Timoteo 1 2

Nuquin Papa chiannete chiaid

1Tantia. Utsibotedi chuinu. Matses abitedimbo tantiaquin Nuquin Papa chianneta. Matses abitedi min Mado Esusbëta mibi bëdambuen tantiamequin bëdambuen ista. Matses nashunquidquio yec mibi bëdamboshë iquec, quequin Nuquin Papa ënenquio icquin chianneta. 2Adembidi Nuquin Papa chuiquin: Chuiquid Tapambobëta chuiquid tapa utsibotedi bëdambuen tantiame. Adoac aidon bëdambuen namiac cuessun secananenquio yec matses abitedi bëdambuec tabadtsiash, Papa, quequin Nuquin Papa chianneta. 3Aden Abi chiannesho tantiash: Ubi bunacpadombuen chiec, quendac Nuquin Papa nuqui cuidenquio icquin abëd tabadmequid. 4Matses abitedimbo cuidenquio icquin bëdambuen isquin abëd tabadmete bunquid yec: Umbi Chiaid abimbo tantiashun Cun Mado abided cuidadec uënësaid ma tantiapanu, quendac Nuquin Papa.#Onas 4.11; Uan 3.17; Pet.2. 3.9. 5Aden Nuquin Papan Chiaidquio tantiashun nuqui naden tantiec. Nuquin Papa matses uaquid abentsëcquiobi iquec. Matsessun Nuquin Papa matses bëdambuen ismequid aton Mado Esuquidistu abentsëcquiobi iquec. 6Aidi abi tantiaquid cuidmenquio icnuec abided cuidadec uënëspanëdash. Aden Nuquin Papan ambi tantiacpadënquio Esus chomepanëdash. Matses abitedi cuidenquio icquin bëdambuen iste bunquin Abëd tabadmequid Nuquin Papa nec, matses camenuen Esus uënësmepanëdash. 7Aden Esus chuibanmenuen Nuquin Papan Ambi Chiaid chuibanquidquio icmepondashi. Adembidi Esusën: Isadaidpembo tantiamequin ubi chuibenneta, caondaidbidi nebi. Adoaid icquin: Ma Esus tantianu, queshun Nuquin Papan Chiaidquio muainquio icquin abimbo chuibennec nebi.

Esus tantiec cuëdënacnoshon dadabëtan chidon nate chiaid

8Tantia. Dadatedi chuinu. Iccuededec cuëdënacno puduedshun Nuquin Papa chuinuec bëdambuequien tabadtiad. Nëish bëdanash chushcananenquio icquimbien podo cadoquin Nuquin Papa chuitiad. 9Chidobotsen chuinu. Esus tantiaquid iquec Esus tantiaquido iccuededec cuëdënacno nidnuec: Mabi bëdapactsëcquio iquec, quequin isnu, quequin tantienquio yec bëdambuec nacnemëdta. Bëdambuen tantiaquid dasiuidacpadec dasiuidta. Chido chishpidabimbuec dasiuidenda. Mabi bëdapactsëcquio iquec, quequin isnu, quenquio yec Esusquio tantianuec Esus tantiaquido iccuededec cuëdënacno puduedta. 10Mabi bëdapactsëcquio iquec, quequin isnu, quequin tantienquio yec: Nuquin Papa tantiaquidquio nebi, quec utsibo nashumbanec bëdambuec tabadta.

11Esus tantiaquido iccuededacnacnoshon dadan Nuquin Papan Chiaid chuibansho tantiaquid chidon. Aidën chiacpadombuen natiapimbo iquebi, quequin tantienquio yec bëdambuen tantiec otacquio tabadquid chido. 12Esus tantiaquido cuëdënacno puduedshun dada chuibanesa chidon. Adembidi dada chuiquin: Umbi chiacpadombuen nata, caisa chidon. Otacquien tabadquid chido, caimbi. 13Dada Adan caidba Nuquin Papan uapampic. Adshumbic chido Eba caidtsen. 14Aden dadabëta chido uacsho issumbien Mayan Icsa Satanasën: Icsambuen namequin tannu, queshun mua uac icsambuen naquin chidomba Nuquin Papan Chiaid niacpampic. Adan padabi icpampic. Aden tantiaquin: Dadan chido chuibanquid nec, caimbi. 15Adec abia icsacsho issun Nuquin Papan cuidac paëmbo icnuc bacuë tishquid chido abitedi yampampic. Esus tantiaquid yanash ambi tishaido bëdambuen namequid iquendac. Esusën chiacpadombuen naic matses tantiaquid yanendac. Mabi bëdambocquid nec, canu, quenquio yec Nuquin Papan chiacpadec bëdambuec tabadquid icsho Nuquin Papan abi yacno puduedmendac.

Currently Selected:

Timoteo 1 2: mcfNT

Highlight

Copy

Compare