Timoteo 2 2

Natiamiaqui chieshtoenquio icquin chuibanta, quiaid

1Chieshtoenquio icquin Esus chuibanta, mado. Esuquidistunuidtsëqui Nuquin Papa ubi bëdambuen ismec. Aidën bëdambo icmiac dayacquiocquin naimbi, queshun Esus chuibanta. 2Matses dadpenshun tantianuc umbi chuibansho mimbi tantiondac. Umbi aden chiondaid utsibotsen chuiban. Adshun mimbi chuibanaido abentse abentsen: Aidon chieshtoenquio icquin Esus bëdambuen tantiamequin chuibantsiash, queshun: Mimbitsen chuiban, cata, mado.

3Sondado dayacquiocquidën chieshenquio icquin nacbimbuen chieshtoenquio icquin bëdambuen nabannuna. Matsesën natiamequin chieshënaqui Esuquidistun chiacpadombuen chieshtoenquio icquin nabannuna. 4Sondadon: Mibi bëdambo iquec, camenuen aton chuiquid tapan chiacpadombuenuidi naquid. Ambibi tantiaid nainquiocquinc utsibon chiacpadombuen nainquiocquinc caquin aton chuiquid tapan chiacpadombuenuidi naquidquio sondado nec. 5Ma nuquin matses titinquequidquio. ¿Mitsipadquio icpec? Aton uidën tanec aton matsesën chiaction abia titinquec chosho: Uidënquio titinquiosh, queshun mauete menequid. Ambi chiaction titinquiabi icsho mauete menenquio icquid. 6Ma nuquin matses tied uaquidquio. ¿Mitsipadquio icpec? Dayacquio yec chonoadquidënquio aton tied uashun ambi nitsinaid caniash sinacsho ambia pequin tauaquid. 7Aden umbi chuibuedtedi tantiata. Adsho aidtedi Nuquin Icbon mibi bëdambuen tantiamendac.

Esuquidistu tantiata, quiaid

8Esuquidistu tantiata. Aidi matsesash isadaidbo tsusedpa Dabidën tsiuecquid nepanëdash. Aidi uënës uacsho Nuquin Papan uincuenmepanëdash, quequin Chiaid Bëda Esusën naid umbi chuibambuedquio abi iqueque. Aidquio tantiaquiota. 9Aden Chiaid Bëda Esusën naid chuibennequidquio icsho chieshënquin bedshun cuessunnianquid uidën uacbimbuen shocosh bucu nacnenaidën mëtaniac mëyadebi. ¿Ubi aden uidënuaquin mëtaniacpadenda Nuquin Papan Chiaid uidën uapadic? Padenquio. 10Aden chuibannubi Nuquin Papan ambi tantiamiaidtedi Esuquidistu tantiamendac. Aid tantiaquido uënësacsho cuidenquio icquin abëdi tabadmendac, quequin tantiec quënën tsadunondaid yequi chieshtoenquio iquebi.

11Naden abimbo chiaidquio tantiash chieshtoenquio iquebi:

Nuquin Icbon chiacpadombuen naquid

chieshëmënquidën uënës uacsho Nuquin Icbon abi yacno abëdi tabadmendac.

12Aden chieshënquin natiamiaqui chieshtoenquio icquin abi tantiec uënësacsho Esusën ambi namiacno tabadmendac.

Esus tantiaquidpenquio nebi, quequid icsho: Adembidi Umbi tantiacmaido nec, quequin Esusën Nuquin Papa chiendac.

13Matses icquin Nuquin Papan chiacpadombuen natiapimbo nuqui icnubi Esusien aidën chiacpadombuen naquidquio nec. Adquid icquin ambibi chiaid niaquesambo nec,

quequin chuipampic.#2.13 Aden Nuquin Papan ambi chiacpadombuen naquidquio nec, quequin Moisesën chuipampic. Ambi dada uampid iste bunquin I.T. 23.19 ista.

Nuquin Papan Chiaid isban isbanta, quequin Timoteo chiaid

14Umbi dada uaquin chuibued mibëd icquido naden chuibanta, mado. Nuquin Icbon isnubi Esusquio chienquio yec ambembi chiaid chiec mibi chushcananeque. Adenda. Adec chushcanansho tantiashun matsesën icsambuen tantieque. Padi, cata, mado. 15Mimbi bëdambuen naoc, Nuquin Papa camenuen bëdambuen nata dacuëdenquio icquin. Umbi naid ma Nuquin Papan isnu, queshun adota. Ambi chiaid bëdambuen isban isbanshun chieshtoenquio icquin Nuquin Papan Chiaidquio chuibanta, mado. 16Ambembi chiaid chiec onquequidobëd icsambuec onquec tabadenda. Adec onquequido icsambuen nabuedi buëdanquiec Nuquin Papan Chiaid niac niaquec icsambuenshë naquid yaneque. 17Nënaid icsa bedash daicsabudacbimbuec adquidën chiaid tantiaquido dadpen yaneque. Adquidën chuisho tantienda. Aden chuiquid Imeneyobëd Pideto caid nec. 18Aidon Nuquin Papan Chiaidquio chienquio icquin muaquin chiec: Uënësabi icquin Esus tantiaquido yequi uincuenaidquio nuqui nec, quequin muaquin chuisho tantiashun utsin utsinquien Nuquin Icbon Chiaidquio tantienquio yanendac. 19Padnuen shubu uanun buintad nitsinacbimbuecquid Nuquin Papan Chiaidquio nec. Aidi Esus tantiaquido uidënquio icmete nec. Ambi dada uamequin chiampid nad iquec: Abi tantiaquido Nuquin Icbon tantiec. Adquid icnuc abi tantiaquidon: Cun Icbo nec, queshun ambi icsambuen naid ënendac, quequin chuipampic.#2.19 I.T. 16.5bëta 16.26 tantiaquin aid chiacbimbuen nëid dada uapanëdash.

20Dadpen dayun uaquidën shubun shocosh bëdambocquid nacnenaid icnubi utsi icsactsëcquid iquec. Bëdambo icquidën codocaic. Icsactsëcquid icsa secanun sandote nec.#2.20 Adacbimbuec cuëdënte shubun iccuededquido iquec. Utsi utsiec Nuquin Icbo Esus tantiaquidquio icnubi utsi utsiec ambi icsambuen naid ëntiapimbo iquequi: Esus tantianu, quecuidtsëqui iquec, quequin tantiaquin aden chuipanëdash. 21Adquid icnuc Esus tantiaquidquio icte bunebique. Nëbi muaquin chuisho tantiatiapimbo icquin Nuquin Icbon chiacpadombuen naimbi, quiash Nuquin Icbon iuambo yantsiash shocosh bëdambocquid yacbimbuec. Adsho Nuquin Icbon bëdambuen nametsiash.

22Caniabon abi bunacpadombuen icsambuen naquid tanenda, mado. Adenquio yec bëdambuec tabadte bunquiota. Adec tabadquin matses ambi icsambuen naid ënmenuen abimbo chuita. Chieshtoenquio icquin Esus tantiata. Utsibobëd tantiananec bëdambuec tabadta. Nuquin Icbo Esus bëdambocquid nec, quequin tantiaquidobëtan Esus tantiata. 23Mibi yacnoshon ambembi chuiquidon chianesho tantiash matses chushcananondashe. Adquidën chuisho tantienda. 24Nuquin Papan Chiaid chuibanquid utsibëd chushcananenquio icquid nendac. Chieshëmënenquio icquin aton matses bëdambuen isquid nendac. Adembidi nëishenquio icquin Nuquin Papan Chiaidquio bëdambuen tantiamequidquio nendac. Badedi chieshtoenquiocquid nendac. 25Esus tantiesabon: Mimbi Nuquin Papan Chiaid chuisho tantiatiapimbo iquebi, caqui adembi chieshtoenquio icquin Nuquin Papan Chiaidquio mimbi chuibanendac. Nuquin Papan Ambi Chiaidquio tantiamiac: Icsambuen naombi, quequin ma Esus tantiesan tantiabennu, quequin abi chuibanendac. 26Aden Nuquin Papan Ambi Chiaidquio tantiamiac Esus tantienquio icbuedëmbi Esus tantiabenshun abi iuaquid Mayan Icsa Satanasën icsambuen namiacpadombuen nabuedëmbi ënendac.

Currently Selected:

Timoteo 2 2: mcfNT

Highlight

Copy

Compare