Números 5
5
Li chakꞌrab chirix li cꞌaꞌak re ru incꞌaꞌ us
1-2Li Ka̱cuaꞌ Dios quixye re laj Moisés: —Ta̱ye reheb laj Israel nak teꞌrisi saꞌ xnaꞌaj lix muheba̱leb li cristian chixjunileb li saklep rixeb, ut li na-el xyaꞌal lix tzꞌejcualeb, joꞌqueb ajcuiꞌ li nequeꞌxmux rib riqꞌuin xchꞌeꞌbal li camenak. 3Teꞌrisi chixjunileb saꞌ li naꞌajej li cuan cuiꞌ lix muheba̱leb, usta cui̱nk usta ixk, re nak incꞌaꞌ teꞌxmux ru li naꞌajej li ninhilan cuiꞌ la̱in, chan li Ka̱cuaꞌ. 4Ut eb laj Israel queꞌxba̱nu joꞌ quiyeheꞌ re laj Moisés xban li Ka̱cuaꞌ. Queꞌisi̱c saꞌ li naꞌajej li cuan cuiꞌ lix muheba̱leb chixjunil li muxbileb ru. 5Li Ka̱cuaꞌ Dios quia̱tinac riqꞌuin laj Moisés ut quixye re: 6—Ta̱ye reheb li ralal xcꞌajol laj Israel chi joꞌcaꞌin: Nak junak cui̱nk malaj ut junak ixk ta̱ma̱cobk chiru li ras ri̱tzꞌin, nama̱cob ajcuiꞌ chiru li Dios. 7Tento nak li jun aꞌan tixxo̱to lix ma̱c chiru li Dios ut tixtoj chiru li ras ri̱tzꞌin li incꞌaꞌ us li quixba̱nu ut tixqꞌue ajcuiꞌ ral li tumin. Ju̱nk may ral li ju̱nk ciento (20%) tixqꞌue re chixjunil. 8Cui li cui̱nk li quicꞌuluc re li raylal camenak chic ut ma̱cꞌaꞌ rechꞌalal ta̱cꞌuluk re li tixqꞌue chokꞌ xtojbal rix li ma̱c li quixba̱nu, tento nak tixkꞌaxtesi chiru li Dios ut laj tij tixcꞌul. Ut tixqꞌue ajcuiꞌ li carner te̱lom li tixmayeja laj tij chokꞌ re xtojbal rix lix ma̱c. 9Chixjunileb li lokꞌlaj mayej li nequeꞌxqꞌue re li Ka̱cuaꞌ eb laj Israel teꞌcana̱k chokꞌ reheb laj tij li teꞌcꞌuluk re li mayej. 10Teꞌcana̱k chokꞌ re laj tij eb li mayej li nequeꞌxkꞌaxtesi re li Ka̱cuaꞌ eb laj Israel. 11Li Ka̱cuaꞌ quia̱tinac riqꞌuin laj Moisés ut quixye re: 12—Ta̱ye reheb laj Israel chi joꞌcaꞌin. Ma̱re junak ixakilbej tixmux rib riqꞌuin junak cui̱nk ma̱cuaꞌ xbe̱lom. 13Ma̱re li ixk ta̱cua̱nk riqꞌuin junak cui̱nk chi incꞌaꞌ naxnau lix be̱lom ut ma̱ ani ta̱naꞌok re xban nak ma̱ ani ta̱ilok re. 14Abanan cui li be̱lomej ta̱oc xcakal xchꞌo̱l ut naxcꞌoxla nak xmux ru xsumlajic li rixakil, tento nak tixcꞌam li rixakil riqꞌuin laj tij, usta ya̱l lix ma̱c usta incꞌaꞌ. 15Nak tixcꞌam li rixakil riqꞌuin laj tij tixcꞌam ajcuiꞌ numenak ca̱hib libra li cꞌaj yi̱banbil riqꞌuin cebada ut tixqꞌue chokꞌ xmayej xban xcakal xchꞌo̱l. Incꞌaꞌ tixjunaji riqꞌuin aceite chi moco riqꞌuin incienso xban nak li mayej aꞌan tixqꞌue xban xcakal xchꞌo̱l ut re ajcuiꞌ nak ta̱cꞌutu̱nk ma cuan xma̱c li ixk malaj ut ma̱cꞌaꞌ. 16Ut laj tij tixcꞌam li ixakilbej ut tixxakab chiru li Ka̱cuaꞌ. 17Laj tij tixchap chak caꞌchꞌinak li haꞌ li santobresinbil ut tixqꞌue saꞌ junak chꞌochꞌ secꞌ. Ut tixqꞌue ajcuiꞌ saꞌ li haꞌ caꞌchꞌinak li poks li quixoqueꞌ nak queꞌxmesu li tabernáculo. 18Nak xakxo̱k chiru li Ka̱cuaꞌ li ixakilbej, laj tij tixjit li rismal xjolom li ixk ut tixqꞌue saꞌ rukꞌ caꞌchꞌinak li mayej cꞌaj li quixqꞌue li be̱lomej xban xcakal xchꞌo̱l. Ut laj tij tixchap saꞌ rukꞌ li cꞌahil haꞌ li nacꞌamoc chak raylal. 19Laj tij tixye re li ixk nak tixba̱nu li juramento ut tixye re, “Cui incꞌaꞌ xamux ru la̱ sumlajic ma̱cꞌaꞌ ta̱cꞌul nak ta̱cuucꞌ li cꞌahil haꞌ aꞌin li nacꞌamoc chak raylal. 20Abanan cui xamux ru la̱ sumlajic ut xatcuan riqꞌuin jalan cui̱nk li ma̱cuaꞌ a̱be̱lom, 21li Ka̱cuaꞌ tixqꞌue chi si̱pocꞌ la̱ saꞌ ut incꞌaꞌ chic ta̱ru̱k tatqꞌuiresi̱nk ut eb la̱ tenamit tateꞌxtzꞌekta̱na. 22Nak ta̱cuucꞌ li haꞌ aꞌin tixqꞌue chi si̱pocꞌ la̱ saꞌ ut incꞌaꞌ chic tatqꞌuiresi̱nk cui xamux ru la̱ sumlajic”, chaꞌak laj tij. Ut li ixk tixsume ut tixye, “Joꞌcan chi cꞌulma̱nc”. 23Ut laj tij tixtzꞌi̱ba retalil li raylal aꞌin ut chirix aꞌan tixchꞌaj li retalil li quixtzꞌi̱ba riqꞌuin li cꞌahil haꞌ. 24Chirix aꞌan laj tij tixqꞌue re li ixk li haꞌ aꞌan re nak tixcꞌul raylal cui cuan xma̱c. 25Ut laj tij tixchap li mayej cꞌaj li quixqꞌue li cui̱nk xban xcakal xchꞌo̱l, li cuan saꞌ rukꞌ li ixk. Tixtaksi chiru li Ka̱cuaꞌ ut tixcꞌam saꞌ li artal. 26Ut laj tij tixchap jun mo̱chꞌak li mayej cꞌaj chokꞌ retalil nak chixjunil li cꞌaj kꞌaxtesinbil re li Ka̱cuaꞌ. Ut tixcꞌat saꞌ li artal ut tixqꞌue chirucꞌ li ixk li cꞌahil haꞌ. 27Cui cuan xma̱c li ixk xban nak xmux ru lix sumlajic, li haꞌ tixqꞌue lix saꞌ chi si̱pocꞌ ut incꞌaꞌ chic ta̱ru̱k ta̱qꞌuiresi̱nk. Ut li ixk tzꞌekta̱nanbilak xbaneb lix tenamit. 28Abanan cui li ixk incꞌaꞌ xmux ru lix sumlajic, ut ma̱cꞌaꞌ xma̱c, li haꞌ ma̱cꞌaꞌ tixba̱nu re. Ut ta̱ru̱k ta̱qꞌuiresi̱nk. 29Aꞌan aꞌin li chakꞌrab reheb li ixk li nequeꞌxqꞌue xcakal xchꞌo̱l lix be̱lom xban nak nequeꞌxmux ru xsumlajic. 30Ut aꞌan aꞌin li chakꞌrab reheb li cui̱nk li nequeꞌoc xcakal xchꞌo̱l xban nak nequeꞌxcꞌoxla nak cuan xma̱c li rixakileb. Li be̱lomej tixcꞌam li rixakil chiru li Ka̱cuaꞌ. Ut laj tij tixba̱nu li chakꞌrab aꞌin saꞌ xbe̱n li ixk. 31Cui li ixk quixmux ru xsumlajic, tento nak tixtoj rix lix ma̱c ut li be̱lomej ma̱cꞌaꞌak xma̱c.
Currently Selected:
Números 5: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
