João 8
8
Jesus tỹ ũn tỹtá kórég fi mỹ vẽnh pãte fón
1Hã ra Jesus tóg pãnónh tỹ Oliveiras ra tĩ mũ, tá nũr jé. 2Kurã ke ra tóg Jerusalém ra tĩg mãn kỹ Topẽ ĩn tá nĩ mãn mũ sir, kỹ vẽnh kar ag tóg ti vĩ mẽnh kãmũ mũ. Tá nĩ kỹ tóg ag kanhrãn mũ. 3Kỹ Topẽ vĩ to ẽg kanhrãn tĩ ag vỹ ũn tỹtá fi pére kãmũ mũ. Fi ve ja ag tóg nĩ, fi tỹ fi mén tũ mré nỹn kỹ. Vẽnh kuju kã ag tóg fi fẽg mũ. 4Kỹ ag tóg Jesus mỹ: “Senhor, fi ve ẽg, fi tỹ fi mén tũ mré nỹ ti,” he mũ. 5“Moisés vỹ ẽg mỹ: “ãjag kã mĩ ũ fi tỹ fi mén tũ mré nỹn kỹ fi tén nĩ, pó tỹ fi pin kỹ,” he ja nĩ. Jo ã hỹn hẽ ri ke tĩ?“ he ag tóg. 6Ag tỹ ón kỹ ti vĩ mẽ sór vẽ, ag tỹ ti vĩ to ti se jé. Hã ra tóg pãnh ke kỹ nĩ kỹ ga kri rán mũ, ti nĩgé tỹ. Vĩ tũ tóg nĩ.
7Hã ra ag tóg ti tovãnh sór tũ nĩ. Kỹ tóg vãhã ag ki ẽvãnh kỹ ag mỹ: “ãjag kã mĩ ũ tỹ Topẽ vĩ mranh ja tũ nĩn kỹ ti jé fi pin vén,” he mũ. 8Kỹ tóg pãnh ke mãn kỹ ga kri rán mãn mũ.
9Kỹ ti vĩ tóg ag mỹ e tĩ. Ag kar tóg ag tỹ Topẽ vĩ mranh ja ẽn mĩ ẽkrég mũ sir, hã kỹ ag tóg mũ kãn mũ sir. Ũn sanh há ag vỹ mũ vén mũ, kar kỹ vẽnh kar ag tóg komẽr hã mũ kãn mũ. Vãhã Jesus vỹ ti pir mỹ nĩ, fi mré. Fi hã vỹ tá jẽ nĩ, ti mré. 10Kỹ tóg fi ki ẽvãnh kỹ fi mỹ: “ag hẽ ra kagáv? Ag mỹ ã vóg kónãn tũ?“ he mũ. Ag mũ kar kỹ tóg fi mỹ ke mũ.
11Kỹ fi tóg: “hỹ,” he mũ. Kỹ tóg fi mỹ: “kỹ inh hỹn ã vóg kónãn ke tũ nĩ gé,” he mũ. “Ha tĩg, jatun mỹ. Hã ra Topẽ vĩ mranh mãn sór tũg nĩ,” he tóg. Ũn tỹtá kórég ẽn fi vóg kónãn sór ja tũ ti nĩ, Jesus ti.
Jesus tỹ jẽngrẽ ri ke nĩ
12Kỹ Jesus tóg Topẽ ĩn krẽm nĩ kỹ vẽnh kar kanhrãn mãn mũ. “Jẽngrẽ ri ke inh nĩ,” he tóg. “Ãjag tỹ inh mré mũn kỹ ãjag tóg kuty mĩ mũ tũ nĩgtĩ. Jẽngrẽ mĩ ãjag tóg mũgtĩ, kurã mĩ. Ãjag tỹ vẽjykre tãg han ke to ken hã vẽ,” he tóg.
13Hã ra Fariseu ag tóg ti vĩ kafãn mũ, kỹ ag tóg: “vẽnh kãmén ã tóg mũ ha. Ẽg tỹ vẽnh kãmén kỹ ẽg tóg ón kỹ vĩ tĩ,” he mũ. 14Hã ra tóg ag mỹ: “hỹ, vẽnh kãmén inh tĩ, hã ra sóg ki hã tó tĩ,” he mũ. “Isỹ hẽ tá kãtĩ mũ ẽn ki kanhró inh nĩ, isỹ hẽn ra tĩg ke mũ ti ke gé. Hã ra ãjag tóg inh ki kagtĩg nỹtĩ. Ẽprã ke vỹ tỹ ãjag nỹtĩ. 15Kãnhmar ãjag tóg ũ to: “jykre kórég ti nĩ,” he tĩ. Ãjag jãvo sóg vẽnh kar jykre to nén ũ tó tũ nĩ ver. 16Isỹ hã ra ũ jykre to nén ũ tó sór kỹ sóg tó há han ke mũ vẽ. Inh pijé inh pir mỹ nén ũ to jykrén tĩ'. Ũ tỹ inh jẽnẽg mũ vỹ inh mré nén ũ kar to jykrén tĩ. 17Kỹ tóg ũn régre ag tỹ vẽnh vĩ pir han kỹ ãjag mỹ tỹ ki hã ke nĩ. Hã kỹ tóg rán kỹ nĩ, Topẽ vĩ tỹ rán kỹ nĩ ki. 18Hã kỹ sóg vẽnh kãmén mũ. Hã ra inh panh tóg inh jẽnẽ, kỹ ti hã tóg inh kãmén mũ gé. Régre ẽg nỹtĩ, he tóg.
