Roma 16
16
Paulo tỹ ũn e mĩ ẽkrég tĩ
1Ãjag mỹ sóg ẽg mré ke fi tó sór mũ, Febe fi. Tỹ fi tóg ẽmã tỹ Cencréia tá Jesus ki ge kỹ nỹtĩ fag kófa nĩ, tá igreja to. 2Fi tỹ kejẽn ãjag ki jun kỹ fi mỹ: “ha kãrã,” hem nĩ. Kỹ fi mỹ nén tỹ fi mỹ tũ ẽn ven kãn nĩ. Ũ tỹ hẽn ri ke jagãgtãn fi huri, inh ke gé.
3 Priscila fi mĩ sóg ẽkrég tĩ, fi mén tỹ Áquila mĩ ke gé. Inh mré fag tóg rãnhrãj mág, Jesus Cristo rãnhrãj han kỹ. 4Isugnĩn fag tóg kãgter kren, inh jy nĩgãn kỹ. Tag hã mĩ sóg ẽkrég tĩ, kỹ sóg fag to há tãvĩ nĩ. Kỹ fóg kar kã mĩ Jesus ki ge kỹ nỹtĩ ag vỹ tag tugrĩn fag to há nỹtĩ gé. 5Fag ĩn krẽm ũ ag tóg vẽnh mãn tĩ gé, culto han jé. Ẽn fag mĩ sóg ẽkrég tĩ gé.
Iso há ũ vỹ nĩ gé, hã vỹ: Epêneto, he mũ. Ga tỹ Ásia tá ũ tỹ Jesus ki rã vén mũn hã vẽ. Ti mĩ sóg ẽkrég tĩ gé. 6Kỹ Maria fi vỹ nĩ gé. Ãjag mỹ fi rãnhrãj mág. Fi mĩ sóg ẽkrég tĩ gé. 7Kỹ sóg Adrônico mĩ ẽkrég tĩ gé, Júnia fi mĩ ke gé. Inh kanhkã fag vẽ. Inh mré fag tóg sigse kỹ nỹtĩ ja nĩgtĩ gé. Apóstolo ag kã mĩ fag tóg tỹ ũn mág nỹtĩ. Vãsỹ fag tóg Jesus ki ge jẽg, isỹ ti ki rã tũg ki.
8 Amplíato mĩ sóg ẽkrég tĩ gé. Ti to sóg há tãvĩ nĩ, ẽg Senhor tugrĩn. 9Kỹ sóg Urbano mĩ ẽkrég tĩ gé. Inh mré tóg Cristo rãnhrãj han tĩ. Kar kỹ iso há ũ vỹ nĩ gé, Estáquis ti. Ti ki sóg ẽkrég tĩ gé. 10Apeles mĩ sóg ẽkrég tĩ gé. Cristo tovãnh jãvãnh ja ti nĩ. Aristóbulo mré ke fag mĩ sóg ẽkrég tĩ gé. 11Kar kỹ inh kanhkã ũ vỹ tá jẽ gé, Herodião ti. Ti ki sóg ẽkrég tĩ. Kỹ sóg Narciso mré ke fag mĩ ẽkrég tĩ, ũ tỹ fag kã mĩ ẽg Senhor ki ge kỹ nỹtĩ fag.
12Kỹ sóg Trifena fi ki ẽkrég tĩ, Trifosa fi mĩ ke gé. Ẽg Senhor mỹ fag rãnhrãj mũgtĩ. Kỹ sóg iso há tãvĩ ũ fi mĩ ẽkrég tĩ gé, hã vỹ: Pérside, he mũ. Ẽg Senhor mỹ rãnhrãj to fi tar tãvĩ nĩ. 13Kỹ sóg Rufo mĩ ẽkrég tĩ. Topẽ ne ti kuprẽg', ti mỹnh fi ke gé'. Inh mỹ fi tóg tỹ inh mỹnh ri ke nĩ. 14Kỹ sóg Asíncrito mĩ ẽkrég tĩ, Flegonte mĩ ke gé, Hermes mĩ ke gé, Pátrobas mĩ ke gé, Hermas mĩ ke gé, ag mré Topẽ vĩ mẽ jé vẽnh mãn tĩ ag mĩ ke gé. 15Kỹ sóg Filólogo mré Júlia fi mĩ ẽkrég tĩ, Nereu mré ti ve fi mĩ ke gé, Olimpas mĩ ke gé, kar kỹ fag mré Jesus vĩ mẽ jé vẽnh mãn tĩ fag mĩ ke gé, Topẽ tũ kar ag mĩ, fag mĩ.
16Kỹ jagnẽ ki nhun ke ri ke han nĩ, Jesus mré ke kar ki, jagnẽ nĩgé kãgmĩ kỹ. Cristo ki ge kỹ nỹtĩ kar vỹ ãjag mĩ ẽkrég tĩ, ẽmã kar ki ke ag, fag ke gé.
