Hechos 12

Santiaco cuessuniaidbëta Petedo quënën tsadunaid chiaid

1Adnubien Edusaden yacno tabadquid Doma yacnocquidon chuiquid tapa icmiaid Edodes Aquidipa cuëmëdquid icpanëdash. Aidëmbi Esus tantiec iccuededquido utsi utsien cumapenen mëyanmequin bedmeshun quënën tsadunmepanëdash. 2Aden quënën tsadunmeshun Santiaco chështen seshunnemepanëdash. Aidi Esusbëd iccondaid Uanën utsimbo nepanëdash. 3Santiaco cuessunniac caosh, quesho tantiash isadaidbo utsibo: Edodesën bëdambuen nash, quecuededpanëdash. Adec onquiaid tantiashun Edodesën: Esusën: Ubi chuibenneta, caid utsi Petedo bedmeshun quënën tsadunmepanëdash. Aid uëshë isadaidbon pan bidiscamiabi yaid tantiate uëshë icnuc nepanëdash. 4Aden quënën tsadunmeshun: Petedo cuennushe, Ista, quequin sondado 4ted 4tedquien 16ted icnuc tabëcquin chuishun Petedobëta auc abentsëc mëtaniaid icnuc mëdante utsiuc sondado abentsëc icpanëdash. Adnubi utsi daëdshun shëcuë ëctabëdquin isec tabadpanëdash. Adenuidi isec sondado tabadnubi isadaidbon obeca bacuë cuessunneshun pichicate tantiate uëshë naimëdan isadaidbo tantiamequin: Ambi nabanaid Petedo chuimembi, quequin Edodesën caimpanëdash.#12.3-4 Pan bidiscamiabicquid tantiate uëshë chiaid iste bunquin Buan. 12.12-20 isbanta. 5Adnubien Esus tantiaquido iccuededquin Petedo quënën tsadunmiaid tantiaquin Nuquin Papambo tantiaquin chuibededec tabadpanëdash.

Nuquin Papabëd icquidën Petedo puduenmiaid

6Adshumbic: Badiadshun isadaidbon isnubi Petedo chuimembi, quequin Edodesën tantianubi aid inchëshëmbi Petedobëta sondado daëd shocosh bucun aucbidaëdi mëtaniacchobi ushec uenubi sondado utsi daëd shëcuë cuëman tabadpanëdash. 7Adnubien Nuquin Papabëd icquid isadcuenec Petedon dayun chonoc quënë nuntan cumapenec chënquepanëdash. Adec choshon Petedo cuës cuëscaquin: Baded nidto, cac nidtonobi shocosh bucun mëtaniaid badedquio seccuduquec mëchiquidpanëdash. 8Adtanquimbien Nuquin Papabëd icquidën: Min dashcute dasiuidtanec min tapucudte tapucud, cac Petedo dasiuidtanec tapucudpanëdash.

Adashic: Min dashcute bëntsecquid dasiuidtanquin ubi tsiban, quianec nidsho issun 9ushquin isacbimbuen: Aidquio nec, quequin tantienquiocquimbi Petedon tsibanampanëdash. 10Aden sondado abëta mëtaniaidën tantienquio icnubi tsibananec nidquin shëcuë isquid daëdshumbidi tantienquio icnubi aidotsen datanuash: Umanuc puduennu, quenubi shocosh shëcuë bëtashte dapa abembi shëcniadpanëdash. Adsho isash puduenash podqui edën nidequi Nuquin Papabëd icquid abëd icbuedi isadenquio yanquin niampanëdash. 11Abëd icbuedi isadenquio yannubien Petedo tantiactanec: Edodesbëd isadaidbo ubi cuessunnemete bunsho issun Nuquin Papan ubi puduenmenuen abëd icquid chomiosh. Abimbo iccosh, quequin tantiec Petedo nidpanëdash. 12Adec nidequi Uan cashumbic Madcos caidën titan shubu yacno Petedo chopanëdash. Aidën tita Madia nepanëdash. Ambobi Esus tantiaquid dadpen iccuededquin Nuquin Papa chiec tabadpanëdash. 13Adnubien Petedo choshon shëcuë bëtashaid tosh toshcasho tantiatanec: ¿Tsuntsin naique? Isnu, quianec chido iua Dode cuëmëdquid chopanëdash. 14Adec choshon Petedombo cuëdsho tantiash bëdamboshë iquec cuishonquequimbi shëcuë shëcnenquio yec aucbidi titinqueshun: Petedo shëcuë cuëman choaccosh, quequin iccuededquido chuituidpanëdash.

15Adoaquien: Abimbo caic, cainquiocquin: Tantiadenashien nec. ¿Aidquio ispashida neba? capanëdash iccuededquidon.

Adoaquien: Ma aidquiobi nepaboc, caquien: Petedo dayun uaquid Nuquin Papabëd icquid isashien nechitec, quepanëdash tantiashunenquio yec.

16Adnubi abi Petedon tosh toshcasho tantiashun shëcnequin istanec tantiadempambo yec tabadtanec: Ai, aidi nec, quecuededpanëdash.

17Adshobien mëdante uic uiccaquin Petedon: Onquenquio yec tabadquin tantiata. Nuquin Icbon nabued mibi chuibannu, queshun abi quënën tsadunacnoshon Nuquin Papan abëd icquid chomequin puduenmiaid Petedon chuibampanëdash. Aden chuitanec: Umbi chuibambued Esusën utsi Santiacobëta Esus tantiaquid utsibo chuitanta, quianec puduenanec shubu utsi yacno Petedo nidpanëdash.#12.17 Nëbi chiaid Santiaco Esusën utsimbo nepanëdash. Padnubi Santiaco utsi Edodesën cuessunemiaid Esusbëd icquid Uanën utsi nepanëdash.

18Adashic badiadnuc quënën tsadunte nuntan Petedobëd icbued sondadotedi: ¿Mitsimbo nuquibëta mëtanebued icpec? Ma nibëdquio icpayoc, quec tantiadempambo yec dacuëdcuededpanëdash.

Adashic: Petedo nibëdec, quequin sondadon chiac 19Edodesën: Nibëntan, cac nidshun sondadon istuidambocsho issun quënë nuntanshun ambi: Ista, cabuedotedi chuimeshumbic aidotedi Edodesën cuessun secamepanëdash.

Adashic Edodes nidaid Udea caid yacnouësh puduanec shubu dadpen icquid Sesadea caid yacno quenenec nidpanëdash.

Edodes Aquidipa uënësaid

20Adec nidash ambo tabadnubi Sesadea caid anoentsëc shubu dadpen icquid Tido caid yacnocquidobëta shubu dadpen icquid utsi Sidon caid yacnocquido Edodesën nëishëmpanëdash. Adash chushcananquido icbuedi padenquio yanec tabadpanëdash. Adec tabadquin: Sesadea yacno Edodes choash tabadosh, quesho tantiash Edodes nashunquid Bedasto cuëmëdquidbëd onquenuec chochopanëdash. Ambo chochoshon: Umbi pete nibëdsho issun Edodesën namiaidon menioshi. Nëbi aid chushcainquio iquembi, quequin chochoquidon chuituidpanëdash. Aden chiac adombuembidi Bedaston Edodes chuiuapanëdash. 21Adoaquien Edodesën: Umbi chiaid uëshën ma chouanu, quiosh Edodes, quequin chuita, cac chochoquido Bedaston chuipanëdash. Aden chiac Edodes onquesho tantianuec ambi chiaid uëshën matses dadpen chochonobi Edodes dashcute nacnacquiocquid dasiuidash chuiquid tapan tsadten abuc tsadtoash onquiampanëdash. 22Aid onquesho tantiash: Nidaidënshun tishaid onquiac padpenquio onquec. Abuc tabadquid nuqui papa caidien Edodes nechitec, quec iccuededquido cumapenec cuëdcuededpanëdash. 23Aden chuisho tantiash: Mimbi Nuquin Papa caidpenquio nebique. Aid abia yampid abentsëcquiobi neque. Aidquio tantiata, quequin chuitiadquidëmbi chienquio icsho tantiashun Nuquin Papan abëd icquid budmiaidën badedquio chichan dadpen dapuduedmiaidën piac Edodes badedi uënëspanëdash.

24Adnubien Esus chuibennequidon nidaid utsi utsiec yacno nidanneshun Nuquin Papan Chiaid chuiban chuibanac Esus tantiaquid utsi utsiec dadpen yampanëdash.

25Adnubic Antioquia yacnocquid Esus tantiaquidon aton piucquid ambi menenuen sanaid Bednabebëta Saudo meniac buanec Edusaden yacno choshon ambocquid Esus tantiaquido menebanash auëshquio puduanec Antioquia yacnobidi chouapanëdash. Aidobëdi Uan cashumbic Madcos caid chopanëdash.

Currently Selected:

Hechos 12: mcfNT

Highlight

Copy

Compare