1 Tessalônica 5
5
Jesus tỹ kãnhmar kãtĩg mãn ke
1Inh kanhkã', ti kãtĩg ke ki kanhró ẽg tóg nỹtĩ. Hã ra ẽg tóg ti kurã hã ki kagtĩg nỹtĩ, ti prỹg ke gé. Tag mẽ ãjag tóg huri, hã kỹ sóg ãjag mỹ tó mág ke tũ nĩ ha. 2Vãhãn kãtĩg, ẽg Senhor ti. Hã ra tóg ũ tỹ ẽg tỹ nén ũ péju tĩ kãtĩg ri ke nĩnh mũ. Ẽg vatánh tá tóg ẽg tũ mãg tĩ. Kỹ tóg ge nĩnh mũ, ẽg Senhor kãtĩg ti. 3Ti to há tũ ag vỹ: “jatun mỹ ẽg nỹtĩ. Ũ vỹ ẽg vóg ke tũ nĩ,” henh ke mũ. Ag tỹ tag tó mũ ra tóg vãhã kãtĩg mũ. Kỹ ag tóg nũgme ki vár ke mũ sir. Ag tỹ to jykrén tũ hã ra ti kãtĩg kỹ ag tóg krenkren ke tũ pẽ nĩ, ha vem nĩ.
4Inh kanhkã', ãjag hã ne tóg tỹ Jesus mré ke nỹtĩ'. Hã kỹ tóg ãjag ki kuty tũ nĩ. Kỹ ãjag tóg ki kanhró nỹtĩ. Kỹ ti kãtĩg vỹ ãjag mỹ nén ũ péju tĩ kãtĩg ri ke tũ nĩ, ãjag tỹ ki kanhró nỹtĩn kỹ. 5Ti krẽ vỹ tỹ ãjag nỹtĩ. Hã kỹ tóg ãjag ki kurã nĩ, ãjag tỹ ki kanhró nỹtĩn kỹ. Kuty tũ ti nĩ, ẽg ki. Ti kãtĩg ke ki kanhró ẽg tóg nỹtĩ, hã kỹ tóg ẽg ki kurã nĩ sir.
6Kỹ ti kãtĩg ke kã jatun tũg nĩ. Vẽso jykrén nĩ, ãjag tỹ ti kãtĩg ke jo vẽnh jãnhkrigkrig jé, ãjag tỹ kã jatun tũ nĩ jé. 7Ũn nũgnũr mũ ag vỹ kuty kỹ nũgnũr tĩ. Kỹ ag tóg ti kãtĩg ke kã jatu nỹtĩ. Kỹ ũn kronkron mũ ag vỹ kuty kỹ pépév mũgtĩ, ag kãgter nỹtĩn kỹ. Kỹ ag tóg vẽso jykrén tũ nỹtĩ. Kuty tá vẽjykre hã vẽ. 8Ẽg jé kurã tá vẽjykre há ẽn ti han jãvo. Ẽg jé vẽso jykrén. Ẽg jé jagnẽ to há to krónh ke tũg.
Kỹ ẽg tóg vẽnh gég tĩ ag tar ri ke nỹtĩnh mũ. Kỹ tóg ẽg mỹ soldado kur ri ke nĩ sir, ti ki rã ti, jagnẽ to há ti ke gé. Ẽg tỹ jagnẽ to há to tar nỹtĩn kỹ ẽg tóg krenkren ke mũ. Kỹ tóg ẽg mỹ soldado tỹ sãpe tỹ ferro ẽn ri ke nĩ sir. 9Topẽ vỹ ẽg kuprẽg, ẽg tỹ ti jũ vég tũ nĩ jé, ẽg krenkren jé, ẽg tỹ nũgme ki vár tũ nĩ jé, Jesus Cristo tugnĩn, ẽg Senhor ti. 10Ti hã ne ẽg jagfy ter ja nĩ', ẽg tỹ ti tugrĩn rĩnrĩr nỹtĩ jé. Ẽg tỹ ti kãtĩg ke jo kãgter mũ ra ẽg tóg ti mré nỹtĩnh mũ. Ẽg kãgter tũ ra ẽg tóg ti mré tá nỹtĩnh ke mũ gé, ti kãtĩg kỹ. Jagnẽ ri ke ẽg nỹtĩnh mũ. 11Tag tóm nĩ, jagnẽ mỹ. Tỹ jagnẽ krĩ tỹ kãnhvy' hem nĩ gé, ũn ter mũ to. Kỹ tỹ jagnẽ jyvẽn nĩ gé, ãjag tar nỹtĩ jé. Tó ãjag tóg mũgtĩ, kỹ tó há han nĩ.
Vẽjykre há ti
12Inh kanhkã', nén ũ tó jé sóg ke mũ gé. Ãjag kã mĩ ũ ag tóg tỹ ãjag kófa nỹtĩ, igreja to, Jesus mré ke ũ ag. Ãjag jyvẽn ag tóg tĩ. Ãjag to ag tóg vãsãn tĩ. 13Ẽn ag kamẽg nĩ. Ag mỹ vĩ há han nĩ. Ag to há tãvĩ nỹtĩm nĩ, ag tỹ ãjag ki rĩr kỹ. Jagnẽ krĩ rỹg tũg nĩ.
14Inh kanhkã', tag tó jé sóg ke mũ gé, ha mẽ. Ũ tỹ vẽnhmỹ mẽ ag jyvẽn tar han nĩ. Ũ tỹ kãnhmar krónh ke tĩ ag mré komẽr hã vĩm nĩ. Ũn fe krój ag fe tỹ tar' hem nĩ. Vẽnh kar mỹ komẽr hã vĩm nĩ. 15Ũ tỹ ãjag mỹ nén ũ kórég han mũ ra ti mỹ nén ũ kórég han tũg nĩ jãvo. Vẽnh kajãm tũg nĩ. Nén ũ há tãvĩ han nĩ jagnẽ mỹ, vẽnh kar mỹ ke gé.
16Kurã kar ki ãjag fe tỹ mrin kem nĩ. 17Kurã kar ki ẽg jóg mág mré vĩm nĩ, ãjag tỹ ti to krónh ke tũ nĩn jé. 18Nén ũ kar to ti mỹ: “inh mỹ tóg há tĩ,” hem nĩ gé. Topẽ jykren hã vẽ. Jesus Cristo nón ẽg tóg ti jykre han ke mũ. Ẽg tỹ nén ũ vég mũ kar to ẽg tóg: “inh mỹ tóg há nĩ,” henh ke mũ.
19Topẽ kuprĩg tỹ ãjag krĩn sór kỹ ti mỹ: “nejé,” he tũg nĩ. 20Kejẽn Topẽ kuprĩg tóg ũ krĩn tĩ, kỹ tóg Topẽ vĩ tó mũ sir. Ẽn to é he tũg nĩ. 21Ũ tỹ ãjag mỹ vĩn kỹ to: “vẽnh vĩ há mỹ'?“ hem nĩ. Ti tỹ tỹ ãjag mỹ vẽnh vĩ há nĩn kỹ jẽmẽm nĩ. 22Ti há tũ nĩn kỹ jẽmẽ tũg nĩ, ãjag tỹ nén ũ kórég han tũ nĩ jé. Nén ũ kórég han sór tũg nĩ.
23Topẽ vỹ ãjag krĩ kuprãg tĩ. Ti mỹ sóg to vĩ tĩ, ti tỹ ãjag tar han jé, ti tỹ ãjag jykre há han jé, ãjag fe ti ke gé, ãjag krĩ ti ke gé. Ẽg Senhor tỹ Jesus Cristo kãtĩg mãn kỹ tóg ẽg jykre tugnỹm ke mũ sir. Hã jé tóg ẽg jykre há han sór mũ. 24Ũ tỹ ẽg kuprẽg mũ vỹ ẽg jykre há han sór mũ, hã vỹ: Topẽ, he mũ. Fagrĩnh mỹ ti vĩ vãnh nĩgtĩ.
25Inh kanhkã', iso Topẽ mré vĩm nĩ gé. 26Jagnẽ ki nhun ke ri ke han nĩ, Jesus mré ke kar ki, jagnẽ nĩgé kãgmĩ kỹ. 27Ẽg Senhor rĩnve sóg ãjag mỹ: “Jesus ki ge kỹ nỹtĩ kar ag tỹ isỹ nén rán mũ tag mẽ kãn ke vẽ,” he mũ mỹr. Hã kỹ sóg: “ag kar mỹ to kem nĩ,” he mũ. 28Ẽg Senhor tỹ Jesus Cristo mỹ sóg to vĩ tĩ, ti tỹ ãjag tar han jé.
Hã vẽ.
Currently Selected:
1 Tessalônica 5: kgp
Highlight
Copy
Compare
Share
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
