Galácia 3
3
Ẽg tỹ Jesus ki ge kỹ krenkren ke
1 Galácia tá ke', ãjag ne tóg krĩ tũ nỹtĩ ve nĩ'. Ũ nỹ ãjag krĩn kónãn, ãjag tỹ Jesus Cristo tovãnh sór jé? Ti tỹ ka to sa ja ẽn tó kãn inh mỹr ãjag mỹ, hã ra ãjag tỹ ne jé vãsỹ vẽjykre ẽn han sór nẽ? 2Kỹ sóg ãjag ki tag jẽmẽ sór mũ, ha mẽ. Ãjag mỹ ãjag tỹ vãsỹ vẽjykre si mĩ mũn kỹ Topẽ kuprĩg tỹ jagrẽn kỹ nỹtĩ'? Vó. Sỹ ãjag mỹ tó tugrĩn ãjag tóg Cristo ki ge kỹ nỹtĩ. Kỹ ãjag tóg ti tugrĩn jagrẽn kỹ nỹtĩ ha. 3Kỹ krĩ tũ nỹtĩ sór tũg nĩ. Topẽ kuprĩg tỹ ãjag krĩn kỹ ãjag tóg Jesus ki ge ja nĩ. Kỹ: “vẽsóg ki sóg ti ki rã,” he tũg nĩ. 4Ke tũ nĩ mũ ra ãjag tóg fagrĩnh mỹ Topẽ kuprĩg tỹ jagrẽ nỹtĩ. Hã ra tóg inh mỹ tỹ fagrĩnh mỹ ke tũ nĩ. 5Kỹ Topẽ vỹ ẽg tỹ nén han vãnh hynhan ja nĩgtĩ gé. Ti mỹ ãjag tỹ vãsỹ vẽjykre ẽn mĩ mũ tugrĩn milagre ẽn hynhan'? Vó. Ãjag tỹ Cristo kãme sér mẽ kỹ ti ki ge tugrĩn tóg hynhan.
6Kỹ Abraão to jykrén nĩ gé. Topẽ ki tóg rã kỹ nĩ ja nĩ, kỹ tóg Topẽ mỹ tỹ ũn há nĩ sir. 7Ẽg tỹ Abraão nón Topẽ ki ge kỹ nỹtĩn kỹ ẽg tóg ti krẽ'krẽ ri ke nỹtĩ. 8Topẽ vỹ fóg ag mré kanhgág ag krenkren han sór mũ, ag tỹ ti ki ge kỹ. Hã kỹ tóg vãsỹ rán kỹ nĩ, Topẽ vĩ tỹ rán kỹ nĩ ki. “Povo kar mỹ sóg vĩ há han ke mũ, ã tugrĩn,” he ja tóg nĩ, Topẽ ti, Abraão mỹ. 9Topẽ tỹ Abraão mỹ vĩ há han kỹ tóg ũ tỹ ti nón ti ki ge kỹ nỹtĩ ag mỹ vĩ há han ke mũ gé sir.
10Ũ tỹ vãsỹ vẽjykre ẽn ki króm tugrĩn kren sór mũ ag mỹ tóg vĩ kónãn ke mũ, ag tỹ ge ra mranh kỹ, mỹr, ha mẽ. “Topẽ tỹ ẽg jyvẽn mũ tóg e nỹtĩ. Ẽg tỹ ki króm kãn ke vẽ. Ũ tỹ mranh pir han mũ mỹ tóg vĩ kónãn ke mũ, Topẽ ti,” he tóg, Topẽ vĩ tỹ rán kỹ nĩ ki. Hã ra ẽg tóg mranh kãn. 11Hã kỹ, ẽg tỹ Topẽ tỹ vãsỹ ẽg jyvẽn mũ ẽn ki króm sór mũ ra ẽg tóg mranh tĩ. Kỹ ẽg tóg ti mỹ há tũ nỹtĩ. Hã kỹ tag tóg rán kỹ nĩ gé: “ẽg tỹ Topẽ ki ge hã to ẽg tóg ti mỹ tỹ ũn há nỹtĩ. Kỹ ẽg tóg krenkren ke mũ,” he ja tóg nĩ. 12“Ãjag tỹ inh vĩ ki króm kỹ ãjag krenkren ke mũ,” he ja tóg nĩ gé. Hã ra ẽg tóg ki króm ki kagtĩg nỹtĩ, hã kỹ ẽg tóg vãsỹ vẽjykre ẽn ki króm sór mũ ra ki króm tũ nĩgtĩ.
13Kỹ Topẽ vỹ ẽg mỹ vĩ kónãn ke mũ vẽ, ẽg tỹ ti vĩ mranh ja to. Hã ra Cristo tóg Topẽ mỹ: “ha ag jagfy inh hã mỹ vĩ kónãn,” he ja nĩgtĩ'. Ti to tag tóg rán kỹ nĩ, ha mẽ: “ũ tỹ krunh to sa mũ ẽn mỹ tóg vĩ kónãn mũ, Topẽ ti,” he ja tóg nĩ. Hã kỹ ẽg tóg Cristo ki ge tugrĩn krenkren ke mũ. 14Topẽ tỹ Cristo hã mỹ vĩ kónãn kỹ tóg ẽg hã mỹ vĩ há han mũ sir, ti tỹ Abraão mỹ vĩ há han ja ẽn ri ke. Fóg ag mỹ tóg vĩ há han mũ, kanhgág ag mỹ ke gé, Jesus Cristo tugrĩn. Kỹ tóg ẽg mỹ ti kuprĩg jẽnẽg mũ sir, ẽg tỹ ti ki ge tugrĩn.
