Timoteo 1 4

Utsibon muaquin chiaid

1Tantia, mado. Nuquin Papan Mayanën tantiamiaid mibi chuinu. Esus chote uëshë nëbi yannuc abi tantiaquidon utsin utsinquien Esus tantienquio yanendac. Mayan Icsa Satanasën iuabo podobitsi icsabon muaquin tantiamiaid icquin matsesën chuisho tantiashun Esus tantienquio yanendac, quequin abimbo tantiamioshi. 2Aden podobitsi icsabon tantiamiac muaquidon: Abimbo caimbi, quequin bëdambocquid danmianquien muaquin chiendac. Aidon: Naden nac bëdambo ictsiash. Naden nac icsambo ictsiash, quequin bëdambuen tantienquio icquimbi icsambuen chuibansho matsesën tantiashunendac. 3Naden chiendac: Dadan chido bedenda. Chidon dada bedmenda. Padenquio yec tabadta, quequin chiendac. Adembidi: Aid petemaid neque. Penda, quequin pete abentse abentsen chiendac aid pete bëdambo icnubi. Nuquin Papan: Umbi chiaidquio bëdambuen tantiashun ubi tantiaquidon: Mimbi pete uaid bëdambo iquec, quequin ma penu, quequin Nuquin Papan pete uapampic.#4.3 Ene. 9.3 tantiaquin Pabadon dada uapanëdash. 4-5Aidën pete uaidtedi bëdamboshë iquec. Umbi pete uaid bëdambo iqueque. Ma penu, queshun Nuquin Papan pete icmiaid neque. Mimbi pete uaid bëdambo iquec, quequin Nuquin Papa chuishun aid pete isuidenquio icquin penuna.

Esus chuibanquid icquin bëdambuen nata, quiaid

6Umbi chuiboedtedi Esus tantiaquido chuibanquin mimbi bëdambuen naindac, mado. Madompi icsho pete pemiacbimbuen min matsesën Nuquin Papan Chiaidquio mibi chuibampanëdash. Aidën chiaid tantiaquidquio yanquin umbi chiacpadombuen mimbi chuibanendac. 7Cun tsusedpabon ambembi chiampidbëta nëbi matsesën adembidi ambembi chiaid tantienda. Nuquin Papan Chiaidquio niaquenquio yec bëdambuec tabadte bunquiota. 8Aton dada uidënquio icmenuec titinquetannequid matses nec. Adacbimbuec Esus tantiaquido uidënquio yec bëdambo icnuec ¿mitsipadquio icpec? Nuquin Papa tantiaquiec Ambi Chiaid niaquenquio yec bëdambuec tabadquid nec. Adquid uënësash Nuquin Papa yacno abuc nidash bëdamboshë icquid iquendac. 9Umbi aden chuisho tantiashun: Abimbuen caic, quequin Esus tantiaquido icquin tantiata. 10Adec: Abi yacno abëdi tabadendabi, quequin tantiec ënëdenquio yec chonoadquin Nuquin Papan Chiaidquio chieshtoenquio icquin chuibannuna. Esus tantiaquid uënësacsho cuidenquio icquin Nuquin Papa uënëstiapimbo icquidën abëdi nuqui tabadmendac, quiash chieshtoenquio yec bëdambuec tabadnuna.

11Umbi chuibambuedtedi tantiaquin: Nuquin Papan chiacpadombuen nanuna, quequin tantiamequin chuibanta, mado. 12Mibi cania neque. Bëdambuec tabadta, mado. Ënden caniaidon: Caniampi icquin Nuquin Papan Chiaid mimbi tantienquio iquec, canushe. Bëdambuec tabadta. Esus tantiaquido utsibotsen ma ubi yacpadec bëdambuec tabadnu, quiash adta. Bëdambuec onquequinc matses tantiaquinc Esus tantiaquinc Nuquin Papan Chiaid niaquenquio icquinc caic bëdambuec tabadta.

13Mibi yacno nidec ubi puduedabi icnuc Esus tantiaquido iccuededacnoshon Nuquin Papan Chiaidquio isbanquin adenuidi chuibanta. Nuquin Papan chiacpadec chieshtoenquio yec bëdambuec tabadnuna, quequin Nuquin Papan Chiaidquio isbanquin matses bëdambuen tantiamequin chuibanta. 14Ënden mibi mamishquin chiondaid ¿tantienquioda ique? Ënden Esus tantiaquidon chuiquid tapabon mibi mamishbededshobien Nuquin Papan Mayan Bëdan tantiamiac aidon mimbi chuibante naden chuipanëdash: Nuquin Papan Chiaid bëdambuen chuibanquid Timoteo iquendac, quequin chuipanëdash. Adoaid yec chieshtoenquio icquin chuibanquid icta, mado.

15Umbi dada uaquin chuibuedtedi isbanshun ënenquio icquin umbi chiacpadombuen bëdambuen nabanta, mado. Naden tantiaquin nata: Umbi chuibansho issun ma umbi chuibanaidon: Nuquin Papan Chiaidquio chuibanquid nec, mabi canu, queshun bëdambuen chuibanta, mado. 16Nuquin Papan Chiaid niacmane, quec mibibi datantiadec: ¿Adabi bëdambuec tabadpeba? ¿Adambi Nuquin Papan Chiaidquio muainquio icquin chuibampoba? quec mibibi tantiadta, mado. Bëdambuec tabadquin Nuquin Papan Chiaidquio ënenquio icquin chuibanta. Aden Nuquin Papan chiacpadombuen chuibanash Aidbëd mibi tabadendac. Mimbi chuibansho bëdambuen tantiaquidotedi adecbidi Esusbëd tabaduaindac.

Currently Selected:

Timoteo 1 4: mcfNT

Highlight

Copy

Compare