João 6
6
Jesus tỹ ũn e jẽn
(Mt 14.13-21; Mc 6.30-44; Lc 9.10-17)
1Tag pãte tóg kejẽn goj nig mág tỹ Galiléia fĩn rãm mũ. Goj ẽn jiji ũ hã vỹ: Tiberíades tỹ goj, he mũ. 2Kỹ ũ tỹ hẽn ri ke ag vỹ ti venh kãmũ mũ, ti nón, ũn e tãvĩ ag. Ti tỹ nén han vãnh hynhan mũ ẽn ve ja ag tóg nĩ, ti tỹ ũn kagyga ag tỹ há' he mũ ti. 3Hã ra tóg pãnónh tá ti mré mũ tĩ ag mré nĩ nĩ. 4Fénhta tỹ Páscoa ẽn vỹ kakó tĩ ha. 5Kỹ tóg ũn e ẽn ki ẽvãnh mũ. Kỹ tóg Filipe mỹ: “ẽg hỹn hẽ tá vẽjẽn venh ke mũ, ẽg tỹ ag mỹ ven jé?“ he mũ. 6Ti tỹ ti jykre ve sór vẽ. Jãvo tóg ti tỹ nén han ke mũ ki kanhró nĩ.
7Kỹ Filipe tóg: “ẽg tỹ ag mỹ nén ũ sĩ ven jé ẽg hỹn jãnkamy tỹ hẽn ri ke to kũpra henh ke mũ, ge ra tóg kãkyn kenh ke mũ, ha vem nĩ,” he mũ.
8Kỹ ag mré tĩ tỹ André he mũ ẽn, Simão jãvy ẽn tóg Jesus mỹ: 9“kyrũ ũ tóg cevada tỹ ẽmĩ tỹ 5 (ke) ma kãtĩg ja nĩ, kãkufár régre mré. Hã ra tóg tỹ nén ũ tũ pẽ nĩ. E tãvĩ ag nỹtĩ,” he mũ.
10Hã ra tóg: “ag mỹ: nĩgnĩ ra, hé,” he mũ. Kỹ ag tóg nĩgnĩ mũ. Tá tóg re gỹnh nĩ. Ũn tỹ 5 mil (ke) ag hỹn tá nỹtĩ, ẽg tỹ ag tãvĩ tón kỹ. Hã ra fag tóg tá nỹtĩ gé, gĩr tỹ hẽn ri ke ke gé. 11Ag nĩgnĩ kỹ tóg ẽmĩ ẽn mãg mũ, kỹ tóg Topẽ mỹ: “há ti nĩ,” he mũ. Kỹ tóg ag mỹ kãnhkrég mũ sir, kãkufár ẽn ke gé. Kỹ vẽnh kar vỹ ko mũ sir. 12Ag funfór nỹtĩn kỹ tóg ti mré mũ tĩ ag mỹ: “ag tỹ ko ja tũ ẽn génh mũjẽg, ti vãgfor tũ nĩ jé,” he mũ. 13Kỹ ag tóg kẽj tỹ 12 (ke) fãn mũ, ẽmĩ tỹ 5 (ke) ẽn ke tỹ.
14Kỹ tóg ag mỹ e tĩ, ag tỹ milagre tag ven kỹ. Kỹ ag tóg ti to: “Topẽ vĩ tó tĩ ẽn hã vẽ, ẽg tỹ ũn jãvãnh mũ ẽn,” he mũ. 15Kỹ ag tóg ti tỹ pã'i mág han sór mũ. Hã ra tóg ki kanhró nĩ. Hã kỹ tóg ti pir mỹ pãnónh ra vẽnh péjunh tĩ mũ.