Jesus tỹ Abraão krẽ'krẽ ag kãfór nĩ
15Inh kanhkã', ẽprã ke jykre to jykrén nĩ. Kejẽn ũn régre ag tóg jagnẽ mré nén ũ to jykrén tĩ. To jykrén kar kỹ ag tóg rán tĩ. Kỹ ag tóg ag jigji ránrán tĩ gé sir. Tag pãte ũ tóg sir tỹ nén ũ han mãn ke tũ nĩ. Ẽprã ke jykre hã vẽ. 16Topẽ vỹ Abraão mỹ: “nén ũ há han jé sóg ke mũ, ã mỹ, ã krẽ'krẽ ag kã ũ mỹ ke gé,” he ja nĩ. Ti krẽ'krẽ ag kã ũn pir hã tó ja ti nĩ, hã vỹ: Cristo, he mũ.
17 Moisés mur ke to hã ke ja vẽ. Tag pãte, 430 (ke) anos tũg kỹ tóg Moisés mỹ ti tỹ ẽg jyvẽn ke ẽn nĩm. Ge ra tóg ti tỹ Abraão mỹ vẽjykre tó ja ẽn tỹ tũ' he ja tũ nĩ. 18Topẽ tóg ti vĩ hã tugrĩn Abraão kren han. Kỹ ẽg tóg Topẽ tỹ ẽg mỹ: “ẽn ve jé ãjag tóg ke mũ,” hen kỹ venh ke mũ, Abraão nón, ti krẽ'krẽ ag kã ũn pir tũgnĩn, hã vỹ Jesus, he mũ.
19Kỹ Topẽ tỹ ne jé Moisés mỹ ti tỹ ẽg jyvẽn ke ẽn tó ja nẽ? Ẽg tỹ: “vẽjykre tag vỹ pãno nĩ, tag vỹ há nĩ,” he jé, ẽg tỹ: “Topẽ vĩ mranh ja inh nĩ,” he jé.
Topẽ tỹ jẽnẽ jafã vỹ Moisés mỹ Topẽ vĩ ma kãtĩg ja nĩ. 20Kỹ Moisés tóg Topẽ ri kén Israel ag jyvẽn ja nĩgtĩ, ag tỹ Topẽ vĩ ki króm jé. Hã ra Topẽ tóg ti tỹ Abraão mré vẽmén kỹ ti pir mỹ ti mỹ tó. Ti pijé ũ jẽnẽ ja nĩ, ti tỹ ri kén ti mré vẽmén jé. Jesus mur tũg ki ke ja vẽ.
Topẽ tỹ vãsỹ ẽg jyvẽn
21“Topẽ tỹ ẽg jyvẽn mũ ra ẽg tóg ti vĩ mranh tĩ. Kỹ tóg ẽg kren han ke tũ nĩ,” he ãjag hỹn tĩ. Hỹ, ti tỹ ẽg jyvẽn mũ ra ẽg tóg mranh tĩ. Ti tỹ ẽg jyvẽn tỹ ẽg kren han ra ẽg tóg vẽsóg ki jykre kuryj nỹtĩnh mũ vẽ. 22Hã kỹ tóg: “vẽnh kar vỹ Topẽ vĩ mranh kãn ja nĩgtĩ,” he mũ, ti vĩ rá ki. Ẽg tỹ Jesus ki ge hã tugrĩn ẽg tóg krenkren ke mũ sir.
23Kỹ, ẽg tỹ Cristo ki genh ke to hã ẽg tóg Topẽ tỹ vãsỹ ẽg jyvẽn mũ ẽn ki króm ja tũ nĩgtĩ. Kỹ tóg ti tỹ ẽg mrãnmrãn ri ke ja nĩgtĩ, ti vĩ ti. Ẽg tỹ Cristo ki ge kỹ ẽg tóg hã ra kygvar kỹ nỹtĩ sir. Cristo mur to hã ke ja vẽ, Topẽ tỹ vãsỹ ẽg jyvẽn ja ẽn ti. 24Ẽg jyvẽn ja tóg nĩgtĩ, ẽg tỹ Cristo ki rãnh ke to jykrén jé. Cristo ki ge tugrĩn ẽg tóg Topẽ mỹ tỹ ũn há nỹtĩ ha. 25Kỹ, ẽg tỹ ti ki rã kar kỹ ẽg tóg Topẽ tỹ vãsỹ ẽg jyvẽn mũ ẽn to jykrén mãn tũ nĩ ha.
26Topẽ krẽ vỹ tỹ ẽg nỹtĩ ha, ẽg tỹ Jesus Cristo ki ge kỹ nỹtĩn kỹ. 27Ti jiji tó kỹ ẽg kygpe kỹ nỹtĩ, kỹ ẽg tóg tỹ ti ri ke nỹtĩ ha. 28Hã kỹ ẽg tóg tỹ jagnẽ ri ke nỹtĩ gé. Kỹ Judeu ag vỹ fóg mré tỹ jagnẽ ri ke nỹtĩ ha, kanhgág ag ke gé. Ũ camarada ag vỹ ag patrão ag ri ke nỹtĩ gé. Ag vỹ fag ri ke nỹtĩ gé. Nén ũ pir vỹ tỹ ẽg nỹtĩ, ẽg tỹ Jesus Cristo ki ge kỹ nỹtĩn kỹ. 29Kỹ, ẽg tỹ tỹ Cristo mré ke nỹtĩn kỹ ẽg tóg tỹ Abraão krẽ'krẽ nỹtĩ gé sir, ẽg kar. Kỹ ẽg venh ke mũ sir, Topẽ tỹ Abraão mỹ nén to ja ẽn ti.
Currently Selected:
Galácia 3: kgp
Highlight
Copy
Compare
Share
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
