Hechos 22

1Tantia. Cun utsibobëta papatedi icsho, mibi chuinu. Icsambuen nambo iccombi, quequin mibitedi chiembique. Isadaidbon chuiquidobëtan isadaidbo utsibon ubi onquesho tantiata.

2Adec aton onquete ebedeo caidën Pabado onquesho tantiash isadaidbo otacquio tantiec tabadsho Pabadon naden chuiuapanëdash:

3Isadaidbobidi nebi. Nidaid cuëshë utsi Sidisia caidën icquid shubu dadpen icquid Tadso yacnoshon tishaid nebi. Aden ashunquio tishaqui Edusaden yacno choash canipondabi. Adec nëmbo Edusaden yacnouësh canidosho nuqui tantiamequidquio Camadiedën nuquin tsusedpabon: Naden nata, quequin chiaid tantiamequin dada uamepondashi. Adoac Nuquin Papan: Naden nata, quequin chiaid tantiaquin adombuembidi nadenniombi mibitedishun nëbi nacpadombuembidi. 4Aden nabanquid icquimbi ënden Esus tantiaquido cuessun secate bunquin dadabobëta chidobo bedmeshun mëyanmequin quënën tsadunmepondambi. 5Umbi aden tsadunmebanondaid nëish iua cuessunneshun pichicaquidon chuiquid tapabëtan nuquin chuiquid utsi tsësiobon isondashun tantiec. Shubu dadpen icquid Damasco yacno nidshun Esus tantiaquid bedmeshun Edusaden yacno cuidmenuen bëmenu, quesho tantiashun Edusaden yacnocquidon chuiquidon: Ai, adotan, quequin dada uaid meniac bedondambi Damasco yacnocquid isadaidbon chuiquido ismenuen.

6Aden bedash aid buanec podquiedën nidec uëshë cuembo yannuc shubu dadpen icquid Damasco caid anoentsëqui yanshobi abucuësh bëchamauanquiec chënquequin dëcatequin dachëncapondashi. 7Adoac nidaidën uebudpondabi. Adec uebudshun nadec onquesho tantiapondambi: Saudo, Saudo ¿atotsi queshun ubi mëyane? capondashi.

8Adoaquimbi: ¿Tsutsi ne? capondac.

Adoaquien: Nasaded yacno iccondaid mimbi mëyanaid Esus nebi, capondashi.

9Adnubi ubëd nidquidon bëchamauanquiec chënquesho isquimbi ubi chiec onquesho tantienquio yec tabadpondash.

10Aden dachëncac umbentsëqui tantiec uequin: ¿Atotsimbi nape Icbo? capondac.

Adoaquien: Nidtoash shubu dadpen icquid Damasco yacno nidec nid. Amboshon umbi: Nata, quequin chuibued dada utsin mibi chiendac, capondashi Esusën. 11Adoaquini bëchamauanquiec chënquequidën bëshu uac isenquiocsho issun ubëd nidquidon nidtomeshun mëdinanquin shubu dadpen icquid Damasco yacno buampondash.

12Ambobi dada Ananias cuëmëdquid icpanëdash. Aidi: Nuquin Papan: Naden nata, quequin Moises chuiquin dada uamiampid tantiaquin naquidquio icsho ambocquido isadaidbon bëdambuen isaidquio icpanëdash. 13Aidëmbi ubi isec choshon: Cun utsi Saudo, padpiden isbenua, cac isenquiocbuedëmbi badedquio isbenuaquimbi Ananias ispondambi.

14Adsho isash Ananias: Nuquin tsusedpabon Papa campid Nuquin Papan ambi tantiacpaden: Naden nata, quequin chuiquin mibi tantiamendac. Adembidi ambi Chomiaid Esus Nuquin Papan: Naden nac bëdambo ictsiash, quequin naquidquio mibi ismendac. Aidën chuisho mimbi tantiendac. 15Aden aid isquin tantiashun matses utsi utsien dadpenquio mimbi isbuedbëta mimbi tantiabued mimbi chuibennendac, 16quequin chuishumbic: ¿Atotsi cainec tsadec ne? Esus tantiabenquin mimbi icsambuen naid chuita. Ma mimbi icsambuen naid tantienquio yec Nuquin Papa bëshunnu. Aden chuitanquin: Nëbi Esus tantiaquid nebi, quequin utsibo ismequin acten mentometa, capondashi Ananiasën.

17Aidën chiacpaden namianec Edusaden yacnobidi niduash Nuquin Papa tabadte shubu dapa yacno nidec daquënë uaidën puduedash Nuquin Papa chiec tsadquin ushquin isacbimbuen ispondambi. 18Aden isac Nuquin Icbo Esus ubi chiec nadpondash: Mimbi ubi chuibansho tantienquio yec nëmbocquido mibi cuessunnete buneque. Edusaden yacnouësh badedquio cuenta, quequin Nuquin Icbon chuipondashi.

19Adoaquimbi: Icbo, aidon isnubi Nuquin Papan Chiaid chuibante shubun shubunquiec puduedcuennequin mibi tantiaquid dadpen bedmeshun quënën tsadumbanquimbi utsi utsien cumapenen mëyanondambi. 20Adembidi mimbi namiac chuibanquid icsho Esteban utsibon cuënoten sesenubi sesequidon dashcute chicshun sanaid dayunuaic tsadquimbi: Aden uënës ua, capondambi.

21Adshobini Nuquin Icbon: Nidec nid. Isadaidpembo yacno ënapen mibi nidmembique. Nidta, capondashi, quepanëdash Pabado ambi nabanaid iccuededquido chiec.

Pabado cacuestsenaid

22Aden Pabadon ambi nabanaid chuibansho tantiec iccuededquido otacquio tabadbuedi: Isadaidpembo, quec Pabado onquesho tantiash: Tantiatiapibi. Aid dada padpiden istiapimbo iquebique. Cuessunneta, quec cumapenec cuëdcuededpanëdash.

23Adec cuëdcuededquimbi aton dashcute bëntsecquid dachiquidshun sequecatanquin nidaid putu musuctanquin abuc secapanëdash: Pabadon chuibued tantiatemaid nec, quequin ismequin. 24Adsho issumbien: Cuessunnenushe. Sondado ushte shubu nuntan buanta, quequin sondadon chuiquidën chiac Pabado nuntan sondadon buanacsho issun: ¿Atotsi nasho isash isadaidbo nëid cuessunnete buneque? Ma ambi icsambuen naid chuinu. Cumapenen cueshcanten cacuesta, quequin sondadon chuiquidën chuipanëdash. 25Adoac cueste nitsinacno buanshun cuestebëta abi tanesho cacuestsennubi Pabadon: ¿Doma yacnoquido icshobi umbi naid chuimiabida ubi cacuese? quepanëdash Pabado sondadon chuiquid utsi capitan chiec.

26Adsho tantiatanec sondadon chuiquid capitan aton chuiquid tapa comandante yacno nidshun chiec: ¿Atotsi mimbi naic? Ma mimbi bëbued nëid dada: Doma yacnoquido nebi, quepaboc, quepanëdash.

27Adoaquien Pabado yacno choshon comandanten: ¿Doma yacnoquido nebi, quecta icco? capanëdash.

Adoaquien: Ai. Aidi nebi, quepanëdash Pabado.

28Adoaquien: Doma yacnoquidopenquio icquin: ¿Ada adquid ubi icmetsia? quequin dadpen piucquid meniondambi, quepanëdash comandante Pabado chiec.

Adoaquien: Cun tan Doma yacnocquidon nidaidënshun tishaid yec Doma yacnoquido nebi, capanëdash Pabadon.

29Aden Pabadon chuisho tantiash ambi icsambuen naid chuimenuen cacuestsembuedo nidannepanëdash. Aden chuisho tantiash: Doma yacnoquido icshobi Pabado shocosh bucun mëtanemechitombi, quequin tantiec comandante dacuëdpanëdash.

Isadaidbon chuiquido iccuededacno Pabado buanaid

30Adshumbic badiadshun ambi shocosh bucu mëtanemebued chicmeshun nëish iua cuessunneshun pichicaquidon chuiquidobëd isadaidbon chuiquid tapabo iccuededacno Pabado buanmepanëdash. ¿Atotsi nasho isash isadaidbo nëid cuessunnete buneque? Tantianu, quequin comandanten Pabado buanmeshun isadaidbo dadpen iccuededacno puduedmeshun nënantanquio Pabado nidtomepanëdash.

Currently Selected:

Hechos 22: mcfNT

Highlight

Copy

Compare