Ón kỹ vẽnh vĩ há mẽ sór tũg nĩ
17Nén ũ tó sór sóg mũ gé ver ãjag mỹ. Ũ ag tóg ãjag tỹ jagnẽ to jũ han sór mũ. Ãjag tỹ jagnẽ vĩ kafãn kónãn han sór ag tóg mũ. Ag pijé ãjag tỹ Topẽ vĩ mẽ ja ẽn ri ke tó tĩ'. Ẽn ag vĩ mẽ sór tũg nĩ. 18Ag pijé ẽg Senhor tỹ Cristo rãnhrãj han sór tĩ'. Ag nug hã ki rĩr ag tóg tĩ'. Ón kỹ ag vĩ vỹ mẽ há tĩ, kỹ ũ tỹ hẽn ri ke ag tóg kri fi sór mũ, ũ tỹ nén ũ vẽnh mỹ to jykrén tũ ag. Inh mỹ tóg ag tỹ ũ tỹ ge krĩn kónãn ha mẽ tĩ. Kỹ ag vĩ mẽ sór tũg nĩ.
19Ãjag tỹ Topẽ vĩ kri fig mũ tag vỹ mẽ há tĩ. Vẽnh kar vỹ mẽ, kỹ tóg inh mỹ sér tĩ sir, ãjag to. Kỹ tóg ãjag tỹ vẽjykre há ki kanhró nỹtĩnh há tĩ. Ãjag tỹ vẽjykre pãno to jykrén tũ nĩn kỹ tóg há tĩ gé.
20Topẽ vỹ ẽg krĩ kuprãg tĩ. Kãnhmar tóg ẽg mỹ Satanás tỹ tũ' henh ke mũ gé, ha vem nĩ. Kỹ tóg ãjag vóg mãn ke tũ nĩ ha.
Ẽg Senhor tỹ Jesus mỹ sóg to vĩ tĩ, ti tỹ ãjag mỹ ti tỹ nén ũ há ẽn vin jé.
Paulo mré ke ag tỹ Roma ki ke fag mĩ ẽkrég tĩ
21Inh mré Topẽ rãnhrãj han mũ tỹ Timóteo vỹ ãjag mĩ ẽkrég tĩ gé, Lúcio ti ke gé, Jasão ke gé, Sosípatro ke gé, inh kanhkã ag.
22Ũ tỹ Paulo mỹ tag rán mũ vỹ tỹ inh nĩ, hã vỹ: Tércio, he mũ. Kỹ sóg ãjag mĩ ẽkrég tĩ gé, ãjag tỹ inh mré ẽg Senhor ki ge kỹ nỹtĩn kỹ.
23 Gaio vỹ ãjag mĩ ẽkrég tĩ. Ti ĩn krẽm sóg jẽ, kỹ ẽg tóg ti ĩn krẽm culto han tĩ. Erasto vỹ ãjag mĩ ẽkrég tĩ gé, ũ tỹ ẽmã jãnkamy ki rĩr tĩ ẽn ti. Ẽg régre tỹ Quarto vỹ ãjag mĩ ẽkrég tĩ gé. 24Ẽg Senhor tỹ Jesus Cristo mỹ sóg to vĩ tĩ, ti tỹ ãjag kar tar han jé. Ha vẽ.
Topẽ mỹ ẽg vĩ há han ke
25Ha mẽ, ẽg jé Topẽ mỹ vĩ há han. Ẽg tar han ki kanhró tóg nĩ, ẽg tỹ ti ki rã kar krónh ke tũ nĩn jé. Sỹ ãjag mỹ Topẽ vĩ sér tó mũn hã vẽ, Jesus Cristo kãmén kỹ. Vãsỹ ẽg tóg mẽ ja tũ nĩ, ti vĩ sér tag ti. Ẽg tỹ vãhã mẽ vẽ, Topẽ tỹ ẽg mỹ to vẽjykre nĩm kỹ. Prỹg tỹ hẽn ri ke ki ag tóg mẽ ja tũ nĩ, ẽg jo ke ag. 26Ũri hã ẽg tóg mẽg mũ. Vãsỹ Topẽ vĩ rán tĩ ag vỹ ẽg tỹ ũri mẽg mũ tag tó ja nĩgtĩ. Kỹ Topẽ tóg tag to: “povo kar mỹ kãmén nĩ, fóg ag mỹ, kanhgág ag mỹ, Judeu ag mré hã,” he ja nĩ, ẽg tỹ ti vĩ mẽ kỹ ti ki ge jé, ti vĩ kri fi jé, ti tỹ tỹ ẽg Senhor kar jẽ jé. Ti tỹ nén kar han tũg ki tóg nĩ nĩ, Topẽ ti, ũ tỹ ti han ja tũ ra. Kỹ tóg tũ' henh ke tũ nĩ gé. Gen kỹ tóg nĩnh mũ.
27Ti hã ne ti pir mỹ nén ũ kar ki kanhró nĩ', Topẽ ti. Jesus Cristo hã tóg ẽg mỹ Topẽ ven ke mũ. Kỹ ẽg tóg ti hã mỹ vĩ há han sór mũ. Krỹg henh ke tũ tóg nĩ, ẽg tỹ ti mỹ vĩ há han mũ ti. Hã vẽ.
Currently Selected:
Roma 16: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido