Nén Venh Ke 2
2
Éfeso tá igreja ki ke ag mỹ rá
1“Ũ tỹ ẽmã tỹ Éfeso tá inh mré ke ag ki rĩr mũ ẽn mỹ tag rán nĩ, ha mẽ,” he tóg. “Ũ tỹ ã mỹ vẽnh vĩ jẽnẽg mũ vỹ ti pẽgja tỹ krĩg tỹ 7 (ke) génh kỹ jẽ nĩ, hem nĩ. Kỹ tóg néj tỹ kri vin jafã tỹ 7 (ke) kã mĩ tĩ mũ gé, hem nĩ. 2“Ãjag tỹ nén han mũ ki kanhró sóg nĩ, he ti,” hem nĩ iso. Vãsãn ãjag tóg tĩ. Iso krónh ke tũ ãjag tóg nĩ. Ũn jykre pãno ag tóg ãjag mỹ kórég nỹtĩ. Ãjag kã mĩ ũ tóg ón kỹ: “apóstolo vỹ tỹ ẽg nỹtĩ,” he ja nĩ. Ag jykre tugnỹm kỹ ãjag tóg ag ón mũ tag to ag pan. 3Iso tar ãjag tóg nỹtĩ. Isugrĩn ãjag tóg jagtar, ge ra ãjag tóg iso krónh ke ja tũ nĩ.
4Hã ra sóg nén ũ sĩ tó sór mũ, ãjag mỹ. Ãjag tỹ nén han mũ ũ tóg inh mỹ há tũ nĩ. Ãjag tỹ inh ki ge vén kỹ ãjag tóg iso há tãvĩ nỹtĩ ja nĩgtĩ. Hã ra ãjag tóg ũri to krónh ke mũ. 5Ãjag tỹ vãsỹ iso tar ẽn mĩ ẽkrén nĩ. Ãjag jykre kórég tovãnh nĩ. Ãjag tỹ inh ki ge vén ja ẽn ri ke nỹtĩ mãn nĩ. Ãjag tỹ tag han sór tũ nĩn kỹ sóg ãjag ki jun kỹ, ãjag tỹ néj tỹ kri vin jafã ẽn ma tĩg ke mũ, ha vem nĩ.
6Nén ũ tóg hã ra há nĩ, ãjag tỹ nén han mũ ũ. Nicolaítas he mũ ẽn ag jykre to ãjag tóg kórég tãvĩ nỹtĩ, isỹ ag jykre to kórég kóm,” he tóg, hem nĩ, vẽnh rán ki“, he tóg inh mỹ.
7“Ũ nĩgrẽg nỹtĩ ag tỹ tỹ jẽmẽ jé, Topẽ kuprĩg vĩ ti. Ũ tỹ inh ki ge kỹ nỹtĩ ag hã mỹ tóg tó tĩ,” he tóg. “Ũ tỹ isovãnh tũ ẽn vỹ ka tỹ ẽg rĩnrĩr han ke mũ ẽn kanẽ konh ke mũ, Topẽ jakré ẽn kanẽ,” he tóg, ũ tỹ tỹ ẽprã ke nĩ ve ẽn ti. Ti tỹ Éfeso tá ke ag mỹ vẽnh vĩ jẽnẽg mũn hã vẽ.
Esmirna tá igreja ki ke ag mỹ rá
8Kỹ tóg: “ũ tỹ ẽmã tỹ Esmirna tá inh ki ge kỹ nỹtĩ ag ki rĩr mũ ẽn mỹ tag rán nĩ, ha mẽ,” he mũ gé. “Ũ tỹ ã mỹ vẽnh vĩ jẽnẽg mũ vỹ tỹ ũn ve nĩ. Hã ra tóg tỹ ẽgno nĩ gé,” hem nĩ. “Ter ja ti nĩ, hã ra tóg rĩr mãn,” hem nĩ iso. 9“Isugrĩn ag tóg ãjag to kórég nỹtĩ. Kỹ ãjag tóg jagtar nỹtĩ. Ki kanhró sóg nĩ. Ge ra ãjag tóg inhhã riko ri ke nỹtĩ. Ãjag to ag tóg vĩ kónãn tĩ, ũ tỹ ón kỹ: “Judeu vỹ tỹ ẽg nỹtĩ, Topẽ tũ vỹ tỹ ẽg nỹtĩ,” he mũ ag. Ag pijé tỹ Topẽ tũ nỹtĩ'. Satanás tũ vỹ tỹ ag nỹtĩ. 10Ãjag jagtar han jé ag tóg ke mũ, isugrĩn. Mũmẽg tũg nĩ hã ra. Japo vỹ ãjag kato vãsãn ke mũ. Kỹ ag tóg vẽseja kã tá ãjag vãm ke mũ. Kurã tỹ 10 (ke) ki ke vẽ, ag tỹ ãjag vóg kónãn ke ti. Isovãnh tũg nĩ. Kỹ ãjag tóg rĩr krỹg ja tũ venh ke mũ. Kỹ tóg ãjag mỹ sér tĩnh mũ, he tóg,” hem nĩ, vẽnh rán ki,” he tóg inh mỹ.
11“Ũ nĩgrẽg nỹtĩ ag tỹ tỹ jẽmẽ jé, Topẽ kuprĩg vĩ ti. Ũ tỹ inh ki ge kỹ nỹtĩ ag hã mỹ tóg tó tĩ, Topẽ kuprĩg ti,” he tóg. “Ũ tỹ isovãnh tũ ẽn vỹ nũgme ki vár ke tũ nĩ,” he tóg, ũ tỹ tỹ ẽprã ke nĩ ve ẽn ti. Ti tỹ Esmirna tá ke ag mỹ vẽnh vĩ jẽnẽg mũn hã vẽ.
Pérgamo tá igreja ki ke ag mỹ rá
12Kỹ tóg: “ũ tỹ ẽmã tỹ Pérgamo tá inh ki ge kỹ nỹtĩ ag ki rĩr mũ ẽn mỹ tag rán nĩ, ha mẽ,” he mũ gé. “Ũ tỹ ã mỹ vẽnh vĩ jẽnẽg mũ vỹ rógro jã régre vyn kỹ jẽ nĩ,” hem nĩ iso. 13“Satanás nĩgja tá ãjag tóg ẽmã nỹtĩ, ki kanhró sóg nĩ. Iso tar ãjag tóg nỹtĩ. Ãjag régre tỹ Antipas tén ja ag tóg nĩ, ti tỹ ijiji tó tugrĩn. Ge ra ãjag tóg iso: “ti ki kagtĩg sóg nĩ,” he ja tũ nĩ, ãjag tỹ Satanás jamã tá nỹtĩ ra.
14Hã ra sóg nén ũ tó sór mũ gé, ãjag mỹ, ti tỹ inh mỹ há tũ nĩn kỹ. Ãjag kã mĩ ũ ag tóg Balaão jykre han sór mũ. Balaão vỹ Balaque mỹ ti tỹ Israel krẽ ag krĩn kónãn ke kãmén ja nĩ, Topẽ vĩ mranh ke to. Kỹ ag tóg ón kỹ vẽnh kãgrá to fénhta ko ja nĩgtĩ. Ẽn ko kỹ ag tóg ag prũ tũ fag mré nỹgnỹ' he ja nĩgtĩ gé. Tag han sór ag tóg mũ gé, kỹ tóg inh mỹ kórég nỹ. 15Kỹ ãjag kã mĩ ũ ag tóg Nicolaítas he mũ ẽn ag jykre han sór mũ gé. 16Tovãnh nĩ, ãjag jykre tag. Ke tũ nĩ mũ ra sóg ãjag ki jun ke mũ, sỹ ũ tỹ vẽjykre tag han mũ ag kato vãsãn jé, rógro tỹ inh jẽnkã tá kãkutẽ mũ ẽn tỹ,” hem nĩ, vẽnh rán ki,” he tóg, inh mỹ, ũ tỹ tỹ ẽprã ke nĩ ve ẽn ti.
17“Ũ nĩgrẽg nỹtĩ ag tỹ tỹ jẽmẽ jé, Topẽ kuprĩg vĩ ti. Ũ tỹ inh ki ge kỹ nỹtĩ ag hã mỹ tóg tó tĩ,” he tóg.
“Ũ tỹ isovãnh tũ mỹ sóg kanhkã tá vẽjẽn tỹ péju kỹ nĩ ẽn nĩm ke mũ. Ag mỹ sóg pó kupri nĩm ke mũ gé. Kri vẽnh jiji tãg tóg rán kỹ nĩ. Ũ pijé vẽnh jiji tag ki kanhró nĩnh mũ'. Ũ tỹ mãg mũ ẽn hã tóg ki kanhró nĩnh mũ, ti jiji tãg ki, he tóg, hem nĩ,” he tóg, ũ tỹ tỹ ẽprã ke nĩ ve ẽn ti. Ti tỹ ẽmã tỹ Pérgamo tá ke ag mỹ vẽnh vĩ jẽnẽg mũn hã vẽ.
Tiatira tá igreja ki ke ag mỹ rá
18Kỹ tóg: “ũ tỹ ẽmã tỹ Tiatira tá inh ki ge kỹ nỹtĩ ag ki rĩr mũ ẽn mỹ tag rán nĩ, ha mẽ,” he mũ gé. “Ũ tỹ ã mỹ vẽnh vĩ jẽnẽg mũ vỹ tỹ Topẽ kósin nĩ, hem nĩ,” he tóg. “Ti kanẽ vỹ pĩ gru ri ke nĩ. Ti pẽn vỹ ouro jẽngrẽ ri ke nĩ gé,” hem nĩ iso. 19“Ãjag tỹ nén han mũ vég sóg tĩ. Iso há tãvĩ ãjag tóg nỹtĩ, inh ki ge pẽ han kỹ ãjag tóg nỹtĩ. Inh rãnhrãj han to krónh ke tũ ãjag tóg nĩgtĩ. Vãsỹ ãjag tóg inh jykre to tar nỹtĩ ja nĩgtĩ. Kỹ ãjag tóg ũri to tar kãfór nỹtĩ gé.
20Hã ra sóg nén ũ sĩ tó sór mũ gé, ãjag mỹ, ti tỹ inh mỹ há tũ nĩn kỹ. Jezabel fi vĩ kamẽg ja tũ ãjag tóg nĩgtĩ. Hã kỹ fi tóg ón kỹ vĩ tĩ nĩ. Inh mỹ rãnhrãj tĩ ag krĩn kónãn fi tóg tĩ, ag tỹ fi mré nỹ jé, ag tỹ vẽnh kãgrá mỹ nén ũ nĩ pũn mũ ẽn ko jé gé. 21Fi tovãnh isóg mũ vẽ, fi tỹ fi jykre tugnỹm jé, hã ra fi tóg fi jykre kórég tovãnh sór tũ nĩ. 22Fi kagãg jé sóg ke mũ. Ũ tỹ fi jykre han mũ ag vóg kónãn jé sóg ke mũ gé, ag tỹ fi jykre kórég tovãnh jãvãnh nỹtĩn kỹ. 23Fi krẽ kãgtén kãn jé sóg ke mũ gé. Kỹ inh ki ge kỹ nỹtĩ kar ag vỹ inh jykre ki kanhró nỹtĩnh mũ. Vẽnh kar tỹ nén to jykrén mũ ẽn ve kãn sóg tĩ, ag tỹ nén han sór mũ ẽn ke gé. Ãjag tỹ nén han mũ ẽn ri ke han jé sóg ke mũ, ãjag mỹ, ha vem nĩ.
24Ãjag kã mĩ ũ ag tóg hã ra fi jykre han ja tũ nĩgtĩ, ag tỹ Tiatira tá nỹtĩ ra. Ag pijé fi tỹ vẽjykre han mũ han ja nĩ'. Ag tỹ nén ũ to: “Satanás jykre jagy,” he mũ ẽn han sór ja tũ ag nĩgtĩ. Hã kỹ sóg ag mỹ nén ũ jagy tónh ke tũ nĩ gé. 25Ãjag tỹ nén han mũ to tar nỹtĩm nĩ. Gen kỹ inh kãtĩg mãn ke tag jãvãnh nỹtĩm nĩ.
26Ũ tỹ isovãnh tũ ẽn ag tỹ sóg pã'i hynhan ke mũ, povo kar kri, ũ tỹ inh vĩ ki króm mũ ag tỹ, ũ tỹ iso krónh ke tũ ẽn ag tỹ ke gé. Inh panh vỹ isỹ pã'i han, hã kỹ sóg ãjag tỹ pã'i han ke mũ gé, 27ãjag tỹ inh kóm tỹ povo kri pã'i nỹtĩ jé. Kỹ ãjag tóg ag to vãsãn ke mũ, ferro tỹ ag mrãnmrãn kỹ, ẽg tỹ go'or tỹ kukrũ há gãm mũ ẽn ri ke. 28Tar ãjag tóg nỹtĩnh mũ, kỹ sóg ãjag mỹ krĩg mág nĩm ke mũ gé,” he tóg, hem nĩ, ag mỹ, vẽnh rán ki,” he tóg, ũ tỹ tỹ ẽprã ke nĩ ve ẽn ti.
29“Ũ nĩgrẽg nỹtĩ ag tỹ tỹ jẽmẽ jé, Topẽ kuprĩg vĩ ti. Ũ tỹ inh ki ge kỹ nỹtĩ ag hã mỹ tóg tó tĩ, Topẽ kuprĩg ti,” he tóg, ũ tỹ tỹ ẽprã ke nĩ ve ẽn ti. Ti tỹ ẽmã tỹ Tiatira tá ke ag mỹ vẽnh vĩ jẽnẽg mũn hã vẽ.
Currently Selected:
Nén Venh Ke 2: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido