Timoteo 1 6

Matses iuaido chiaid

1Matses iuabo Esus tantiaquido icsho naden chuita. Mibi iuaquid Esus tantiesa icsho bëdambuen isquin aidën chiacpadombuen bëdambuen nashunta. Pabadon chuibanaid icsambo iquec. Ambi Nuquin Papa caidtsen icsambo iquec, quequin icsambuen chuinushe. Mibi iuaquidën chiacpadombuen nata, quequin iuabo chuita. 2Iua utsitsen chuiquin: Mibi iuaquid Esus tantiaquidbidi icsho: Ubipadquid icnuc aidën chiacpadombuen natiapimbo iquebi, cainda. Ubipadquid umbi tantiaid cun buchi caid neque. Aidën chiacpadombuen nanu, quequin mibi iuaquid tantiaquin bëdambuen nashunta, quequin iuabo chuita.

Piucquid bunquin utsibon ambembi chiaid

3Nuquin Icbo Esuquidistun Chiaidquio chienquio yec tantienquiocquid nec, quequimbi ambembi tantiaquin chuibanquid icsambo iquec. 4Aden icsambuen tantiaquidën bëdambuen chuibantiapimbo iquec. Umbi chiaiduidtsëqui bëdambo iquec, quequin abimbo chiaid tantiesambo nec. Utsibëd chushcanante bunquid nec. Utsi nëishmequid nec. Adquidbëd chushcananec muauannanec icsambuec chuishunnansho isash: Abimbo chuiquid nec, quetiapimbo iquendac. 5Pabiate shëcuë nibëdacbimbuen Nuquin Papan Chiaidquio bëdambuen tantienquio yec chushcananendac. Nuquin Papan Chiaid chuibanquidën piucquid dadpen bedte danec chuibanquidbidi ictiadquio iquendac. 6Nuquien Nuquin Papa tantiec bëdambuec tabadquido yec nuquina daëdpactsëc icnubi bëdambo iquendac. Dadpen bedacbimbuec nuqui bëdambo iquendac. 7Tishac chucactsëc icnuc nuquina nibëdpanëdash. Adecbidi uënësquin nuquina buantiapimbo nuqui iquendac. 8Nuquin petebëd dashcute icnuc dadpen bunenquio icac bëdambo ictsiash. 9Padnuen piucquid dadpen bedshun dayun uate bunquin badedi chieshtoquin Esus tantienquio yantsiash. Adshun Mayan Icsa Satanasën tantiamiacpaden abi bunaiduidquio bednuen mëmunenquio icquin icsambuen nabantsiash. Aden Nuquin Papan Chiaid niacniacquin icsambuen naic quenenash adenuidi naic uënësash mëyadtequid yacno nidendac. 10Adec piucquid natiambo bunquidon aid bednuen baded badedquien icsambuen nadednendac. Adquido: Esus tantiembi, quebuedobi padenquio yanash natiec tabadendac.

Bëdambuec tabad, quiaid

11Mibi Nuquin Papa tantiaquidquio neque. Cuenacbimbuen icsambuen nateuidi bunenquio yec bëdambuec tabadte bunquiota, mado. Mëyadtequid icnubi Nuquin Papan Chiaid niaquenquio yec chieshtoenquio icquin Esus tantiata. Matsestsen tantiec chieshëmënenquio yec bëdambuec tabadta. 12Utsibon chieshënaqui chieshtoenquio icquin Esus tantiaquiec bëdambo icta. Uënësash Nuquin Papabëd ënëdenquio yec tabadnuec adta. Nuquin Papan: Cun Mado Esus tantiaquiec uënësacsho ubëdi tabadmendambi, queshun Nuquin Papan tantiamiac mimbi Esus tantiabempondac. Adshumbic: Nuquin Papan Mado Esus tantiaquiembi, quequin matses dadpen mimbi tantiamepondac. 13Tiboquequidtedi uaquidënquio Nuquin Papan nuqui iseque. Adembidi: Adquid nebi, quequin chuiquid tapa Ponsio Pidato chiec dacuëdenquio icnëdaidën Nuquin Icbo Esuquidistuntsen nuqui iseque. Aid tantiaquin chieshtoenquio icquin Aidën naidquio chuibanta. 14Nuquin Icbo Esuquidistu choabi icnuc umbi chuibued niaquenquio yec bëdambuec tabadta. Esus tantiaquido icsambo iquec, utsibo quetiapimbo icnuc adta. 15Nuquin Papan tantiacpadënquio Esuquidistu nidaidën padpidec chouaindac. Abi chomequid icsaisambo yec bëdamboshë icquid nec. Aid abentsëcquiobi abitedishun Icbombo nec. Aidëmbi chuiquid utsibo abitedi namendac. Aidquio chuiquid utsin dëniactiapimbo iquendac. 16Aid abentsëqui uënëstiapimbo icquid nec. Bëchamauanquiec isadsho: Isnu, quequimbi anuenadtiapimbo iquec. Aidi matsesën istiapimbo icquid nec. Adquid icsho: Mibiuidtsëqui abitedishun Icbombo yec nadatiambocquid mibi bëdamboshëcquid nec, Papa, amen, quequin Nuquin Papa chiannenuna ënenquio icquin.#6.15-16 Nuquin Papa bëchamauanquiec icquid yec matsesën istemaid chiaid istiadquio icquin nëidtedi isbanta. Nëidic M.I.Ch. 10.17. Nëidic Cuëd. 104.2. Nëidic Buan. 33.20.

Atona dadpen dayun uaquid chiaid

17Atona dadpen dayun uaquido naden chuita, mado. Cuna dadpenquioshë icnuc ubiuidtsëqui bëdambo iquebi, quenda. Nibëdantiapimbo icquid danquin mimbi dayun uaiduidtsëqui tantienda. Nuquin Papambo tantiaquiota. Aidëmbi matses bëdambo icmenuen atona dadpen bedmec, quequin chuita. 18Aidbidi chuiquin: Bëdambuec tabadquin utsibo nashumbanquiota. Adembidi cudasenquio icquin mitsana utsibo menianneta. 19Aden naic tabadsho: Mimbi bëdambuen naoque. Ubëdi tabadmequin mibi bëdambo icmendambi, Nuquin Papa camenuen adota. Adash uënësacsho Nuquin Papan abëdi mibi tabadmendac padpidec uënëstiapimbo icnuc, quequin atona dadpen dayun uaquid chuita.

Ënquimbi chiaid

20Umbi chuibuedtedi tantiaquin bëdambuen chuibanta, mado. Utsi Nuquin Papan Chiaid chienquio yec ambembi chiaid chiec onquesho tantienda. Utsibic: Ubien bëdambuen tantiaquidquio nec, quebuedobi muasho tantienda. 21Aden icsambuen chuisho tantiashun: Abimbo caic, quequin utsin utsinquien Esus tantienquio yanondashe. Aidon chiaid tantienda. Chieshtoenquio icquin Esusquio chuibanta. Nuquin Icbon mibi bëdambuen isquin mibëd icquidotsen ma bëdambuen ispanuna. Adembidi matses tantiananquid icmeta, quequin mibitedi tantiaquin Nuquin Papa chiannembi. Amen. Aidted chuiquin dada uaombi.

Currently Selected:

Timoteo 1 6: mcfNT

Highlight

Copy

Compare