Cadasia 1

I. BEDANQUIN CHIAID

(1.1-9)

Mibi tantiembi, quequin chiaid

1Pabado nebi. Esuquidistun: Ubi chuibenneta, caid nebi. Matsesën: ¿Adquid icta, caidtabi nedi? Padenquio. Esuquidistun: Ubi chuibennequidquio icta, caid nebi. Adembidi Aid uincuenmenëdaid icquin Nuquin Papantsen: Esus chuibenneta, caid nebi. 2Nëmbocquid Esus tantiaquidobëtan mibitedi tantiembi. Nidaid utsi Cadasia yacno tabadquin Esus tantiaquido icsho mibitedi chuiquin dada uaic nebi. 3Nuquin Papabëtan Nuquin Icbo Esuquidistun ma bëdambuen isquin bëdambuec tabadmepanu, quequin mibitedi tantiaquin Nuquin Papa chiannembi. 4Matses abitedi icsamboec tabadsho isash nuqui icsambuen naid bedshunash Nuquin Papa bunacpadec abi tantiaquido cuidmenquio icnuec abided cuidadec Esuquidistu uënëspanëdash. 5Aid tantiaquin: Nuquin Papa bëdamboshë iquec, canuna ënenquio icquin. Amen.

Esus tantienquio yanaid

6Tantienquio yanosh, quequin mimbi naid chuisho tantiash tantiadempambo ictanobi. Nuquin Papan mibi bëdambuen iste bunquin tantiamiac Esus tantiec mibitedi tabadanondac. Adondaidi utsibon icsambuen chuibanaquien mimbi Esus tantienquio yanchitac. 7Aidon ma Nuquin Papan Chiaidpenquio chuibaneyoc. Esusquio chienquio icquin utsi uaquin muaquin chuisho tantiashun: Abimbuen cachitec, queshun mibitedishun Esuquidistu tantienquio yampac caoc. 8Esusuidtsëqui tantiasho Nuquin Papan nuqui bëdambuen isec, quequin abimbo chiondambi. Aden umbi chiaid icnubi abimbo chienquio icsho ma Nuquin Papan cuidpanu, caimbi. Nuquin Papabëd icquidëntsen muaquin chuisho tantiashun ma aidtsen cuidpanu, catsiambi. Utsibontsen muaquin chuisho tantiashun aidotsen: Ma Nuquin Papan cuidpanu, caimbi. 9Tantia. Ënden chiondaidbidi nëbi padpiden chuinu. Umbi chuibanac mibitedishun Esus tantiabenondac. Mimbi tantiondaid Esusquio chienquio icquin utsi uaquin chuiquido ma Nuquin Papan cuidpanu, quequin chiec nebi.

II. PABADON ESUSËN NAID CHUIBENNIAID

(1.10—2.21)

Esusën tantiamiaidquio nebi, Pabado quiaid

10¿Mabi matsesën: Mibi bëdambo iquec, canu, quequindambi aden chuibampadi? Padenquio. Nuquin Papambien: Mibi bëdambo iquec, ubi caindac. Matsesën tantiaiduidi chuibanec Esuquidistun iuapenquio ictsiabi.

11Tantia. Chuinu, cun utsibo. Esus tantiasho Nuquin Papan matses bëdambuen isendac, quequin umbi Esusën naid Chiaid Bëda chuibambued matsesën ambibi tantiaquin ambembi chiaidpenquio nec. 12Matsesën: Naden chuita, quequin chiambobi Esuquidistunuidtsëqui tantiamiac Ambi chiaidquio chuibenniombi.

13Ënden umbi cun matses isadaidbon chiacpadombuenuidi naondaid mibitedishun tantiec. Adec isadaidbombo icquin Nuquin Papan tantiamiaido Esus tantiaquido cumapenen chieshënquin nibëdquio icnuc cuessun secate bumpadennebi. 14Nuquin Papa tantiate bunquimbi cun matsesën chiaid abitedimbo tantiaquin naquidquio icpadennebi. Ubëta tishaid caniabon bëdiactsëc tantiaquin nanubi ubimbo cun tsusedpabon chiaiduidi tantiaquin nate bumpadennebi. 15Adshobini Nuquin Papan ubi tantiaquioquin tantiamiondash. Ubi tishabi icnubi ubi caic: Cun Mado Esus tantiameshun bëdambuen isquin:#1.15 Umbi oncamiaid icmendambi, quequin chiaid iste bunquin. Isa. 49.1bëta Ede. 1.5 isbanta. 16Esusën naid Chiaid Bëda isadaidpembo chuibenneta, caimbi, quequin ambi tantiampicpadombuen Nuquin Papan tantiamiondashi. Adoac: Esusën naid chuibanquido: ¿Atotsimbi nëbi nape? quequin chuitanambo iccondambi. 17Edusaden yacno nidshun Esusbëd icnëdaido chuitanambo iccondambi. Aden utsibo chienquio yec nidaid cuëshë utsi Adabia caid yacno badedquio nidtanondabi. Adashic iuec iuecpambo ictanec auëshquio choec shubu dadpen icquid Damasco yacnobidi chouaondabi.

Pabadon Esus tantiaquidon chuiquid tapabo istanaid

18Shubu dadpen icquid Damasco yacno seta 3ted matanmec tabadtanec Edusaden yacno nidshun chuiquid Tapa Sepas cashumbic Petedo cuëmëdquid isec nidondabi. Adec nidash 15tedec ushec aidbëd tabadondabi. 19Ambobi Nuquin Icbo Esusën utsi Santiacotsen isondambi. Esusbëd icnëdaid utsibo isambo iccondambi. Aid daëdtsëqui isondambi. 20Umbi aden chuisho tantiash: Abimbo caic, quendac Nuquin Papa.

21Aden Edusaden yacno istanec choashic iuec iuecpambo ictanec nidaid cuëshë utsi Sidiabëta nidaid cuëshë utsi Sidisia caid yacno isec nidondabi. 22Ambo nidacsho nidaid cuëshë utsi Udea yacnocquid Esuquidistu tantiaquidon isambo iccondashi. 23Aidon: Nuquipadquid Esus tantiaquido cuessun secamiondaidëmbi Esusën naid Chiaid Bëda chuibenniosh, quequin umbi naid chuishouidi tantiapanëdash. 24Adec ubi icaid tantiash: Nuquin Papa bëdamboshë iquec, quepanëdash Udea yacnocquido.

Currently Selected:

Cadasia 1: mcfNT

Highlight

Copy

Compare