Ebedeo 1

I. BEDANQUIN CHIAID

(1.1-4)

Aton Papan chuimiacpadombuen Esuquidistun Ebedeobo chuibanaid

1Ëndenquimboshë Nuquin Papan tantiamiac ambi oncamiaidon utsin utsinquien Nuquin Papan Chiaid nuquin tsusedpabo chuidednepampic. Adembidi ambi oncamiaido utsi utsien dada uamepampic. 2Nëbien abipadquidquio tsiuec choshon Nuquin Papan chiacpadombuen aton Madonquio chuibampanëdash. Aidëmbi aton Papabëtan abuc icquidtedbëta nidaidën icquidtedi uapampic. Adshumbic Nuquin Papan ambi uaidtedishun Icbombo icmepampic. 3Aidi aton Papapadquiobidi bëdamboshëcquidquio yec bëchamauanquiecquid nadatiambocquid neuaic. Aidëmbi nadatiambocquin Nuquin Papabëtan ambi tantiacpadombuen ambi uaid abitedimbo abi icmec nibëdantiapimbocnoc. Aidi matsesën icsambuen naid bedshunquin Nuquin Papa matses bëdambuen ismenuec abided cuidadec uënësashic abuc nidash Nuquin Papan dayun abiucquio tsadtuidpanëdash.#1.3 Adec aidën dayun abiucquio tsadec, quequin Nuquin Papabëdi abitedishun Icbombo nec, capec. Min onqueten dada uabicnuc Chotaquën onqueten dada uaid Cuëd. 110.1 ista.

4Adec Esus tsadtuidnuc ambi uaido Nuquin Papabëd icquido Esuspadquid nadatiamboshëcquid ictiapimbo iquec. Aidon Icbombo Esus nec. Nuquin Papan: Cun Mado mibi nec, caid icquin Esusën Nuquin Papabëd icquido namec.

II. NUQUIN PAPABËD ICQUIDON ICBOMBO ESUQUIDISTU NEC, CAID

(1.5—2.18)

5Abëd icquido ambi uaido isec Nuquin Papa:

Cun Mado mibi nec.

Nëbi Min Papa nendabi ¿quepecta icpanëdash? Padenquio.

Aden abëd icquido chiesa yec: Nëid uëshëmbi mibi chuiquid tapa icmeshun mibi Cun Mado caindambi,

quequin Nuquin Papan chuipampic.#1.5 Cuëd. 2.7bëta Sam.2. 7.14 tantiaquin nëid dada uapanëdash. 6Padpiden chiec Nuquin Papa:

Aton mado abentsëcquiobi matses ismenuen abëd icquido caic:

Cun Madombo bëdamboshë iquec, caquin aidquio tantiec tabadta,

quequin chuipampic.#1.6 Chotaquën onqueten dada uaid Cuëd. 97.7 tantiaquin nëid dada uapanëdash.

7Ambi uaido abëd icquido naden Nuquin Papan chiec:

Umbi namiacpadequi cunquequidbimbuecquid mibi iquendac.

Adecbidi umbi namiacpadequi cute nëdënquequidbimbuecquid iquendac,

quequin chuipampic.#1.7 Cuëd. 104.4 tantiaquin nëid dada uapanëdash. Ebedeon onquetemba chiaid issun Quidiecon matsesën onqueten nëid dada uapanëdash. Aden Quidiecon matsesën onqueten dada uaquin utsi utsiec Ebedeon onqueten dada uaidbimbuecpenquio tantiadpanëdash.

8Aden chuishumbic abipadquid aton Madombo icsho Nuquin Papan naden chiec:

Ënëdenquio yec Chuiquid Abentsëcquiobi mibi iquendac.

Adecbidi bëdambuen tabadmequid yec umbi chiacpadombuen namequid mibi iquendac.

9Ubipadquid iquec bëdambuec tabadte bunquidquio mibi nec. Adquid yec icsambuec tabadte bunesambobidi mibi nec, Mado.

Adquid yec ubi yacpadquidquio Icbo Abentsëcquiobi mibi nec. Mibëd icquido adquid nibëdec.

Mibi abentsëqui adquidquio iquec. Mibëd icquido bëdiactsëc cuishonquenubi umbien mibi cumapenen cuishoncamendac.#1.8-9 Min onqueten nëid dada uabi Chotaquën onqueten Cuëd. 45.6-7 isbanta.

10Adembidi Nuquin Papan aton Mado chuiuaic:

Tauaquin abubëta nidaid uashun aidën icquidtedi mimbi uaidquio nec.

11-12Aidtedi nibëdanendac.

Mibien nibëdantiapimbo yec abi tabadendac.

Utsitedi shënibudendac.

Dashcute shëni chicshun shëbunshun niash utsi chuca dasiuidacbimbuec.

Mibi utsi ictiapimbo iquendac. Adquid yec uënësesa mibi iquendac.

13Naden Nuquin Papan abëd icquido chiambo iquec:

Cun abiuc Abitedishun Icbombo icnuec nëmbo tsadec cho.

Mibi chieshënquidobi dëniacmeshun: Cun Icbo mibi camenu,

quequin abëd icquido chiambo icpampic.#1.13 Chotaquën onqueten Cuëd. 110.1 isbanta.

14Padnuen abëd icquido Nuquin Papa nashunquido nec. Adembidi Nuquin Papan: Esus tantiaquido ubëd tabadtequido neque. Nashuntan, quequin chometequido nec.#1.14 Nëid chiacbimbuec Dabid Cuëd. 34.7 iquec. Cuëd. 91.11 chotaquën onqueten chiaid iquec. Aid daëdquio ista.

Currently Selected:

Ebedeo 1: mcfNT

Highlight

Copy

Compare