San Juan 8
8
Quicꞌameꞌ riqꞌuin li Jesús jun li ixk li quixmux ru xsumlajic
1Li Jesús co̱ saꞌ li tzu̱l Olivos. 2Cuulajak chic nak toj ekꞌela co̱ cuiꞌchic saꞌ li templo. Li qꞌuila tenamit queꞌcuulac riqꞌuin. Ut nak quicꞌojla, qui-oc cuiꞌchic chixchꞌolobanquil lix ya̱lal chiruheb. 3Eb laj fariseo ut eb laj tzolol chakꞌrab queꞌxcꞌam riqꞌuin li Jesús jun li ixk yo̱ chixmuxbal ru xsumlajic nak queꞌxtau ut coxeꞌxxakab chiruheb chixjunileb. 4Queꞌxye: —At tzolonel, li ixk aꞌin yo̱ chixmuxbal ru xsumlajic nak xkatau. 5Saꞌ li chakꞌrab li quixqꞌue ke laj Moisés naxye nak cutbileb chi pec nak teꞌcamsi̱k eb li ixk li nequeꞌxmux ru lix sumlajic joꞌ xba̱nu li ixk aꞌin. Ut la̱at, ¿cꞌaꞌru nacaye? chanqueb. 6Queꞌxye re li Jesús chi joꞌcan yal re rilbal cꞌaꞌ na ru tixye xban nak yo̱queb chixsicꞌbal cꞌaꞌru teꞌxjit cuiꞌ. Aban li Jesús quixxulub rib ut qui-oc chi tzꞌi̱bac chiru chꞌochꞌ riqꞌuin ruꞌuj rukꞌ. 7Ut xban nak yo̱queb chixpatzꞌbal, li Jesús quixakli cuiꞌchic ut quixye reheb: —Li ani ma̱cꞌaꞌ xma̱c saꞌ e̱ya̱nk, aꞌan li xbe̱n li tixcut li pec, chan. 8Ut quixxulub rib ut qui-oc cuiꞌchic chi tzꞌi̱bac chiru chꞌochꞌ. 9Nak queꞌrabi li cꞌaꞌru quixye, queꞌrecꞌa rib xban nak cuanqueb xma̱c ut queꞌoc chi e̱lc chi xju̱nkaleb. Xbe̱n cua queꞌel li che̱quel cui̱nk ut chirixeb aꞌan queꞌel li toj sa̱jeb. Quicana xjunes li Jesús ut li ixk xakxo chiru. 10Li Jesús quixakli cuiꞌchic ut quixye re li ixk: —¿Bar cuanqueb li yo̱queb chi jitoc a̱cue? ¿Ma ma̱ ani xqꞌuehoc a̱cue chixtojbal a̱ma̱c? chan. 11Ut li ixk quixye re: —Ma̱ jun, Ka̱cuaꞌ.— Ut li Jesús quixye re: —Chi moco la̱in tatinqꞌue chixtojbal a̱ma̱c. Ayu ut matma̱cob chic, chan.
Li Jesús quixchꞌolob xya̱lal chiruheb nak aꞌan li Cristo
12Li Jesús quia̱tinac cuiꞌchic riqꞌuineb li tenamit ut quixye reheb: —La̱in lix cutan saken li ruchichꞌochꞌ. Li ani ta̱pa̱ba̱nk cue la̱in, incꞌaꞌ chic ta̱cua̱nk saꞌ xkꞌojyi̱nal ru li ma̱c. Ta̱cua̱nk ban saꞌ cutan saken ut ta̱cua̱nk xyuꞌam chi junelic, chan. 13Ut eb laj fariseo queꞌxye re: —Ma̱cꞌaꞌ na-oc cuiꞌ li cꞌaꞌru yo̱cat chixyebal xban nak cha̱cuix ajcuiꞌ la̱at yo̱cat chi a̱tinac, chanqueb. 14Li Jesús quixye reheb: —Cuan xcuanquil li ninye usta yo̱quin chi a̱tinac chicuix la̱in xban nak tzꞌakal ya̱l li ninye. La̱ex incꞌaꞌ nequenau bar xinchal chak, chi moco nequenau bar tinxic. Caꞌaj cuiꞌ la̱in ninnaꞌoc re bar xinchal chak ut bar tinxic. 15La̱ex nequexrakoc a̱tin joꞌ nequeraj la̱ex e̱junes. La̱in ma̱ ani saꞌ aj be̱n yo̱quin chi rakoc a̱tin. 16Abanan cui tinrakok a̱tin, tinba̱nu saꞌ ti̱quilal xban nak incꞌaꞌ ninrakoc a̱tin injunes. Ninba̱nu ban joꞌ naraj lin Yucuaꞌ li quitaklan chak cue. 17Saꞌ le̱ chakꞌrab tzꞌi̱banbil retalil cui cuan cuibeb li cui̱nk junaj lix cꞌaꞌuxeb riqꞌuin li cꞌaꞌru teꞌxye, tento xpa̱banquil li ra̱tineb. 18La̱in ninye li ya̱l chicuix ajcuiꞌ la̱in. Ut lin Yucuaꞌ li quitaklan chak cue, aꞌan naxchꞌolob ajcuiꞌ li ya̱l chicuix, chan li Jesús. 19Eb laj fariseo queꞌchakꞌoc ut queꞌxye re: —¿Ani la̱ yucuaꞌ? chanqueb re. Li Jesús quixye reheb: —La̱ex incꞌaꞌ nequenau ani lin Yucuaꞌ xban nak incꞌaꞌ nequenau cuu la̱in. Cui ta nequenau cuu la̱in, nequenau aj raj cuiꞌ ru lin Yucuaꞌ, chan reheb. 20Chixjunil aꞌin quixye li Jesús reheb nak yo̱ chixchꞌolobanquil lix ya̱lal chiruheb li cuanqueb saꞌ li templo saꞌ li naꞌajej bar nequeꞌxqꞌue cuiꞌ lix mayejeb. Ut ma̱ ani quichapoc re xban nak toj ma̱jiꞌ nacuulac xkꞌehil. 21Ut li Jesús quixye cuiꞌchic reheb: —La̱in tinxic. Tine̱sicꞌ raj chic abanan incꞌaꞌ tine̱tau xban nak incꞌaꞌ ta̱ru̱k texxic bar tinxic cuiꞌ la̱in. Texca̱mk ban saꞌ le̱ ma̱c, chan. 22Ut eb laj judío queꞌxye: —Aꞌan xye nak incꞌaꞌ naru toxic bar ta̱xic cuiꞌ aꞌan. ¿Cꞌaꞌut nak xye ke chi joꞌcan? ¿Ma yo̱ chixcꞌoxlanquil xcamsinquil rib? chanqueb. 23Li Jesús quixye reheb: —La̱ex aj ruchichꞌochꞌ. Abanan la̱in ma̱cuaꞌin aj ruchichꞌochꞌ. La̱in saꞌ choxa xinchal chak. 24Joꞌcan nak xinye e̱re nak texca̱mk saꞌ le̱ ma̱c. La̱ex texca̱mk saꞌ le̱ ma̱c cui incꞌaꞌ nequepa̱b nak la̱in ac cuanquin ajcuiꞌ chak saꞌ xticlajic joꞌ xinye e̱re, chan li Jesús. 25Ut eb aꞌan queꞌxye re: —Ye ke. ¿Anihat tzꞌakal la̱at? chanqueb. Li Jesús quixye reheb: —Chalen saꞌ xticlajic quinye chak e̱re anihin la̱in. 26Nabal li cꞌaꞌak re ru naru tinye raj e̱re re xrakbal a̱tin saꞌ e̱be̱n. Li ani quitaklan chak cue, aꞌan ti̱c xchꞌo̱l ut naxye li ya̱l. Li cꞌaꞌru xcꞌut chicuu li quitaklan chak cue, aꞌan li ninye e̱re la̱ex li cuanquex saꞌ ruchichꞌochꞌ, chan. 27Abanan eb aꞌan incꞌaꞌ queꞌxtau ru nak li Jesús yo̱ chi a̱tinac chirix li Acuabej Dios. 28Ut quixye ajcuiꞌ li Jesús reheb: —Nak acak xine̱taksi chiru li cruz re incamsinquil toj aran te̱qꞌue retal nak la̱in li taklanbilin chak xban li Dios. Ut te̱nau nak ma̱cꞌaꞌ ninba̱nu injunes. Li cꞌaꞌru ninye la̱in, aꞌan li quixcꞌutbesi chicuu lin Yucuaꞌ. 29Li ani quitaklan chak cue, aꞌan cuan cuiqꞌuin. Aꞌan incꞌaꞌ quinixcanab injunes xban nak la̱in junelic ninba̱nu li cꞌaꞌru naraj aꞌan, chan li Jesús. 30Nabaleb queꞌpa̱ban re li Jesús nak queꞌrabi li cꞌaꞌru quixye.
Li Jesús quixye aniheb li ralal xcꞌajol laj Abraham ut aniheb li ralal xcꞌajol laj tza
31Li Jesús quia̱tinac riqꞌuineb laj judío li queꞌpa̱ban re. Quixye reheb: —Cui la̱ex te̱ba̱nu li cꞌaꞌru ninye e̱re, la̱exak tzꞌakal intzolom. 32Te̱nau chic lix ya̱lal. Ut nak acak xenau chic lix ya̱lal, libre chic cua̱nkex, chan. 33Eb aꞌan queꞌchakꞌoc ut queꞌxye: —La̱o ralal xcꞌajol laj Abraham. Ma̱ jun cua cꞌayinbilo chi cꞌanjelac chiru anihak. ¿Cꞌaꞌut nak nacaye nak libre chic cua̱nko? 34Li Jesús quixye reheb: —Relic chi ya̱l ninye e̱re nak chixjunileb li nequeꞌxba̱nu li ma̱usilal cuanqueb rubel xcuanquil li ma̱c. Chanchan nak cꞌayinbileb chi cꞌanjelac chiru. 35Junak cꞌayinbil chi cꞌanjelac moco ta̱cana̱k ta chi junaj cua saꞌ rochoch lix patrón. Aꞌut li alalbej, aꞌan tento nak ta̱cana̱k saꞌ rochoch chi junaj cua. 36Joꞌcan nak cui la̱in li Cꞌajolbej tincolok e̱re chiru li ma̱c, relic chi ya̱l libre chic cua̱nkex. 37La̱in ninnau nak la̱ex xcomonex li ralal xcꞌajol laj Abraham. Abanan cuan saꞌ e̱ya̱nk li teꞌraj incamsinquil xban nak incꞌaꞌ nacuulac chiruheb li cꞌaꞌru yo̱quin chixyebal. 38La̱in ninye li cꞌaꞌru quixcꞌut chicuu lin Yucuaꞌ. Ut eb aꞌan nequeꞌxba̱nu li cꞌaꞌru quixye reheb lix yucuaꞌeb aꞌan, chan. 39Eb aꞌan queꞌxye re: —Laj Abraham, aꞌan li kaxeꞌto̱nil yucuaꞌ, chanqueb. Li Jesús quixye reheb: —Cui ta la̱ex ralal xcꞌajol laj Abraham, te̱ba̱nu raj joꞌ quixba̱nu laj Abraham. Cha̱bil raj le̱ naꞌleb joꞌ xnaꞌleb aꞌan nak quicuan. 40Abanan la̱ex te̱raj incamsinquil xban nak la̱in xinye e̱re lix ya̱lal joꞌ quicꞌutbesi̱c chicuu xban li Dios Acuabej. Laj Abraham incꞌaꞌ quixba̱nu joꞌ yo̱quex la̱ex. 41Incꞌaꞌ yo̱quex chixba̱nunquil li quixye laj Abraham. Yo̱quex ban chixba̱nunquil li naxye le̱ yucuaꞌ, chan li Jesús. Eb aꞌan queꞌchakꞌoc ut queꞌxye re: —Moco la̱o ta ralal xcꞌajol laj coꞌbe̱t. Jun ajcuiꞌ li kayucuaꞌ cuan. Aꞌan li Dios, chanqueb. 42Li Jesús quixye reheb: —Cui ta ya̱l nak li Dios e̱yucuaꞌ, niquine̱ra raj la̱in xban nak riqꞌuin li Dios quinchal chak. Cuanquin arin saꞌ e̱ya̱nk. Incꞌaꞌ quintakla chak cuib injunes. Aꞌ li Dios, aꞌan li quitaklan chak cue. 43¿Cꞌaꞌut nak incꞌaꞌ nequetau ru li cꞌaꞌru ninye? Incꞌaꞌ nequecꞌul li cua̱tin xban nak incꞌaꞌ nequeraj rabinquil li cꞌaꞌru yo̱quin chixyebal. 44La̱ex ralal xcꞌajol laj tza. Aꞌan li nataklan saꞌ e̱be̱n. La̱ex nequeba̱nu li cꞌaꞌru naraj aꞌan xban nak cuanquex rubel xcuanquil. Aꞌan aj camsinel chalen saꞌ xticlajic. Incꞌaꞌ nacuulac chiru li ya̱l xban nak aꞌan aj ticꞌtiꞌ. Ac re nak naticꞌtiꞌic. Aꞌan li xyucuaꞌil li ticꞌtiꞌ. 45La̱in ninye e̱re lix ya̱lal. Joꞌcan nak incꞌaꞌ niquine̱pa̱b. 46¿Ma cuan junak saꞌ e̱ya̱nk ta̱ru̱k tixye nak cuan inma̱c la̱in? Cui ninye li ya̱l, ¿cꞌaꞌut nak incꞌaꞌ niquine̱pa̱b? 47Cui ta la̱ex ralal xcꞌajol li Dios, nequepa̱b raj li cꞌaꞌru naxye. Abanan la̱ex ma̱cuaꞌex ralal xcꞌajol li Dios. Joꞌcan nak incꞌaꞌ nequeraj rabinquil li cꞌaꞌru naxye, chan li Jesús. 48Queꞌchakꞌoc eb laj judío ut queꞌxye re: —Ya̱l ajcuiꞌ nacaye. Samaria la̱ tenamit ut cuan ma̱us aj musikꞌej a̱cuiqꞌuin, chanqueb. 49Li Jesús quixye reheb: —Ma̱cꞌaꞌ ma̱us aj musikꞌej cuiqꞌuin. Li cꞌaꞌru yo̱quin chixba̱nunquil la̱in, aꞌan xqꞌuebal xlokꞌal lin Yucuaꞌ. Abanan la̱ex niquine̱tzꞌekta̱na. 50La̱in incꞌaꞌ ninsicꞌ inlokꞌal. Abanan cuan jun naraj nak ta̱qꞌuehekꞌ inlokꞌal. Ut aꞌan li ta̱rakok a̱tin saꞌ e̱be̱n xban nak yo̱quex chintzꞌekta̱nanquil. 51Relic chi ya̱l ninye e̱re nak li ani tixba̱nu li cꞌaꞌru ninye, li jun aꞌan incꞌaꞌ ta̱ca̱mk, chan. 52Eb laj judío queꞌchakꞌoc ut queꞌxye: —Anakcuan nakanau chi tzꞌakal nak cuan ma̱us aj musikꞌej a̱cuiqꞌuin. Laj Abraham quicam ut queꞌcam ajcuiꞌ eb li profeta. Abanan la̱at nacaye nak li ani ta̱ba̱nu̱nk re li cꞌaꞌru nacaye incꞌaꞌ ta̱ca̱mk. 53¿Ma kꞌaxal nim ta biꞌ a̱cuanquil la̱at chiru laj Abraham li kaxeꞌto̱nil yucuaꞌ? Aꞌan quicam ut queꞌcam ajcuiꞌ li profeta. ¿Anihat la̱at nak nacaye chi joꞌcan? chanqueb re. 54Li Jesús quixye reheb: —Cui la̱in tinqꞌue inlokꞌal injunes, ma̱cꞌaꞌ na-oc cuiꞌ lin lokꞌal. Li naqꞌuehoc lin lokꞌal, aꞌan lin Yucuaꞌ li nequeye la̱ex nak aꞌan le̱ Dios. 55La̱ex incꞌaꞌ nequenau ru aꞌan. Abanan la̱in ninnau ru. Cui ut tinye ta nak incꞌaꞌ ninnau ru, la̱inak raj aj ticꞌtiꞌ joꞌ la̱ex. Aban la̱in ninnau ru ut ninba̱nu li cꞌaꞌru naxye aꞌan. 56Laj Abraham le̱ xeꞌto̱nil yucuaꞌ quisahoꞌ saꞌ xchꞌo̱l nak tincha̱lk saꞌ ruchichꞌochꞌ. Quiril nak quincꞌulun ut quisahoꞌ saꞌ xchꞌo̱l xban, chan li Jesús reheb. 57Eb aꞌan queꞌxye re: —¿Chanru nak xacuil ru laj Abraham? La̱at toj ma̱jiꞌ nacaba̱nu laje̱b roxcꞌa̱l (50) chihab, chanqueb. 58Li Jesús quichakꞌoc ut quixye reheb: —Relic chi ya̱l tinye e̱re nak chalen chak saꞌ xticlajic nak toj ma̱jiꞌ nayoꞌla laj Abraham, ac cuanquin ajcuiꞌ chak la̱in, chan li Jesús. 59Cꞌajoꞌ nak queꞌjoskꞌoꞌ ut queꞌoc raj chixcutinquil chi pec. Abanan li Jesús quixmuk rib chiruheb. Qui-el saꞌ li templo ut co̱.
Currently Selected:
San Juan 8: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.