Han Kãme 19

Paulo tỹ ẽmã tỹ Éfeso tá nĩ

1Kỹ Apolo tóg Corinto tá nĩ nĩ sir. Hã ra Paulo tóg ga ẽn mĩ tĩg ja nĩgtĩ, pãnónh kri kyjer ẽn mĩ. Kỹ tóg Éfeso tá jun mũ sir.

2Tá ũ ag tóg Jesus ki ge ja nĩgtĩ. Kỹ Paulo tóg ag mỹ: “ãjag mỹ Topẽ kuprĩg tỹ jagrẽ nỹtĩ', ãjag tỹ Jesus ki gen kỹ'?“ he mũ. Kỹ ag tóg ti mỹ: “kỹ ne nẽ ge, Topẽ kuprĩg ti?“ he mũ. 3Kỹ Paulo tóg: “ãjag tỹ vẽnh kygpe kỹ ãjag hẽ ri ké?“ he mũ. Kỹ ag tóg: “João tỹ ag kygpe ri ke ti nĩ, “ he mũ. 4Kỹ tóg: “João tóg ag kygpe ja nĩgtĩ, ag tỹ ag jykre pãno tovãnh kỹ,” he mũ. “Kỹ tóg vẽnh kar mỹ: ũ tỹ inh nón kãtĩg ke mũ ẽn ki gem nĩ, hã vỹ: Jesus, he mũ, he ja nĩ,” he tóg, Paulo ti. 5Kỹ tóg ag kygpég mũ sir, Jesus jiji tó kỹ. 6Kỹ tóg ti nĩgé tỹ ag mẽg mũ, kỹ Topẽ kuprĩg tóg ag ki rã mũ sir. Vẽnh vĩ ũ tugtó ag tóg mũ sir. Kỹ ag tóg Topẽ vĩ tó mũ gé. 7Ũ tỹ 12 (ke) ag hỹn, vẽnh vĩ ũ tugtó mũ ẽn ag.

8Kỹ Paulo tóg Judeu ag vẽnh kanhrãn jafã kã ra rã mũ. Mũmẽg vãnh nĩn kỹ tóg Topẽ tỹ tỹ ẽg pã'i nĩ kãmén mũ. Kysã tãgtũ ki tóg ag mỹ kãmén mũ. 9Hã ra ũ ag tóg ti vĩ to fe ũ nỹtĩ sir, ag tỹ kri fi jãvãnh nỹtĩn kỹ. Kỹ ag tóg to é he kỹ to vĩ kónãn mũ, vẽnh kar jo. Kỹ tóg ag mré vĩ mãn tũ nĩ sir. Jesus mré mũ ag mỹ tóg: “vyr mỹ ẽg nỹtĩnh mũ,” he mũ. Kỹ tóg ag hã kanhrãn mũ sir, professor tỹ Tirano escola krẽm.

10Prỹg régre ki tóg tá nĩ nĩ, Paulo ti. Hã kỹ ga tỹ Ásia tá ke kar ag vỹ Jesus vĩ mẽg mũgtĩ, Judeu ag kar, fóg ag kar ke gé. 11Kỹ Topẽ tóg Paulo mỹ vẽjykre nĩm mũ gé. Kỹ tóg ẽg tỹ nén han vãnh tỹ hẽn ri ke han mũ. 12Kejẽn ag tóg Paulo kur mãn kỹ ũn kaga ag mỹ ven mũ. Kỹ ag tóg ag tỹ mẽgmẽ kỹ hághá' he mũ. Kỹ vẽjagrẽ kórég ag vỹ gen kỹ pa mũ gé.

Kujá ag

13Hã ra Judeu ag kujá ag vỹ tá nỹtĩ gé. Kujá ẽn ag tóg ẽmã kar kri rũm ke tĩ. Kejẽn ag tóg ag tỹ vẽjagrẽ kórég ve kỹ ón kỹ Jesus jiji tó tĩ. Kỹ ag tóg ũ mỹ: “Jesus jykre tỹ sóg ã kutẽm ke mũ, Paulo tỹ ũn kãmén tĩ ẽn jykre tỹ,” he mũ. 14Topẽ tũ to pã'i mág tỹ Ceva krẽ tỹ 7 (ke) ag vẽ.

15Ag tỹ ũn jagrẽ kórég mỹ Jesus jiji tó kỹ tóg ag mỹ: “Jesus ki kanhró sóg nĩ, Paulo mẽ inh huri ke gé, hã ra ãjag tóg tỹ ũ nỹtĩ?“ he mũ. 16Kỹ ũn jagrẽ kórég ẽn tóg ag to hũm he mũ. Ag kygrẽg tóg mũ, hã ra ag tóg ti tỹ hẽ ri ke tũ nĩ. Ag kur tóg jynjar kãn mũ. Kỹ ag tóg kator pétẽ mũ sir, kygvénh kỹ. 17Kỹ Éfeso tá ke kar ag tóg mẽg mũ, Judeu kar, fóg ag kar ke gé. Kỹ ag tóg mũmẽgmẽg mũ sir. Kỹ Jesus Cristo jiji tóg ag mỹ tar nĩ. Ag mỹ tóg nén kar kãfór nĩ.

18Kỹ Jesus ki ge kỹ nỹtĩ ag tóg ag jykre kórég tugtó mũ sir, jagnẽ mỹ. 19Ũ ag tóg kujá tũ han ja nĩgtĩ. Kỹ ag tóg ag vẽnh rá gé kãmũ mũ, kujá tỹ vẽnh rá ẽn ti. Kỹ ag tóg kugprũn kãn mũ sir, vẽnh kar rĩnve. Ag tỹ ti kaja nĩkrén kỹ tóg kaja e ja nĩ, jãnkamy tỹ 50 mil (ke) hỹn. 20Hã kỹ Topẽ vĩ tóg sir vẽnh kar kri rũm ke mũ. Kỹ ũ tỹ hẽn ri ke ag tóg kri fig mũ sir.

Éfeso tá vẽnh génh

21Kar kỹ Paulo tóg ga tỹ Macedônia mĩ kutẽ sór mũ, ga tỹ Grécia mĩ, Jerusalém ra tĩg jé. “Isỹ Jerusalém ra tĩg kar kỹ sóg ẽmã tỹ Roma ra tĩg sór mũ gé,” he tóg. 22Kỹ tóg ga tỹ Macedônia ra ũn régre ag jẽgnẽg mũ, ti mré rãnhrãj mũ ag, hã vỹ: Timóteo mré Erasto, he mũ. Jãvo ti hã tóg ga tỹ Ásia tá nĩ nĩ ver.

23Kejẽn ag tóg jagnẽ kato tẽgtẽ mũ, Jesus japry tugrĩn. 24Ũ tóg Éfeso tá nĩ nĩ, ti jiji hã vỹ: Demétrio he mũ. Ũ tỹ topẽ tỹ Artemis he mũ fi jo ĩn sĩ kãgrá han mũ vẽ, prata tỹ. Ti mré rãnhrãj mũ tỹ hẽn ri ag tóg vẽnh rãnhrãj ẽn ki nén há vég tĩ. Ag gỹjỹ vẽ.

25Kỹ tóg ti mré rãnhrãj mũ ag jé prẽr kãn mũ. Kỹ tóg ag mỹ: “ha vé, vẽnh rãnhrãj tag ki ẽg tóg nén ũ há vég mũgtĩ,” he mũ. 26“Hã ra Paulo tag tóg ũ tỹ hẽn ri ke krĩn mũ sir, ga tỹ Ásia mĩ hã. Ag mỹ tóg: vẽnh nĩgé tỹ han ja pijé tỹ Topẽ nĩ', he tĩ. Kỹ ag tóg ti vĩ kri fig tĩ sir. 27Kỹ ẽg gỹjỹ tag tóg tũ' he sór mũ sir, ti tugrĩn. Hã ra Artemis fi jo ĩn tóg tỹ nén ũ tũ nĩ ha ke gé, ti sĩnvĩ nĩ ra. Kỹ fi tóg tỹ nén ũ tũ nĩ gé sir, fi tỹ tỹ ũn mág nĩ ra. Ásia kar mĩ ag tóg fi to jãnjãn tĩ, ga kar mĩ. Hã ra Paulo tóg fi tỹ tũ' henh ha,” he tóg, Demétrio ti.

28Kỹ ag fe tóg gỹm ke mũ sir. Kỹ ag tóg jamã hára prẽnprẽr kỹ: “!..topẽ tỹ Artemis fi vỹ ẽg kãfór ne..! !..Tỹ fi Éfeso ag tũ ne..!“ he mũ sir. 29Kỹ ẽmã ẽn ki ke ag tóg jagnẽ kato tẽgtẽ mũ sir. Kỹ vẽnh kar tóg ĩn mág ẽn ra pétẽ mũ, ĩn kri ĩn tũ ẽn ra. Gaio he mũ ẽn pére ag tóg mũ mũ, ti kãgmĩ kỹ, Aristarco ke gé. Macedônia tá ag tóg Paulo mré kãmũ ja nĩgtĩ. Ẽn ag kugmĩ kỹ ag tóg ag tatĩ mũ mũ.

30Kỹ Paulo tóg ra tĩg sór mũ, ag mré vĩ jé. Hã ra ti mré ke ag tóg ti mỹ: “tĩ tũg ra,” he mũ. 31Kỹ ga tỹ Ásia tá pã'i ag tóg ti mỹ vẽnh vĩ jẽnẽg mũ gé, ti tỹ ĩn mág ẽn ra tĩ tũ nĩ jé. Ti to ag tóg há nỹtĩ.

32Ðn mág ẽn tá ag tóg vẽnh mãn kỹ nỹtĩ nĩ, ũ tỹ hẽn ri ke ag. Kỹ ũ ag tóg nén ũ tó tĩ, prẽnprẽr kỹ, jó ũ ag tóg nén ũ ũ tó tĩ gé, prẽnprẽr kỹ. Kỹ ag tóg: “ẽg tỹ hẽ ri ke jé vẽnh mãn ne hỹn'?” he mũ. 33Kỹ Judeu ag tóg vẽnh kar mỹ ũ ven mũ gé, Alexandre he mũ ẽn. Kỹ tóg ti nĩgé tỹ ge mũ, ag tỹ katy' he jé. Kỹ tóg ag mỹ kãmén sór mũ. 34Kỹ ag tóg ti tỹ tỹ Judeu nĩ vég mũ sir. Hã ra tá fóg ag tóg Judeu ag to jũgjũ nỹtĩ. Kỹ vẽnh kar tóg prẽnprẽr kỹ: “!..Éfeso tá ke fi vỹ vẽnh kar kãfór ne..! !..Artemis he mũ fi vỹ vẽnh kar kãfór ne..!“ he mũ. Óra régre han ag tóg mũ sir, prẽnprẽr kỹ.

35Hã ra governo tỹ pã'i ũ tóg ag fe tỹ há' he sór mũ. Kỹ tóg ag mỹ: “Éfeso tá ke',” he mũ. “Vẽnh kar vỹ Artemis fi ki kanhró nỹtĩ,” he tóg. “Éfeso tá ẽg tóg fi ki rĩr mũ. Fi kãgrá nẽji tóg kanhkã tá kãtére ja nĩ,” he tóg. 36“Ũ tóg tag kato vĩ tũ nĩgtĩ. Hã kỹ jatu' hé. Krĩ rỹ han tũg ra,” he tóg. 37“Tag ag tatĩ ãjag tóg kãmũ ja nĩgtĩ, hã ra ag tóg topẽ fi ĩn tá nén ũ péju ja tũ nĩgtĩ. Ẽg topẽ fi to ag tóg vĩ kónãn ja tũ nĩgtĩ gé,” he tóg. 38“Demétrio mỹ ag kato vĩ sór mũ'? Vẽnh kãgrá han mũ ag mỹ ti mré ag vĩ kafãn sór mũ'? Kỹ kófa ag mỹ tóm nĩ ge, vẽjyvẽn ke kurã ẽn kã. Ag kato vĩm nĩ ge,” he tóg. 39“Ãjag tỹ hã ra nén ũ tó sór kỹ ãjag tóg ẽg tũ ki kanhró nỹtĩ. Kurã nĩm jé ẽg tóg ke mũ, kỹ ẽg vẽnh mãn kỹ venh mũ,” he tóg. 40“Hã ra ẽg tỹ ón kỹ vẽnh génh kỹ, ũ ag hỹn ẽg to: pã'i mág tỹ imperador kato ag tẽ sór mũ, he mũ. Nén ũ tũ to ãjag tóg vẽnh mãn mũ. Ũ tỹ ẽg mỹ: ne nẽ? he mũ ra ẽg tỹ ne tónh ke tóg tũ tĩ,” he tóg, pã'i ti. 41Kar kỹ tóg ag mỹ: “ha mũ jẽg,” he mũ. Kỹ ag tóg mũ mũ sir.

Currently Selected:

Han Kãme 19: kgp

Highlight

Compare

Copy