Jeremías 51
51
1Joꞌcaꞌin naxye li Ka̱cuaꞌ: —La̱in tintakla junak li tenamit chi pletic riqꞌuineb laj Babilonia ut riqꞌuineb ajcuiꞌ li cuanqueb aran li nequeꞌxkꞌetkꞌeti ribeb chicuu. Eb li tintakla chanchanakeb li ikꞌ li nasachoc nak teꞌxic chi pletic. 2La̱in tintaklaheb li jalan xtenamiteb chirisinquileb laj Babilonia saꞌ lix naꞌajeb. Teꞌisi̱k joꞌ nak na-isi̱c rix li trigo xban ikꞌ. Ut teꞌxcanab chi ma̱cꞌaꞌ chic cuan chi saꞌ lix tenamiteb xban nak yalak bar teꞌcha̱lk chak li ta̱sachok reheb.— 3Cauresihomak le̱ tzimaj, la̱ex li nequenau cutuc riqꞌuin tzimaj. La̱ex li nequenimobresi e̱rib riqꞌuin le̱ rakꞌ chꞌi̱chꞌ, me̱ril xtokꞌoba̱leb ru. Camsihomakeb li sa̱jeb aran Babilonia. Ut sachomakeb ru chixjunileb lix soldado. 4Chixjunileb laj Babilonia teꞌcamsi̱k. Telajeꞌcamsi̱k saꞌ eb li be. 5Eb li ralal xcꞌajol laj Israel ut eb li ralal xcꞌajol laj Judá incꞌaꞌ queꞌtzꞌekta̱na̱c chi junaj cua xban li Ka̱cuaꞌ, li nimajcual Dios, usta numtajenak lix ma̱queb chiru li Ka̱cuaꞌ lix santil Dioseb. 6Elenkex Babilonia. Colomak e̱rib. Me̱qꞌue e̱rib chi sachecꞌ xban lix ma̱queb laj Babilonia. Xcuulac xkꞌehil nak li Ka̱cuaꞌ tixqꞌue re̱kaj reheb joꞌ xcꞌulubeb xcꞌulbal. 7Li tenamit Babilonia chanchan jun li secꞌ oro saꞌ rukꞌ li Ka̱cuaꞌ nak quicuan ut chixjunil li tenamit quixcaltesiheb. Queꞌrucꞌ li vino li quixqꞌue reheb ut queꞌsach xnaꞌlebeb li xni̱nkal ru tenamit. 8Abanan chiru junpa̱t quisacheꞌ ru li tenamit Babilonia. Chexya̱bak chirixeb. Yalomak xbanbal lix tochꞌolal. Ma̱re ta̱qꞌuira̱k. 9Eb li cuanqueb aran queꞌxye: —Xkayal xbanbaleb laj Babilonia abanan incꞌaꞌ xeꞌqꞌuira. Kacanabakeb ut yoꞌkeb saꞌ li katenamit. Li Ka̱cuaꞌ quixqꞌueheb laj Babilonia chixtojbal lix ma̱queb xban nak xnumta li ma̱c xeꞌxba̱nu. 10Li Ka̱cuaꞌ xcꞌutbesi nak la̱o cuanco saꞌ ti̱quilal. Yoꞌkeb chixyebal reheb li cuanqueb Sión li cꞌaꞌru quixba̱nu li Ka̱cuaꞌ li kaDios. 11Li Ka̱cuaꞌ xqꞌue saꞌ xchꞌo̱leb lix reyeb laj Media nak teꞌxsach ruheb laj Babilonia. Li Ka̱cuaꞌ tixqꞌue re̱kaj li queꞌxba̱nu re lix templo li Ka̱cuaꞌ. La̱ex aj Media, cauresihomak le̱ tzimaj ut cauresihomak le̱ chꞌi̱chꞌ li nequecol cuiꞌ re le̱ chꞌo̱l. 12Taksihomak li bandera retalil nak te̱tiquib pletic riqꞌuineb li cuanqueb saꞌ xbe̱neb li tzꞌac li sutsu cuiꞌ li tenamit. Qꞌuehomak xtzꞌakobeb li soldado ut qꞌuehomakeb saꞌ xnaꞌaj li nequeꞌqꞌuehoc etal. Taklahomakeb chi pletic. Li Ka̱cuaꞌ tixba̱nu li cꞌaꞌru naraj xba̱nunquil joꞌ quixye nak tixba̱nu reheb laj Babilonia. 13La̱ex aj Babilonia, li sutsu le̱ tenamit xbaneb li nimaꞌ, ta̱sachekꞌ e̱ru. Nabal le̱ biomal, abanan xcuulac xkꞌehil nak tex-osokꞌ. 14Li Ka̱cuaꞌ li nimajcual Dios quixba̱nu li juramento saꞌ xcꞌabaꞌ aꞌan ut quixye nak tixtakla li qꞌuila soldado chi pletic e̱riqꞌuin la̱ex aj Babilonia. Chanchanakeb laj sa̱cꞌ nak teꞌcha̱lk xban xqꞌuialeb. Ut japjo̱k reheb nak teꞌnumta̱k saꞌ e̱be̱n. 15Li Ka̱cuaꞌ quixyi̱b li ruchichꞌochꞌ riqꞌuin lix cuanquil. Quixxakab saꞌ xnaꞌaj riqꞌuin lix naꞌleb ut quixyi̱b li choxa. 16Yal riqꞌuin ra̱tin li Ka̱cuaꞌ naxtakla chak li hab. Ut naxqꞌue li chok saꞌ chixjunil li ruchichꞌochꞌ. Yal riqꞌuin ra̱tin naxqꞌue li ca̱k chi ecꞌa̱nc nak yo̱ li hab. Ut narisi chak li ikꞌ saꞌ li naꞌajej li xocxo cuiꞌ xban. 17Abanan eb li cui̱nk ma̱cꞌaꞌ nequeꞌoc cuiꞌ ut ma̱cꞌaꞌ xnaꞌlebeb. Chixjunileb li nequeꞌyi̱ban re li yi̱banbil dios xuta̱nal nequeꞌel. Ma̱cꞌaꞌ nequeꞌoc cuiꞌ li jalanil dios li nequeꞌxyi̱b. Moco yoꞌyo̱queb ta. 18Ma̱cꞌaꞌ nequeꞌoc cuiꞌ ut xcꞌulubeb nak teꞌhobekꞌ. Teꞌsachekꞌ ruheb nak li Ka̱cuaꞌ ta̱cha̱lk chi rakoc a̱tin. 19Moco joꞌcan ta li Ka̱cuaꞌ lix Dios laj Jacob. Li Ka̱cuaꞌ, aꞌan li quiyi̱ban re chixjunil li cꞌaꞌru cuan. Ut aꞌan li quisicꞌoc ruheb laj Israel chokꞌ xtenamit. “Li Ka̱cuaꞌ li Nimajcual Dios” xcꞌabaꞌ. 20Li Ka̱cuaꞌ quixye: —La̱ex aj Babilonia, chanchanex lin martillo re sachoc. La̱ex texcꞌanjelak chicuu re xsachbaleb li xni̱nkal ru tenamit ut re xsachbal lix cuanquileb. 21La̱ex texcꞌanjelak chicuu re xsachbaleb li cacua̱y ut eb li soldado li nequeꞌxic chirixeb. La̱ex texsachok reheb li carruajes ut laj chꞌeꞌol reheb. 22La̱ex texcꞌanjelak chicuu re xsachbaleb li ixk ut eb li cui̱nk, li ti̱xeb ut li toj sa̱jeb, joꞌ eb ajcuiꞌ li chꞌajom ut eb li xkaꞌal. 23La̱ex texcꞌanjelak chicuu re xsachbaleb li queto̱mk ut eb laj ilol reheb. La̱ex texsachok reheb laj acuinel joꞌ eb ajcuiꞌ li bo̱yx. Ut la̱ex ajcuiꞌ texsachok reheb li nequeꞌcꞌamoc be ut eb li nequeꞌtaklan. 24Li Ka̱cuaꞌ quixye: —La̱in tinqꞌueheb laj Babilonia ut chixjunileb li cuanqueb aran chixtojbal xma̱queb xban li ma̱usilal li queꞌxba̱nu aran Sión che̱ru la̱ex aj judío. 25La̱ex aj Babilonia, chanchanex jun li tzu̱l najt xteram. La̱ex li xexsachoc saꞌ chixjunil li ruchichꞌochꞌ. Abanan la̱in li Ka̱cuaꞌ. Yo̱ injoskꞌil saꞌ e̱be̱n. La̱in tinsach ru le̱ tenamit. Cꞌatbil nak ta̱osokꞌ. 26Lix pecul le̱ tenamit la̱ex aj Babilonia incꞌaꞌ chic ta̱cꞌanjelak chokꞌ xxuc junak cab, chi moco ta̱cꞌanjelak re xqꞌuebal chokꞌ cimiento. Le̱ tenamit junelic chanchanak chic li chaki chꞌochꞌ ma̱cꞌaꞌ chic cuan chi saꞌ, chan li Ka̱cuaꞌ. 27Taksihomak le̱ bandera ut ya̱basihomak le̱ trompeta re xyebal reheb lix ni̱nkal ru tenamit nak teꞌxcauresi ribeb chi xic chi pletic riqꞌuineb laj Babilonia. Yehomak resil nak teꞌxtiquib pletic eb li tenamit Ararat, Mini ut Askenaz. Xakabomak li ani ta̱takla̱nk saꞌ xbe̱neb li soldado. Ut cꞌamomakeb nabal li cacua̱y. Chanchanakeb li jun tu̱b laj sa̱cꞌ li yo̱queb xjoskꞌil. 28Yehomak reheb lix reyeb laj Media nak teꞌxcauresi ribeb chi pletic, joꞌ ajcuiꞌ eb li nequeꞌtaklan saꞌ xbe̱neb li soldados, ut eb li nequeꞌtenkꞌan re li rey. Yehomak resil reheb chixjunileb li tenamit li cuanqueb rubel xcuanquileb laj Media. 29Lix tenamit laj Babilonia ta̱ecꞌa̱nk saꞌ xnaꞌaj ut ta̱rahokꞌ saꞌ xchꞌo̱l xban nak li Ka̱cuaꞌ oc re chixba̱nunquil li cꞌaꞌru quixye nak tixba̱nu reheb laj Babilonia. Tixsukꞌisi chaki chꞌochꞌ ut ma̱cꞌaꞌak chic cua̱nk aran. 30Eb li soldado aj Babilonia xeꞌxcanab pletic. Xeꞌxtzꞌap ribeb saꞌ li cab li nequeꞌxcol cuiꞌ ribeb. Ma̱cꞌaꞌeb chic xmetzꞌe̱u. Chanchaneb ixk. Cꞌatbil nak ta̱osokꞌ lix tenamiteb ut poꞌinbileb chic li oqueba̱l. 31Nabaleb li takl xeꞌco̱eb chixyebal resil re li rey nak ac xeꞌxchap chixjunil li tenamit li xicꞌ nequeꞌiloc reheb. 32Eb li xicꞌ nequeꞌiloc reheb xeꞌxchap li naꞌajej li nequeꞌnumeꞌ cuiꞌ jun pacꞌal li nimaꞌ ut yo̱queb chixcꞌatbaleb li naꞌajej li nequeꞌxcol cuiꞌ ribeb laj Babilonia. Ut chixjunileb li soldado aj Babilonia queꞌsach xchꞌo̱leb xban xxiuheb. 33Li Ka̱cuaꞌ li nimajcual Dios, lix Dioseb laj Israel, quixye: —Eb laj Babilonia teꞌsachekꞌ ru chixjunileb. Chanchanakeb li trigo li nayekꞌiman re risinquil li rix.— 34Eb li cuanqueb Jerusalén queꞌxye: —Laj Nabucodonosor lix reyeb laj Babilonia quixsach ku. Ma̱cꞌaꞌ chic cuan chi saꞌ li katenamit xcanab. Chanchan jun li secꞌ ma̱cꞌaꞌ chic cuan chi saꞌ. Laj Nabucodonosor chanchan jun li dragón naxnukꞌ li joꞌ qꞌuial naraj ut naxtzꞌek li incꞌaꞌ naraj. 35Chisukꞌi̱k taxak saꞌ xbe̱neb laj Babilonia chixjunil li raylal li queꞌxba̱nu ke. Cheꞌxtoj taxak rix li ma̱c queꞌxba̱nu nak queꞌxcamsiheb li kacomon, chanqueb li cuanqueb Sión. 36Joꞌcan nak li Ka̱cuaꞌ quixye: —La̱in tin-oque̱nk che̱rix ut la̱in tinqꞌue re̱kaj li incꞌaꞌ us xeꞌxba̱nu e̱re. La̱in tinqꞌue chi chakic li nimaꞌ ut eb li yuꞌam haꞌ li cuanqueb Babilonia. 37Juqꞌuinbilak lix tenamiteb ut tu̱btu̱k aj chic. Ta̱cana̱k chokꞌ xnaꞌaj laj xoj. Incꞌaꞌ ta̱cua̱nk cristian aran. Hobilak ut xucuajelak rilbal. 38Eb laj Babilonia japjo̱k reheb. Chanchanakeb li cakcoj ut li ral li cakcoj nak teꞌxjap reheb. 39Nak yo̱keb chixjapbal reheb ut ta̱chakik reheb, la̱in tinqꞌue li rucꞌaheb ut teꞌcala̱k. Japjo̱k reheb chi seꞌec ut chirix aꞌan teꞌcua̱rk chi junaj cua ut incꞌaꞌ chic teꞌajk ruheb, chan li Ka̱cuaꞌ. 40La̱in tinqꞌueheb chi camsi̱c. Chanchanakeb li carner ut eb li ral ut eb li chiba̱t nak nequeꞌcꞌameꞌ chi camsi̱c. 41Cꞌoxlahomak chanru nak quichapeꞌ li naꞌajej Babilonia. Quichapeꞌ li nimla tenamit li quiqꞌueheꞌ xlokꞌal xbaneb chixjunileb li cuanqueb saꞌ ruchichꞌochꞌ. Anakcuan xucuajel rilbal saꞌ xya̱nkeb li xni̱nkal ru tenamit. 42Chanchan xbutꞌun li tenamit Babilonia nak teꞌcha̱lk li xicꞌ nequeꞌiloc re chixsachbal. 43Ma̱cꞌaꞌ chic ta̱cana̱k saꞌ eb li tenamit li cuanqueb Babilonia. Ma̱ ani chic teꞌcua̱nk aran ut ma̱ ani chic teꞌnumekꞌ saꞌ li naꞌajej aꞌan. 44La̱in tinqꞌue chixtojbal lix ma̱c laj Bel lix dioseb laj Babilonia. La̱in tinmakꞌ chiru li cꞌaꞌru quilajeꞌxcanab saꞌ lix templo. Eb li xni̱nkal ru tenamit incꞌaꞌ chic teꞌxic riqꞌuin. Ut li tzꞌac li sutsu cuiꞌ li tenamit ta̱tꞌanekꞌ. 45La̱ex aj Israel, lin tenamit, elenkex saꞌ li tenamit Babilonia. Tex-e̱lelik ut colomak le̱ yuꞌam xban nak la̱in yo̱ injoskꞌil saꞌ xbe̱neb laj Babilonia, chan li Dios. 46Michꞌinan le̱ chꞌo̱l chi moco texxucuak nak te̱rabi li cꞌaꞌru yo̱keb chixyebal. Rajlal chihab jalan esilal ta̱abima̱nk. Ta̱abi̱k resil li raylal ut li rahobtesi̱nc. Ut ta̱abi̱k resil nak eb li rey yo̱keb chixpletinquil ribeb. 47Relic chi ya̱l ta̱cuulak xkꞌehil nak la̱in tinqꞌueheb chixtojbal xma̱queb ut tinsach ruheb li jalanil dios. Xuta̱nal teꞌe̱lk chixjunileb li cuanqueb saꞌ li naꞌajej aꞌan. Ut eb li camenak tꞌanaxi̱nkeb saꞌ eb li naꞌajej. 48Ut chixjunileb li cuanqueb saꞌ choxa ut eb li cuanqueb saꞌ ruchichꞌochꞌ teꞌxjap reheb xban xsahil xchꞌo̱leb xban li cꞌaꞌru teꞌxcꞌul eb laj Babilonia. Eb li teꞌsachok reheb teꞌcha̱lk chak saꞌ li norte, chan li Ka̱cuaꞌ. 49Eb laj Babilonia queꞌxcamsiheb li cristian yalak bar saꞌ ruchichꞌochꞌ. Queꞌxcamsiheb laj Israel. Joꞌcan nak tento nak teꞌsachekꞌ ruheb aꞌan. 50La̱ex li joꞌ qꞌuialex xexcoleꞌ saꞌ li ple̱t, me̱xakab e̱rib. Usta najt cuanquex, checꞌoxla li Dios ut checꞌoxla ajcuiꞌ li tenamit Jerusalén. 