Roma 2

Topẽ tỹ vẽjykre pãno to jũ

1Fóg mré kanhgág ag vỹ vẽjykre kórég tag han kãn tĩ, kỹ ag tóg Judeu ag mỹ kórég nỹtĩ. Hã ra Judeu ag vỹ ti kórég han tĩ gé, ag tỹ ón kỹ ag to: “kórég ag nỹtĩ,” he mũ ra. Hã kỹ ag tóg ag jykre tugrĩn ti kórég venh ke mũ gé, fag ke gé. 2Topẽ vỹ ti jykre kuryj tugrĩn ũ tỹ tag han mũ vóg kónãn ke mũ. Ti tỹ ke há vẽ. 3Ũn jykre kórég ag tóg ag mỹ kórég nỹtĩ, Judeu ag mỹ, hã ra ag tóg hã han tĩ gé. Kỹ ag hỹn hẽ ri kenh mũ, Topẽ tỹ ag vóg kónãn tũ nĩ jé? Ag vóg kónãn jé tóg ke mũ, ha vem nĩ, fag ke gé. 4Ver tóg ẽg to há nĩ, ver tóg ẽg to fen nĩnh mũ, ver tóg jũ vãnh nĩ, Topẽ ti. Ti tỹ ẽg tỹ ẽg jykre kórég tovãnh ve sór vẽ, hã kỹ tóg ver ẽg to há tãvĩ nĩ. Hã ra tóg ag mỹ tỹ nén ũ tũ nĩ ve nĩ. 5Kutu ag nỹtĩ, vẽjykre pãno tovãnh jãvãnh ag nỹtĩ, hã kỹ Topẽ tỹ ag to jũ tóg komẽr hã mág rã nĩ. Kejẽn tóg ti tỹ vẽnh kar jykre venh ke kurã pétẽm ke mũ sir. Kỹ ag tóg, Topẽ tỹ ag vóg kónãn venh ke mũ, fag ke gé. Kỹ vẽnh kar vỹ ti jykre kuryj venh ke mũ, ti tỹ ẽg mỹ ki hã tó mũ ti. 6Ti hã ne ẽg mỹ, ẽg tỹ nén han ja ẽn kaja nĩm ke mũ'. 7Ẽn kã tóg ẽg mỹ ẽg rĩr krỹg ja tũ ven ke mũ, ũn jykre kuryj ag mỹ, fag mỹ ke gé. Ẽg tỹ ti jykre há to tar nỹtĩn kỹ tóg ẽg mỹ ẽg rĩr krỹg ja tũ ven ke mũ, ẽg tỹ tá tỹ ũn mág nỹtĩ jé. 8Hã ra tóg ũ vóg kónãn ke mũ gé. Ũ ag tóg ag tỹ nén han sór mũ ẽn hã han tĩ. Vẽnh vĩ há kri fi jãvãnh ag nỹtĩ, ag tỹ vẽjykre pãno han sór kỹ. Hã kỹ tóg ag vóg kónãn ke mũ, fag ke gé. 9Ũ tỹ vẽjykre pãno han mũ kar vỹ kanẽ junjur ke mũ, jagtar jagy han kỹ. Ag tỹ tỹ Judeu nỹtĩ ra ag tóg jagtar ke mũ, kar kỹ fóg kar ag ke gé, kanhgág kar ag ke gé, fag ke gé. 10Ũ tỹ vẽjykre kuryj han mũ tỹ tóg ũn mág hynhan ke mũ hã ra, to tóg vĩ há han ke mũ. Ẽg mỹ tóg vẽjykre kusa nĩm ke mũ, ẽg tỹ tỹ Judeu nỹtĩ ra, kar kỹ fóg ag mỹ ke gé, kanhgág ag mỹ ke gé, fag mỹ ke gé.

11Ha vé, Topẽ mỹ ti tỹ nén ũ tũ nĩ, Judeu ag, fóg ag, kanhgág ag. Ti mỹ ẽg tóg tỹ ũn pir nỹtĩ. 12Ũ ag tóg Topẽ vĩ mẽ ja tũ nỹtĩ. Kỹ ag tóg ti kórég kar han mũ sir, fag ke gé. Kỹ ag tóg nũgme ki vár ke mũ sir, inferno ki, ag jykre kórég to. Ag jãvo Judeu ag vỹ Topẽ vĩ mẽ ja nĩgtĩ. Hã ra ag tóg ti kórég han tĩ gé. Kỹ Topẽ tóg ag vóg kónãn ke mũ gé sir. 13Ha vé, ẽg tỹ Topẽ vĩ mẽg mũ ra han tũ nĩn kỹ ẽg Topẽ mỹ há tũ nỹtĩ. Ẽg tỹ ti vĩ ki króm kỹ ẽg tóg ti mỹ kuryj nỹtĩ. 14Fóg ag mré kanhgág ag vỹ Topẽ vĩ mẽ ja tũ nỹtĩ ver, ũ tỹ Judeu jykre han tũ kar ag. Ge ra vẽjykre há tóg ag mỹ sér tĩ, ag tỹ Topẽ vĩ mẽ ja tũ ra. Kỹ ag tỹ vẽjykre há han sór mũ tag vỹ ag mỹ tỹ ag tỹ ki króm nĩ. 15Topẽ tỹ nén tó ja ẽn vỹ ag kã kã nĩ, hã kỹ ag tóg han sór mũ, ag tỹ mẽ ja tũ ra. Hã kỹ tóg ag mỹ sér tĩ, ag tỹ nén ũ há han kỹ. Jãvo tóg ag mỹ e tĩ, ag tỹ ti kórég han kỹ. Ag tỹ Topẽ vĩ mẽ ja tũ ra ag tóg vẽjykre há ki kanhró nỹtĩ. 16Kejẽn Topẽ tóg Jesus Cristo mỹ: “ag jykre ve kãn nĩ, fag jykre ke gé,” henh ke mũ, ti kurã ẽn kã. Kỹ vẽnh kar jykre vỹ vẽnh ven ke mũ, ag jykre kórég mré hã, ag tỹ vẽnh kar vatánh tá nén han ja ti, fag jykre ke gé. Tag hã tó sóg tĩ, sỹ vẽnh kar mỹ ti vĩ sér kãmén kỹ.

