João 13
13
Jesus tỹ ti mré mũ tĩ ag pẽn kugpe
1Hã ra fénhta tỹ Páscoa vỹ kakó tãvĩ tĩ sir, hã ra tóg tá krỹg tũ nĩ ver. Kỹ Jesus vỹ ki kanhró nĩ, ti tỹ ũri ter ke ẽn ti. Ti kurã vỹ jun ja nĩ, ti tỹ ti panh ra tĩg jé. Ti mré mũ tĩ ag to tóg há tãvĩ ja nĩgtĩ, ag tỹ tỹ ti tũ nỹtĩn kỹ. Kỹ tóg ti ter ke kurã ẽn kã ag to há tãvĩ nĩ gé, tag ki, ẽprã.
2Kỹ tóg rãkãnh kỹ ag mré jẽg mũ. Hã ra Japo vỹ Judas krĩn huri, ti tỹ pã'i ag mỹ Jesus ven tĩg jé, ag tỹ ti se jé. Judas Iscariotes ẽn vẽ, Simão kósin ẽn. 3Hã ra Jesus tóg ki kanhró nĩ, ti tỹ Topẽ tá kãtĩg ja ẽn ki, kỹ tóg ki kanhró nĩ gé, ti tỹ ra tĩg mãn ken ki. Kỹ Topẽ tóg ti tar han mũ gé, ti tỹ nén ũ kar ki ag mỹ tỹ ũn mág jẽ jé. Ẽn ki kanhró tóg nĩ gé. 4Tag kar to jykrén kỹ tóg vãhã jẽgnẽ mũ sir, jẽn kar kỹ. Jẽgnẽ kỹ tóg ti capa kunũnh kỹ vẽnh pẽfĩn jafã tỹ vẽnh pẽfĩg mũ. 5Goj tỹ tóg pénky kã ki kujẽg mũ, kỹ tóg ti mré mũ tĩ ag pẽn kugpég mũ. Vẽnh péfĩn jafã ẽn tỹ tóg ag pẽn kykũg mũ. 6Kỹ tóg Simão tá jun mũ gé, ti pẽn kugpe jé. Hã ra tóg ti mỹ: “ã pijé inh pẽn kugpenh mũ',” he mũ.
7Hã ra tóg ti mỹ: “ã pijé ki kanhró nĩ', sỹ ã mỹ nén han mũ ti',” he mũ. “Kar kỹ ã tóg kejẽn to jykrén ke mũ, ha vem nĩ,” he tóg.
8Hã ra Simão tóg ti mỹ: “vó, inh pẽn kugpenh ke tũ ã tóg nĩ,” he mãn mũ. Kỹ Jesus tóg ti mỹ: “isỹ ã pẽn kupég tũ nĩn kỹ ã pijé tỹ isũ nĩnh mũ',” he mũ.
9Kỹ Simão tóg ti mỹ: “inh kupe kãn nĩ, ge kỹ, inh pẽn, inh krĩ, inh nĩgé ke gé,” he mũ.
10Hã ra tóg ti mỹ: “ẽg mro kar kỹ ẽg jãnhkri nỹtĩ, kỹ ẽg tóg ẽg pẽn hã kugpég tĩ,” he mũ. “Jãnhkri ãjag nỹtĩ, hã ra ãjag kã mĩ ũn pir vỹ jãnhkri tũ nĩ,” he tóg. 11Ũ tỹ pã'i ag mỹ ti ven ke mũ ẽn ki kanhró tóg nĩ, hã kỹ tóg ag mỹ: “ãjag kã mĩ ũn pir vỹ jãnhkri tũ nĩ,” he mũ.
12Kỹ tóg ag pẽn kugpe kãn mũ sir. Kar kỹ tóg ti kur rĩnh mãn mũ, kỹ tóg nĩ mãn mũ. Kỹ tóg ag mỹ: “ãjag mỹ sỹ nén han mũ ki kanhró nỹtĩ?“ he mũ. 13“Iso ãjag tóg: Senhor, he tĩ. Tó há han ãjag tĩ. Tỹ sóg ãjag Senhor nĩ. 14Kỹ sóg tỹ ãjag kanhrãn tĩ nĩ gé. Hã ra sóg ãjag pẽn kugpé. Hã kỹ tóg há tĩ, ãjag tỹ jagnẽ mỹ jagnẽ pẽn kugpe kỹ, inh ri ke han kỹ. 15Sỹ ãjag kanhrãn sór vẽ, hã kỹ sóg ãjag mỹ ãjag pẽn kugpé. Inh ri ke han nĩ. 16Ki hã sóg tó mũ, ha mẽ. Camarada pijé ti patrão kãfór nĩ'. Kỹ ẽg tỹ ũ jẽnẽn kỹ tóg ũ tỹ ti jẽnẽg mũ ẽn kãfór tũ nĩ gé. 17Tag ki kanhró ãjag nỹtĩ, kỹ tóg há tĩ, ãjag tỹ inh ri ke han kỹ. 18Ãjag kã mĩ ũ tóg tag han ke tũ nĩ, ki kanhró sóg nĩ. Ãjag kuprẽg inh, kỹ sóg ãjag ki kanhró nĩ. Tag vỹ ãjag kã mĩ ũ to rán kỹ nĩ, ha mẽ: “ũ tỹ inh mré inh jamĩ ko mũ ẽn vỹ isovãnh ke mũ ha,” he tóg, Topẽ vĩ tỹ rán kỹ nĩ ki. Isỹ tag ve jé sóg ãjag kuprẽg. 19Ũri sóg ãjag mỹ tó mũ, ti tỹ isovãnh ke to hã, ãjag tỹ ẽn ve kỹ inh ki ẽkrég' he jé. Ẽn ve kỹ inh ki ge kỹ nỹtĩm nĩ jãvo. 20Ki hã sóg tó mũ, ha mẽ. Isỹ ãjag jẽgnẽnh ke vẽ. Kỹ ũ tỹ ãjag mỹ vĩ há han kỹ tóg inh mỹ vĩ há han ke mũ gé, hã ra tóg ũ tỹ inh jẽnẽg mũ ẽn mỹ vĩ há han ke mũ gé,” he tóg.
Ũ tỹ pã'i ag mỹ Jesus ven ke
(Mt 26.20-25; Mc 14.17-21; Lc 22.21-23)
21 Jesus tỹ tag tó kar kỹ tóg ti mỹ e tĩ. Krĩ kufy jagy ti nĩ, kỹ tóg ti mré mũ tĩ ag mỹ: “ki hã sóg tó mũ,” he mũ. “Ãjag kã mĩ ũ vỹ pã'i ag mỹ inh ven ke mũ,” he tóg. 22Kỹ tóg ag mỹ e tĩ. Ki kagtĩg ag nỹtĩ, kỹ ag tóg véké jagnẽ ki ẽvãnh mũ.
23Hã ra ũ tóg Jesus rã hã nĩ nĩ, ẽn kã, ti tỹ ti to há nĩn kỹ. 24Kỹ Simão tóg ti mỹ ti nĩgé ven mũ, ti tỹ ti mỹ: “ũ to ke nẽ?“ he jé. 25Kỹ tóg ti to grẽn ke kỹ ti mỹ: “Senhor, ũ to ke nẽ?“ he mũ. 26Kỹ Jesus tóg ti mỹ: “ẽmĩ tỹ sóg ti kume kã tỹ pun ke kỹ ti mỹ nĩm ke mũ. Ẽn hã vẽ,” he mũ. Kỹ tóg ẽmĩ mãn kỹ ti kume kã tỹ pun ke mũ sir, kỹ tóg Judas mỹ nĩm mũ, Simão Iscariotes kósin ẽn mỹ. 27Kỹ Judas tóg ko mũ. Ti tỹ ko kar mũ ra vẽsỹmér Satanás tóg ti kã ra rã ja nĩ sir. Kỹ Jesus tóg ti mỹ: “ã tỹ nén han sór mũ ẽn han tĩg nĩ, to fũrũn nĩ,” he mũ. 28Hã ra ũ ag tóg ki kagtĩg nỹtĩ, Jesus tỹ ti mỹ nén tó mũ ẽn ki. 29Judas vỹ ag jãnkamy ki rĩr tĩ. Hã kỹ ag kã mĩ ũ tóg: “ti hỹn ti mỹ: “ẽg mỹ fénhta to kũpra ũ han tĩg, he mũ, ke tũ nĩ kỹ ti tỹ ũn jagtar ag mỹ nén ũ nĩm ke hỹn,” he ag tóg mũ. 30Hã ra Judas tóg ẽmĩ ẽn ko kar kỹ króm ke kãkutẽ mũ, re mĩ. Hã ra tóg kuty nỹ.
Vẽjykre tãg
31 Judas tĩg kar kỹ Jesus tóg ti mré mũ tĩ ag mỹ: “vãhã tóg vẽnh ven ke mũ, isỹ tỹ ũn mág nĩ ti,” he mũ. “Tỹ sóg ẽprã ke fi kósin nĩ. Hã ra sóg vẽnh kar mỹ Topẽ tỹ tỹ ũn mág nĩ tag ven ke mũ gé. 32Isỹ vẽnh kar mỹ Topẽ tỹ tỹ ũn mág nĩ ven kỹ Topẽ tóg vẽnh kar mỹ isỹ tỹ ũn mág nĩ ti ven ke mũ gé. Vẽsỹmér tóg tag han ke mũ, Topẽ ti, ha vem nĩ,” he tóg.
33“Inh jãvy', ãjag mré sóg nĩ sĩ pẽ han mũ ver. Inh jãvãnh jé ãjag tóg ke mũ, hã ra ãjag tóg inh venh ke tũ nĩ. Tag tó inh, Judeu ag mỹ, hã ra sóg ãjag mỹ tag hã tó mũ gé, hã vỹ: ãjag pijé isỹ hẽn ra tĩg ke mũ ẽn ki kanhró nỹtĩ', he mũ. 34Kỹ sóg ãjag mỹ vẽjykre tãg nĩm sór mũ, hã vỹ: jagnẽ to há, he mũ. Ãjag to há tãvĩ sóg nĩ gé. Tag ri ke han nĩ, jagnẽ mỹ. Vẽjykre tãg hã vẽ. 35Ãjag tỹ jagnẽ to há nỹtĩn kỹ vẽnh kar vỹ ãjag jykre ki kanhrãn ke mũ. “Ti mré ke vỹ tỹ ag nỹtĩ,” he jé ag tóg ke mũ ãjag to, ag tỹ ãjag jykre há ve kỹ,” he tóg.
Jesus tỹ Simão mỹ nén tó mũ
(Mt 26.31-35; Mc 14.27-31; Lc 22.31-34)
36Kỹ Simão tóg Jesus mỹ: “Senhor, ã tỹ hẽ ra tĩg sór nẽ?“ he mũ. Kỹ tóg: “ẽn ra ã tĩg ke tũ nĩ ver, inh mré,” he mũ. “Kar kỹ ã tóg kejẽn ẽn ra tĩg ke mũ gé, inh nón,” he tóg.
37Kỹ Simão tóg ti mỹ: “isỹ ã mré tĩg há tóg tĩ. Isỹ ã tugrĩn ter kỹ tóg inh mỹ tỹ nén ũ tũ nĩnh mũ,” he mũ. 38Hã ra tóg: “vó, ũri ã tóg ón kỹ iso: ti ki kagtĩg sóg nĩ, he tãgtũ han ke mũ, galo kynkyr ke to hã. Ki hã sóg tó mũ, ha vem nĩ,” he mũ.
Currently Selected:
João 13: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido