San Lucas 21
21
Li xma̱lcaꞌan nebaꞌ nabal quixqꞌue chiru li queꞌxqꞌue li biom
1Saꞌ jun li cutan li Jesús cuan saꞌ li templo ut quiril nak eb li biom yo̱queb chixqꞌuebal lix mayejeb saꞌ li ca̱x. 2Ut quiril ajcuiꞌ nak jun li xma̱lcaꞌan nebaꞌ quixqꞌue saꞌ li ca̱x cuib li tumin cobre chokꞌ xmayej. 3Ut li Jesús quixye: —Relic chi ya̱l ninye e̱re nak li xma̱lcaꞌan nebaꞌ nabal xqꞌue chiru li queꞌxqꞌue li biom, 4xban nak chixjunileb aꞌan xeꞌxqꞌue li x-elaꞌan chiruheb. Abanan li ixk aꞌin, usta nebaꞌ, xqꞌue chixjunil li joꞌ nimal cuan re, li re raj xnumsinquil li cutan junju̱nk.
Ta̱cuulak xkꞌehil nak ta̱juqꞌui̱k li templo
5Cuanqueb li yo̱queb chi a̱tinac chirix lix chꞌinaꞌusal li templo. Yo̱queb chixyebal: —Cꞌajoꞌ xchakꞌal ru li pec li yi̱banbil cuiꞌ li templo joꞌ ajcuiꞌ li mayej li queꞌxqꞌue chokꞌ xsahob ru, chanqueb. Ut li Jesús quixye reheb: 6—Ta̱cuulak xkꞌehil nak ta̱sachekꞌ ru chixjunil li yo̱quex chirilbal anakcuan. Ma̱ jun reheb li pec aꞌan ta̱cana̱k saꞌ xnaꞌaj chi incꞌaꞌ ta ta̱juqꞌui̱k, chan li Jesús.
Li cꞌaꞌru talajcꞌulma̱nk nak ac cuulac re xkꞌehil li rosoꞌjic li ruchichꞌochꞌ
7Queꞌxpatzꞌ re: —At tzolonel, ¿jokꞌe ta̱cꞌulma̱nk li yo̱cat chixyebal? ¿Cꞌaꞌru retalil ta̱cua̱nk nak talajcꞌulma̱nk li cꞌaꞌak re ru aꞌin? chanqueb. 8Li Jesús quixye reheb: —Cheba̱nu cue̱nt re nak incꞌaꞌ texbalakꞌi̱k xban nak nabal teꞌcha̱lk chi balakꞌi̱nc ut teꞌxye nak saꞌ incꞌabaꞌ la̱in xeꞌchal. Teꞌxye, “La̱in li Cristo li yechiꞌinbil xban li Dios,” chaꞌkeb. Ut teꞌxye, “Anakcuan xcuulac xkꞌehil,” chaꞌkeb. Abanan me̱pa̱b li cꞌaꞌru teꞌxye eb aꞌan. 9Nak te̱rabi nak yo̱ li ple̱t ut li chꞌaꞌajquilal yalak bar, mexxucuac xban nak tento nak ta̱cꞌulma̱nk chi joꞌcan. Abanan moco ac aꞌan ta rosoꞌjiqueb li cutan, chan li Jesús. 10Ut quixye ajcuiꞌ: —Nabal li tenamit teꞌpletik riqꞌuin jalan chic tenamit. Ut eb li acuabej teꞌxpleti ribeb. 11Talajcua̱nk hi̱c saꞌ nabal chi naꞌajej ut ta̱cua̱nk cueꞌej ut yajel. Ta̱cua̱nk ni̱nki raylal ut xucuajel rilbal li retalil li talajcꞌutu̱nk saꞌ choxa. 12Abanan nak toj ma̱jiꞌ nacꞌulman chixjunil li cꞌaꞌak re ru aꞌin, texchapekꞌ ut texrahobtesi̱k. Texcꞌamekꞌ saꞌ li cab li nequeꞌxchꞌutub cuiꞌ ribeb laj judío ut texcꞌamekꞌ saꞌ tzꞌalam. Texcꞌamekꞌ chiruheb li rey ut eb laj rakol a̱tin saꞌ incꞌabaꞌ la̱in. 13Ut aꞌan ta̱cꞌanjelak e̱re re xchꞌolobanquil resil li colba-ib. 14Qꞌuehomak biꞌ saꞌ e̱chꞌo̱l aꞌin, nak moco toj yo̱kex ta chixcꞌoxlanquil chanru texsume̱nk cuiꞌ re xcolbal e̱rib, 15xban nak la̱in tinqꞌue e̱naꞌleb ut tincꞌut che̱ru cꞌaꞌru te̱ye. Ut eb li xicꞌ nequeꞌiloc e̱re incꞌaꞌ teꞌru̱k chixcuechꞌbal rix li cꞌaꞌru te̱ye, chi moco teꞌxnau xsumenquil. 16Texkꞌaxtesi̱k saꞌ rukꞌeb li xicꞌ nequeꞌiloc e̱re xbaneb le̱ naꞌ e̱yucuaꞌ ut xbaneb le̱ ras ut le̱ ri̱tzꞌin ut eb le̱ rechꞌalal joꞌ eb ajcuiꞌ le̱ rami̱g. Ut cuan li cuanqueb saꞌ e̱ya̱nk li teꞌcamsi̱k. 17Ut xicꞌ tex-ilekꞌ xbaneb chixjunileb li tenamit saꞌ incꞌabaꞌ la̱in. 18Abanan ma̱cꞌaꞌ te̱cꞌul. 19Cui incꞌaꞌ nachꞌinan e̱chꞌo̱l saꞌ le̱ pa̱ba̱l usta yo̱kex chi cꞌuluc raylal te̱re̱chani li junelic yuꞌam. 20Nak te̱ril li tenamit Jerusalén sutsu̱k xbaneb li qꞌuila soldado, la̱ex te̱nau nak ac xcuulac xkꞌehil li rosoꞌjic. 21Ut eb li cuanqueb saꞌ li naꞌajej Judea cheꞌe̱lelik saꞌ junpa̱t ut cheꞌxicak saꞌ eb li tzu̱l. Eb li cuanqueb saꞌ li tenamit Jerusalén cheꞌe̱lk aran ut eb li cuanqueb saꞌ cꞌaleba̱l incꞌaꞌ chic teꞌsukꞌi̱k saꞌ li tenamit. 22Ut saꞌ eb li cutan aꞌan, li Dios tixqꞌueheb chixtojbal rix lix ma̱queb li xicꞌ nequeꞌiloc re. Chi joꞌcan ta̱tzꞌaklok ru chixjunil li tzꞌi̱banbil retalil saꞌ li Santil Hu. 23Kꞌaxal ra cuiꞌchic chokꞌ reheb li yaj aj ixk ut li yo̱queb chi tuꞌresi̱nk saꞌ eb li cutan aꞌan, xban nak ma̱ caꞌchꞌin li raylal teꞌxcꞌul li tenamit aꞌan xban nak yo̱k xjoskꞌil li Dios saꞌ xbe̱neb. 24Cuan li teꞌcamsi̱k riqꞌuin chꞌi̱chꞌ ut cuan li teꞌchapekꞌ ut teꞌcꞌamekꞌ chi pre̱xil saꞌ eb li jalan tenamit. Ut li tenamit Jerusalén ta̱cana̱k rubel xcuanquileb li ma̱cuaꞌeb aj judío toj ta̱cuulak xkꞌehil nak li Dios ta̱risiheb lix cuanquileb li ma̱cuaꞌeb aj judío, chan li Jesús. 25Ut ta̱cua̱nk retalil chiru li sakꞌe, li po ut eb li chahim. Ut eb li cuanqueb saꞌ ruchichꞌochꞌ teꞌyotꞌekꞌ ut teꞌsach xchꞌo̱leb xban lix ya̱b ut lix cau ok li palau. 26Teꞌlucta̱k li cui̱nk xbaneb xxiu nak yo̱keb chixcꞌoxlanquil li raylal li ta̱cha̱lk saꞌ ruchichꞌochꞌ. Ut ta̱ecꞌa̱nk saꞌ xnaꞌaj li choxa. 27Chirix aꞌan te̱ril nak la̱in li Cꞌajolbej yo̱kin chak chi cha̱lc saꞌ choxa riqꞌuin lix nimal incuanquilal ut inlokꞌal. 28Nak acak xticla xcꞌulbal chixjunil li cꞌaꞌak re ru aꞌin, cacuubresihomak e̱chꞌo̱l ut yoꞌon cua̱nkex. Chisahokꞌ saꞌ e̱chꞌo̱l xban nak cuulac re xkꞌehil nak texcolekꞌ, chan li Jesús.
Li jaljo̱quil ru a̱tin chirix li jun to̱n chi higo
29Ut quixye jun chic li jaljo̱quil ru a̱tin reheb. Quixye: Cheqꞌuehak retal li jun to̱n chi higo ut chixjunileb li cheꞌ. 30Nak nakꞌunkꞌut chak lix xak li cheꞌ chi e̱lc, riqꞌuin aꞌan nequeqꞌue retal nak yo̱ chak chi nachꞌoc li sakꞌehil. 31Joꞌcan ajcuiꞌ la̱ex nak te̱ril nak yo̱k chi cꞌulma̱nc chixjunil li cꞌaꞌak re ru aꞌin, aꞌan retalil nak yo̱ chak chi nachꞌoc lix nimajcual cuanquil li Dios. 32Relic chi ya̱l ninye e̱re nak incꞌaꞌ ta̱osokꞌ li tenamit aꞌin chi toj ma̱jiꞌak nacꞌulman chixjunil li cꞌaꞌak re ru aꞌin. 33Li choxa ut li ruchichꞌochꞌ talajeꞌosokꞌ. Abanan li cua̱tin incꞌaꞌ ta̱cana̱k yal chi joꞌcan chi incꞌaꞌ ta ta̱cꞌulma̱nk li cꞌaꞌru naxye. 34Chenauhak xcolbal e̱rib. Me̱qꞌue e̱rib chi a̱le̱c riqꞌuin li numcuaꞌac ut li cala̱c, chi moco riqꞌuin xcꞌoxlanquil chanru te̱numsi li cutan junju̱nk. Ma̱re anchal ta̱cuulak xkꞌehil li cutan aꞌan chi ma̱cꞌaꞌ saꞌ e̱chꞌo̱l. 35Ta̱cha̱lk chi ma̱cꞌaꞌ saꞌ e̱chꞌo̱l joꞌ nak naqꞌueman junak raꞌal chi ma̱ ani nanaꞌoc re. 36Joꞌcan ut yoꞌon cua̱nkex ut junelic chextijok re nak cauhak e̱chꞌo̱l chixcuybal xnumsinquil li raylal li ta̱cha̱lk saꞌ e̱be̱n, ut re nak ta̱ru̱k texcuulak cuiqꞌuin la̱in li Cꞌajolbej, chan li Jesús. 37Rajlal cutan li Jesús naxchꞌolob xya̱lal chiruheb saꞌ li templo ut nak na-ecuu, naxic saꞌ li tzu̱l Olivos chixnumsinquil li kꞌojyi̱n. 38Ut chixjunileb li tenamit nequeꞌxic saꞌ li templo rajlal ekꞌela chirabinquil li cꞌaꞌru naxye li Jesús.
Currently Selected:
San Lucas 21: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.