João 2
2
Jesus tỹ vẽnh prũg venh tĩg
1Kurã tãgtũ tũg kỹ ũ tóg vẽnh prũg han mũ, ẽmã tỹ Caná tá, ga tỹ Galiléia tá. Jesus mỹnh fi vỹ venh tĩg ja nĩ. 2Kỹ ag tóg Jesus mỹ tó mũ gé, ti tỹ fénhta venh kãtĩg jé, ti mré mũ tĩ ag mré. 3Ag tỹ tá nỹtĩ ra vãhã vinho tóg tũ' he mũ. Kỹ ti mỹnh fi tóg ti mỹ: “vinho vỹ hur tũg,” he mũ. 4Hã ra tóg fi mỹ: “toreg', mỹnh', inh mré ke tũ vẽ ver,” he mũ. 5Hã ra fi tóg ũ tỹ fénhta ki rĩr tĩ ag mỹ: “ti tỹ ãjag mỹ nén ũ tó kỹ han nĩ,” he mũ.
6Hã ra goj né tỹ 6 (ke) vỹ tá nỹtĩ. Pó tỹ há vẽ, goj né ẽn ti. Éhé ti nỹtĩ, balde fór tỹ 10 (ke) tỹ ẽg tóg ũn pir fãn tĩ. Judeu ag vỹ vẽnh kygpe e han tĩ, ag tỹ Topẽ mỹ há nỹtĩ jé. Hã jé goj né ẽn tóg tá nỹtĩ. 7Kỹ Jesus tóg fénhta ki rĩr tĩ ag mỹ: “goj né ẽn fónfãn ra, goj runrun kỹ,” he mũ. Kỹ ag tóg fónfãn kãn mũ. 8Kỹ tóg ag mỹ: “goj tag tỹ fénhta to pã'i mỹ ven,” he mũ. Kỹ ag tóg ke mũ. 9Kỹ tóg kãmẽg mũ. Hã ra tóg tỹ vinho há tãvĩ nĩ sir, ag tỹ goj run ja ti. Hã ra tóg ki kagtĩg nĩ, Jesus tỹ goj tỹ vinho han mũn ki. Ũ tỹ fénhta ki rĩr tĩ ag hã vỹ ki kanhró nỹtĩ, pã'i ẽn krẽm ke ag.
Hã kỹ tóg ũn prũg mũ ẽn jé prẽr kỹ ti mỹ: 10“vẽjykre vẽnh mỹ han ã,” he mũ. “Ag tỹ kronkron vén kỹ ã tóg ag mỹ vinho há tãvĩ nĩm ke mũ vẽ. Kar kỹ vinho pãgsĩ vỹ há nĩ vẽ. Hã ra ã tóg ag mỹ vinho pãgsĩ ẽn nĩm vén. Kỹ ã tóg vinho há tãvĩ tag nĩm sór mũ ha vãhã,” he tóg.
11 Jesus tỹ ẽmã tỹ Caná tá nén han mũn hã vẽ, Galiléia tá. Ẽg tỹ nén han ki kagtĩg hynhan tóg tĩ, kỹ tóg tag han vén. Hã kỹ ti mré mũ tĩ ag tóg ti ki ge pẽ han mũ sir, ag tỹ ti jykre tar ẽn ven kỹ.
12Kar kỹ tóg ẽmã tỹ Cafarnaum ra tĩ mũ, ti mỹnh fi mré, ti jãvy ag mré hã, ti mré mũ tĩ ag mré ke gé. Tá ag tóg nỹtĩg mág sĩ han.
Jesus tỹ Topẽ ĩn ra tĩg
(Mt 21.12-13; Mc 11.15-17; Lc 19.45-46)
13Ẽn kã Judeu ag fénhta tỹ Páscoa vỹ kakó tĩ sir. Kỹ Jesus vỹ ẽmã tỹ Jerusalém ra tĩ mũ, ti mré mũ tĩ ag mré. 14Ti tỹ Topẽ ĩn tá jun kỹ tóg ũ tỹ monh vẽne he tĩ ag vég mũ, carneiro vẽne he tĩ ag ke gé, sórãg vẽne he tĩ ag ke gé. Topẽ ĩn krẽm ag tóg ag nĩgóso hynhan tĩ. Kar kỹ jãnkamy trocar he tĩ ag tóg tá nỹtĩ gé. 15Jesus tỹ ag ve kỹ tóg ti mỹ e tĩ, ag tỹ Topẽ ĩn kavénh mũn kỹ. Hã kỹ tóg mrãn ke jafã fy ẽn vyn kỹ tỹ ag pan mũ, Topẽ ĩn tá, carneiro ti ke gé, monh ti ke gé. Ũ tỹ jãnkamy trocar he tĩ ag jãnkamy ẽn vãm tóg mũ gé, ẽprã. Kỹ tóg ag mesa tỹ vyryn ke mũ gé. 16Ũ tỹ sórãg vẽne he tĩ ag mỹ tóg: “ãjag tũ ma mũjẽg,” he mũ. “Inh panh ĩn krẽm nĩgóso han sór tũg nĩ. Bodega pijé', inh panh ĩn ti,” he tóg.
17Ti mré mũ tĩ ag tỹ tag ve kỹ ag tóg ti to rán kỹ nĩ ẽn mĩ ẽkrég mũ, ha mẽ: “ã ĩn tóg inh mỹ sĩnvĩ jẽ. Ag tỹn kavénh kỹ ag tóg inh krĩ rỹ han mũ. Kỹ tóg kejẽn isén ke mũ sir, ha vem nĩ,” he tóg.
18Kỹ Judeu ag pã'i ag vỹ Jesus tỹ ag pan mũ vég mũ gé. Kỹ ag tóg ti mỹ: “ã tỹ hẽ ri ke nẽ?“ he mũ. “Ũ nỹ ã mỹ: tag han nĩ, hé? Milagre ũ han nĩ, ẽg tỹ ũ tỹ ã jẽnẽg mũ ki kanhrãn jé,” he ag tóg.
19Hã ra tóg ag mỹ: “ãjag tỹ Topẽ ĩn tag kókén kỹ sóg ti jẽgja ki ũ han mãn ke mũ, kurã tãgtũ ki, ha vem nĩ,” he mũ. 20Kỹ tóg ag mỹ e tĩ. “Ũ tỹ Topẽ ĩn tag han mũ ag vỹ prỹg tỹ 46 (ke) ki rãnhrãj kỹ ti han. Jãvo ã mỹ kurã tãgtũ ki ũ han sór mũ', ĩn ti'?“ he ag tóg. 21Hã ra Jesus tóg ag mỹ ti ter ke tó ja nĩgtĩ. Vẽnh kãmén ja ti nĩgtĩ, ti tỹ vẽso: “Topẽ ĩn ri ke inh nĩ,” hen kỹ. 22Ti tỹ kejẽn ti ter kar kỹ rĩr mãn kỹ ti mré mũ tĩ ag tóg ti vĩ tag ki ẽkrén kỹ ki kanhrãn mũ. Kỹ ag tóg Topẽ vĩ ki rán kỹ nĩ ẽn to jykrén há han mũ vãhã, ti vĩ to ke gé. Kỹ ag tóg ti ki ge há han mũ vãhã.
Jesus tỹ vẽnh kar jykre ki kanhró
23Fénhta tỹ Páscoa ẽn kã ũ tỹ hẽn ri ke ag vỹ ti ki ge mũ, Jerusalém tá, ag tỹ ti tỹ nén han mũ ve kỹ. 24Hã ra tóg ag jykre ki kanhró nĩ. Ón kỹ ag tóg ti ki ge mũ, hã kỹ ag tóg to jykrén há han tũ nĩ sir. 25Kỹ ũ tỹ ti mỹ: “ũ ẽn jykre vỹ ge nĩ,” hen kỹ tóg: “hỹ, ki kanhró inh nĩ,” he tĩ. Vẽsóg ki tóg ag jykre ki kanhró nĩgtĩ.
Currently Selected:
João 2: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido