Éfeso 3
3
Fóg mré kanhgág mỹ ke
1Hã kỹ sóg Topẽ mré vĩ tĩ, inh, hã vỹ: Paulo, he mũ. Se kỹ inh jẽ, Jesus Cristo tugrĩn. Isỹ ãjag to há nĩn kỹ sóg se kỹ jẽ, isỹ ũ tỹ Judeu jykre han tũ kar ag to há nĩn kỹ. 2Ãjag hỹn tóg Topẽ tỹ isar han mũ ẽn mẽ. Isỹ ãjag ki rĩr jé tóg isar han, isỹ ũ tỹ Judeu jykre han tũ ag ki rĩr jé. 3Topẽ ne inh mỹ ti tỹ vãsỹ nén to jykrén mũ ẽn tó', hã kỹ sóg ãjag mỹ kãmén sĩ han huri. 4Ãjag tỹ inh vẽnh rá tag ve kỹ ãjag tóg inh jykre venh ke mũ sir. Cristo vỹ nén ũ tãg han jé kãtĩg ja nĩ. 5Ti tỹ inh mỹ tag tó to hã ag tóg ki kagtĩg ja nỹtĩgtĩ, ẽg jógjóg ag, ẽprã ke kar ag. Ũri tóg ẽg mỹ tó mũ, ti kuprĩg tỹ, apóstolo ag mỹ ke gé, ẽg jyvẽn tĩ ag mỹ ke gé, ti tũ kar ag mỹ. 6Ti tỹ ẽg mỹ nén ũ tãg tó mũn hã vẽ, ha mẽ. Vãsỹ Topẽ tóg Judeu ag hã mỹ vĩ há han ja nĩ. Ũri tóg fóg ag mỹ, kanhgág ag mỹ vĩ há han mũ ha, Judeu ag mré. Ẽg kar vỹ tỹ Jesus Cristo há ri ke nỹtĩ ha, ẽg tỹ ti ki ge kỹ nỹtĩn kỹ. Kỹ ẽg tóg ẽg tỹ Jesus Cristo tugrĩn nén venh ke mũ ẽn ve kãn ke mũ gé.
7Tag to Topẽ tóg inh mỹ: “ha fóg kar ag mỹ, kanhgág kar ag mỹ tónh tĩg,” he ja nĩgtĩ. Kỹ tóg to isar han, inh rãnhrãj to. 8Topẽ tũ kãsir ag kar jakrẽm inh nĩ, hã ra tóg isar han, sỹ fóg ag mỹ, kanhgág ag mỹ Cristo kãmén jé. Cristo tugrĩn tóg ẽg mỹ nén ũ há tãvĩ han ke mũ. Hã tó sóg tĩ, vẽnh kar mỹ. 9Vẽnh kar mỹ sóg kãmén tĩ, ti tỹ nén han ke ti. Vãsỹ tóg to: “tag han jé sóg ke mũ,” he ja nĩgtĩ. Ti tỹ nén kar han tũg ki tóg to jykrén ja nĩgtĩ. Ti hã ne nén kar han'. Ge ra tóg ũ mỹ tó ja tũ nĩ ver. 10Ũri tóg ve há tĩ ha, ti tỹ vãsỹ nén to jykrén mũ ẽn ti. Kanhkã tãn ag mỹ tóg ve há tĩ ha, tá pã'i ag mỹ. Ag tỹ ũ tỹ Jesus ki ge kỹ nỹtĩ ag ve kỹ ag tóg Topẽ jykre hapẽ ẽn ki kanhró nỹtĩ.
11Vãsỹ tóg to jykrén, ti tỹ ẽg pã'i tỹ Jesus Cristo tugrĩn nén ũ han sór mũ ẽn ti. 12Ti hã ki ẽg ge kỹ nỹtĩ, hã kỹ ẽg tóg jatun mỹ Topẽ mré vẽmén tĩ ha. Ẽg kanẽ jun mãn ke tũ ti nĩ ha, Topẽ ti. 13Hã kỹ sóg ãjag mỹ: “sỹ ãjag jagfy jagtar nĩ tag mĩ ẽkrén kỹ Jesus to krónh ke sór tũg nĩ,” he mũ. Ãjag jagfy ke vẽ, isỹ nén vég mũ tag. Inh jagtar tag tugrĩn ãjag tóg nén ũ há venh ke mũ, ha vem nĩ.
Cristo tỹ ẽg to há nĩ
14Hã jé sóg Topẽ mré vẽmén tĩ. Ẽg jóg vẽ mỹr. 15Ti tugrĩn ẽg tóg rĩnrĩr nỹtĩ, ẽprã ke kar, kanhkã tá ke kar ke gé. Kỹ tóg ẽg ki rĩr tĩgtĩ. 16Kỹ sóg ti hã mỹ to vĩ tĩ, ti tỹ ti kuprĩg tỹ ãjag tar han jé. Nén ũ kar vỹ tỹ ti tũ nỹtĩ. Tar ti nĩ gé. Ti hã mỹ sóg to vĩ tĩ, 17ti tỹ Cristo tỹ ãjag ki ẽmã han jé, ãjag tỹ ti ki ge kỹ nỹtĩn kỹ. Ti tỹ ẽg to há nĩ vỹ tỹ ga ri ke nĩ, ẽg tỹ ti ki jãrén jé, ka jãrén ri ke. Kỹ ẽg tóg ti to tar nỹtĩ sir. Hã jé sóg ti mỹ ãjag tó tĩ gé. 18Topẽ tỹ ẽg kren han mũ vỹ, ẽg tỹ nén ve vãnh ri ke nĩ. Kỹ sóg Topẽ mré vẽmén tĩ, ti tỹ ãjag mỹ tag kãmén kãn jé, ti tũ kar ag mỹ ke gé. Topẽ tỹ ẽg kren han mũ vỹ nén ũ téj gy ri ke nĩ. Krỹg ja tũ ti nĩ. Hã kỹ ẽg tóg vẽsóg ki to jykrén kãn ke tũ nĩ. 19Cristo vỹ ẽg to há tãvĩ nĩ, tag to jykrén kãn ke tũ ẽg tóg nĩ gé. Kỹ sóg Topẽ mỹ: “ha ag mỹ tag kãmén,” he tĩ, ãjag tỹ ti hã tỹ krĩn kỹ nỹtĩ jé.
20Ha vé, Topẽ hã ne tar tãvĩ nĩ'. Hã kỹ tóg ẽg tỹ ti mỹ nén ũ to vĩn kỹ ẽg mỹ kãfór han tĩ. Kỹ tóg ẽg tỹ nén ũ to jykrén mũ kãfór han tĩ gé. 21Kỹ ẽg tóg ti hã mỹ vĩ há han ke mũ, ẽg tỹ Jesus Cristo ki ge kỹ nỹtĩn kỹ. Ẽg tỹ ti mỹ vĩ há han vỹ tũ' henh ke tũ nĩ. Hã vẽ.
Currently Selected:
Éfeso 3: kgp
Highlight
Copy
Compare
Share
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
