Efesios 6
6
1Joꞌcan ajcuiꞌ la̱ex, alalbej. Chex-abi̱nk chiru le̱ naꞌ e̱yucuaꞌ saꞌ xcꞌabaꞌ li Ka̱cuaꞌ xban nak aꞌan kꞌaxal us xba̱nunquil. 2Che-oxlokꞌi le̱ naꞌ e̱yucuaꞌ. Aꞌan aꞌin lix be̱n kataklanquil cuan cꞌaꞌru yechiꞌinbil ke cui takaba̱nu aꞌan. 3Ut li yechiꞌinbil ke, aꞌan aꞌin: Cui neque-oxlokꞌi le̱ naꞌ e̱yucuaꞌ, kꞌaxal us tex-e̱lk ut ta̱najtokꞌ ru le̱ yuꞌam li tixqꞌue li Dios arin saꞌ ruchichꞌochꞌ. 4Ex naꞌbej ex yucuaꞌbej, me̱chikꞌ xjoskꞌileb le̱ ralal e̱cꞌajol chi ma̱cꞌaꞌ rajbal. Cheqꞌuiresihakeb ban saꞌ xya̱lal riqꞌuin xkꞌusbaleb ut riqꞌuin xtijbaleb saꞌ xcꞌabaꞌ li Ka̱cuaꞌ Jesucristo. 5Ex aj cꞌanjel, chex-abi̱nk chiruheb le̱ patrón arin saꞌ ruchichꞌochꞌ. Chexcꞌanjelak chiruheb chi anchal e̱chꞌo̱l ut saꞌ xya̱lal joꞌ nak nequexcꞌanjelac chiru li Cristo. 6Moco toj yo̱keb ta che̱rilbal nak te̱ba̱nu le̱ cꞌanjel re nak sahak xchꞌo̱l le̱ patrón e̱riqꞌuin. Chexcꞌanjelak ban chiru le̱ patrón joꞌ nak yo̱kex chi cꞌanjelac chiru li Cristo. Chi anchal e̱chꞌo̱l cheba̱nuhak li naraj li Dios. 7Chexcꞌanjelak chi anchal e̱chꞌo̱l joꞌ nak yo̱quex chi cꞌanjelac chiru li Ka̱cuaꞌ ut ma̱cuaꞌ chiruheb li cui̱nk. 8La̱ex nequenau nak cui cha̱bil te̱ba̱nu che̱junju̱nkal aꞌan ajcuiꞌ li re̱kaj te̱cꞌul riqꞌuin li Ka̱cuaꞌ usta cuan e̱patrón usta ma̱cꞌaꞌ. 9Joꞌcan ajcuiꞌ la̱ex patrón, joꞌ nak laj cꞌanjel nacꞌanjelac chi anchal xchꞌo̱l che̱ru, joꞌcan ajcuiꞌ nak la̱ex te̱taklaheb saꞌ xya̱lal. Canabomak xtaklanquileb saꞌ joskꞌil. Nequenau nak la̱ex cuan e̱patrón saꞌ choxa joꞌ ajcuiꞌ eb aꞌan. Li patrón, aꞌan li Ka̱cuaꞌ Dios ut aꞌan moco jun ta sa ta̱ril ut jun ta xicꞌ ta̱ril.
Li kacꞌanjeleba̱l qꞌuebil ke xban li Dios
10Toj cuan cꞌaꞌru nacuaj xyebal e̱re ut aꞌan aꞌin: Cheꞌcacuubresi̱k le̱ chꞌo̱l saꞌ le̱ pa̱ba̱l riqꞌuin lix nimal xcuanquilal li Ka̱cuaꞌ li cuan e̱riqꞌuin. 11Joꞌcan ut chetikibak e̱rib riqꞌuin chixjunil lix cꞌanjeleba̱l li Dios re nak xakxo̱kex chi tzꞌakal ut yo̱kex chixcolbal e̱rib chiru laj tza nak yo̱k che̱balakꞌinquil. 12Moco yo̱co ta chixyalbal kakꞌe riqꞌuin cui̱nk. Yo̱co ban chi pletic riqꞌuin qꞌuila pa̱y ru chi ma̱us aj musikꞌej li cuanqueb xcuanquil saꞌ eb li cutan aꞌin, li nequeꞌtaklan saꞌ ikꞌ ut saꞌ li ruchichꞌochꞌ li cuan saꞌ xkꞌojyi̱nal ru li ma̱c. 13Xban nak nocopletic riqꞌuin li ma̱us aj musikꞌej, joꞌcan nak cua̱nk e̱riqꞌuin chixjunil le̱ cꞌanjeleba̱l li qꞌuebil e̱re xban li Dios re nak cauhak e̱rib chixcolbal e̱rib chiru laj tza yalak jokꞌe tixyal e̱ra̱lenquil. 14Xakxo̱kex biꞌ chi cau. Aꞌan aꞌin li ta̱cꞌanjelak che̱ru re xcolbal e̱rib chiru laj tza. Li ya̱l ta̱cꞌanjelak joꞌ xcꞌa̱mal e̱saꞌ ut li ti̱quil chꞌo̱lej ta̱cꞌanjelak joꞌ li chꞌi̱chꞌ naramoc re le̱ chꞌo̱l. 15Cauresinbilakex re xyebal resil li colba-ib ut aꞌan ta̱cꞌanjelak e̱re joꞌ e̱xa̱b che̱rok. 16Chirix chixjunil aꞌin chicua̱nk ajcuiꞌ le̱ pa̱ba̱l. Ut aꞌan ta̱cꞌanjelak e̱re joꞌ le̱ ramleb chꞌi̱chꞌ. Le̱ pa̱ba̱l ta̱cꞌanjelak re xcolbal e̱rib chiru laj tza nak tixyal e̱ra̱lenquil. Riqꞌuin aꞌin ta̱ru̱k te̱chup xxamlel lix tzimaj laj tza. 17Li colba-ib ta̱cꞌanjelak e̱re joꞌ nak nacꞌanjelac re li soldado lix tzꞌapbal xjolom. Li Santil Musikꞌej tixcꞌut che̱ru li ra̱tin li Dios. Aꞌan ta̱cꞌanjelak che̱ru joꞌ nak nacꞌanjelac li chꞌi̱chꞌ chiru li soldado. 18Ut yoꞌon cua̱nkex. Junelic chextijok joꞌ naxcꞌut che̱ru li Santil Musikꞌej. Junelic chextzꞌa̱ma̱nk chiru chi anchal e̱chꞌo̱l nak li Dios ta̱tenkꞌa̱nk e̱re. Ut chetzꞌa̱ma chiru nak tixtenkꞌaheb chixjunileb li ralal xcꞌajol li Dios. 19Ut chextijok ajcuiꞌ chicuix la̱in re nak chixqꞌue taxak cua̱tin li Dios re xyebal resil li colba-ib ut chixqꞌue taxak xcacuilal inchꞌo̱l chixyebal resil nak li colba-ib reheb ajcuiꞌ li ma̱cuaꞌeb aj judío. 20Taklanbilin xban li Dios chixyebal li resilal aꞌan. Ut xban xyebal resil li colba-ib nak cuanquin chi pre̱xil anakcuan. Chextijok chicuix re nak tinchꞌolob xya̱lal li colba-ib chi cau inchꞌo̱l joꞌ qꞌuebil cue xba̱nunquil xban li Dios.
Laj Pablo naxqꞌue xsahil xchꞌo̱leb
21Nincꞌoxla nak te̱raj te̱nau chanru cuanquin ut cꞌaꞌru yo̱quin chixba̱nunquil. Joꞌcan nak yo̱quin chixtaklanquil laj Tíquico e̱riqꞌuin. Aꞌan jun li herma̱n kꞌaxal raro kaban, ut cha̱bil aj cꞌanjel chiru li Dios. Aꞌan tixye e̱re chanru cuanquin. 22Yo̱quin chixtaklanquil laj Tíquico e̱riqꞌuin re xserakꞌinquil e̱re chanru cuanco arin. Ut nak te̱nau chanru cuanco, chicꞌojla̱k taxak e̱chꞌo̱l riqꞌuin aꞌan. 23Aꞌ taxak li tuktu̱quil usilal li naxqꞌue li Acuabej Dios ut li naxqꞌue li Ka̱cuaꞌ Jesucristo chicua̱nk e̱riqꞌuin la̱ex che̱junilex aj pa̱banel. Ut chicua̱nk taxak e̱riqꞌuin li rahoc ib ut lix cacuilal e̱chꞌo̱l saꞌ le̱ pa̱ba̱l. 24Chicua̱nk taxak li rusilal li Dios e̱riqꞌuin che̱junilex la̱ex li nequexrahoc re li Ka̱cuaꞌ Jesucristo chi anchal e̱chꞌo̱l ut chi junelic. Joꞌcan taxak.
Currently Selected:
Efesios 6: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.