses nec, caido nuqui nendac.#13.12 Isadaidbon nëish iua pichicate iste bunquin D.N.Ch. 16.2-34 isbanta. 13Adoaid yec Esusbëd icquid nebi, quiash umanuc buansho isash aidbëd nidacbimbuecquid icnuna. Adquid icsho issun Esuquidistu tantiesabon: Mibi icsamboshë iquec, quequin Esus chieshënnëdacpadombuembidi nuquitsen chieshënendac. 14Adquid icnuc nëid nidaidën ënëdenquio yec nuqui tabadte nibëdec. Adquid nibëdnuc nibënacbimbuen Nuquin Papabëd tabadtequid cainquido nuqui nendac.#13.14 Nuquin Papa tabadacno Edusaden chuca capanëdash. 15Nuquin Papan namiac Esuquidistu abided cuidadec uënëspanëdash, quequin aid tantiaquin: Nëish iua cuessunneshun pichicanu, quenquio icquin: Mibi bëdamboshë iquec, Papa, quequin ënenquio icquin Nuquin Papa chiannenuna.#13.15 Mibi bëdamboshë iquec, Papa, camete Nuquin Papa bunec. Aden chiaid iste bunquin chotaquën onqueten dada uaid Cuëd. 50.14bëta 23 issun min onqueten dada uaid Oseas 14.2 isbanta. 16Aden bëshunenquio icquin chiannec utsibobëd tantiananec nashunnanquin atona nibëdquid icsho menequid icta. Adsho issun nëish iua cuessunneshun pichicaid isacbimbuecnuc Nuquin Papan: Bëdambo iquec, caindac.
17Mibi Esus chuibanquidon chiacpaden nabanta. Nuquin Papan: Chieshtoenquio icquin ubi tantiaquido bëdambuen isquin dayun uata, caid nec. Aidi: Esus tantiaquido naden namiombi, quequin Nuquin Papa chuiquid nec. Ubi chuibanquid nec, queshun ambi chiacpadombuen mibitedishun nabansho isash aid cuishonquec. Aden ambi chiacpadombuen nainquiocsho isash uënësquio ictsiash. Adnuc mibitedi bëdambo ictiapimbo ictsiac. 18Ubitedi tantiaquin Nuquin Papa chianneta. Nuquin Papan: Mimbi icsambuen naic, canushe, queshun bëdambuen tantiaquin naic tabadebi, quioshe. Adembidi bëdambuen tabadme, Papa, cata. 19Adembidi ubi tantiaquin Nuquin Papa chianneta. Ubi yacno aid chome, Papa, quequin mimbi chianniac Nuquin Papa: Ai, ambo nidtan, quenuc badedquio mibi yacno niduaindabi.
VII. ËNQUIN CHIAID
(13.20-25)
Nashunnantebëta mibi tantiaquin aidtedi chiombi, quiaid
20Bëdambuec tabadmianquid icquin Nuquin Papan aton Mado Esus matsesacsho matsesën uënës uaid icsho uincuenmiac nëish iua obeca abi dayun uacbimbuen abi tantiaquidtedi dayun uaquid yampanëdash. Abi tantiaquido caic: Aido bëdambuen isendambi, quequin chiaid ucudtiapimbo ictequid nec, quequin aton intac ismequin ënenquio icquin abi tantiaquido Nuquin Papa bëdambuen ismendac.#13.20 Nëid chiacbimbuen chiaid iste bunquin Isa. 40.11bëta Buan. 34.1-33 isbanta. 21Aden abi tantiaquido icsho Esusën nëish iua obeca dayun uacbimbuen dayun uaquin Nuquin Papan ambi tantiacpadombuen bëdamboshëcquiduidquio icmendac. Adoac Nuquin Papa bunacpadombuen ma napanuna. Adembidi abi bunacpadombuen ma icmepanuna, queshun Esuquidistunuidtsëqui nac. Esuquidistu bëdamboshëcquidquio yec nibëdantiapimbocquid nec, quequin ënenquio icquin chiannenuna. Amen.
22Cun utsibo, mibitedi bëdambuen tantiamenuen daëdpactsëc umbi chuiquin dada uabued chieshtoenquio icquin tantiadoneta.
23Tantia. Mibitedi chuinu. Nuquin utsi caid Timoteo quënën tsadumbuedi nëbi puduenmiac aidi badedquio nëmbo choan aidbëdi mibi yacno isec nidendabi.
24Mibëd icquid Esus tantiaquidobëta mibi chuibanquidtedi chuiquin: Mibi tantiec tsadebi, quiosh, quequin chuita. Adembidi umbitsen mibi tantiembi, quiosh, quequin chuita, queuapec Esus tantiaquido nëuëshquio Itadia yacno tabadquido.
25Nuquin Papan ma mibitedi bëdambuen ispanuna. Amen. Aidted chuiquin dada uaombi.
Currently Selected:
Ebedeo 13: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.