Jesus tỹ goj nig mág kri tĩg
(Mt 14.22-33; Mc 6.45-52)
16Kutyg rã ra ti mré mũ tĩ ag tóg goj nig mág ra mũ mũ. 17Kejẽn tóg kuty pẽ nỹ, hã ra tóg ver ag to vỹn ke ja tũ nĩ. Kỹ ag tóg canoa kã mĩ goj fĩn rãm kỹ Cafarnaum ra mũ sór mũ. 18Ag mũ ki kóho jũ vỹ kãtĩ mũ, kỹ goj vỹ krém ke mũ. 19Mũ sĩ han ja ag nĩ ver, 5 (ke) quilômetros, hỹn, ke tũ nĩ kỹ 6 (ke), goj kri. Vãhã ag tóg ti vég mũ sir, ti tỹ goj kri tĩg kỹ. Ag ki tóg jun mũ. Kỹ ag tóg jũrũn ke mũ. 20Hã ra tóg ag mỹ: “inh hã vẽ, mũmẽg tũg nĩ,” he mũ. 21Kỹ tóg ag mỹ sér tĩ. Kỹ tóg ag mré canoa kã ra rã mũ sir. Ti tỹ ag mré nĩn kỹ ag tóg kãnhmar kafã ũ tá junjun mũ.
Vẽnh kar tỹ Jesus ve sór
22Hã ra vẽnh e ẽn vỹ kafã ũ tá nỹtĩ ver. Tỹ vaj kỹ ag tóg Jesus jãvãnh mũ, tá. Ti jãvãnh nỹtĩn ki ag tóg jagnẽ mỹ: “canoa pir vỹ kã nỹ ja nĩ, kuty tá. Kỹ ti mré mũ tĩ ag vỹ canoa ẽn ki ge kỹ mũ ja nĩ, hã ra tóg ag mré tĩg ja tũ nĩ,” he mũ. 23Kỹ canoa ũ tóg ag ki junjun mũ, ẽmã tỹ Tiberíades tá kãmũ ũ. Jesus tỹ tá ẽmĩ to Topẽ mré vĩ ja ẽn tá ag tóg junjun mũ, vẽnh e tỹ ko tá ja ẽn tá. 24Ag tỹ ti vég tũ nĩn kỹ ag tóg canoa tỹ tá junjun mũ ki ge kỹ mũ mũ sir, Cafarnaum ra, ti ve jé.
Kanhkã tá ẽmĩ
25Ag tỹ tá junjun kỹ ag tóg tá ti vég mũ sir, goj nig mág kafã ũ tá. Kỹ ag tóg ti mỹ: “hẽ ri ken kỹ ã ki jun?“ he mũ.
26Kỹ tóg: “ha mẽ, ãjag tỹ ẽmĩ ko ja tugrĩn ãjag tóg inh ve sór mũ. Sỹ milagre hynhan tĩ ẽn vég ãjag tóg tĩ, hã ra ãjag tóg to jykrén há han tũ nĩgtĩ. Ãjag tógá nỹtĩ tag hã ve sór ãjag tóg mũ. 27Ẽg tỹ tag ki vẽjẽn vég mũ ẽn vỹ kãnhmar tũ' henh ke mũ, kỹ tag to vãsãn sór tũg nĩ. Vẽjẽn ũ jé vãsãn nĩ, ẽmĩ tỹ ãjag rĩnrĩr pẽ han ke mũ ẽn jé. Sỹ ãjag mỹ ẽmĩ ẽn nĩm sór vẽ. Ẽg jóg tỹ Topẽ tỹ inh mỹ vẽnh rãnhrãj nĩm jan hã vẽ. Tỹ sóg ẽprã ke fi kósin nĩ mỹr,” he tóg.
28Kỹ ag tóg ti mỹ: “kỹ ẽg hỹn hẽ ri kenh ke mũ, ẽg tỹ Topẽ jykre han jé?“ he mũ. 29Kỹ tóg: “Topẽ tỹ ũn jẽnẽg mũ ẽn ki gem nĩ, inh ki. Ti jykre hã vẽ,” he mũ. 30Kỹ ag tóg: “kỹ ã hỹn ne han ke mũ, ẽg tỹ ve kỹ ã ki gen jé?“ he mũ. “Ã hỹn ne han há nĩgtĩ? 31Ẽg jógjóg ve ag vỹ kanhkã tá ẽmĩ ẽn kó, maná he mũ ẽn, ag tỹ ga kórég ẽn mĩ mũn kỹ. “Kanhkã tá tóg ag mỹ ẽmĩ jẽnẽ, ag tỹ ko jé,” he ja tóg nĩ, Topẽ vĩ tỹ rán kỹ nĩ ki. Jãvo ã hỹn ẽg mỹ ne han ke mũ?“ he ag tóg, ti vĩ kãfãn kỹ.
32Kỹ tóg: “Moisés pijé ãjag mỹ kanhkã tá ẽmĩ pẽ nĩm ja nĩ',” he mũ. “Ki hã sóg tó mũ, ha mẽ. Ũ tỹ ãjag mỹ kanhkã tá ẽmĩ pẽ nĩm mũ ẽn vỹ tỹ inh panh nĩ. 33Topẽ jamĩ vỹ kanhkã tá kãtére mũ. Ẽn vỹ ẽprã ke kar rĩnrĩr han mũ,” he tóg.
34Kỹ ag tóg: “ẽg mỹ ẽmĩ ẽn nĩm, kurã kar ki,” he mũ. 35Kỹ tóg: “inh hã vỹ tỹ ẽmĩ ẽn ri ke?? nĩ. Inh hã vỹ ãjag rĩnrĩr han ke mũ,” he mũ. “Ũ tỹ iso kãtĩ mũ ẽn vỹ kókĩr mãn ke tũ nĩ. Ũ tỹ inh ke rã mũ vỹ goj kron mãn sór ke tũ nĩ gé,” he tóg.
36“Hã ra ãjag tóg inh vég mũ ra inh ki ge sór tũ nĩ. 37Inh panh vỹ ũ ag kuprẽg mũ, ag tỹ tỹ isũ nỹtĩ jé. Ũ tỹ iso kãmũ kar vỹ inh mỹ há nỹtĩ. Inh pijé ũ mỹ: “inh mré kãtĩ tũg,” henh ke mũ'. 38Inh pijé isỹ vẽsóg ki nén to jykrén mũ ẽn han sór mũ'. Ũ tỹ inh jẽnẽg mũ tỹ inh mỹ nén tó mũ ẽn hã han sóg tĩ, hã jé sóg kanhkã tá kãtére ja nĩ. 39“Isỹ ã mỹ ũn jẽnẽnh ke mũ ẽn ki rĩr há han nĩ, ag vãgfor tũ nĩ jé,” he ja tóg nĩ inh mỹ, inh panh ti. Hã kỹ sóg ag rĩnrĩn mãn ke mũ, kurã tỹ ẽgno kã. 40Hỹ, tag vỹ inh panh mỹ há nĩ. Ũ tỹ ti kósin to kãmũ mũ ẽn mỹ tóg rĩr krỹg ja tũ ven ke mũ, ũ tỹ inh ki ge kỹ nỹtĩ ag kar mỹ. Kỹ sóg kurã tỹ ẽgno kã ag rĩnrĩn mãn kãn ke mũ, ha vem nĩ,” he tóg, Jesus ti.
Ẽg tỹ Jesus nĩ konh ke
41Kỹ ag tóg ti kato vĩ mũ, ti vĩ to, ti tỹ ag mỹ: “ẽmĩ tỹ kanhkã tá kãtére mũ ẽn ri ke?? inh nĩ,” hen kỹ. 42“Ti ki kanhró ẽg nỹtĩ. José kósin vẽ. Ti han mũ fag ki kanhró ẽg nỹtĩ. Hã ra tóg vẽso: “kanhkã tá sóg kãtére,” he sór mũ',” he ag tóg.
43Hã ra tóg: “iso vĩ kónãn tũg nĩ, jagnẽ mỹ,” he mũ. 44“Inh panh tỹ ũn krĩn mũ ag hã vỹ iso kãmũnh mũ. Ũ tỹ iso kãmũ mũ ag rĩnrĩn mãn jé sóg ke mũ, kurã tỹ ẽgno kã. 45Topẽ vĩ tó tĩ ũ vỹ tag rán ja nĩ, ha mẽ: “Topẽ vỹ vẽnh kar kanhrãn ke mũ,” he ja ti nĩ. Hã kỹ ũ tỹ inh panh vĩ mẽg mũ ag hã tóg iso kãmũnh ke mũ. 46Ẽprã ke ũ pijé inh panh ve ja nĩ'. Ũ tỹ Topẽ tá kãtĩ mũ ẽn hã vỹ ti ve ja nĩ, inh,” he tóg.
47“Sỹ ãjag mỹ ki hã tó mũn hã vẽ. Ũ tỹ inh ki rã mũ ẽn vỹ rĩr krỹg ja tũ ẽn venh ke mũ. 48Inh hã vỹ ẽmĩ pẽ ri ke nĩ, inh hã vỹ ãjag rĩnrĩr han ke mũ. 49Ãjag jógjóg ve ag vỹ, ag tỹ ga kórég mĩ mũn kỹ kanhkã tá ẽmĩ ẽn ko ja nĩgtĩ, maná he mũ ẽn. Ag tỹ ko mũ (hã) ra ag tóg kãgter kãn. 50Ũ tỹ ẽmĩ tỹ ẽg rĩnrĩr han mũ ẽn ko kỹ, ũ tỹ kanhkã tá kãtére ja ẽn ki rã kỹ tóg ter ke tũ pẽ nĩ. 51Ẽmĩ ẽn hã vỹ tỹ inh nĩ, inh hã vỹ kanhkã tá kãtére, inh hã vỹ ãjag rĩnrĩr han ke mũ. Ãjag tỹ ẽmĩ tag ko kỹ ãjag ter ke tũ pẽ nĩ. Isỹ vẽnh kar mỹ vẽjẽn nĩm ke mũn hã vẽ, hã vỹ: inh nĩ, he mũ. Ãjag tỹ inh nĩ ko' hen kỹ ãjag rĩnrĩr nỹtĩnh mũ,” he tóg.
52Kỹ ag tóg jagnẽ mỹ: “ti mỹ ẽg mỹ ti nĩ nĩm ke mũ, ẽg tỹ ko jé?“ he mũ. “Vẽnh mỹ ti nĩ, tag,” he ag tóg.
53Kỹ tóg: “isỹ ãjag mỹ ke há vẽ,” he mũ. “Ãjag tỹ inh nĩ ko sór tũ nĩn kỹ, ãjag tỹ inh kyvénh kron sór tũ nĩn kỹ ãjag rĩnrĩr ke tũ pẽ nĩ. Tỹ sóg ẽprã ke fi kósin nĩ,” he tóg. 54“Ũ tỹ inh nĩ ko kỹ, ũ tỹ inh kyvénh kron kỹ tóg rĩr krỹg ja tũ venh ke mũ. Kỹ sóg ti rĩn mãn ke mũ, kurã tỹ ẽgno kã. 55Inh nĩ vỹ tỹ vẽjẽn pẽ nĩ, inh kyvénh vỹ tỹ ẽg tỹ kron jafã pẽ nĩ gé. 56Ũ tỹ inh nĩ kon kỹ, ti tỹ inh kyvénh kron kỹ tóg inh ki rã kỹ jẽ nĩ. Kỹ sóg ti kã kã nĩ gé. Jagnẽ mré ke vỹ tỹ ẽg nỹtĩ. 57Inh panh vỹ rĩr nĩ. Ti hã vỹ inh jẽnẽ. Ti tugrĩn sóg rĩr jẽ. Kỹ ũ tỹ inh ki rã mũ ẽn vỹ isugnĩn rĩr ke mũ gé. 58Ẽmĩ tỹ kanhkã tá kãtére mũn hã vẽ. Ãjag jógjóg ve ag tỹ ẽmĩ ko ja ẽn ri ke tũ ti nĩ. Ag hã vỹ ag tỹ ko mũ ra kãgter kãn ja nĩgtĩ. Ũ tỹ ẽmĩ pẽ tag ko kỹ tóg ter mãn ke tũ nĩ. Inh ki rã to ken hã vẽ,” he tóg.
