San Juan 18
18
Li Jesús quikꞌaxtesi̱c saꞌ rukꞌeb li xicꞌ nequeꞌiloc re
1Nak quirakeꞌ chi tijoc li Jesús, qui-el saꞌ li naꞌajej aꞌan rochbeneb lix tzolom. Co̱eb jun pacꞌal li haꞌ Cedrón xcꞌabaꞌ bar cuan cuiꞌ jun si̱r li acui̱mk. 2Laj Judas Iscariote, li ta̱kꞌaxtesi̱nk re li Jesús, naxnau li naꞌajej aꞌan xban nak nabal sut quicuulac li Jesús aran rochbeneb lix tzolom. 3Joꞌcan nak laj Judas co̱ saꞌ li naꞌajej aꞌan ut quixcꞌam chirix jun chꞌu̱tal li soldado aj Roma. Ut co̱eb ajcuiꞌ chirixeb li nequeꞌcꞌacꞌalen saꞌ li templo. Taklanbileb xbaneb laj fariseo ut li xbe̱nil aj tij. Cuan cuanqueb xxameb saꞌ rukꞌ ut cuan cuanqueb xxameb saꞌ ruꞌuj cheꞌ ut cuanqueb ajcuiꞌ xchꞌi̱chꞌeb. 4Li Jesús ac naxnau chixjunil li cꞌaꞌru tixcꞌul. Joꞌcan nak quichal ut quixakli chiruheb ut quixye: —¿Ani nequesicꞌ? chan reheb. 5Eb aꞌan queꞌxye: —Yo̱co chixsicꞌbal li Jesús laj Nazaret.— Li Jesús quixye: —La̱in li yo̱quex chinsicꞌbal, chan. Cuan ajcuiꞌ saꞌ xya̱nkeb laj Judas li ta̱kꞌaxtesi̱nk re. 6Nak li Jesús quixye reheb, “La̱in li yo̱quex chinsicꞌbal”, kꞌa̱jel ix nak queꞌco̱eb ut jun tꞌaniqueb nak queꞌtꞌaneꞌ chi chꞌochꞌ. 7Ut li Jesús quixye cuiꞌchic reheb: —¿Ani nequesicꞌ?— Queꞌchakꞌoc ut queꞌxye re: —Li Jesús laj Nazaret, aꞌan li yo̱co chixsicꞌbal.— 8Li Jesús quixye reheb: —Ac xinye e̱re nak la̱in. Cui yo̱quex chinsicꞌbal la̱in, canabomakeb chi xic li nequeꞌta̱ken cue, chan. 9Quixye chi joꞌcan re nak ta̱tzꞌaklok ru li quixye nak quitijoc: At inYucuaꞌ, ma̱ jun reheb li cakꞌaxtesiheb cue xsach chicuu. 10Laj Simón Pedro cuan xchꞌi̱chꞌ. Quirisi chak lix chꞌi̱chꞌ saꞌ xnaꞌaj. Ut riqꞌuin lix chꞌi̱chꞌ quirisi lix xic laj Malco lix mo̱s li xyucuaꞌil aj tij. Li xic li quixyocꞌ, aꞌan li cuan saꞌ xnim. 11Li Jesús quixye re laj Pedro: —Xoc la̱ chꞌi̱chꞌ saꞌ xnaꞌaj. ¿Ma incꞌaꞌ ta biꞌ tento nak tincꞌul li raylal aꞌin? ¿Ma incꞌaꞌ ta biꞌ aꞌan aj e nak xinixtakla chak lin Yucuaꞌ? chan. 12Ut eb li soldado aj Roma rochben li nataklan saꞌ xbe̱neb ut eb laj judío li nequeꞌcꞌacꞌalen saꞌ li templo, queꞌxchap li Jesús ut queꞌxbacꞌ. 13Queꞌxcꞌam riqꞌuin laj Anás lix yucuaꞌ li rixakil laj Caifás. Laj Caifás, aꞌan li xbe̱nil aj tij saꞌ li chihab aꞌan. 14Laj Caifás aꞌan li quiyehoc reheb li nequeꞌtaklan saꞌ xbe̱neb laj judío nak us raj nak ta̱ca̱mk jun chi cui̱nk saꞌ xcꞌabaꞌeb chixjunileb.
Laj Pedro quixye nak incꞌaꞌ naxnau ru li Jesús
15Nak yo̱queb chixcꞌambal li Jesús, laj Simón Pedro rochben jun chic lix tzolom li Jesús yo̱queb chixta̱kenquil. Li tzolom aꞌan nanaꞌeꞌ ru xban li xyucuaꞌil aj tij. Joꞌcan nak qui-oc rochben li Jesús saꞌ li neba̱l li cuan chiru li rochoch li xyucuaꞌil aj tij. 16Abanan laj Pedro quicana saꞌ be chire li oqueba̱l. Ut lix tzolom jun chic qui-el saꞌ li neba̱l li cuan chiru li cab ut quia̱tinac riqꞌuin li ixk li nacꞌacꞌalen re li oqueba̱l. Ut quirocsi laj Pedro chi saꞌ. 17Ut li ixk, li nacꞌacꞌalen re li oqueba̱l quixye re laj Pedro, —¿Ma ma̱cuaꞌ ta biꞌ la̱at jun reheb lix tzolom li cui̱nk aꞌan? chan re. Laj Pedro quichakꞌoc ut quixye: —Incꞌaꞌ. Ma̱cuaꞌin.— 18Eb laj cꞌanjel ut eb li nequeꞌcꞌacꞌalen saꞌ li templo queꞌxtzꞌab xxameb xban nak que teꞌrecꞌa. Xakxo̱queb chi kꞌixi̱nc chire xam. Laj Pedro yo̱ ajcuiꞌ chi kꞌixi̱nc saꞌ xya̱nkeb. 19Li xyucuaꞌil aj tij qui-oc chixpatzꞌbal re li Jesús chirixeb lix tzolom ut chirix ajcuiꞌ li tijleb li naxcꞌut. 20Li Jesús quixye re: —Junelic xinchꞌolob lix ya̱lal chiruheb li tenamit saꞌ eb li cab li nequeꞌxchꞌutub cuiꞌ ribeb laj judío ut saꞌ li templo. Ma̱cꞌaꞌ xinye reheb chi mukmu. 21¿Cꞌaꞌut nak nacapatzꞌ cue la̱in? Patzꞌ reheb li nequeꞌabin cue. Eb aꞌan naru nequeꞌxye e̱re cꞌaꞌru xinye, chan li Jesús. 22Nak quixye aꞌan, jun reheb li nequeꞌcꞌacꞌalen saꞌ li templo quixsacꞌ saꞌ xnakꞌ ru li Jesús ut quixye re: —¿Cꞌaꞌut nak nacasume li xyucuaꞌil aj tij chi joꞌcan? chan re. 23Li Jesús quixye re: —Cui incꞌaꞌ us li xinye, ye reheb li cuanqueb arin cꞌaꞌru incꞌaꞌ us xinye. Cui ut us li xinye, ¿cꞌaꞌut nak niquina̱sacꞌ? chan re. 24Ut laj Anás quixtakla li Jesús chi bacꞌbo riqꞌuin laj Caifás li xyucuaꞌil aj tij. 25Laj Pedro toj xakxo chi kꞌixi̱nc chire xam. Ut queꞌxye cuiꞌchic re: —¿Ma ma̱cuaꞌ ta biꞌ la̱at xcomoneb lix tzolom li cui̱nk aꞌan? Ut laj Pedro quiticꞌtiꞌic ut quixye: —Incꞌaꞌ. Ma̱cuaꞌin.— 26Jun lix mo̱s li xyucuaꞌil aj tij rechꞌalal li cui̱nk li quiyoqꞌueꞌ xxic xban laj Pedro, quixye re: —La̱at xcomoneb. ¿Ma incꞌaꞌ ta biꞌ xcuil nak a̱cuochben aran saꞌ li xnaꞌaj li acui̱mk? chan. 27Ut laj Pedro quixye cuiꞌchic re: —Incꞌaꞌ. Ma̱cuaꞌin, chan. Tojeꞌ ajcuiꞌ ta̱rakekꞌ xyebal aꞌan nak quiya̱bac laj tzoꞌ xul.
Quicꞌameꞌ li Jesús riqꞌuin laj Pilato
28Toj ekꞌela chi us queꞌrisi li Jesús riqꞌuin laj Caifás ut queꞌxcꞌam saꞌ li naꞌajej li narakoc cuiꞌ a̱tin laj Pilato li acuabej aj Roma. Eb li nequeꞌtaklan saꞌ xbe̱neb laj judío incꞌaꞌ queꞌoc saꞌ li rochoch laj Pilato xban nak aꞌan ma̱cuaꞌ aj judío. Cui ta queꞌoc saꞌ rochoch junak ma̱cuaꞌ aj judío, queꞌxmux raj rib saꞌ lix pa̱ba̱leb. Xban nak queꞌraj cuaꞌac re li ninkꞌe Pascua, incꞌaꞌ queꞌru chi oc saꞌ li cab aꞌan. 29Xban nak incꞌaꞌ queꞌoc saꞌ li cab, laj Pilato qui-el chirix cab ut quixye reheb: —¿Cꞌaꞌru xma̱c li cui̱nk aꞌin nak xexchal chixjitbal? chan reheb. 30Queꞌchakꞌoc ut queꞌxye re: —Cui ta ma̱cꞌaꞌ xma̱c, incꞌaꞌ raj xkacꞌam chak a̱cuiqꞌuin re nak tatrakok a̱tin saꞌ xbe̱n, chanqueb. 31Laj Pilato quixye reheb: —Cꞌamomak la̱ex ut rakomak a̱tin saꞌ xbe̱n joꞌ naxye saꞌ le̱ chakꞌrab la̱ex, chan. Eb laj judío queꞌxye re: —Moco qꞌuebil ta kalese̱ns la̱o aj judío nak takacamsi junak cristian, chanqueb. 32Riqꞌuin aꞌin quitzꞌakloc ru li quixye li Jesús chanru nak ta̱camsi̱k. 33Laj Pilato qui-oc cuiꞌchic saꞌ li naꞌajej li narakoc cuiꞌ a̱tin. Quixbok li Jesús riqꞌuin ut quixye re: —¿Ma la̱at lix reyeb laj judío? chan re. 34Li Jesús quixye re: —¿Ma saꞌ a̱chꞌo̱l x-ala li xaye, malaj jalan xyehoc a̱cue li xaye? chan. 35Laj Pilato quixye re: —¿Ma la̱in ta biꞌ aj judío? Eb la̱ cuech tenamitil rochbeneb li xbe̱nil aj tij, aꞌaneb li xeꞌkꞌaxtesin a̱cue saꞌ cuukꞌ. Ye cue cꞌaꞌru a̱ma̱c, chan. 36Li Jesús quixye re: —Lin cuanquil la̱in ma̱cuaꞌ re saꞌ ruchichꞌochꞌ. Cui ta la̱in tintakla̱nk arin saꞌ ruchichꞌochꞌ, eb li nequeꞌta̱ken cue teꞌpletik raj re incolbal chiruheb li nequeꞌcꞌamoc be chiruheb laj judío. Abanan lin cuanquil la̱in ma̱cuaꞌ re saꞌ ruchichꞌochꞌ, chan. 37Laj Pilato quixye re: —La̱at rey chi joꞌcanan.— Li Jesús quixye re: —Ya̱l li xaye nak la̱in rey. Aꞌan aj e nak quinchal chi yoꞌla̱c arin saꞌ ruchichꞌochꞌ re xchꞌolobanquil lix ya̱lal. Ut chixjunileb li nequeꞌraj xnaubal lix ya̱lal, nequeꞌrabi li cꞌaꞌru ninye, chan. 38Laj Pilato quixye: —Ut, ¿cꞌaꞌru lix ya̱lal?— Ut co̱ cuiꞌchic riqꞌuineb laj judío ut quixye reheb: —Ma̱ jun xma̱c li cui̱nk aꞌin nintau. 39La̱ex cꞌaynakex nak na-achꞌaba̱c junak li pre̱x saꞌ li ninkꞌe Pascua. ¿Ma te̱raj nak tincuachꞌab che̱ru le̱ rey la̱ex aj judío? chan laj Pilato. 40Eb aꞌan queꞌxjap re ut queꞌxye: —Incꞌaꞌ. Ma̱cuachꞌab li cui̱nk aꞌan. Achꞌab laj Barrabás, chanqueb. Laj Barrabás, aꞌan jun aj e̱lkꞌ.
Currently Selected:
San Juan 18: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.