Uan 3 1
1
Mibi tantiembi, quequin chiaid
1Ubia Esus tantiaquido chuibanquid nebi. Adquid icquin umbi tantiaidquio icsho Cayo cuëmëdquid chuiquin dada uaic nebi.
Cayo bëdambocquid nec, quequin chiaid
2Tantia. Cun utsi, umbi tantiaidquio icsho mibi chuinu. Esuquidistu tantiec bëdambuec tabadquid nec, quequin mibi tantiembi. Adshun mibi tantiaquin naden Nuquin Papa chiembi. Mibi bunacpadec tabadec daicsainquio yec bëdambuec tabadmeta, quequin chiannembi. 3Mibëd icquidon nëmbo choshon naden chioshi: Esuquidistun chiacpadombuen nabanec tabadquid Cayo nec, quequin chuibanoshi. Aden chuisho tantiabosh bëdambo iquec cuishonquec tsadebi. 4Umbi Esusquio chuibanondaido yec cun bacuëbobimbuecquido nec. Adquido yec umbi chiondacpadquiec Esus tantiec bëdambuec tabadec, quiash cuishonquequiec bëdambo iquebi.
5Mimbi bëdambuen naid chuisho tantiombi, cun utsi. Esuquidistu tantiaquid utsibo uannocquido chochosho issun iuedshun Cayon nashunosh, quequin chioshi. 6Iuedshun mimbi bëdambuen nashunaidon mimbi naid Esus tantiaquido iccuededacnoshon chuibanosh. Cayon bëdambuen nashunoshi, quequin chuibanosh. Adembidi nabanquin mimbi iuedaido: Shubu dadpen icquid utsi yacno nidnu, quesho nashunquin meneta. Nuquin Papa: Aden mimbi bëdambuen naic, camenuen aido bëdambuen nashunta. 7Adoac Esus tantiesabo yacno Esus chuibannuec bedanec nidnuen: Ubi nashun, quequin Esus tantiesabo chienquio iccondambi, queposh. 8Adquid icshobi: Ma aidon Nuquin Papan Chiaid abimbo chuibannu, quequin piucquid menequin nuquitedi nashunnuna.
Diotedepesën icsambuen naidbëta Demetedion bëdambuen naid chiaid
9Mibëd iccuededquido chuiquin dada uaondambi. Aden umbi dada uaid isash: Umbentsëqui namembi, quec Diotedepes chieshëmëmpondash. Aidi ubëd icquidon: Naden nata, quequin chiaid tantiate bunesa nec. 10Mibi yacno nidshun ubitedi icsambuen chuishunquin muaquin chuibennequid icsho chomeshun Diotedepes chiendambi. Aidi Esuquidistu tantiaquid utsibo iuedesa nec. Utsi: Aido iuednu, quesho tantiash: Padi. Iuedenda, quec iuedmianesa Diotedepes nec. Adembidi: Iuednu, quequido icsho Esus tantiaquid utsi cuenmequin cuëshëdmequid aidi nec.
11Tantia. Cun utsi Cayo umbi tantiaidquio icsho mibi chuinu. Icsambuen naquidën nacpaden naic icsainda. Bëdambuen naquid Nuquin Papa tantiaquid neque. Bëdambuen nata. Icsambuen naquid: Nuquin Papa iquec, quequin tantiesa nec. 12Demetedio caidien bëdambuen nabanquid nec, quequin utsibon abimbo chiec. Aidi Nuquin Papan chiacpadombuen nabanec tabadquidquio nec, quequin muainquiocquin utsibon bëdambuen chuinubi adembidi ubëd icquidobëtan Demetedio chiaid tantiash: Muequi nec, quenquio mibi iquec.
Ënquin chiaid
13Dadpen chuitiadquiocquimbi dada uaquin chienquio iquembi. 14Nëbi mibi yacno nidshun mibi bëisquioquimbi dadpen chuibanendambi.
15Ma Nuquin Papambi mibi bëdambuec tabadmepanu, quequin tantiaquin chiannembi. Nëmbocquidon naden chioshi. Mibi tantiec tabadebi, Cayo, quequin dada uata, caoshi. Cayo, mibëd icquido adembidi tantiembique. Chuita.
Aidted chuiquin dada uaombi.
Currently Selected:
Uan 3 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.