Judeu ag tỹ Topẽ vĩ mranh ja

17Ha vé, Judeu ag mỹ tóg sér tĩ, ag tỹ tỹ Judeu nỹtĩn kỹ. “Topẽ ne ẽg jyvẽn ja nĩgtĩ', kỹ ẽg nũgme ki vár ke tũ nĩ,” he ag tóg tĩ. “Topẽ to ẽg há nỹtĩ,” he ag tóg tĩ gé. 18Ti tỹ ẽg ki nén ve sór mũ ki kanhró ag tóg nỹtĩ. Ti vĩ ki tóg rán kỹ nĩ. Hã kỹ ag tóg ẽn ve kỹ vẽjykre kuryj ki kanhró nỹtĩ. 19Hã kỹ ũ tỹ ki kagtĩg ag tóg ag mỹ ũn kyvó ag ri ke nỹtĩ. Kỹ ag tóg ag mỹ jẽngrẽ han sór tĩ, ag mỹ Topẽ vĩ tó kỹ. 20Ũ tỹ ki kagtĩg ag kanhrãn ag tóg tĩ, ón kỹ, fag ke gé, gĩr ag ke gé. “Topẽ vĩ vỹ há nĩ, vẽjykre há vẽ, ki hã tóg tó tĩ, hã to ẽg Topẽ ki kanhrãn tĩ,” he ag tóg tĩ, ón kỹ. 21Ũ mỹ ag tóg: “nén ũ péju tũg nĩ,” he tĩ. Hã ra ag tóg ũ tũ péju tĩ. 22Ón kỹ ag tóg: “ã prũ tũ fi mré nỹ tũg nĩ, ã mén tũ mré nỹ tũg nĩ gé,” he tĩ. Hã ra ag tóg fag mré nỹgnỹ tĩ. Ón kỹ ag tóg vẽnh kãgrá tỹ topẽ to: “Topẽ pijé',” he tĩ. Hã ra ag tóg vẽnh kãgrá ag jo ĩn krẽm ag tũ péju tĩ. 23“Topẽ vỹ ẽg jyvẽn ja nĩgtĩ,” he ag tóg tĩ. Hã ra ag tóg ti vĩ mranh tĩ. Topẽ kavénh ag tóg tĩ. 24Hã kỹ tag tóg rán kỹ nĩ, Judeu ag to, ha mẽ: “ãjag jykre kórég ve kỹ fóg ag mré kanhgág ag vỹ Topẽ jykre to: kórég ti hỹn nĩ, he tĩ,” he ja tóg nĩgtĩ, Judeu ag to, Topẽ vĩ rán ki.

25Há ti nĩ, ẽg tỹ tỹ Judeu nỹtĩ ti, ẽg tỹ Topẽ vĩ ki króm kỹ. Ẽg tỹ hã ra ti vĩ mranh kỹ tóg ẽg mỹ nén ũ há han ke tũ nĩ, ẽg tỹ tỹ Judeu nỹtĩ ra. Fóg ri ke vỹ tỹ ẽg nỹtĩ, kanhgág ri ke, ẽg tỹ ti vĩ mranh kỹ. 26Kejẽn fóg ũ tóg sir Topẽ vĩ ki króm mũ, kanhgág ũ hẽn ri ke mũn. Kỹ tóg Topẽ mỹ tỹ Judeu ri ke nĩ sir, ti tỹ Topẽ vĩ ki króm to. 27Hã kỹ fóg ag mré kanhgág ag vỹ Judeu ag jykre kórég tónh ke mũ, ha vem nĩ, ag tỹ Topẽ vĩ ki króm kỹ. Topẽ vĩ mranh ag tóg tĩ, ag tỹ Topẽ vĩ rá vég nỹtĩ ra. Hã tó jé ag tóg ke mũ, fóg ag, kanhgág ag ke gé. 28-29Ón kỹ ag tóg tỹ Judeu nỹtĩ, ag pijé tỹ Topẽ tũ pẽ nỹtĩ'. Ón kỹ ag gré fár junun vỹ kym kỹ nĩ, Topẽ tỹ ag mỹ: “kym ra,” he ja nĩn kỹ. Kỹ ag tóg tag tugnĩn jagnẽ mỹ: “Topẽ tũ vỹ tỹ ẽg nỹtĩ,” he tĩ. Hã ra ũ tỹ tỹ Topẽ tũ nỹtĩ ag vỹ ag fe tỹ ti ki rã tĩ, kỹ ag jykre vỹ kuryj kar nĩ'. Topẽ kuprĩg ne ẽg jykre kurynh tĩ'. Kỹ Topẽ tóg ẽg mỹ vĩ há han tĩ gé sir, ẽg jykre há nỹtĩn kỹ. Ti pijé ẽprã ke ri ke ón kỹ vĩ há han tĩ', ti ki ge kỹ nỹtĩ ag mỹ. Ẽg hã vỹ tỹ Topẽ krẽ nỹtĩ'.

Currently Selected:

Roma 2: kgp

Highlight

Compare

Copy