Éfeso 5

Ẽg jykre tãg

1Topẽ tỹ vẽjykre han tĩ ẽn hã han nĩ, ãjag tỹ tỹ ti fe nỹtĩn kỹ, ti krẽ. 2Jagnẽ to há kar nỹtĩm nĩ, Cristo tỹ ẽg to há nĩ ri ke. Ẽg jagfy tóg vẽnh fẽg. Ẽg tỹ Topẽ mỹ nén ũ pũn ri ke ti nĩ, ti tỹ ẽg jagfy vẽnh fẽg mũ ẽn ti. Kỹ tóg Topẽ mỹ há tĩ sir.

3Topẽ tũ vỹ tỹ ãjag nỹtĩ. Hã kỹ vẽjykre pãno tỹ vẽmén sór tũg nĩ, ãjag tỹ han sór tũ nĩ jé. Ẽg prũ tũ mré nỹ, ẽg mén tũ mré nỹ, tỹ vẽmén sór tũg nĩ. Ãjag tỹ nén e hã tỹ vãsãn mẽ tỹ vẽmén sór tũg nĩ gé. 4Kỹ jagnẽ mỹ vĩ kónãn tũg nĩ. Jagnẽ to vĩ kónãn tũg nĩ gé. Fagrĩnh mỹ vĩ tũg nĩ gé. Nén ũ kavéj tỹ vẽmén tũg nĩ gé. Ẽg tỹ tag tó kỹn pijé há nĩ', ẽg tỹ tỹ Topẽ krẽ nỹtĩn kỹ. Ẽg tỹ nén tónh ken hã vẽ, ha mẽ: “ã tỹ inh mỹ nén jẽnẽg mũ tóg inh mỹ há kar nỹtĩ,” he jé ẽg tóg ke mũ, Topẽ mỹ vĩ há han kỹ. 5Tag to jykrén, ha mẽ: ũ tỹ ti prũ tũ fi mré nỹ mũ ẽn ti, ũ fi tỹ fi mén tũ mré nỹ mũ ẽn fi pijé Cristo venh ke mũ'. Ũ tỹ ti tỹ nén e hã tỹ vãsãn mũ ẽn pijé venh ke mũ'. Ẽg tỹ vẽnh kãgrá to jãn ẽn ri ke ti nĩ, ẽg tỹ ẽg tỹ nén e hã tỹ vãsãn mũ ẽn ti. Ũ tỹ ge pijé Cristo venh ke mũ', ti tỹ tỹ ẽg pã'i nĩ ẽn ti.

6Ũ tóg ón kỹ ãjag mỹ vẽnh vĩ há tó sór tĩ. Ũ tỹ ge vĩ jẽmẽ tũg nĩ, ke tũ nĩ mũ ra Topẽ tóg ãjag to jũnh ke mũ. Ti vĩ mranh vẽ mỹr, kỹ tóg ũ tỹ ge to jũnh ke mũ. 7Hã kỹ ag vĩ jẽmẽ sór tũg nĩ. 8Vãsỹ ãjag tóg vẽjykre ki kuty hã han ja nĩgtĩ gé. Hã ra Topẽ tóg ãjag mỹ vẽjykre ki kurã ẽn nĩm, ãjag tỹ ti ki gen kỹ. Kỹ vẽjykre ki kurã tag hã han sórm nĩ. 9Ẽg tỹ vẽjykre ki kurã hã han kỹ ẽg tóg jagnẽ mỹ vĩ há han ke mũ, vẽjykre kuryj. Ki hã tó jé ẽg tóg ke mũ gé, jagnẽ mỹ. 10Vẽjykre tỹ ẽg Senhor mỹ há nỹ ẽn hã han sórm nĩ. Ẽn hã to jykrén mág nĩ.

11Kejẽn ãjag tóg ũ vég tĩ, hã ra tóg vẽjykre ki kuty han tĩ. Kỹ ti mré han sór tũg nĩ. Ti mỹ: “kórég ti nĩ, tovãnh nĩ,” hem nĩ. 12Vẽnh péju kỹ ag tóg han tĩ, vẽjykre kórég ti. Ẽg mỹ'a tóg tĩ, ẽg tỹ ag tỹ nén han tĩ ẽn ve kỹ. 13Kejẽn tóg ag tỹ nén han mũ kri kurãg tĩ, kỹ tóg ve há tĩgtĩ, ag jykre ti. Kurã ki ẽg tóg ti kórég nĩ ẽn vég tĩ. 14Kỹ tóg há nĩ, ẽg tỹ vẽjykre kórég to: kórég ti nĩ, hen kỹ. Kỹ ẽg tóg tovãnh sór ke mũ. Hã kỹ ẽg tóg: “Topẽ vĩ mranh sór mãn tũg nĩ. Nũgme ki kutẽ sór tũg nĩ. Kỹ Cristo vỹ ã mỹ jẽngrẽ han ke mũ,” he tĩ, ẽg jãn kỹ.

15Ãjag tỹ nén han mũ to jykrén nĩ. Krĩ tũ nĩ sór tũg nĩ. Vẽjykre há ki vẽnh kanhrãn kỹ mũm nĩ. 16Kurã kren tũg sórm nĩ. Nén ũ jagy ve jé ẽg tóg ke mũ, hã kỹ tóg há tĩ, ẽg tỹ kurã kren tũ nĩn kỹ. Ũri ti rãnhrãj han nĩ. Kejen ti jagy tĩnh mũ, ẽg tỹ ti rãnhrãj han sór mũ ra. 17Ẽg Senhor vỹ ẽg tỹ nén ũ há han mũ ve sór tĩ. Kỹ tag hã to jykrén nĩ, ãjag tỹ tag hã han jé.

18 Vinho tỹ vẽsén tũg nĩ, tỹ vẽnh pépév han tũg nĩ, goj fa tỹ ke gé. Vẽjykre kórég vẽ. Topẽ kuprĩg tỹ ẽg fãn tag hã ne há nĩ'. 19Jagnẽ mré Topẽ tỹ jãn nĩ. Ẽg Senhor jé tóm nĩ. Ti kuprĩg vỹ ẽg kanhrãn tĩ gé, ẽg tỹ ẽg Senhor mỹ nén tó sór mũ to, ẽg tỹ ti tỹ jãn há han jé. Ẽg tỹ ti mỹ: “há kar ti nĩ,” henh ke vẽ gé. 20Ẽg jóg tỹ Topẽ mỹ ẽg tóg tónh ke mũ, ti hã mỹ ẽg tóg: “ã tỹ ẽg mỹ nén ven mũ vỹ há kar nỹtĩ,” henh ke mũ, ẽg tỹ ẽg Senhor tỹ Jesus Cristo jiji tón kỹ.

Ũ tỹ jagnẽ mré nỹtĩ fag jykre

21Ẽg tỹ Cristo kamẽg kỹ tóg há tĩ. Kỹ ẽg tóg jagnẽ jykre mĩ mũnh ke mũ gé, ẽg tỹ tỹ ti mré ke nỹtĩn kỹ.

22Ũn tỹtá fag jé fag mén ag jykre mĩ mũjẽg, fag tỹ ẽg Senhor jykre mĩ mũ ẽn ri ke. 23Fi krĩ vẽ, fi mén ti, ti tỹ fi ki rĩr jé. Cristo vỹ tỹ ti ki ge kỹ nỹtĩ kar ag krĩ nĩ, fag krĩ ke gé. Kỹ ẽg tóg tỹ ti há ri ke nỹtĩ, ti tỹ ẽg kren han kỹ, ti tỹ ẽg ki rĩr nĩn kỹ. 24Hã kỹ ẽg tóg, Cristo jykre mĩ mũgtĩ. Ge ti nĩgtĩ, ũn tỹtá fag jykre ti. Fag mén jykre mĩ fag mũnh ke mũ.

25Fag mén ag jé ag prũ fag to há nỹtĩ, Cristo tỹ ẽg to há nĩ ẽn ri ke. Ẽg jagfy tóg vẽnh fẽg, 26ẽg kar tỹ tỹ ti tũ nỹtĩ jé, fag ke gé. Goj tỹ ẽg kygpe kỹ nỹtĩ. Ti vĩ tỹ tóg ẽg jyvẽn tĩ, ẽg há nỹtĩ jé. 27Ẽg tỹ vẽnh mỹ nỹtĩnh ke tũ vẽ. Ẽg tỹ kaga ri ke nỹtĩnh ke tũ vẽ. Ẽg kórég nỹtĩnh ke tũ vẽ gé. Ẽg sĩnvĩ tãvĩ nỹtĩnh ke vẽ, ẽg tỹ tỹ ti tũ nỹtĩn kỹ. Cristo prũnh ke ri ke vỹ tỹ ẽg nỹtĩ.

28Tag ri ke han nĩ, ãjag prũ tỹ. Fag to há nỹtĩm nĩ, jagnẽ jykre mĩ mũm nĩ. “Inh há ri ke vỹ tỹ fi nĩ,” hem nĩ, fag to. Ũ tỹ ti prũ fi to há nĩn kỹ tóg vẽso há nĩ sir. 29Vẽnh ki rĩr há han ẽg tóg tĩ. Jẽg ẽg tóg tĩ, ẽg tar nỹtĩ jé. Ẽg pijé vẽnh kókén sór tĩ'. Cristo vỹ ẽg tỹ ge tĩ gé. Ẽg ki tóg rĩr há han tĩ gé. 30Ti há vỹ tỹ ẽg nỹtĩ, ẽg kar, ẽg tỹ ti ki ge kỹ nỹtĩn kỹ.

31Tag vỹ rán kỹ nĩ, ha mẽ: “ũn gré tóg ti prũ fi mré ti panh ré kỹ tĩ mũ, ti mỹnh fi ré kỹ ke gé. Ti prũ fi mré tóg tĩnh mũ. Fi mré tóg tỹ ũn pir nĩ sir,” he ja tóg nĩgtĩ, Topẽ vĩ rán ki. 32Tag vỹ tỹ nén ũ sĩnvĩ pẽ nĩ. Kỹ tóg Cristo to rán kỹ nĩ gé, ti tỹ ũ tỹ ti ki ge kỹ nỹtĩ ag mré tỹ ũn pir nĩn kỹ. 33Hã ra tóg ẽg mỹ rán kỹ nĩ gé, ẽg tỹ ẽg prũ fag to há nỹtĩ jé, ẽg tỹ vẽnh ki rĩr há han mũ tag ri ke. Kỹ tóg fag mỹ rán kỹ nĩ gé, fag tỹ fag mén vĩ jẽmẽn jé.

Currently Selected:

Éfeso 5: kgp

Highlight

Copy

Compare