19Kỹ ag tóg: “hỹn, ã panh ti?“ he mũ. Kỹ tóg: “ãjag pijé inh ki kanhró nỹtĩ',” he mũ. “Hã kỹ ãjag tóg inh panh ki kagtĩg nỹtĩ gé. Ãjag tỹ inh ki kanhró nỹtĩ ra ãjag tóg inh panh ki kanhró nỹtĩnh ke mũ gé vẽ vẽ,” he tóg.
20Ti tỹ ag mỹ vẽnh kãmén hã vẽ. Topẽ ĩn krẽm nĩ kỹ tóg ag mỹ vẽnh kãmén mũ, jãnkamy vin jafã rã hã nĩ kỹ. Kỹ pã'i ag tóg ti se sór mũ, hã ra ag tóg ti kãgmĩg tũ nĩ, ag tỹ ti kamẽg kỹ. Ti ter ke kurã vỹ jun ja tũ nĩ ver, hã kỹ ag tóg ti tỹ hẽ ri ke tũ nĩ ver.
Jesus tỹ hẽn ra tĩg ke
21Kỹ tóg ag mỹ: “tĩg jé sóg ke mũ, kỹ ãjag tóg inh ve sór ke mũ, hã ra ãjag tóg inh venh ke tũ nĩ,” he mũ. “Inh vég tũ ki ãjag tóg kãgter ke mũ, kỹ ãjag tỹ Topẽ vĩ mranh ja ẽn vỹ ãjag kã kã nĩnh mũ. Ãjag pijé isỹ hẽn ra tĩg ke mũ ẽn ki kanhró nỹtĩ'. Tá jun ke tũ ãjag nĩ gé,” he tóg. 22Kỹ ag tóg jagnẽ mỹ: “ti mỹ vẽsén sór tũ nĩ vỹ, hã kỹ tóg: “ãjag pijé isỹ hẽn ra tĩg ke mũ ẽn tá jun ke mũ',” he mũ?“ he ag tóg. 23Hã ra tóg: “ẽprã ke vỹ tỹ ãjag nỹtĩ. Ãjag jãvo sóg tỹ kanhkã tá ke nĩ. Ga tag ki ke vỹ tỹ ãjag nỹtĩ, jãvo inh pijé tỹ ga tag ki ke nĩ',” he mũ. 24“Hã kỹ sóg ãjag mỹ: kãgter jé ãjag tóg ke mũ, kỹ ãjag tỹ Topẽ vĩ mranh ja ẽn vỹ ãjag kã kã nĩnh mũ, he ja nĩ. Ha vé, ãjag tỹ inh ki ge sór tũ nĩn kỹ tóg ãjag kã kã nĩnh mũ, ãjag tỹ Topẽ vĩ mranh ja ẽn ti. Ũ ẽn vỹ tỹ inh nĩ, he ja inh nĩ ãjag mỹ. Kỹ: hỹ, hem nĩ,” he tóg, Jesus ti.
25Kỹ ag tóg ti mỹ: “tỹ ã ũ nĩ?“ he mũ. Kỹ tóg: “vãsỹ sóg ãjag mỹ tó huri, isỹ ãjag mré vẽmén vén kỹ,” he mũ. “Ãjag mỹ sóg vẽnh kãmén tĩgtĩ. 26Hã ra sóg ãjag mỹ tó kãn ja tũ nĩ ver. Sỹ ãjag mỹ vĩ kónãn ke vỹ kã nĩ gé ver. Hã ra sóg ũ tỹ inh jẽnẽg mũ ẽn vĩ hã tó tĩ, ti tỹ inh mỹ tó ja kar ẽn ti. Ki hã tóg tó tĩ, he tóg. 27Hã ra tóg ag tỹ to jykrén tũ tĩgtĩ, ti tỹ ag mỹ ti panh tó mũ ra.
28Kỹ tóg ag mỹ tó mãn mũ. “Ãjag tỹ ka to isa kỹ, ẽn kã ãjag tóg inh ki kanhrãn ke mũ,” he tóg. “Tỹ sóg ẽprã ke fi kósin nĩ. Kurã ẽn kã ãjag tóg inh ki kanhró nỹtĩnh ke mũ, isỹ tỹ ũ ẽn nĩ ti. Inh pijé vẽsóg ki nén ũ to jykrén tĩ'. Inh panh tỹ inh mỹ nén tó mũ ẽn hã tó sóg tĩ. 29Kỹ ũ tỹ inh jẽnẽg mũ vỹ inh mré nĩ nĩ. Ti mỹ nén há nĩ ẽn hã han sóg tĩ, hã kỹ tóg inh mré nĩ nĩ,” he tóg. 30Ag tỹ ti vĩ tag mẽ kỹ ũn e ag vỹ ti ki ge mũ, kurã ẽn kã.
Jesus tỹ ẽg tar han ke
31Kỹ Jesus tóg ũ tỹ ti ki ge kỹ nỹtĩ ag mỹ: “inh vĩ tovãnh tũg nĩ, kỹ ãjag tóg tỹ inh mré ke pẽ nỹtĩ,” he mũ. 32“Kỹ ãjag tóg Topẽ vĩ pẽ ki kanhró nỹtĩnh mũ. Topẽ vĩ pẽ ki kanhró tugrĩn ãjag tóg patrão kórég ve mãn ke tũ nĩ,” he tóg.
33Kỹ ag tóg ti mỹ: “Abraão krẽ'krẽ vỹ tỹ ẽg nỹtĩ,” he mũ. “Ẽg pijé tỹ ũ camarada nỹtĩ', ũri, vãsỹ ke gé. Ne to ke nẽ, hã vỹ: patrão kórég ve mãn ke tũ ãjag nĩ, he mũ tag ti?“ he ag tóg.
34Hã ra tóg: “ki hã sóg tó mũ,” he mũ. “Ãjag tỹ Topẽ vĩ mranh kỹ ãjag tóg tỹ ti vĩ mranh jafã nỹtĩ, kỹ tóg ẽg tỹ patrão kórég vég mũ ri ke nĩ. 35Ti camarada ag pijé ti ĩn krẽm ẽmã nỹtĩgtĩ'. Ti kósin hã vỹ ti ĩn krẽm nĩgtĩ jãvo. 36Kỹ Topẽ kósin tỹ ãjag tỹ Topẽ krẽ han kỹ ãjag tóg, patrão kórég ve mãn ke tũ nĩ ha. 37Abraão krẽ vỹ tỹ ãjag nỹtĩ. Ki kanhró inh nĩ. Hã ra ãjag tóg isén sór mũ, ãjag tỹ inh vĩ to há tũ nỹtĩn kỹ. 38Inh panh tỹ inh mỹ nén tó mũ ẽn hã tó sóg tĩ. Kỹ ãjag tóg ãjag panh tỹ ãjag mỹ nén tó mũ ẽn hã tó tĩ gé,” he tóg.
39Kỹ ag tóg ti mỹ: “hỹ, Abraão vỹ tỹ ẽg panh nĩ,” he mũ.
Kỹ Jesus tóg: “ãjag tỹ tỹ Abraão krẽ nỹtĩn kỹ ti jykre han nĩ ge,” he mũ. 40“Hã ra ãjag tóg isén sór mũ. Ãjag mỹ sóg Topẽ vĩ pẽ tó ja nĩ, Topẽ tỹ inh mỹ nén tó mũ ẽn ti, hã ra ãjag tóg isén sór mũ. Abraão vỹ tag han ja tũ nĩ. 41Vyrmỹ ãjag panh tũ hã han ãjag tóg tĩ,” he tóg.
Kỹ ag tóg: “panh ẽg nỹtĩ, hã vỹ: Topẽ, he mũ. Ẽg pijé panh tũ nỹtĩ',” he mũ.
