Tesadonica 1 5

1Tantia, cun utsibo. Mibitedi chuinu. Nëidtedec ushash Esus padpidec choec, quequin chuitiapimbo iquebi. Adembidi: Nëidted seta matanmiash choec, quequin dada uatiapimbo iquebi. Tantienquio iquembi. 2Nëid inchëshëmbi ampequid choec, quequin tantiatiapimbo yacbimbuec: Aid uëshën Nuquin Icbo choec, quequin tantiatiapimbo icnuc Esus chouaindac, quequin umbi chiondaid mibitedishun tantiec. 3Esus tantienquio yequi matses dadpen: Cuesnanenquio yec nuqui bëdambuec tabadec, queshobien: Nëbi ubi cuidec choec, ambi cacmaidënquio padpidec choshon cuidquiendac. ¿Mitsipadquio chido bacuë usunquid icpec? Aid uëshënquio tishembi, quequin tantiatiapimbo icnubi badedquio nëncuenec. Adacbimbuec ambi: Nëbi choec, cacmaidquio Esus badedquio chosho abi tantiesabon cuenëntiapimbo iquendac. 4¿Esus chonoda mibi dacuëdpe? ¿Esus tantiesaboda mibi nedi? Esus tantiaquidoen mibitedi nec. Adquido yec: Nëbien Esus chochitec, quec bëdambuec tabadnubi ampe choacbimbuec Esus chonoc mibitedi dacuëdenquio iquendac.

5¿Pamumëdacbimbuecquidoda mibitedi nedi? Padenquio. Paposhquiacbimbuecnuc Esusën bëdambuen tantiamiaido yec bëdambuec tabadquido ma nuqui neyoc. Adoaido yec bëdambuec tabadnuna. 6Ushquin tantienquio yacbimbuen utsibon Nuquin Icbo Esus tantiatiapimbo iquec. Adec tabadenquio icnuna. Esus tantienquio yanmane, queshun nuqui icsate bunaid nainquio icnuna. Nuquin Icbo Esus chosho iste bunquin cainec bëdambuec tabadnuna. 7Esus tantiesabuen inchëshën ushquin tantienquio yacbimbuec tabadquido nec. Adquiecbidi inchëshën tabadquin tantiadennuen acte paë uaid acquido nec. 8Padnuen nuquitedi Esus tantiec bëdambuec tabadquido nec. Adquid icquin nuqui icsambuen nate bunaid nainquio icnuna. Sondado: Shocosh tsasimbo icquid shictonquenu. Sicsenushe, quiacbimbuec icnuna. Mayan Icsa Satanasën Esus tantiamenquio icnushe. Esus tantiaquioquin matsestsen tantiaquionona. Adecbidi sondado: Masenushe. Shocosh tsasimbo icquid mauete mauenu, quiacbimbuecbidi icnuna. Mayan Icsa Satanasën icsambuen tantiamequin chieshtomenushe. Esus tantiasho cuidenquio icquin Nuquin Papan abi yacno ubi tabadmendac, quequin tantiec bëdambuec tabadnuna. 9¿Cuidnuenda Nuquin Papan nuquitedi Esus tantiamediac? Padenquio. Abëdi tabadmenuembien Nuquin Icbo Esuquidistu nuqui tantiamiac. 10Aidi nuquitedi cuidmenquio icnuec abided cuidadec uënëspanëdash. Aidëmbidi abi tantiaquidotedi beduanshun abëdi tabadmendac. Uënësaid uincuenmiaidobëta uënësabi icquidotedi adoendac. 11Umbi aden chuisho tantiashun mimbi nabocpadombuembidi Esus tantiec bëdambo icnuec utsibobëd umbi chuibued chuinanquiota. Adec bëdambuec tabadec: Adequi tabadnuna, cananta.

Bëdambuec tabadte chiaid

12Cun utsibo, Esus tantiamequin mibi chuibanquido bëdambuen ista. Aidi chieshtoenquio icquin mibi bëdambuec tabadte chuibanquid neque. Bëdambuen ista. 13Aido Nuquin Papan Chiaid bëdambuen tantiamequidombo nec, quequin tantiaquioquin bëdambuen ista. Adec chieshëmënenquio yec utsibobëdtsen bëdambuec tabadta. 14Cun utsibo, mibitedishun nabante chuinu. Chieshquid icsho: Mibitsen chonoadta, cata. Utsibo chieshtotiadquio icsho: Esus tantiec bëdambo icnuna, cata. Esus bëdiactsëc tantiactsëcsho bëdambuen chuiquin Esus tantiamequiota. Dada padishquio icquid icsho nashunta. Badedquio chieshtoenquiocquin abitedi bëdambuen ista. 15Utsin icsambuen chuishunquin chieshënac cuidnante bunsho: Padi. Esus tantiaquid adesa neque. Bëdambuec tabadnuna, cata. Mibëtan Esus tantiaquidobëd bëdambuec isnanquin utsibotsen bëdambuen ista.

16Aden Esus tantiec ënëdenquio yec cuishonqueta. 17Adembidi ënenquio icquin Nuquin Papa chianneta. 18Nadec tabadquin: Nuquin Papa bëdambo iquec, cata. Bëdambuec tabadquin nac bëdambo ictsiash. Daicsabudshumbi adembidi nac bëdambo ictsiash. Paëmbo icnubi adembidi. Mitsana icnuc adembidi. Mitsana nibëdnubi adembidi. Utsibon chieshënaqui adembidi: Mibi bëdamboshë iquec, Papa, cac bëdambo ictsiash. Aden Nuquin Papan: Ma Esus tantiaquidon adono, quequin tantiacpadembi mibitedishun chiannendac.

19Nuquin Papan Mayan Bëdan: Bëdambuen tantiamenu, cac pamumëdacbimbuec tabadenda. 20Aden Nuquin Papan Mayan Bëdan tantiamequin oncamiaid icquin chuisho: Muequi nec, quequin mamënshunenda. 21Adoenquio icquin: ¿Nuquin Papan Chiaidquiobida chuibaneque? Tantiabono, cata. Aden tantiashun Nuquin Papan Chiaidquio isbanta. Aden isbanshun abimbo chiaid icsho issun: Ai, Nuquin Papan Chiaidquiobi chiec niosh, quequin aidën chuisho bëdambuen tantiata. 22Adembidi Nuquin Papan Chiaidpenquio chiec, queshun aidën chuisho tantienda. Aidën chiacpadombuen nainda.

23Mibitedi tantiaquin Nuquin Papa naden chiannembi. Bëdambuec tabadmianquid icquin mimbi chiacpadombuen naic bëdambuec tabadquid icme. Adembidi aton tantiate yec aton mayan yec aton dada yec quenuc bëdambo icmequin bëdambuen dayun ua, Papa. Adoacsho Cun Icbo Esuquidistu choshon aido bëdambouidquio icsho istuidendac, quequin chiannembi. 24Nuquin Papambi: Cuna nec, queshun nuqui Esus tantiamequid yec muesambo icquin ambi chuinëdacpadombuen naindac.

IV. ËNQUIN CHIAID

(5.25-28)

25Cun utsibo, ubitedi tantiaquin Nuquin Papa chianneta. 26Ambocquido Esus tantiaquidotedi chuiquin: Pabado chedon nuqui tantiaquiec, quequin chuibanta. 27Nuquin Icbon tantiamiacpaden chuiquin dada uaombique. Umbi dada uabued isec onquequin ambocquido Esus tantiaquidotedi chuibanta. 28Nuquin Icbo Esuquidistun ma mibitedi bëdambuen ispanu, quequin tantiembi. Amen. Aidted chuiquin dada uaombi.

Currently Selected:

Tesadonica 1 5: mcfNT

Highlight

Copy

Compare