59 Cafarnaum tá tóg ag kanhrãn mũ, ag tỹ vẽnh kanhrãn jafã ẽn krẽm.
Ũ ag tỹ Jesus tovãnh
60Kỹ ti vĩ tóg ti mré mũ tĩ ũ ag mỹ e tĩ. Kỹ ag tóg: “mẽ jagy ti tĩ. Ẽg tỹ mẽ jãvãnh tóg tĩ,” he mũ.
61Hã ra tóg ki kanhró nĩ. Hã kỹ tóg ag mỹ: “tag mỹ ãjag mỹ mẽ há tũ'?“ he mũ. 62“Kỹ ãjag hỹn hẽ ri kenh ke mũ, ãjag tỹ isỹ kanhkã ra tĩg mãn ẽn ve kỹ, isỹ tỹ ẽprã ke fi kósin nĩn kỹ?“ he tóg. 63“Ũ tỹ ẽg rĩnrĩr han mũ vỹ tỹ Topẽ kuprĩg ti nĩ. Isỹ ãjag tỹ inh nĩ ko' henh ke tag to ken hã vẽ, hã vỹ: inh ki rã, he mũ. Inh vĩ tag ki króm tugrĩn ãjag rĩnrĩr nỹtĩnh ke mũ. 64Hã ra ãjag tóg inh vĩ kri fi sór tũ nỹtĩ,” he tóg. Ũ tỹ ón kỹ ti ki ge mũ ẽn ag ki kanhró tóg nĩ, vẽsóg ki. Kỹ tóg ũ tỹ pã'i ag mỹ ti tónh ke mũ ẽn ki kanhró nĩ gé. 65Kỹ tóg ag mỹ: “hã kỹ sóg ãjag mỹ: inh panh tỹ ũn krĩn mũ ag hã vỹ iso kãmũnh ke mũ, he ja nĩ,” he mũ.
66Ti vĩ tag tugrĩn ti mré mũ tĩ ũ ag tóg ti tovãnh mũ sir. Ti mré ag mũ mãn tũ nĩ. 67Kỹ tóg ũ tỹ 12 (ke) ag mỹ: “ãjag hỹn isovãnh sór mũ gé,” he mũ.
68Kỹ Simão tóg ti mỹ: “ẽg tỹ ã tovãnh mũ ra ẽg hỹn ũ mré mũnh ke mũ'? Ã hã vỹ ẽg mỹ Topẽ vĩ tó tĩ, kỹ ẽg tóg rĩr krỹg ja tũ vẽnh ke mũ, ẽg tỹ ã vĩ kri fi kỹ,” he mũ. 69“Ã ki ẽg ge kỹ nỹtĩ, kỹ ẽg tóg ã ki kanhró nỹtĩ. Cristo vỹ tỹ ã nĩ, Topẽ hã vỹ ã jẽnẽ ẽg to,” he tóg.
70Kỹ tóg ũ tỹ 12 (ke) ag mỹ: “ãjag kuprẽg inh, hã kỹ ãjag tóg tỹ ũ tỹ 12 (ke) nỹtĩ. Hã ra ãjag kã mĩ ũn pir vỹ tỹ Japo tũ nĩ jãvo,” he mũ. 71Ti tỹ Judas ẽn tó vẽ, Simão Iscariotes kósin ẽn. Ẽn vỹ kejẽn ti tovãnh kỹ pã'i ag mỹ ti fẽg mũ, ag tỹ ti se jé. Hã ra Jesus tóg ti tỹ nén han ke mũ ẽn ki kanhró ja nĩ.
Currently Selected:
João 6: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido