Hechos 7

Estebanën chuiquid tapabo chuibanaid

1Aden Estebanën naid chuisho tantiashumbien nëish iua cuessunneshun pichicaquidon chuiquid tapanquio Esteban chuiquin: ¿Abimboda mimbi naid chuiposh? 2caquien Estebanën naden chuibampanëdash: Chuinu. Tantia, cun matsesado. Tsusedpa Abadauan nidaid Adan caid yacno tabadec nidnush nidaid Mesopotamia caid yacno tabadsho Nuquin Papan abitedishun Icbo icquin abibi Abadauan ismepampic. 3Aden ismec nadec onquepampic: Min nidaidbëta min matsestedi nianec nidaid utsi: Mibi umbi ismenu, cacno nidta, quepampic Nuquin Papa. 4Adsho tantiash aton nidaid Mesopotamia cashumbic Cadea caid yacnouësh puduanec nidash nidaid Adan caid yacno Abadauan tabadpampic. Ambo tabadnubi aton papa uënësan nidaid Adan yacnoshon nëbi nuqui tabadacno Nuquin Papan nuquin tsusedpa Abadauan chomepampic.#7.2-4 Ene. 11.31 bedanquin Ene. 12.5 tsiccuëscaid tantiaquin nëid dadpen dada uapanëdash, aid ista. 5Aden chomeshun Nuquin Papan naden Abadauan chuipampic: Nëid nidaid mibi capuaid mitsanapenquio nec. Iuecshun mibi menenun nanu. Bacuë tishtiapimbo icbuedi mimbi min chido tishmiaid abentsëc min madon tsiuecquido nëid nidaid menendambi.#7.5 Ene. 17.7-8bëta Ene. 48.3-4 tantiaquin nëid dada uapanëdash. 6Nëid nidaid bedabi yec min baban tsiuecquido matses utsibon nidaidën tabadendac. Ambo tabadshobi ambocquid chuiquidën min matses iuaquin seta dadpen 400ted matanmequin mëyanendac. 7Adoacsho abi mëyanquidtsen cuidquin mëyadmeuaindambi, quepampic Nuquin Papa. Adashic abi Nuquin Papa onquec: Min madon baban tsiuecquido mëyanacnouësh nëmbo choshon umbi chiacpadombuen nabanendac, quequin#7.6-7 Ene. 15.13-14bëta Buan. 3.12 tantiaquin nëid dada uapanëdash. 8chuishumbic: Nidaid menenun nanu, quequin Nuquin Papan naden Abadauan chuiuapampic: Umbi: Mibitedi nidaid menenu, casho: Abimbo caic, quequin ubi ismequin bacuëbobëta caniaidtedi shui dëbid dëtemeta, capampic Nuquin Papan. Adoaquien Abadauanën ambia aton shui dëbid dëtemeshun dadatedishun shui dëbid dëtemeta, quequin chuipampic. Adoshombic iuecquio icshun Abadauanën aton mado tishmeshun Isac cuënquin 7tedec ushshun Isaquën shui dëbid dëtemeuapampic. Adoshombic adembidi Isaquën mado tishacsho Acobo cuënshun 7tedecbidi ushshun Isaquëntsen Acobon shui dëbid dëtemeuapampic. Adoac canishun Acobon tishmiaido 12ted icpampic. Abentse abentsen tishmeshun 7ted ushshun ushshunquien aton madon shui dëbid dëtemeuapampic, quepanëdash Esteban.

9Aden chiashic: Acobon mado 12ted nuquin tsusedpabo icpampic. Acobon mado chido utsin tishaid Ose icpampic. Aidi aton papan tantiaidquio icsho isash nëishshun chieshënquin aton utsibon bedshun piucquid bedquin matses utsi menepampic. Aden meniac nidaid utsi Equipito yacno Ose buampampic. Aden buanacsho abëd icquin Nuquin Papan Ose bëdambuen namepampic.#7.9 Aton buchiadon Ose chieshënquin naid chiaid iste bunquin Ene. 37.1-30 isbanta. Nuquin Papan Ose bëdambuen isaid chiaid iste bunquin Ene. 39.2 isbanta. 10Aden Equipito yacno buanacsho: Iuanu, queshun natiamiaid Ose icsho issun Nuquin Papan aid dayun uaquin bëdambuen tantiaquidquio icmeshun bëdambuen chuiquidquio icmepampic. Adquidquio icsho issun Equipito yacnocquidon chuiquid tapa padaonën aton shubu nuntanshun namequid icmeshumbic Equipito yacnocquidotedishun chuiquid tapa cobednadod Ose icmepampic.#7.10 Aden Ose chuiquid icmiaid iste bunquin Ene. 41.15-16bëta 41.25-41 isbanta.

11Adec chuiquid tapa Ose icnubi iuecash pete nibëdquio yampampic. Adec pete nibëdnubi nidaid Equipito caid yacnocquidobëd nidaid Canan caid yacnocquido natiambo buncuededpampic. Adecbidi nuquin tsusedpabo isadaidbon petetsen nibëdquio yampampic.#7.11 Pete nibëdaid chiaid iste bunquin Ene. 41.54-57 isbanta. 12Adshumbic: Equipito yacno dayun uate shubu uashun dayun uaid pete iquec, quesho tantiashun Acobon aton madobo nuquin tsusedpabo chuiquin: Equipito yacno pete iquec, quesho tantiombique. Bedtan, cac Osen utsibo aton papan chiacpaden pete bedtanquin tauapampic.#7.12 Osen buchiado pete bedec nidaid chiaid istiadquio icquin Ene. 42.1-3 ista. 13Adashic padpidec nidacsho issun: Min utsi nebi, quequin Osen chuipampic. Adoshon Equipito yacnocquidon chuiquid tapa padaon yacno buanshun: Nëid isadaidbo cun utsibo nec, Ose quesho tantiash: Aidën matsesadoshenda nepec, quiampampic padaon.#7.13 Osen aton buchiado: Ose nebi, quiaidbëta aton matses padaon ismiaid iste bunquin Ene. 45.1-16 ista. 14Padaon ismeshumbic Osen aton utsibo chuiquin: Nuquin pabëta nuquin matses bedtan, capampic. Aden bedtanac Equipito yacno chouapampic. Aidotedi 75ted icpampic.#7.14 Isadaidbo Equipito yacno nidanniaid iste bunquin Ene. 45.9bëta 47.12 ista. 15Adashic Equipito yacno iuec tabadec tsësiobudash Acobo uënëspampic. Auëshquiobidi nuquin tsusedpabo Acobon madotedi adecbidi uënësbudneuapampic.#7.15 Acobo uënësaidbëd aton mado uënësaid chiaid istiadquio icquin Ene. 49.33 ista. 16Acobo uënësacsho issun aton madon Siquen caid yacno buanshun ëndenquimbo matses utsi Amod caid piucquid menequin tsusedpa Abadauanën tied bedampidën chococapampic, quepanëdash Esteban.

17Aden chuishumbic Estebanën nadopanëdash: Equipito yacnouësh tsusedpabo nidabi icnuc Nuquin Papan: Nëid nidaid menenun nanu, quequin Abadauan chuipampid uëshë chote anoentsëc yannuc nuquin tsusedpabo dadpenquioshë caidpampic. 18Adec caidnubien Equipito yacnocquidon chuiquid tapa padaon utsi yanshun Osen nabannëdaid tantienquio icpampic.#7.18 Buan. 1.7-9 tantiaquin nëid dada uapanëdash. 19Aidëmbi mua uaquin chuiquin natiamequin nuquin tsusedpabon dada bacuë tishacsho: Bedenquiocquin cuessunneta, quequin chuipampic.#7.19 Buan. 1.10-11bëta Buan. 1.22 tantiaquin nëid dada uapanëdash. 20Adnubien Moises tishacsho isac Nuquin Papan icmiacpadec bëdapactsëc isadpampic. Aidi icucquin uëshë 3ted nidmetanquin Equipito yacnocquido ismenquio icquin aton mado Moises anin ompopampic. 21Aden ompotiapimbo yanquin tsitsanën nandoshon acten tsicunniaid Equipito yacnocquidon chuiquid tapa padaonën champi nesec budquin tsitsanën Moises nuadtsëcsho istuidshun bedash: Cun mado caimbi, quepampic chuiquid tapan champi.#7.20-21 Moises ompoaid iste bunquin Buan. 2.1-10 isbanta. 22Bedac canidoequi aidën shubu nuntan tabadec Equipito yacnocquid matsesën naid mëquiadequi aton onquete Moises anquiadpampic. Adshun ambocquidon naidtedi naquin aidën chiaidtedi Moisesën tantiabenquiopampic.

23Adec ambo tabadequi aton seta 40ted yannuc aton matses isadaidbo icnuc: Isadaidbo istannu, quianec aido chonoadacno nidquin Moisesën istuidpampic. 24Istuidshumbic Equipito yacnocquid isadaidbo chonoadsho isquid abentsëcshun isadaidbo dada abentsëc mëyanquiosho issun: Equipito yacnocquid cuidnu, quequin Moisesën cuessunnepampic.#7.23-24 Aden Moisesën aton matses istanquin nampid iste bunquin Buan. 2.11-12 ista. 25Adshumbic: Umbi adosho issun: Nuquin Papan Equipito yacnoshon nuqui buanquid Moises icmendac, quequin cun matsesën tantiatsiash, quequin ambibi tantiec nidsho aton matsesën tantienquio icpampic. 26Badiadash aton matses yacno isec padpidec niduaquimbi aton matses daëd cuesnansho istuidshun: Ënmenu, quequin tantiaquin: ¿Atotsi quec min matses daëdi cuesnanec ne? capampic Moisesën. 27Adoac Moises tsicunnetanec: Umbi nasho cuidte chuiquid ¿tsuntsin mibi icmioshe? Chui. Tantianu, quetanequi: 28¿Uëshë utsin Equipito yacnocquid mimbi cuessunnebocpaden ubitsen cuessunnenuecta ne? quepampic cuesnanquid Moises caic.#7.26-28 Buan. 2.13-14 tantiaquin nëidtedi dada uapanëdash. 29Aden chuisho tantiashien: Equipito yacnocquidon chuiquid tapan tantiash, quianec dacuëdec Equipito yacnouësh Moises cuempampic. Adec cuenec nidaid utsi Madian caid yacno nidash tabadpampic. Ambo tabadquin Moisesën chido bedshun bacuë daëd tishmepampic, quepanëdash Esteban.#7.29 Buan. 2.15bëta Buan. 18.3-4 tantiaquin nëid dada uapanëdash.

30Adashic abi onquec: Adec seta dadpen 40tedbidi matanmec nidaid Madian caidën tabadec cute nibëdec masiuidpambo yacno macuësh tapa Sinai caid anoentsëqui Moises chopampic. Ambo choquimbi cutempi nëdënquesho isquimbi aid nënantanquio Nuquin Papabëd icquid isadcuensho Moisesën ispampic.#7.30 Buan. 3.1-2 tantiaquin nëid dada uapanëdash. 31Aid istanequien: Tantiadempamboctequid niacbieque. Isbono, quianec anoentsëqui Moises choquin Nuquin Icbo nadec onquesho tantiapampic: 32Min tsusedpa Abadauan yec Isac yec Acobo yec quequidon Papa campid nebi, quesho tantiash dacuëdec uëdëquec Moises istiapimbo icpampic. 33Nidtuidsho Moises chiec Nuquin Icbo nadpampic: Nëmbo ubi icsaisambo icnuc caputemaid nidaid iqueque. Min tapucudte chicshun ubi tantiata.#7.33 Buan. 3.5 tantiaquin nëid dada uapanëdash. 34Min matses cun matses isadaidbo Equipito yacnocquidon mëyanquiac uëshquec shubiquiosho tantiashun aido iuabouidtsëqui icsho iuapenquio icmenuen: Aido Equipito yacnoshon buanta, mibi canuec chobi. Nëbi Equipito yacno mibi nidmeuaimbi, quepampic Nuquin Icbo Moises chiec.#7.30-34 Buan. 3.1-10 tantiaquin nëidtedi dada uapanëdash.

35Aden cutempi nëdënquequid nënantanuësh isadcuembued Nuquin Papabëd icquidën: Isadaidbo bëyucanquin buanquid nec, quequin tantienquio icquin aton matsesën: ¿Umbi nasho cuidte chuiquid tsuntsin mibi icmioshe? Chui. Tantianu, abi caondaidobi bëyucanquin buanquid Moises Nuquin Papan icmepampic.#7.35 Buan. 2.14 tantiaquin nëid dada uapanëdash. 36Aden chuiquin Nuquin Papan nidmiac Equipito yacnoshon aton matses bëyucanquin buannun Moisesën nadatiambocquin nabanquin ismepampic. Adoshombic isadaidbo buanquin acte dapa Acte Piu caid yacnoshontsen nadatiambocquin nabanquin ismeuapampic. Adoshombic shubu nibëdacno masi dapa yacno seta dadpen 40ted matanmec abi tabadcuenniacnoshontsen nadatiambocquin nabanquin isadaidbo Moisesën ismeuapampic.#7.36 Moisesën aden nampid iste bunquin Buan. 7.3bëta 14.21 issun I.T. 14.32-33 isbanta. 37Aidëmbi naden isadaidbo chuipampic: Iuecquio icshun ubipadquid min madon baban tsiuecquido caidaido abentsëc Nuquin Papan oncamiaidquio iquendac, quequin Moisesën chuipampic.#7.37 M.I.Ch. 18.15 tantiaquin nëid dada uapanëdash. Aden Esusën nate Nuquin Papan aden Moises chuimepampic. 38Isadaidbo bëyucanquin buanquid Moises shubu nibëdacno isadaidbobëd macuësh tapa Sinai caid yacno nidash tabadpampic. Ashunquio Nuquin Papan namiac abëd icquidën: Naden nata, quequin dada uaid Moises menepampic. Aden nuquitsen tantiamenuen aden menepampic.#7.38 Buan. 19.1—20.17 tsicuëscaid tantiaquin nëid dada uapanëdash. 39Adoac aid dada uaid bedshun chuibansho tantiatiapimbo yanec nuquin tsusedpabo Moisesbëd icte bunenquio yec Equipito yacnobidi niduate bumpampic.#7.39 Aden naid chiaid iste bunquin I.T. 14.3-4bëta Nem. 9.17 ista. 40Adashic Moises macuësh yacno iuecquio tabadnubi Moisesën buchi Adon cuëmëdquid aton matsesën naden chuibededpampic: Moises nuqui Equipito yacnoshon bëyucanquin bëbued ¿mitsimbo nidash nibëdquio iquec nepec? ¿Atotsi quec nidpash? Nuquitedi papa canun nacnenta. Nacnenac nuqui namequid aid iquendac,#7.40 Buan. 32.1-23 tantiaquin nëid dada uapanëdash. 41tsusedpabon cac bacan bacuëbimbuecnuc Adonën nacnempampic. Aden ambi nacnenaid ismenuen nëish iua cuessunnetanec aid tantiec isadaidbo pebededec tabadpampic. 42Adquid tantiec pebededshumbic uispatsen papa casho tantiash isadaidbobëd ictiapimbo yec Nuquin Papa: Padi. Aden nainda, quenquio icpampic. Aden isadaidbon naid chuiquin Nuquin Papan ambi oncamiaido nuquin tsusedpa naden dada uamepampic:

Isadaidbo, shubu nibëdacno

seta dadpen 40ted matanmec capucuennequin

¿ubi tantiaquinda nëish iua

cuessunneshun pichicadennedio?#7.42 Amos 5.25-27 issun nëid dada uapanëdash. Adembidi Ede. 8.2bëta Ede. 19.13 isbanshun M.I.Ch. 4.19bëta M.I.Ch. 17.2-5 ista.

43Adquid icnubi aidpadquid nacnenshun Modoc cuënshun aton shubumpi uatanquin nauedtanquin mimbi chiadtoannioc.

Aidbëtabi uispa dapatsen tantiaquin aidbimbuecnuc nacnenshun Depan cuënash dannëshën sebudec shuebudshun: Mibi tantiaquid nebi, quequin aid mimbi chuidennepoc. Adembidi utsi utsien mimbibi tantiaidquio nacnenaidtedi chiec: Mibi tantiaquid nebi, mibi quedednepanëdac.

Aden nasho issun: Cun matses nec, queshun umbi: Menenu, caid nidaid yacnoshon mibitedi cuenmequin nidaid utsi Babidonia caid udimbo mibitedi nidmendambi, quequin Nuquin Papan chuipampic, quepanëdash Esteban.#7.42-43 Amos 5.25-27 tantiaquin nëid dada uapanëdash.

44Aden chuishumbic: Cute nibëdec shubu nibëdacno masiuidpambo yacno nidannequin nuquin tsusedpabon Nuquin Papa tabadte shubumpi chicshun buandednepampic. Aid shubumpi Nuquin Papan Moises ismiacpadembi nuquin tsusedpabon Nuquin Papa tabadte shubumpi uashumpampic.#7.44 Buan. 25.9bëta 25.40 tantiaquin nëid dada uapanëdash. 45Adashic nuquin tsusedpabo aid shubumpi uaquidotedi uënësan ambi tishmiaidontsen aid shububidi adombuembidi chicshun buanuapampic. Adoshombic: Isadaidpembo utsi utsien cuenmenu, quequin aidon nidaid yacno aid shubumpi chicaid buanec bëyucanquid Osuebëtan nuquin tsusedpabon aid nidaid nënantanquio shubumpi shubu uapampic. Aden aid shubumpi shubu uadenniambic iuectanec isadaidbon chuiquid tapa nuquin tsusedpa Dabid yampampic.#7.45 Osuen aton matses isadaidbo Nuquin Papan chiacno nidaid buanaid iste bunquin Osue 3.14-17 isbanta. 46Aidi Nuquin Papan bëdambuen isaidquio icquin aid nidaidën tabadquin Nuquin Papa tabadte shubumpi chicshun Acobon tsiuecquidon buanacpaden buantiapimbocquidën Nuquin Papa shubu dapa uamete bumpampic.#7.46 Dabidën Nuquin Papa tabadte shubu dapa shubu uashunte bunaid iste bunquin Sam.2. 7.1-16 isbanta. 47Aid shubu uabi Dabid uënësambic aton mado Sadomon cuëmëdquidën Nuquin Papa tabadte shubu dapa shubu uapampic.#7.47 Aden Sadomonën Nuquin Papa tabadte shubu dapa uashunaid iste bunquin Ch.D.1. 6.1-38 isbanta. 48Aden matsesën shubu uaidën Nuquin Papa tabadenquio iquec. Aden tantiaquin Nuquin Papan oncamiaidën naden chuipampic:#7.48 Adembidi Sadomonën chuipampic. Aden chiampid iste bunquin Ch.D.1. 8.27 ista.

49Abu abichobi cun tsadte dapa icnuc

nidaid abichobi umbi tincatequid nendac.

Adquid icnuc ¿midambo ubi tiboquete shubumpi uatiapimbo iquendac? quec Nuquin Icbo.

50Umbimbo abubëta nidaid uashun aidën icquidtedi uaondambi,

quequin Nuquin Papan Chiaid dada uapampic, quequin chiashic Esteban abi onquec:#7.49-50 Isa. 66.1-2 tantiaquin nëid dada uapanëdash. 51Pabiate shëcuë nibëdacbimbuen Nuquin Papan Chiaid tantiashumbi mimbi icsambuen naid ënesa mibitedi nec. Aton Mayan Bëdan: Tantiamenu, caqui tsusedpabotedishun tantienquio icpampicpadembi mibitedishun tantienquio icuaic.#7.51 Tsusedpabon tantienquio yaid iste bunquin Buan. 32.9bëta 33.3-5 isbanta. 52¿Nuquin Papan oncamiaido nuquin tsusedpabon mëyanenquioda icpampic? Adembidi: Nuquin Papan Chomiaid icsaisambo choendac, quequin chuibanquido tsusedpabon cuessun secapampic. Aidon nampicpadembidi Nuquin Papan Chomiaidquio icshobi mibitedishun chieshënquin uënës uamepondac. 53Nuquin Papan: Naden nata, quequin chiaid abëd icquido ambi budmiaidën tantiamiaqui Nuquin Papan Chiaid niac niacquido mibitedi nec, quepanëdash Esteban isadaidbo chiec.

Esteban cuënoten seshunniaid

54Adec Esteban onquesho tantiash isadaidbon chuiquido shëta chëquëdëshquequiec nëishquioshon chieshënquin chushcapanëdash. 55Adoaquien Nuquin Papan aton Mayan Bëda meniaidquio icquin Estebanën abuc isquin Nuquin Papa uëshëmbo yec matsesën istiapimbo bëchamauanquiec chënquenubi Nuquin Papan dayun abiucquio Esus nidtosho ispanëdash. 56Aden isequi: Abu shëcuë uain shëcniaye. Is. Ambo Esus Matsesën Tishaid Nuquin Papabëd tancandaëdquiec abiucquio nidtosho isembi, quepanëdash Esteban.

57Adsho tantiash chuiquidotedi cumapenec sidquianec pamumëdanec titinquequin Esteban bedshun 58cuënoten sesenuen shubu nibëdacno uanno buampanëdash. Aden Esteban mua uaquin chuishumbuedon aton dashcute cania Saudo cuëmëdquidën taëno sampanëdash Esteban sesenuen. 59Aden dashcute sanshun cuënoten sesiac Estebanën Esus cuënquin naden chuipanëdash: Ubi iued, Icbo, quetanec 60dannëshën sebudash cumapenec cuëdec: Ubi sesequin icsambuen naid tantienquio yec bëshunta, Icbo, quepanëdash. Aden chianec Esteban uënëspanëdash.

Currently Selected:

Hechos 7: mcfNT

Highlight

Copy

Compare