Hechos 6

Cuukub chi cui̱nk queꞌxakaba̱c chi cꞌanjelac

1Saꞌ eb li cutan aꞌan cꞌajoꞌ nak yo̱queb chi qꞌuia̱nc eb laj pa̱banel. Ut eb laj judío li nequeꞌa̱tinac saꞌ griego queꞌoc chixcuechꞌinquileb laj judío li nequeꞌa̱tinac saꞌ hebreo. Queꞌxye nak incꞌaꞌ tzꞌakal li cꞌaꞌru naqꞌueheꞌ rajlal cutan reheb li xma̱lcaꞌan li cuanqueb saꞌ xya̱nkeb aꞌan. 2Joꞌcan nak li cablaju chi apóstol queꞌxchꞌutub chixjunileb laj pa̱banel ut queꞌxye reheb: —Incꞌaꞌ naru takacanab xchꞌolobanquil ra̱tin li Dios yal re nak tojecꞌok tzacae̱mk la̱o. 3Ex herma̱n, sicꞌomak saꞌ e̱ya̱nk cuukubak chi cui̱nk cha̱bilakeb xnaꞌleb ut nujenakeb chi Santil Musikꞌej riqꞌuineb. Cha̱bilak xyehom xba̱nuhomeb. Aꞌaneb li teꞌqꞌuehekꞌ saꞌ li cꞌanjel aꞌin. 4Ut la̱o takayal kakꞌe chi tijoc ut chixjulticanquil li ra̱tin li Dios, chanqueb. 5Ut queꞌxcꞌul xchꞌo̱leb chixjunil li cuanqueb aran. Queꞌxsicꞌ ru laj Esteban li napa̱ban chi tzꞌakal ut nujenak chi Santil Musikꞌej. Ut queꞌxsicꞌ ajcuiꞌ ruheb laj Felipe, laj Prócoro, laj Nicanor, laj Timón, laj Parmenas, ut laj Nicolás aj Antioquía li qui-oc saꞌ xya̱nkeb laj judío. 6Aꞌaneb aꞌin li queꞌxakaba̱c chi cꞌanjelac. Ut eb li apóstol queꞌxqꞌue li rukꞌ saꞌ xbe̱neb ut queꞌtijoc. 7Joꞌcan nak yo̱ chi abi̱c li ra̱tin li Ka̱cuaꞌ yalak bar. Ut yo̱queb chi ta̱mc laj pa̱banel aran Jerusalén. Ut nabaleb laj tij queꞌpa̱ban.

Nak queꞌxchap laj Esteban

8Laj Esteban aꞌan jun cui̱nk osobtesinbil xban li Dios ut qꞌuebil xcuanquil chixba̱nunquil li milagro ut sachba chꞌo̱lej saꞌ xya̱nkeb li tenamit. 9Cuanqueb xcomoneb li nequeꞌtzoloc saꞌ li cab li nequeꞌxchꞌutub cuiꞌ ribeb laj judío. Aj libertos nequeꞌxye reheb. Saꞌ xya̱nkeb aꞌan cuanqueb li nequeꞌchal chak saꞌ eb li tenamit Cirene, Alejandría, Cilicia ut Asia. Eb aꞌan yo̱queb chixcuechꞌinquil laj Esteban. 10Abanan nak quia̱tinac laj Esteban, eb aꞌan incꞌaꞌ chic queꞌru xsumenquil xban nak aꞌan qꞌuebil xnaꞌleb xban li Santil Musikꞌej. 11Aban cuanqueb li queꞌtumina̱c ru re teꞌxye ticꞌtiꞌ chirix laj Esteban. Ut queꞌxye: —La̱o xkabi nak yo̱ chixmajecuanquil li Dios ut laj Moisés, chanqueb. 12Ut queꞌxtacchiꞌi ajcuiꞌ li tenamit, joꞌqueb ajcuiꞌ laj cꞌamol be ut eb laj tzꞌi̱b. Queꞌxchap laj Esteban ut queꞌxcꞌam chiruheb li nequeꞌtaklan saꞌ xbe̱neb laj judío. 13Ut queꞌxsicꞌ ani ta̱ticꞌtiꞌik chirix ut queꞌxkꞌaba aꞌan ut queꞌxye: —Li cui̱nk aꞌin junelic yo̱ chixsachbal xcuanquil li santil naꞌajej aꞌin ut naxtzꞌekta̱na li chakꞌrab li quiqꞌueheꞌ re laj Moisés. 14La̱o quikabi nak yo̱ chixyebal nak li Jesús laj Nazaret tixjucꞌ li naꞌajej aꞌin, ut tixjal ru li chakꞌrab li coxtzol cuiꞌ laj Moisés, chanqueb. 15Ut chixjunileb li nequeꞌtaklan saꞌ xbe̱neb laj judío li cꞌojcꞌo̱queb aran queꞌril laj Esteban ut queꞌxqꞌue retal nak nalemtzꞌun li riloba̱l. Chanchan na-iloc jun li ángel.

Currently Selected:

Hechos 6: kek

Highlight

Copy