51La̱ex nequeye, “Xuta̱nal xo-el ut xohobeꞌ ut nocoxuta̱na̱c xban nak eb li jalaneb xtenamit queꞌoc saꞌ eb li santil naꞌajej saꞌ lix templo li Ka̱cuaꞌ.” 52Abanan cuulac re xkꞌehil nak la̱in tinsach ruheb chixjunileb lix dioseb laj Babilonia. Ut yalak bar saꞌ li naꞌajej eb li tenamit ayaynakeb xban lix tochꞌolaleb. 53Usta teꞌxyi̱b lix naꞌajeb chi najt xteram ut ta̱cuulak toj saꞌ choxa, abanan la̱in tintaklaheb laj sachonel chixsachbal, chan li Ka̱cuaꞌ. 54Abihomak nak yo̱keb chi ya̱bac laj Babilonia xban nak quisacheꞌ lix tenamiteb. 55Li Ka̱cuaꞌ tixsach ruheb laj Babilonia ut incꞌaꞌ chic teꞌchoki̱nk. Eb li xicꞌ nequeꞌiloc re choki̱nkeb nak yo̱keb chi cha̱lc. Chanchan nak na-ecꞌan li palau. 56Teꞌcha̱lk chixsachbal li tenamit Babilonia. Eb lix soldado laj Babilonia teꞌchapekꞌ ut teꞌtokekꞌ lix tzimaj. La̱in li Ka̱cuaꞌ tinqꞌueheb laj Babilonia chixtojbal xma̱queb joꞌ xcꞌulubeb xcꞌulbal. 57Aꞌin li naxye li Ka̱cuaꞌ: —La̱in tinqꞌueheb chi cala̱c li nequeꞌtenkꞌan re li rey ut eb li cuanqueb xnaꞌleb joꞌ eb ajcuiꞌ li nequeꞌtaklan saꞌ xbe̱neb li soldados ut eb li cuanqueb saꞌ xcuanquil, joꞌ eb ajcuiꞌ li soldados. Teꞌcua̱rk chi junaj cua ut incꞌaꞌ chic teꞌajk ruheb, chan li Rey li “nimajcual Dios” xcꞌabaꞌ. 58Aꞌan aꞌin li naxye li Ka̱cuaꞌ li nimajcual Dios: —Ta̱juqꞌui̱k li tzꞌac chi junaj cua li sutsu cuiꞌ li tenamit usta kꞌaxal nim ru. Ut teꞌcꞌatekꞌ li oqueba̱l li kꞌaxal najt xteram. Ma̱cꞌaꞌ aj e nak queꞌxtacuasi ribeb li tenamit chi cꞌanjelac xban nak yal quicꞌateꞌ li cꞌaꞌru queꞌxyi̱b, chan. 59Saꞌ li xca̱ chihab roquic chokꞌ xreyeb laj Israel laj Sedequías, nak li profeta Jeremías quia̱tinac riqꞌuin laj Seraías, li ralal laj Nerías, ut li ri laj Maasías. Laj Seraías quirochbeni li rey Sedequías nak co̱ Babilonia. Aꞌan li na-iloc re li rey. 60Li profeta Jeremías quixtzꞌi̱ba saꞌ jun li botbil hu li raylal li tixcꞌul eb laj Babilonia, joꞌ ajcuiꞌ lix tenamiteb. 61Quixye re laj Seraías: —Nak tatcuulak Babilonia, ta̱cuil xsaꞌ li hu aꞌin chi cau xya̱b a̱cux. 62Ut ta̱ye, “At Ka̱cuaꞌ, la̱at caye nak ta̱sach ru li naꞌajej aꞌin. Ma̱cꞌaꞌ chic cristian ta̱cana̱k saꞌ li naꞌajej aꞌin, chi moco eb li xul. Ta̱cana̱k chokꞌ chaki chꞌochꞌ chi junaj cua.” 63Nak tatrakekꞌ chirilbal xsaꞌ li hu aꞌin, ta̱bacꞌ chiru jun li pec ut ta̱cut saꞌ li nimaꞌ Éufrates. 64Ut ta̱ye, “Joꞌ nak xsubun li hu saꞌ li haꞌ, joꞌcan ajcuiꞌ nak ta̱osokꞌ li tenamit Babilonia ut incꞌaꞌ chic ta̱usa̱k xban li raylal li quixqꞌue li Ka̱cuaꞌ saꞌ xbe̱n,” chaꞌakat. Joꞌcaꞌin nak quirakeꞌ chi a̱tinac li profeta Jeremías.
Currently Selected:
Jeremías 51: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
