Hebreos 13

Chanru xnaꞌleb laj pa̱banel

1Me̱canab xra̱bal e̱rib che̱ribil e̱rib xban nak junajex saꞌ le̱ pa̱ba̱l. 2Me̱kꞌetkꞌeti e̱rib chixcꞌulbal le̱ rulaꞌ. Checꞌuleb ban saꞌ usilal. Cuanqueb li queꞌxcꞌul li rulaꞌeb, abanan incꞌaꞌ nequeꞌxnau nak ángel li queꞌcuulac chi ulaꞌani̱nc reheb. 3Cherilak xtokꞌoba̱l ruheb li cuanqueb saꞌ tzꞌalam. Cherecꞌa̱k saꞌ le̱ ra̱m nak chanchan ajcuiꞌ la̱ex li cuanquex saꞌ tzꞌalam. Chinak ajcuiꞌ saꞌ e̱chꞌo̱l li nequeꞌhobeꞌ ut li nequeꞌrahobtesi̱c. Chanchan nak la̱ex ajcuiꞌ yo̱quex chi cꞌuluc re li raylal aꞌan. 4Us li sumla̱c aban tento che-oxlokꞌi le̱ sumlajic. Ma̱cꞌaꞌ cꞌaꞌru chebalakꞌi cuiꞌ e̱rib. Li Dios ta̱rakok a̱tin saꞌ xbe̱neb li nequeꞌxmux ru lix sumlajiqueb, joꞌ ajcuiꞌ saꞌ xbe̱neb laj coꞌbe̱t laj yumbe̱t. 5Me̱ra ru li tumin. Checꞌojobak ban e̱chꞌo̱l riqꞌuin li joꞌ qꞌuial cuan e̱re xban nak li Dios quixye:

Junelic tatintenkꞌa, ut ma̱ jokꞌe tatincanab a̱junes. (Deut. 31:6)

6Joꞌcan nak naru takaye chi anchal kachꞌo̱l:

Li Ka̱cuaꞌ Dios natenkꞌan cue. Incꞌaꞌ ninxucua li cꞌaꞌru teꞌxba̱nu li xicꞌ nequeꞌiloc cue. (Sal. 118:6)

7Chijulticokꞌ e̱re eb li queꞌcꞌamoc be che̱ru. Aꞌan queꞌxchꞌolob xya̱lal li ra̱tin li Dios. Cheqꞌuehak retal lix pa̱ba̱l ut lix yuꞌameb nak queꞌcuan saꞌ ruchichꞌochꞌ. Joꞌcan ajcuiꞌ cheba̱nuhak la̱ex. 8Li Jesucristo incꞌaꞌ najala chi moco najala lix naꞌleb. Ac aꞌan ajcuiꞌ chak chalen najter kꞌe cutan, aꞌan anakcuan ut aꞌanak chi junelic. 9Me̱qꞌue e̱rib chi balakꞌi̱c xbaneb laj balakꞌ, xban nak jalan jala̱nk li tijleb nequeꞌxye. Ma̱cuaꞌ li cꞌaꞌru nakatzaca li najaloc re li kayuꞌam. Aꞌ ban li rusilal li Dios najaloc re ut naxqꞌue xcacuil kachꞌo̱l. 10La̱o cuan jun ka-artal. Aꞌan nak quixmayeja rib li Ka̱cuaꞌ Jesucristo chiru li cruz. Eb laj tij incꞌaꞌ naru teꞌxtzaca li mayej aꞌan joꞌ queꞌxba̱nu chak najter saꞌ li tabernáculo nak queꞌxmayeja li xul. (Naraj naxye nak li colba-ib incꞌaꞌ natauman riqꞌuin xba̱nunquil li chakꞌrab. Natauman ban riqꞌuin xpa̱banquil li Cristo.) 11Lix yucuaꞌil aj tij saꞌ xya̱nkeb laj Israel naxcꞌam lix quiqꞌuel li xul saꞌ li Lokꞌlaj Santil Naꞌajej ut naxmayeja re risinquil li ma̱c. Aban lix tibel li xul naxcꞌat toj jun pacꞌal li tenamit. 12Joꞌcan ajcuiꞌ li Jesucristo quicꞌameꞌ toj jun pacꞌal li tenamit ut aran quicam chiru li cruz. Ut riqꞌuin lix lokꞌlaj quiqꞌuel li Jesucristo nocoxsantobresi. 13Kacanabak li kanajter naꞌleb ut chikata̱kehak li Jesucristo usta toj yo̱ko chi cꞌuluc raylal saꞌ xcꞌabaꞌ aꞌan. 14Li ruchichꞌochꞌ aꞌin ma̱cuaꞌ tzꞌakal kanaꞌaj. Yo̱co ban chiroybeninquil jun chic li kanaꞌaj kꞌaxal cha̱bil. Aꞌan li choxa. 15Joꞌcan ut junelic chikalokꞌonihak li Dios saꞌ xcꞌabaꞌ li Jesucristo, ut chikanima̱k ru. Cui takaba̱nu chi joꞌcan, aꞌan li kamayej chiru li Dios. 16Misach saꞌ e̱chꞌo̱l xba̱nunquil li usilal ut xtenkꞌanquil e̱rib che̱ribil e̱rib xban nak aꞌan jun li mayej nacuulac chiru li Dios. 17Chex-abi̱nk chiruheb laj cꞌamol be che̱ru, ut cheba̱nuhak li cꞌaꞌru nequeꞌxye e̱re xban nak eb aꞌan nequeꞌtenkꞌan e̱re saꞌ le̱ pa̱ba̱l. Aꞌaneb li teꞌxkꞌaxtesi xcue̱nt che̱rix chiru li Dios. Chetenkꞌaheb re nak sahakeb saꞌ xchꞌo̱l saꞌ lix cꞌanjeleb xban nak cui rahakeb saꞌ xchꞌo̱l, rahak ajcuiꞌ chokꞌ e̱re la̱ex. 18Ex herma̱n, tintzꞌa̱ma che̱ru nak chextijok chikix la̱o. Nakecꞌa nak ti̱c kachꞌo̱l ut nakaj nak junelic cua̱nko saꞌ ti̱quilal. 19Ut nintzꞌa̱ma ajcuiꞌ che̱ru nak chextijok chicuix. Aꞌ taxak li Dios chitenkꞌa̱nk cue re nak ta̱ru̱k tinxic cuiꞌchic chi junpa̱t che̱rilbal.

Xchakꞌrabinquileb li herma̱n

20Aꞌ li Ka̱cuaꞌ Dios aꞌan laj qꞌuehol tuktu̱quil usilal, li Dios li quicuaclesin cuiꞌchic re chi yoꞌyo li Jesucristo saꞌ xya̱nkeb li camenak. Riqꞌuin lix lokꞌlaj quiqꞌuel li Jesucristo xakabanbil xcuanquil li acꞌ contrato chi junelic. Li Jesucristo na-iloc ke joꞌ junak cui̱nk narileb lix carner. 21Chicua̱nk taxak li rusilal li Dios e̱riqꞌuin re nak te̱ba̱nu li cꞌaꞌru naraj. Chixba̱nuhak taxak li Dios li cꞌaꞌru naraj e̱riqꞌuin saꞌ xcꞌabaꞌ li Jesucristo. Lokꞌoninbil taxak li Jesucristo chi junelic kꞌe cutan. Joꞌcan taxak. 22Ex herma̱n, nintzꞌa̱ma jun usilal che̱ru. Checuyak rabinquil li cua̱tin re xchꞌolobanquil e̱naꞌleb. Moco qꞌui ta li a̱tin xintzꞌi̱ba saꞌ li hu aꞌin. 23Nacuaj ajcuiꞌ xyebal e̱re nak li hermano Timoteo ac x-el saꞌ tzꞌalam. Cui nachal chi junpa̱t arin, cuochbenak nak toxic che̱rilbal. 24Cheqꞌuehak xsahil xchꞌo̱leb laj cꞌamol be che̱ru saꞌ le̱ pa̱ba̱l ut chixjunileb li kech aj pa̱banelil. Eb laj pa̱banel li cuanqueb arin Italia nequeꞌxtakla xsahil e̱chꞌo̱l. 25Li rusilal li Dios chicua̱nk e̱riqꞌuin. Joꞌcan taxak.

Currently Selected:

Hebreos 13: kek

Highlight

Copy

Compare