42Hã ra Jesus tóg ag mỹ: “Topẽ tỹ tỹ ãjag panh nĩ ra ãjag tóg iso há nỹtĩnh mũ vẽ,” he mũ. “Inh panh tá sóg kãtére, hã kỹ sóg ãjag mré nĩ nĩ. Inh pijé vẽsóg ki to jykrén kỹ kãtére mũ'. Ti hã vỹ inh jẽnẽ. 43Hã ra ãjag tóg inh vĩ ki kagtĩg nỹtĩ. Mẽ sór tũ ãjag nỹtĩ, hã kỹ ãjag tóg ki kagtĩg nỹtĩ. 44Japo krẽ vỹ tỹ ãjag nỹtĩ, kỹ ãjag tóg ti tỹ nén tó mũ ẽn hã han tĩ. Topẽ tỹ ẽprã ke ag hynhan ẽn kã tóg ag kãgtén sór tĩgtĩ, Japo ti. Vãsỹ ti jykre vẽ, kỹ tóg ũri tỹ ti jykre nĩ gé ver. Ti pijé ki hã tó tĩ'. Ki hã tó to ti kórég pẽ nĩ, Japo ti. Vẽnh ó vỹ tỹ ti tũ pẽ nĩ. Ti hã vỹ tỹ ũn ón tĩ ag jóg kar nĩ. 45Ti jãvo sóg ki hã tó tĩ. Hã ra ãjag tóg inh vĩ kri fi sór tũ nĩgtĩ. 46Inh hỹn ne ki Topẽ vĩ mranh? Ha inh mỹ tó. Mranh ja tũ sóg nĩ. Hã ra sóg ãjag mỹ Topẽ vĩ pẽ tó tĩ. Ãjag hẽ ri ken kỹ inh vĩ kri fi sór tũ nĩ? 47Topẽ krẽ ag vỹ Topẽ vĩ mẽg tĩ. Jãvo ãjag tóg inh vĩ jẽmẽ sór tũ nĩ'. Hã kỹ ãjag pijé tỹ Topẽ krẽ nỹtĩ',” he tóg.
Jesus tỹ Abraão kãfór nĩ
48Kỹ Judeu ag tóg ti mỹ: “Samaria tá ke ag ri ke ã tógTopẽ vĩ ki kagtĩg nĩ, kỹ ã jagrẽ kórég nĩ gé,” he mũ.
49Hã ra tóg: “inh pijé jagrẽ kórég nĩ',” he mũ. “Inh panh to sóg: ũn mág vỹ tỹ ti nĩ, he tĩ. Hã ra ãjag tóg iso é he tĩ. 50Inh pijé vẽsỹ ũn mág han sór mũ'. Ũ tỹ isỹ ũn mág han ke mũ vỹ nĩ nĩ, ẽn vỹ vẽnh kar jykre tugnỹm ke mũ. 51Ki hã sóg tó mũ, ha mẽ. Ãjag tỹ inh vĩ kri fi kỹ ãjag kãgter ke tũ pẽ nĩ,” he tóg.
52Kỹ Judeu ag tóg ti mỹ: “jagrẽ kórég ã nĩ,” he mũ. “Vãhã tóg ve há tĩ, ã jagrẽ kórég ti. Abraão vỹ ter, kỹ Topẽ vĩ tó tĩ ag kar vỹ kãgter. Hã ra ã tóg ón kỹ: “ãjag tỹ inh vĩ kri fi kỹ ãjag kãgter ke tũ pẽ nĩ,” he mũ. 53Ã mỹ vẽsỹ ẽg jógjóg ve tỹ Abraão kãfór han sór mũ', ã tỹ ẽg mỹ: kãgter ke tũ ãjag nĩ, hen kỹ? Ter ja ti nĩ, Abraão ti, kỹ Topẽ vĩ tó tĩ ag kar vỹ kãgter kãn gé. Vẽsỹ ũn mág han ve ã tóg nĩ,” he ag tóg, Jesus mỹ.
54Kỹ tóg ag mỹ: “isỹ vẽsỹ ũn mág han kỹ sóg ón kỹ ke mũ vẽ,” he mũ. “Hã ra inh panh hã vỹ isỹ ũn mág han ke mũ, ãjag tỹ ũ to: ẽg jóg mág, he mũ ẽn ti. 55Hã ra ãjag tóg ti ki kagtĩg nỹtĩ, ãjag jãvo sóg ti ki kanhró nĩ. Isỹ ãjag mỹ: ti ki kagtĩg inh nĩ, hen kỹ sóg ãjag ón tag ri ke han mũ vẽ. Hã ra sóg ti ki kanhró nĩ, kỹ sóg ti vĩ ki króm tĩ gé. 56Ãjag jógjóg ve tỹ Abraão vỹ inh kurã ve sór ja nĩgtĩ, kỹ tóg kejẽn vé, kỹ tóg ti mỹ sér pẽ tĩ, ti tỹ inh kurã ven kỹ,” he tóg.
57Kỹ Judeu ag tóg ti mỹ: “50 (ke) anos han tũ ã nĩ ver,” he mũ. “Hã ra ã tóg: Abraão ve inh, he mũ. Vĩ vẽnh mỹ han ã tóg,” he ag tóg.
58Hã ra tóg: “ki hã sóg tó mũ, ha mẽ,” he mũ. “Abraão mur tũ ra sóg nĩ nĩ,” he tóg. 59Kỹ ag tóg jũgjũ mũ, ti tỹ vẽso: “Topẽ vỹ tỹ inh nĩ,” hen kỹ. Hã kỹ ag tóg pó mãn kỹ ti pin sór mũ. Hã ra Jesus tóg Topẽ ĩn kã tá kãkutẽ kỹ tĩ mũ sir, vẽnh péju jé.
Currently Selected:
João 8: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido