Apocalipsis 16

1Ut quicuabi jun xya̱b cux quia̱tinac chak chi cau saꞌ lix templo li Dios. Quixye reheb li cuukub chi ángel: —Ayukex ut hoyomak chak saꞌ xbe̱n li ruchichꞌochꞌ lix joskꞌil li Dios li cuan saꞌ li cuukub chi secꞌ.— 2Co̱ li xbe̱n ángel ut quixhoy li cuan saꞌ lix secꞌ saꞌ xbe̱n li ruchichꞌochꞌ. Ut quichal jun yajel saꞌ xbe̱neb chixjunileb li queꞌxcꞌul xnumbril lix cꞌabaꞌ li joskꞌ aj xul joꞌqueb ajcuiꞌ li queꞌxlokꞌoni lix jalam u̱ch. Queꞌxoxoꞌ rixeb ut kꞌaxal ra queꞌxcꞌul xban li yajel. 3Ut li xcab ángel quixhoy li cuan saꞌ lix secꞌ saꞌ xbe̱n li palau. Ut li haꞌ quisukꞌi chokꞌ quicꞌ. Chanchan xquiqꞌuel jun camenak. Ut quilajeꞌcam chixjunileb li cuanqueb saꞌ li palau. 4Li rox ángel quixhoy li cuan saꞌ lix secꞌ saꞌ xbe̱neb li nimaꞌ ut saꞌ xbe̱neb li yuꞌam haꞌ. Ut li haꞌ quisukꞌi chokꞌ quicꞌ. 5Ut quicuabi nak li ángel li nataklan saꞌ xbe̱n li haꞌ quia̱tinac ut quixye:

At Ka̱cuaꞌ, la̱at ti̱c a̱chꞌo̱l chi rakoc a̱tin chi joꞌcaꞌin. La̱at ac cuancat chak saꞌ xticlajic ut la̱at cuancat anakcuan. La̱at santo. Joꞌcan nak xatrakoc a̱tin saꞌ xya̱lal saꞌ xbe̱neb li incꞌaꞌ useb xnaꞌleb.

6Xban nak aꞌan eb queꞌcamsin reheb la̱ cualal a̱cꞌajol ut eb la̱ profeta, joꞌcan nak xasukꞌisi li haꞌ chokꞌ quicꞌ ut xaqꞌueheb chirucꞌ. Xcꞌulubeb nak teꞌxcꞌul chi joꞌcan xban nak incꞌaꞌ us lix naꞌlebeb, chan.

7Ut quicuabi jun yo̱ chak chi a̱tinac saꞌ li artal. Ut quixye:

Relic chi ya̱l, at Ka̱cuaꞌ, at nimajcual Dios, La̱at nacatrakoc a̱tin saꞌ xya̱lal ut saꞌ ti̱quilal, chan.

8Ut li xca̱ ángel quixhoy li cuan saꞌ lix secꞌ saꞌ xbe̱n li sakꞌe. Ut li sakꞌe quitikcuoꞌ ru chi us ut quixcꞌateb li cristian. Chanchan xtikcual li xam. 9Eb li cristian queꞌcꞌateꞌ xban xtikcual li sakꞌe. Xban li raylal li yo̱queb chixcꞌulbal, queꞌxmajecua li Dios li cuan xcuanquil saꞌ xbe̱neb li raylal. Ut incꞌaꞌ queꞌyotꞌeꞌ xchꞌo̱leb chi moco queꞌxqꞌue xlokꞌal li Dios. 10Ut li roꞌ ángel quixhoy li cuan saꞌ lix secꞌ saꞌ xbe̱n lix cꞌojariba̱l li joskꞌ aj xul. Ut chixjunileb li cuanqueb rubel xcuanquil queꞌcana saꞌ kꞌojyi̱n. Chixjunileb yo̱queb chixtiubal li ruꞌuj rakꞌeb xban li raylal yo̱queb chixcꞌulbal. 11Ut queꞌxmajecua li Dios li cuan saꞌ choxa xban li raylal ut li xox li yo̱queb chixcꞌulbal. Abanan incꞌaꞌ quiyotꞌeꞌ xchꞌo̱leb ut incꞌaꞌ queꞌxcanab xba̱nunquil li ma̱usilal. 12Ut li xcuak ángel quixhoy li cuan saꞌ lix secꞌ saꞌ xbe̱n li nimaꞌ Éufrates. Quichakic li haꞌ re teꞌnumekꞌ eb li rey li queꞌchal chak saꞌ eb li naꞌajej li na-el cuiꞌ chak li sakꞌe. 13Ut quicuil oxib li ma̱us aj musikꞌej. Yo̱queb chi e̱lc saꞌ re li dragón ut saꞌ re li joskꞌ aj xul ut saꞌ re li xcab xul li cuan cuib xxucub, li profeta aj balakꞌ. Li oxib chi ma̱us aj musikꞌej, aꞌan chanchaneb li amoch. 14Eb li ma̱us aj musikꞌej aꞌin nequeꞌxba̱nu sachba chꞌo̱lej. Nequeꞌxic yalak bar saꞌ ruchichꞌochꞌ chixchꞌutubanquileb li rey ut eb li tenamit re nak teꞌpletik saꞌ eb li cutan nak li nimajcual Dios ta̱pletik riqꞌuin li joskꞌ aj xul. 15Ut la̱in quicuabi nak li Ka̱cuaꞌ quixye: —La̱in tincha̱lk chi ma̱cꞌaꞌ saꞌ xchꞌo̱leb li tenamit joꞌ nak nachal laj e̱lkꞌ. Us xak re li ani nayoꞌlec re cuoybeninquil ut incꞌaꞌ nachꞌinan xchꞌo̱l saꞌ xpa̱ba̱l. Aꞌan incꞌaꞌ ta̱xuta̱na̱k chicuu nak tincꞌulu̱nk xban nak ti̱c xchꞌo̱l, chan. 16Ut queꞌxchꞌutub eb li rey li oxib chi ma̱us aj musikꞌej saꞌ li naꞌajej Armagedón xcꞌabaꞌ saꞌ hebreo. 17Ut lix cuuk ángel quixhoy saꞌ ikꞌ li cuan saꞌ lix secꞌ. Ut quicuabi jun yo̱ chak chi a̱tinac saꞌ lix templo li Dios. Chi cau xya̱b xcux quixye: —Riqꞌuin aꞌin ta̱tzꞌaklok ru li rakba a̱tin saꞌ xbe̱n li ruchichꞌochꞌ.— 18Ut quirepoc li rakꞌ ca̱k ut qui-abi̱c nabal li xya̱b cux. Quimok li ca̱k. Ut quicuan jun nimla hi̱c. Ma̱ jun cua quinumeꞌ junak hi̱c joꞌ aꞌan chalen saꞌ li cutan nak queꞌyoꞌobtesi̱c li cristian saꞌ ruchichꞌochꞌ. 19Li tenamit li kꞌaxal nim xcuanquil quijacheꞌ. Oxib jachal qui-el. Ut eb li jun chꞌol chic tenamit quilajeꞌtꞌaneꞌ. Ut quijulticoꞌ re li Dios li ma̱c queꞌxba̱nu li tenamit Babilonia. Joꞌcan nak quixqꞌueheb chixtojbal rix lix ma̱queb chi tzꞌakal xban nak yo̱ xjoskꞌil saꞌ xbe̱neb. 20Quilajeꞌsacheꞌ li chꞌochꞌ li sutsu saꞌ haꞌ. Queꞌsubeꞌ saꞌ haꞌ. Ut quilajeꞌtꞌaneꞌ li ni̱nki tzu̱l. 21Quitꞌaneꞌ ni̱nki sakbach saꞌ ruchichꞌochꞌ. Ju̱nk ciento libra ra̱lal li junju̱nk chi sakbach. Ut queꞌnak saꞌ xbe̱neb li cristian ut queꞌxmajecua li Dios xban li nimla raylal li yo̱queb chixcꞌulbal.

Currently Selected:

Apocalipsis 16: kek

Highlight

Copy

Compare