Ezequiel 9

Li visión li quiril laj Ezequiel chirix li raylal li ta̱cha̱lk saꞌ xbe̱neb li cuanqueb Jerusalén

1Chanchan matqꞌuenbil quinba̱nu nak quicuabi li Ka̱cuaꞌ nak quixye chi cau xya̱b xcux: —Xeꞌchal li teꞌqꞌuehok re li tenamit chixtojbal rix lix ma̱queb. Xeꞌchal chi cuan chak lix chꞌi̱chꞌeb re camsi̱nc saꞌ rukꞌeb, chan. 2Ut quicuil nak queꞌchal cuakibeb li cui̱nk cuan chak lix chꞌi̱chꞌeb re camsi̱nc saꞌ rukꞌeb. Eb aꞌan queꞌoc saꞌ li oqueba̱l li cuan saꞌ li norte. Saꞌ xya̱nkeb li cuakib chi cui̱nk quichal jun chic li cui̱nk lino li rakꞌ. Saꞌ xcꞌa̱mal xsaꞌ quixcꞌam chak li cꞌaꞌru ta̱cꞌanjelak re tzꞌi̱bac. Ut nak ac xeꞌoc, coxeꞌxakli̱k chiru li artal yi̱banbil riqꞌuin bronce. 3Ut lix lokꞌal lix Dioseb laj Israel qui-el saꞌ xbe̱neb li querubines ut co̱ saꞌ li oqueba̱l re li templo. Ut li Ka̱cuaꞌ quia̱tinac riqꞌuin li cui̱nk li lino rakꞌ, li cuan li tzꞌi̱bleba̱l saꞌ xcꞌa̱mal xsaꞌ. 4Ut li Ka̱cuaꞌ quixye re: —Ayu saꞌ li tenamit Jerusalén. Ta̱suti xsaꞌ li tenamit ut ta̱qꞌue retalileb saꞌ xpe̱quemeb li teꞌyotꞌekꞌ xban xrahileb xchꞌo̱l xban li ma̱usilal li yo̱queb chixba̱nunquil li tenamit, chan. 5Ut quicuabi nak li Dios quixye reheb li cuakib chi cui̱nk: —Ayukex chirix li cui̱nk aꞌin nak ta̱numekꞌ saꞌ li tenamit ut camsihomakeb li cristian. Incꞌaꞌ te̱cuyeb xma̱c chi moco te̱ril xtokꞌoba̱leb ru. 6Jun xiquic nak te̱camsiheb li ti̱xil cui̱nk joꞌ eb li chꞌajom, li xkaꞌal, li naꞌbej joꞌ eb ajcuiꞌ li cocꞌal. Abanan incꞌaꞌ te̱chꞌeꞌeb li cuan retalileb saꞌ xpe̱quemeb, chan. Ut eb aꞌan queꞌxtiquib xcamsinquileb li nequeꞌcꞌamoc be, li cuanqueb chiru li templo. 7Li Ka̱cuaꞌ quixye reheb: —Ayukex saꞌ lin templo ut muxumak ru. Ut te̱tu̱b li camenak saꞌ li neba̱l, chan. Ut queꞌco̱eb ut queꞌoc chixcamsinquileb li cuanqueb saꞌ li tenamit. 8La̱in quincana injunes nak yo̱queb chi camsi̱nc. Quinhupub cuib saꞌ chꞌochꞌ ut quinjap cue chixyebal: —At Ka̱cuaꞌ, at nimajcual Dios, ¿ma ta̱choy xsachbal ruheb laj Israel li joꞌ qꞌuial chic xeꞌcana xban nak yo̱ a̱joskꞌil saꞌ xbe̱neb laj Jerusalén? chanquin. 9Li Ka̱cuaꞌ quixye cue: —Kꞌaxal numtajenak lix ma̱queb li ralal xcꞌajol laj Israel ut laj Judá. Saꞌ chixjunil li naꞌajej queꞌxcamsi ras ri̱tzꞌin ut queꞌxba̱nu li ma̱usilal. Nequeꞌxye nak la̱in xintzꞌekta̱na lix naꞌajeb ut incꞌaꞌ nacuil li ma̱usilal li nequeꞌxba̱nu. 10Joꞌcan nak la̱in incꞌaꞌ tincuil xtokꞌoba̱l ruheb. Anakcuan tinqꞌueheb chixtojbal chixjunil li ma̱usilal li queꞌxba̱nu.— 11Ut li cui̱nk, li lino rakꞌ, li cuan li tzꞌi̱bleba̱l saꞌ xcꞌa̱mal xsaꞌ quisukꞌi ut quixye re li Ka̱cuaꞌ: —La̱in xinba̱nu chixjunil li cꞌaꞌru xina̱takla cuiꞌ, chan.

Currently Selected:

Ezequiel 9: kek

Highlight

Copy

Compare