Efesios 1
1
Laj Pablo quixtakla xsahil xchꞌo̱leb
1La̱in laj Pablo. La̱in x-apóstol li Jesucristo xban nak joꞌcan quiraj li Dios. Yo̱quin chixtzꞌi̱banquil li hu aꞌin e̱riqꞌuin la̱ex laj pa̱banel li cuanquex Éfeso. Yo̱quin chi tzꞌi̱bac e̱riqꞌuin che̱junilex la̱ex li nequeqꞌue e̱chꞌo̱l chixpa̱banquil li Jesucristo. 2Chicua̱nk taxak e̱riqꞌuin li ruxta̱n ut li tuktu̱quil usilal li naxqꞌue li Dios li kaYucuaꞌ ut li naxqꞌue li Ka̱cuaꞌ Jesucristo.
Li Cristo na-osobtesin ke
3Lokꞌoninbil taxak li Dios lix Yucuaꞌ li Ka̱cuaꞌ Jesucristo. Xban nak junajo chic riqꞌuin li Cristo, li Dios naxqꞌue chak ke chixjunil li kosobtesinquil li nachal chak saꞌ choxa. 4Nak toj ma̱jiꞌ naxyi̱b chak li ruchichꞌochꞌ li Dios, ac sicꞌbil chak ku xban saꞌ xcꞌabaꞌ li Jesucristo, re nak ti̱cak li kayuꞌam ut ma̱cꞌaꞌak chic kama̱c. 5Xban nak nocoxra, joꞌcan nak quixsicꞌ chak ku re nak la̱ako chic li ralal xcꞌajol saꞌ xcꞌabaꞌ li Jesucristo. Quixba̱nu chi joꞌcan xban nak joꞌcan quiraj. 6Joꞌcan nak chikalokꞌonihak ru li Dios xban nak yal chi ma̱tan quiruxta̱na ku nak quixtakla chak li Ralal li kꞌaxal raro xban. 7Kꞌaxal numtajenak li rusilal li Dios li quixqꞌue ke xban nak riqꞌuin xcamic li Jesucristo, cuan kacolbal ut cuybil sachbil chic li kama̱c. 8Li rusilal quixqꞌue ke chi numtajenak xqꞌuial ut quixqꞌue kanaꞌleb re nak takatau ru lix ya̱lal. 9Ut quixcꞌutbesi chiku li naꞌleb li mukmu nak quicuan chak junxil, aꞌ li qui-ala saꞌ xchꞌo̱l xba̱nunquil nak quixtakla chak li Jesucristo. 10Ta̱cuulak xkꞌehil nak ta̱tzꞌaklok ru chixjunil joꞌ naraj li Dios. Tixjunaji chixjunil li cꞌaꞌru cuan joꞌ saꞌ choxa joꞌ saꞌ ruchichꞌochꞌ. Ut aꞌ chic li Cristo ta̱jolomi̱nk re chixjunil. 11La̱o aj judío sicꞌbil ku xban li Dios chokꞌ ralal xcꞌajol saꞌ xcꞌabaꞌ li Cristo. Aꞌin qui-uxman xban nak joꞌcan quiraj li Dios ut xban nak aꞌan yal re saꞌ xbe̱n chixjunil. 12Quixba̱nu chi joꞌcan re nak lokꞌoninbilak ru kaban la̱o li co-oybenin re li Cristo nak toj ma̱jiꞌ nacꞌulun saꞌ ruchichꞌochꞌ. 13Ut joꞌcan ajcuiꞌ la̱ex li ma̱cuaꞌex aj judío. Nak xerabi lix ya̱lal li colba-ib, la̱ex xepa̱b li Cristo ut xecꞌul li Santil Musikꞌej, li quiyechiꞌi̱c e̱re chokꞌ retalil nak la̱ex chic li ralal xcꞌajol. 14Li Santil Musikꞌej quiqꞌueheꞌ ke chokꞌ retalil nak takacꞌul chixjunil li yechiꞌinbil ke xban li Dios ut ta̱tzꞌaklok ru li kacolbal. Joꞌcan nak lokꞌoninbilak ru riqꞌuin lix nimal xcuanquilal.
Laj Pablo natijoc chirixeb laj pa̱banel
15La̱in xcuabi resil nak chi anchal e̱chꞌo̱l nequepa̱b li Ka̱cuaꞌ Jesucristo ut xcuabi resil nak nequera le̱ rech aj pa̱banelil. 16Joꞌcan nak junelic ninbantioxin chiru li Dios ut yo̱quin chi tijoc che̱rix. 17Nintijoc chiru li nimajcual Dios, lix yucuaꞌ li Ka̱cuaꞌ Jesucristo, ut nintzꞌa̱ma chiru nak tixqꞌue e̱naꞌleb re nak te̱tau ru chi tzꞌakal lix naꞌleb li Dios ut re nak te̱tau ru lix ya̱lal chi us. 18Nintzꞌa̱ma chiru li Dios nak tixqꞌue e̱naꞌleb re nak te̱tau ru cꞌaꞌru le̱ lokꞌlaj ma̱tan li yo̱quex chiroybeninquil xban nak sicꞌbil e̱ru xban li Dios. Te̱cꞌul le̱ ma̱tan e̱rochbeneb chixjunileb laj pa̱banel. 19Ut nintzꞌa̱ma ajcuiꞌ chiru li Dios nak tixqꞌue e̱naꞌleb re nak te̱nau nak kꞌaxal nim lix cuanquil saꞌ kabe̱n la̱o li nocopa̱ban re. 20Ut aꞌan ajcuiꞌ lix nimal xcuanquil li quicuaclesin re li Cristo chi yoꞌyo saꞌ xya̱nkeb li camenak ut quixcꞌojob saꞌ xnim ukꞌ li Dios aran saꞌ li santil choxa ut quixqꞌue xcuanquil. 21Kꞌaxal nim xcuanquil li Cristo saꞌ xbe̱neb chixjunileb li ángel ut li ma̱us aj musikꞌej ut saꞌ xbe̱neb li cuanqueb xcuanquil chi takla̱nc saꞌ choxa joꞌ saꞌ ruchichꞌochꞌ. Kꞌaxal nim saꞌ xbe̱n chixjunil li cꞌaꞌak re ru li cuanqueb xcuanquil anakcuan ut chi junelic kꞌe cutan. 22Li Dios quixqꞌue chixjunil rubel xcuanquil li Cristo ut quixqꞌue li Cristo chi jolomi̱nc reheb laj pa̱banel ut aꞌan chic yal re saꞌ xbe̱neb. 23Li Cristo aꞌan li najolomin ke la̱o aj pa̱banel. Ut la̱o chanchano li rok rukꞌ nak cuanco. Junak li tzꞌejcualej moco tzꞌakal ta re ru cui ma̱cꞌaꞌ lix jolom. Joꞌcan ajcuiꞌ junak li jolomej, cui ma̱cꞌaꞌ li rok rukꞌ incꞌaꞌ tzꞌakal re ru. Joꞌcan nak tento nak li Cristo ta̱jolomi̱nk ke la̱o aj pa̱banel ut la̱o cua̱nko joꞌ li rok rukꞌ li Cristo.
Currently Selected:
Efesios 1: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.