San Mateo 2
2
Eb laj kꞌe queꞌcuulac chixsicꞌbal li Jesús
1Nak cua̱nk chokꞌ rey laj Herodes, li Jesús quiyoꞌla aran Belén xcue̱nt Judea. Cuanqueb aj kꞌe queꞌchal chak saꞌ releb sakꞌe ut queꞌcuulac Jerusalén. 2Queꞌpatzꞌoc ut queꞌxye: —¿Bar cuan lix reyeb laj judío xyoꞌla? Xochal xban nak xkil chak toj saꞌ releb sakꞌe li chahim retalil lix yoꞌlajic ut xochal chixlokꞌoninquil, chanqueb. 3Ut nak quirabi aꞌan, li rey Herodes quisach xchꞌo̱l ut qui-oc xcꞌaꞌux joꞌ ajcuiꞌ chixjunileb li cuanqueb Jerusalén. 4Ut laj Herodes quixchꞌutubeb chixjunil li xbe̱nil aj tij joꞌ eb ajcuiꞌ laj tzꞌi̱b saꞌ li tenamit ut quixpatzꞌ reheb bar ta̱yoꞌla̱k li Cristo. 5Ut eb aꞌan queꞌchakꞌoc ut queꞌxye re: —Aran Belén xcue̱nt Judea xban nak joꞌcan tzꞌi̱banbil chak xban li profeta. 6Joꞌcaꞌin tzꞌi̱banbil saꞌ li Santil Hu:
Li tenamit Belén, xchꞌochꞌeb laj Judá, moco kꞌaxal caꞌchꞌin ta lix cuanquil saꞌ xya̱nkeb li xni̱nkal ru tenamit re Judá xban nak aran ta̱e̱lk jun Acuabej ut aꞌan ta̱beresi̱nk re lin tenamit Israel. (Miq. 5:2)
7Tojoꞌnak laj Herodes quixbokeb laj kꞌe saꞌ mukmu ut quixpatzꞌ reheb jokꞌe tzꞌakal quicꞌutun li chahim. 8Ut nak quixtaklaheb Belén quixye reheb: —Ayukex aran Belén ut qꞌuehomak e̱chꞌo̱l chixsicꞌbal toj retal te̱tau li cꞌulaꞌal. Ut nak te̱tau chak, tole̱ye cue re nak tinxic ajcuiꞌ la̱in ut toxinlokꞌoni chak, chan. 9Ut nak queꞌrabi li quixye li rey, eb laj kꞌe queꞌco̱eb. Ut li chahim li queꞌril chak saꞌ releb sakꞌe yo̱ chi xic cꞌamol be chiruheb tojoꞌnak quixakli saꞌ xbe̱n li naꞌajej cuan cuiꞌ li cꞌulaꞌal. 10Ut cꞌajoꞌ nak queꞌsahoꞌ saꞌ xchꞌo̱leb chirilbal li chahim nak quixakli saꞌ xbe̱n li naꞌajej aꞌan. 11Ut nak queꞌoc saꞌ li cab, queꞌxtau li cꞌulaꞌal rochben lix María li naꞌbej. Ut queꞌxcuikꞌib rib chiru li Jesús ut queꞌxlokꞌoni. Ut queꞌxte lix cꞌu̱leba̱leb ut queꞌxqꞌue lix ma̱tan. Ut li ma̱tan li queꞌxqꞌue, aꞌan li oro, li incienso ut li sununquil ban mirra xcꞌabaꞌ. 12Ut queꞌcꞌutbesi̱c chiruheb xban li Dios saꞌ xmatqꞌueb nak incꞌaꞌ chic teꞌsukꞌi̱k riqꞌuin laj Herodes. Saꞌ jalan chic be queꞌxcꞌam nak queꞌsukꞌi saꞌ xtenamiteb.
Laj José ut lix María queꞌxcꞌam li Jesús Egipto re xcolbal chiru laj Herodes
13Ut nak ac xco̱eb laj kꞌe, jun x-ángel li Ka̱cuaꞌ quixcꞌut rib chiru laj José saꞌ xmatcꞌ ut quixye re: —Cuaclin, cꞌam li cꞌulaꞌal joꞌ cuiꞌ lix naꞌ. Tex-e̱lk arin ut ayukex saꞌ li tenamit Egipto. Ut aran texcana̱k toj la̱in toxinyehok a̱cue. Tex-e̱lelik xban nak laj Herodes oc re chixsicꞌbal li cꞌulaꞌal re xcamsinquil.— 14Ut laj José qui-aj ru, quicuacli ut quixcꞌam li cꞌulaꞌal joꞌ cuiꞌ lix naꞌ ut saꞌ ajcuiꞌ li kꞌojyi̱n aꞌan queꞌco̱eb Egipto. 15Ut queꞌcuan aran Egipto toj quicam laj Herodes. Aꞌan quicꞌulman joꞌ quixtzꞌi̱ba li profeta li quiyeheꞌ re xban li Ka̱cuaꞌ nak quixye:
Saꞌ li tenamit Egipto quinbok chak li cualal, chan. (Ose. 11:1)
16Aꞌut laj Herodes nak quiril nak quibalakꞌi̱c xbaneb laj kꞌe, kꞌaxal nak quichal xjoskꞌil. Ut quixtakla xcamsinquil chixjunileb li cocꞌ te̱lom cuanqueb Belén, joꞌ cuiꞌ saꞌ eb li naꞌajej cuanqueb chixcꞌatk. Queꞌcamsi̱c chixjunileb li cocꞌ te̱lom li toj cꞌulaꞌaleb jun xxiquic aj caꞌcab chihab xban nak quixbir rix cꞌaꞌru li cutan quiyoꞌla cuiꞌ li cꞌulaꞌal joꞌ quiyeheꞌ re xbaneb laj kꞌe. 17Joꞌcan nak quitzꞌakloc ru li yebil xban li profeta Jeremías nak quixye chi joꞌcaꞌin:
18Qui-abi̱c li ya̱bac saꞌ li tenamit Ramá xban li nimla rahil chꞌo̱lej, ut yotꞌba chꞌo̱lej li queꞌxcꞌul. Aꞌan eb li ixk aj Israel nak yo̱queb chi ya̱bac chirixeb lix cocꞌal. Ut incꞌaꞌ chic nequeꞌraj xcꞌojobanquil xchꞌo̱leb xban nak ac camenakeb chic lix cocꞌaleb. (Jer. 31:15)
Queꞌsukꞌi cuiꞌchic Nazaret
19Ut nak quicam laj Herodes, jun x-ángel li Ka̱cuaꞌ quixcꞌutbesi rib chiru laj José saꞌ xmatcꞌ aran Egipto. 20Ut quixye re: —Cuaclin. Cꞌam li cꞌulaꞌal joꞌ cuiꞌ li naꞌbej ut texxic cuiꞌchic saꞌ li tenamit Israel xban nak xeꞌcam li queꞌajoc re xcamsinquil li cꞌulaꞌal, chan. 21Ut laj José quicuacli, quixcꞌam li cꞌulaꞌal joꞌ cuiꞌ lix naꞌ ut quichal saꞌ li tenamit Israel. 22Ut nak quirabi resil nak aꞌ laj Arquelao chic li rey aran Judea re̱kaj laj Herodes lix yucuaꞌ, laj José quixucuac chi xic aran. Ut nak quicꞌutbesi̱c chiru saꞌ xmatcꞌ, queꞌco̱eb saꞌ jun naꞌajej xcue̱nt Galilea. 23Queꞌchal ut queꞌcuan saꞌ jun li tenamit Nazaret xcꞌabaꞌ xcue̱nt Galilea. Aꞌin quicꞌulman joꞌ queꞌxye li profeta nak queꞌxye nak aj Nazaret tixcꞌabaꞌin.
Currently Selected:
San Mateo 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.