Números 1
1
Queꞌajla̱c eb li ralal xcꞌajol laj Israel
1Li Ka̱cuaꞌ quia̱tinac riqꞌuin laj Moisés saꞌ li xbe̱n cutan re li xcab po nak ac yo̱ chic xcab chihab reliqueb chak laj Israel aran Egipto. Quia̱tinac riqꞌuin saꞌ li tabernáculo nak cuanqueb saꞌ li chaki chꞌochꞌ aran Sinaí. Quixye re: 2—La̱at ut laj Aarón te̱rajlaheb laj Israel. Te̱tzꞌi̱ba xcꞌabaꞌeb li junju̱nk chi cui̱nk saꞌ li junju̱nk xte̱paleb aꞌ yal chanru xqꞌuialeb saꞌ li junju̱nk cabal. 3La̱at a̱cuochben laj Aarón te̱tzꞌi̱ba xcꞌabaꞌeb li cui̱nk li cuan junmay chihab reheb, joꞌqueb ajcuiꞌ li ac numenakeb junmay chihab. Te̱tzꞌi̱ba xcꞌabaꞌeb li naru teꞌoque̱nk saꞌ li ple̱t. 4Ut cua̱nkeb ajcuiꞌ che̱tenkꞌanquil li nequeꞌcꞌamoc be saꞌ xya̱nkeb li junju̱nk xte̱paleb laj Israel. 5Aꞌaneb aꞌin lix cꞌabaꞌeb li cui̱nk li teꞌtenkꞌa̱nk e̱re. Laj Elisur, li ralal laj Sedeur, aꞌan li najolomin reheb lix te̱paleb li ralal xcꞌajol laj Rubén. 6Laj Selumiel, li ralal laj Zurisadai, aꞌan li najolomin reheb lix te̱paleb li ralal xcꞌajol laj Simeón. 7Laj Naasón li ralal laj Aminadab, aꞌan li najolomin reheb lix te̱paleb li ralal xcꞌajol laj Judá. 8Laj Natanael li ralal laj Zuar, aꞌan li najolomin reheb lix te̱paleb li ralal xcꞌajol laj Isacar. 9Laj Eliab li ralal laj Helón, aꞌan li najolomin reheb lix te̱paleb li ralal xcꞌajol laj Zabulón. 10Ut saꞌ xya̱nkeb lix te̱paleb li ralal xcꞌajol laj José, aꞌan laj Elisama li ralal laj Amiud li najolomin reheb lix te̱paleb li ralal xcꞌajol laj Efraín; ut laj Gamaliel li ralal laj Pedasur, aꞌan li najolomin reheb lix te̱paleb li ralal xcꞌajol laj Manasés. 11Laj Abidán, li ralal laj Gedeoni, aꞌan li najolomin reheb lix te̱paleb li ralal xcꞌajol laj Benjamín. 12Laj Ahiezer li ralal laj Amisadai, aꞌan li najolomin reheb lix te̱paleb li ralal xcꞌajol laj Dan. 13Laj Pagiel, li ralal laj Ocrán, aꞌan li najolomin reheb lix te̱paleb li ralal xcꞌajol laj Aser. 14Laj Eliasaf li ralal laj Deuel, aꞌan li najolomin reheb lix te̱paleb li ralal xcꞌajol laj Gad. 15Ut laj Ahira, li ralal laj Enán, aꞌan li najolomin reheb lix te̱paleb li ralal xcꞌajol laj Neftalí. 16Aꞌaneb aꞌin li cui̱nk li queꞌxakaba̱c chi tenkꞌa̱nc chi rajlanquileb li cui̱nk. Aꞌaneb li nequeꞌjolomin reheb li junju̱nk chi xte̱paleb laj Israel. 17Laj Moisés ut laj Aarón queꞌxbokeb li cui̱nk aꞌin li queꞌsiqꞌueꞌ ruheb. 18Ut saꞌ li xbe̱n cutan re li xcab po queꞌxchꞌutubeb ru chixjunileb laj Israel ut queꞌxtzꞌi̱ba xcꞌabaꞌeb chixjunileb li cui̱nk li cuan junmay chihab reheb, joꞌqueb ajcuiꞌ li ac numenakeb junmay chihab. Queꞌxtzꞌi̱ba xcꞌabaꞌeb aꞌ yal ani lix xeꞌto̱nil yucuaꞌeb li junju̱nk. 19Laj Moisés quirajlaheb saꞌ li chaki chꞌochꞌ Sinaí joꞌ quiyeheꞌ re xban li Ka̱cuaꞌ. 20Quitzꞌi̱ba̱c xcꞌabaꞌeb li ralal xcꞌajol laj Rubén li xbe̱n ralal laj Israel li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 21Saꞌ xya̱nkeb li ralal xcꞌajol laj Rubén queꞌajla̱c cuakib roxcꞌa̱l mil riqꞌuin o̱b ciento (46,500) chi cui̱nk. 22Queꞌtzꞌi̱ba̱c xcꞌabaꞌeb li ralal xcꞌajol laj Simeón li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 23Saꞌ xya̱nkeb li ralal xcꞌajol laj Simeón queꞌajla̱c bele̱laju roxcꞌa̱l riqꞌuin oxib ciento (59,300) chi cui̱nk. 24Queꞌtzꞌi̱ba̱c xcꞌabaꞌeb li ralal xcꞌajol laj Gad li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 25Saꞌ xya̱nkeb li ralal xcꞌajol laj Gad queꞌajla̱c o̱b roxcꞌa̱l mil riqꞌuin cuakib ciento riqꞌuin laje̱b roxcꞌa̱l (45,650) chi cui̱nk. 26Queꞌtzꞌi̱ba̱c xcꞌabaꞌeb li ralal xcꞌajol laj Judá li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 27Saꞌ xya̱nkeb li ralal xcꞌajol laj Judá queꞌajla̱c ca̱laju xca̱cꞌa̱l mil riqꞌuin cuakib ciento (74,600) chi cui̱nk. 28Queꞌtzꞌi̱ba̱c xcꞌabaꞌeb li ralal xcꞌajol laj Isacar li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 29Saꞌ xya̱nkeb li ralal xcꞌajol laj Isacar queꞌajla̱c ca̱laju roxcꞌa̱l mil riqꞌuin ca̱hib ciento (54,400) chi cui̱nk. 30Queꞌtzꞌi̱ba̱c xcꞌabaꞌeb li ralal xcꞌajol laj Zabulón li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 31Saꞌ xya̱nkeb li ralal xcꞌajol laj Zabulón queꞌajla̱c cuuklaju roxcꞌa̱l mil riqꞌuin ca̱hib ciento (57,400) chi cui̱nk. 32Queꞌajla̱c li ralal xcꞌajol laj José. Queꞌtzꞌi̱ba̱c xcꞌabaꞌeb li ralal xcꞌajol laj Efraín li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 33Saꞌ xya̱nkeb li ralal xcꞌajol laj Efraín queꞌajla̱c caꞌcꞌa̱l mil riqꞌuin o̱b ciento (40,500) chi cui̱nk. 34Queꞌtzꞌi̱ba̱c xcꞌabaꞌeb li ralal xcꞌajol laj Manasés li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 35Saꞌ xya̱nkeb li ralal xcꞌajol laj Manasés queꞌajla̱c cablaju xcaꞌcꞌa̱l mil riqꞌuin cuib ciento (32,200) chi cui̱nk. 36Queꞌtzꞌi̱ba̱c xcꞌabaꞌeb li ralal xcꞌajol laj Benjamín li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 37Saꞌ xya̱nkeb li ralal xcꞌajol laj Benjamín queꞌajla̱c oꞌlaju xcaꞌcꞌa̱l mil riqꞌuin ca̱hib ciento (35,400) chi cui̱nk. 38Queꞌtzꞌi̱ba̱c xcꞌabaꞌeb li ralal xcꞌajol laj Dan li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 39Saꞌ xya̱nkeb li ralal xcꞌajol laj Dan queꞌajla̱c cuib xca̱cꞌa̱l mil riqꞌuin cuukub ciento (62,700) chi cui̱nk. 40Queꞌtzꞌi̱ba̱c xcꞌabaꞌeb li ralal xcꞌajol laj Aser li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 41Saꞌ xya̱nkeb li ralal xcꞌajol laj Aser queꞌajla̱c jun roxcꞌa̱l mil riqꞌuin o̱b ciento (41,500) chi cui̱nk. 42Queꞌtzꞌi̱ba̱c xcꞌabaꞌ li ralal xcꞌajol laj Neftalí li ac xeꞌxba̱nu junmay chihab re teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ li junju̱nk cabal. 43Saꞌ xya̱nkeb li ralal xcꞌajol laj Neftalí queꞌajla̱c oxlaju roxcꞌa̱l mil riqꞌuin ca̱hib ciento (53,400) chi cui̱nk. 44Aꞌaneb aꞌin li cui̱nk li queꞌajla̱c xbaneb laj Moisés ut laj Aarón rochbeneb li cablaju li cui̱nk li nequeꞌjolomin reheb li junju̱nk te̱p li ralal xcꞌajol laj Israel. 45Queꞌajla̱c chixjunileb laj Israel li ac xeꞌxba̱nu junmay chihab li ta̱ru̱k teꞌoc chokꞌ soldado. Queꞌajla̱c aꞌ yal chanru xqꞌuialeb saꞌ xte̱paleb lix yucuaꞌeb. 46Chixjunileb li queꞌajla̱c cuanqueb cuakib ciento mil riqꞌuin oxib mil ut riqꞌuin o̱b ciento riqꞌuin laje̱b roxcꞌa̱l (603,550). 47Abanan, eb li ralal xcꞌajol laj Leví incꞌaꞌ queꞌajla̱c rochbeneb li jun chꞌol chic laj Israel, 48xban nak joꞌcan quixye li Ka̱cuaꞌ re laj Moisés. 49Quixye re: —Nak te̱rajlaheb laj Israel incꞌaꞌ te̱rajlaheb li ralal xcꞌajol laj Leví. 50Te̱xakabeb ban li ralal xcꞌajol laj Leví chi cꞌanjelac saꞌ li tabernáculo ut aꞌaneb li teꞌilok re chixjunil li nacꞌanjelac aran. Teꞌxyi̱b lix muheba̱leb chi xjun sutam li tabernáculo. 51Ut nak eb laj Israel teꞌxjal xnaꞌaj li tabernáculo, eb li ralal xcꞌajol laj Leví teꞌhitok re ut aꞌaneb ajcuiꞌ li teꞌxakaba̱nk re nak teꞌhila̱nk saꞌ jalan naꞌajej. Cui junak jalan ta̱jilok riqꞌuin li tabernáculo saꞌ li ho̱nal aꞌan, li jun aꞌan ta̱camsi̱k. 52Li junju̱nk te̱p li ralal xcꞌajol laj Israel teꞌxyi̱b lix muheba̱leb chi chꞌu̱tal rochbeneb lix solda̱d. Ut teꞌxxakab lix bandereb chixcꞌatk lix muheba̱leb. 53Ut eb li ralal xcꞌajol laj Leví teꞌxyi̱b lix muheba̱leb chi xjun sutam li tabernáculo. Ut aꞌaneb li teꞌilok re, re nak li Dios incꞌaꞌ ta̱joskꞌokꞌ saꞌ xbe̱neb laj Israel. 54Ut eb laj Israel queꞌxba̱nu chixjunil li quixye li Ka̱cuaꞌ Dios re laj Moisés.
Currently Selected:
Números 1: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
