Ezequiel 11
11
1Ut lix musikꞌ li Dios quinixcuaclesi ut quinixcꞌam saꞌ li oqueba̱l re li templo li cuan saꞌ li este. Saꞌ li oqueba̱l aꞌan cuanqueb o̱b xcaꞌcꞌa̱l (25) li cui̱nk. Saꞌ xya̱nkeb aꞌan cuan laj Jaazanías li ralal laj Azur ut laj Pelatías li ralal laj Benaía. Eb aꞌan nequeꞌcꞌamoc be saꞌ xya̱nkeb li tenamit. 2Li Ka̱cuaꞌ quixye cue: —At ralal cui̱nk, aꞌaneb aꞌin li cui̱nk li yo̱queb chixcꞌu̱banquil ru li ma̱usilal ut yo̱queb chixtacchiꞌinquileb li tenamit aꞌin. 3Nequeꞌxye, “Ma̱cꞌaꞌ cꞌoxlac. Tzꞌakal tocablak. Saꞌ li tenamit aꞌin takacol kib. Chanchanak jun li ucꞌal ut la̱o chanchanako li tib li cuan chi saꞌ li ucꞌal,” chanqueb. 4Joꞌcan nak la̱at, at ralal cui̱nk, ye resil reheb li raylal li ta̱cha̱lk saꞌ xbe̱neb, chan. 5Ut lix musikꞌ li Ka̱cuaꞌ quichal cuiqꞌuin ut quixye cue nak tinye chi joꞌcaꞌin: Aꞌan aꞌin li naxye li Ka̱cuaꞌ. La̱ex li ralal xcꞌajol laj Israel, nequeye li cꞌaꞌak re ru aꞌin, abanan la̱in ninnau cꞌaꞌru cuan saꞌ le̱ chꞌo̱l. 6La̱ex xecamsi nabaleb li cristian saꞌ li tenamit. Ut xecanabeb chi tu̱btu li camenak saꞌ eb li be. 7Joꞌcan nak li Ka̱cuaꞌ Dios naxye chi joꞌcaꞌin: La̱in texcuisi saꞌ li tenamit. Aꞌ chic li cristian li xecamsiheb teꞌcana̱k saꞌ li tenamit. Chanchanakeb li tib saꞌ li ucꞌal. 8La̱ex incꞌaꞌ nequeraj pletic xban nak nequexxucuac. Abanan la̱in tinqꞌue li ple̱t saꞌ e̱be̱n. 9Texcuisi saꞌ le̱ tenamit ut texinkꞌaxtesi saꞌ rukꞌeb li jalaneb xtenamit. Texinqꞌue chixtojbal le̱ ma̱c. 10Texcamsi̱k chi chꞌi̱chꞌ. La̱in tinrakok a̱tin saꞌ e̱be̱n naticla chak saꞌ li nuba̱l re li naꞌajej Israel re nak te̱qꞌue retal nak la̱in li Ka̱cuaꞌ. 11Li tenamit aꞌan moco chanchanak ta li ucꞌal chokꞌ e̱re, chi moco la̱exak ta li tib li cuan chi saꞌ. La̱in tinrakok a̱tin saꞌ e̱be̱n naticla chak saꞌ li nuba̱l re li tenamit Israel. 12La̱ex te̱qꞌue retal nak la̱in li Ka̱cuaꞌ. La̱ex incꞌaꞌ xeba̱nu li naxye saꞌ lin chakꞌrab chi moco xeba̱nu li cꞌaꞌru xinye e̱re. Xeba̱nu ban joꞌ nequeꞌxba̱nu li jalaneb xtenamit li cuanqueb che̱jun sutam, chan li Ka̱cuaꞌ. 13Ut nak la̱in yo̱quin chixyebal resil li raylal li ta̱cha̱lk saꞌ xbe̱neb, laj Pelatías li ralal laj Benaía quicam. Ut la̱in quinhupub cuib saꞌ chꞌochꞌ ut quinjap cue ut quinye: —At nimajcual Dios, ¿ma ta̱sacheb ru chi junaj cua eb li ralal xcꞌajol laj Israel li joꞌ qꞌuial chic queꞌcoleꞌ?— 14Li Dios quia̱tinac cuiqꞌuin ut quixye cue: 15—At ralal cui̱nk, eb li cristian li cuanqueb Jerusalén yo̱queb chi a̱tinac chirixeb laj Israel la̱ cuech tenamitil li queꞌchapeꞌ ut queꞌcꞌameꞌ chi najt. Yo̱queb chixyebal, “Najt cuanqueb riqꞌuin li Ka̱cuaꞌ. Incꞌaꞌ naru teꞌlokꞌoni̱nk. Joꞌcan nak xcana chokꞌ ke la̱o li naꞌajej aꞌin,” chanqueb. 16Joꞌcan nak ta̱ye reheb laj Israel la̱ cuech tenamitil li queꞌcꞌameꞌ chi najt li cꞌaꞌru yo̱quin chixyebal. La̱in quintaklan reheb chi najt ut quinjeqꞌuiheb saꞌ xya̱nkeb li jalanil tenamit. Abanan la̱in tincua̱nk riqꞌuineb nak cua̱nkeb aran. 17Ye ajcuiꞌ reheb laj Israel nak la̱in tinchꞌutub cuiꞌchic ruheb li jeqꞌuinbileb ru saꞌ li jalanil tenamit ut tincꞌameb cuiꞌchic saꞌ lix tenamiteb. Ut tinqꞌue cuiꞌchic reheb li naꞌajej Israel. 18Nak ac cua̱nkeb chic saꞌ lix naꞌajeb, teꞌrisi li yi̱banbil dios saꞌ xya̱nkeb ut incꞌaꞌ chic teꞌxba̱nu li yibru naꞌleb re xlokꞌoninquil li jalanil dios. 19La̱in tinacꞌobresi li ra̱meb ut tinjal lix cꞌaꞌuxeb. Tinkꞌunobresi li ra̱meb ut tincuisi li cacuil chꞌo̱lej li cuan riqꞌuineb. 20Eb aꞌan teꞌxba̱nu li cꞌaꞌru ninye ut teꞌxpa̱b lin chakꞌrab. Ut la̱inak lix Dioseb ut aꞌanakeb li cualal incꞌajol. 21Abanan eb li nequeꞌxic xchꞌo̱l chixba̱nunquil li yibru naꞌleb re xlokꞌoninquil li jalanil dios, la̱in tinqꞌueheb chixtojbal lix ma̱queb. La̱in li Ka̱cuaꞌ ninyehoc re aꞌin.— 22Ut li querubines queꞌxhel lix xiqꞌueb ut queꞌco̱eb ut eb li ruedas co̱ rochbeneb. Ut lix lokꞌal lix Dioseb laj Israel cuan saꞌ xbe̱neb. 23Ut lix lokꞌal li Dios qui-el saꞌ li tenamit ut coxxakli̱k saꞌ xbe̱n li tzu̱l li cuan saꞌ xjayal li na-el cuiꞌ li sakꞌe. 24Ut lix musikꞌ li Dios quinixcuaclesi ut quinixcꞌam cuiꞌchic Babilonia cuanqueb cuiꞌ li queꞌcꞌameꞌ chi pre̱xil. Aꞌan li quicuil saꞌ li visión li quicꞌutbesi̱c chicuu xban li Ka̱cuaꞌ. Ut incꞌaꞌ chic quicuil li visión aꞌan. 25Ut la̱in quinye reheb laj Israel li cuanqueb chi pre̱xil Babilonia chixjunil li quicꞌutbesi̱c chicuu saꞌ li visión xban li Ka̱cuaꞌ.
Currently Selected:
Ezequiel 11: kek
Highlight
Copy
Compare
Share
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
