Hechos 2
2
Queꞌxcꞌul li xcuanquilal li Santil Musikꞌej eb laj pa̱banel saꞌ xkꞌehil li ninkꞌe Pentecostés
1Saꞌ xkꞌehil li ninkꞌe re li Pentecostés#Saꞌ li versículo 2:1 li Pentecostés, aꞌan jun ninkꞌe nequeꞌxba̱nu eb laj judío saꞌ xkꞌehil nak nequeꞌxxoc ru li racui̱mkeb. Aꞌan na-uxman laje̱b roxcꞌa̱l cutan chirix li ninkꞌe Pascua. Li a̱tin “Pentecostés” saꞌ griego naraj naxye laje̱b roxcꞌa̱l (50). chꞌutchꞌu̱queb chixjunileb laj pa̱banel saꞌ jun chi naꞌajej ut junajeb xchꞌo̱l. 2Queꞌrabi jun choki̱nc chanchan xya̱b cacuil ikꞌ yo̱ chi cha̱lc saꞌ choxa. Chixjunileb li cuanqueb saꞌ li cab queꞌrabi. 3Queꞌril li chanchan rakꞌ xam. Li rakꞌ xam queꞌxjeqꞌui rib ut queꞌhilan saꞌ xbe̱neb chi xjunju̱nkaleb. 4Queꞌxcꞌul li xcuanquilal li Santil Musikꞌej, ut queꞌoc chi a̱tinac saꞌ jalan a̱tinoba̱l aꞌ yal chanru quicꞌuteꞌ chiruheb xban li Santil Musikꞌej. 5Cuanqueb aj judío aran Jerusalén cauheb xchꞌo̱l saꞌ xpa̱ba̱leb. Queꞌchal chak saꞌ chixjunil li tenamit jun sut rubel choxa. 6Nak queꞌrabi li cꞌaꞌru yo̱queb chixcꞌulbal eb aꞌan, queꞌxchꞌutub ribeb li qꞌuila tenamit. Sachso̱queb xchꞌo̱l xban nak queꞌrabi nak yo̱queb chi a̱tinac saꞌ li ra̱tinoba̱leb li junju̱nk chi tenamit. 7Cꞌajoꞌ nak queꞌxucuac ut sachso̱queb xchꞌo̱l queꞌcana ut queꞌxye chi ribileb rib: —¿Ma ma̱cuaꞌeb ta biꞌ aj Galilea chixjunileb aꞌin li yo̱queb chi a̱tinac saꞌ jalanil a̱tinoba̱l? 8¿Cꞌaꞌut nak yo̱co chirabinquileb chi a̱tinac saꞌ li ka̱tinoba̱l chikaju̱nkal? 9Anakcuan eb aꞌan yo̱queb chi a̱tinac saꞌ ra̱tinoba̱leb laj Partos, laj Medo, laj elamitas ut chikajunilo la̱o li cuanco Mesopotamia, ut Judea, Capadocia, Ponto ut Asia, 10joꞌqueb ajcuiꞌ laj Frigia ut laj Panfilia, laj Egipto ut eb li cuanqueb saꞌ eb li naꞌajej xcue̱nt Libia li cuanqueb nachꞌ riqꞌuin Cirene, joꞌqueb ajcuiꞌ laj Roma. 11Cuanqueb aj judío saꞌ xyoꞌlajiqueb ut cuanqueb ajcuiꞌ li queꞌxjal xpa̱ba̱l ut queꞌoc saꞌ xya̱nkeb laj judío. Cuanqueb ajcuiꞌ li queꞌchal Creta ut Arabia. Nakabi nak yo̱queb chixyebal saꞌ ka̱tinoba̱l li cꞌaꞌru yo̱ chixba̱nunquil li Ka̱cuaꞌ Dios riqꞌuin xnimal xcuanquilal, chanqueb. 12Ut chixjunileb sachso̱queb xchꞌo̱l ut incꞌaꞌ queꞌxtau ru. Queꞌxye chiribileb rib: —¿Cꞌaꞌru xya̱lal aꞌin li yo̱co chixcꞌulbal? chanqueb. 13Cuanqueb ajcuiꞌ yo̱queb chi hoboc ut yo̱queb chixyebal: —Ma̱re teꞌcala̱k, chanqueb.
Laj Pedro naxchꞌolob xya̱lal chiruheb li qꞌuila tenamit
14Tojoꞌnak quixakli laj Pedro rochbeneb li junlaju chic chi apóstol ut qui-oc chi a̱tinac chi cau xya̱b xcux. Quixye reheb li qꞌuila tenamit: —Ex cuech tenamitil aj judío ut che̱junilex la̱ex li cuanquex Jerusalén, la̱in tinye e̱re cꞌaꞌru xya̱lal aꞌin. Qꞌuehomak retal chi us li oc cue xyebal e̱re. 15Li joꞌ qꞌuialeb li cuanqueb arin moco teꞌcala̱k ta joꞌ yo̱quex chixcꞌoxlanquil la̱ex. Anakcuan tojeꞌ bele̱b o̱r re li cutan cuanco. 16Yo̱co ban chixcꞌulbal li quixye chak resil li profeta Joel nak quixye chi joꞌcaꞌin:
17Saꞌ eb li cutan li telajeꞌcha̱lk, chan li Dios, la̱in tinqꞌue lin musikꞌ chi cua̱nc riqꞌuineb chixjunileb li tenamit. Eb le̱ ralal e̱cꞌajol teꞌyehok ra̱tin profeta. Ut tincꞌut lix ya̱lal chiruheb li ti̱xil cui̱nk saꞌ xmatqꞌueb ut tincꞌuteb li visión chiruheb li sa̱j cui̱nk.
18Ut tinqꞌue ajcuiꞌ lin musikꞌ chi cua̱nc riqꞌuineb lin mo̱s cui̱nk ut lin mo̱s ixk, ut talajeꞌxye resil li cꞌaꞌru ta̱cꞌulma̱nk mokon.
19Ut sachba chꞌo̱lej tincꞌutbesi che̱ru chiru choxa joꞌ ajcuiꞌ saꞌ ruchichꞌochꞌ ut te̱ril li quicꞌ, li xam ut li sib chanchan li chok.
20Ta̱kꞌojyi̱nokꞌ ru li sakꞌe ut li po ta̱cakokꞌ ru chanchan li quicꞌ toj ta̱cuulak xkꞌehil li cutan aꞌan, li kꞌaxal xiu xiu, nak la̱in tinrakok a̱tin, chan li Dios.
21Abanan chixjunileb li nequeꞌya̱ban re lix cꞌabaꞌ li Ka̱cuaꞌ, teꞌcolekꞌ. (Joel 2:28-32)
22Ex aj Israel, abihomak li tinye e̱re. La̱ex ac nequenau nak li Jesús aj Nazaret, aꞌan qꞌuebil xcuanquil xban li Dios saꞌ e̱ya̱nk la̱ex riqꞌuin li sachba chꞌo̱lej ut li milagro quilajxba̱nu. La̱ex ac nequenau nak riqꞌuin xcuanquil li Dios quixba̱nu li sachba chꞌo̱lej. 23Li Jesús quikꞌaxtesi̱c saꞌ e̱rukꞌ la̱ex xban nak ac joꞌcan chak saꞌ xchꞌo̱l li Dios nak joꞌcan tixcꞌul. Ut la̱ex quechap ut quekꞌaxtesi saꞌ rukꞌeb li cui̱nk li incꞌaꞌ useb xnaꞌleb. Ut eb aꞌan queꞌxcamsi chiru cruz. 24Abanan li Dios quicuaclesin cuiꞌchic re chi yoꞌyo saꞌ xya̱nkeb li camenak. Li Dios quirisi xcuanquil li ca̱mc saꞌ xbe̱n xban nak li ca̱mc incꞌaꞌ naru nanumta saꞌ xbe̱n. 25Joꞌcaꞌin quixye li rey David chirix li Jesús:
La̱in junelic nincꞌoxla li Dios. Aꞌan cuan cuiqꞌuin. Ma̱cꞌaꞌ cꞌaꞌru ta̱isi̱nk cue riqꞌuin li Dios.
26Numtajenak li saylal cuan saꞌ li cua̱m xban nak cꞌojcꞌo inchꞌo̱l riqꞌuin li Ka̱cuaꞌ.
27La̱in ninnau nak tina̱cuaclesi cuiꞌchic chi yoꞌyo saꞌ xya̱nkeb li camenak. Ut ninnau ajcuiꞌ nak incꞌaꞌ ta̱canab chi kꞌa̱c lix tibel la̱ Santil Alal.
28La̱in ninnau nak la̱at nacatcꞌutuc chicuu chanru nak tintau li junelic yuꞌam. Xban nak la̱at cuancat cuiqꞌuin, junelic sa saꞌ inchꞌo̱l. Ut caꞌaj cuiꞌ a̱cuiqꞌuin cuan li sahil chꞌo̱lejil. (Sal. 16:8-11)
29Ex kech tenamitil, la̱in ninye e̱re chi anchal inchꞌo̱l nak tzꞌakal ya̱l nak laj David li kaxeꞌto̱nil yucuaꞌ quicam ut quimukeꞌ. La̱o nakanau nak li mukleba̱l li cuan cuiꞌ toj cuan ajcuiꞌ chalen anakcuan. 30Laj David aꞌan jun profeta. Aꞌan quixnau nak li Dios quixye riqꞌuin juramento nak saꞌ xya̱nkeb li ralal xcꞌajol ta̱yoꞌla̱k li Cristo, ut aꞌan chic ta̱xakaba̱k chokꞌ rey. 31Ut laj David quixnau li cꞌaꞌru ta̱cꞌulma̱nk mokon. Joꞌcan nak quixchꞌolob xya̱lal nak li Cristo ta̱cuacli̱k cuiꞌchic chi yoꞌyo saꞌ xya̱nkeb li camenak. Quixnau nak aꞌan incꞌaꞌ ta̱cana̱k saꞌ xnaꞌajeb li camenak chi moco lix tibel ta̱kꞌa̱k. 32Aꞌan aꞌin li Jesús li quicuaclesi̱c cuiꞌchic chi yoꞌyo xban li Dios. La̱o xkil tzꞌakal riqꞌuin xnakꞌ ku. Joꞌcan nak nakanau nak ya̱l. 33Quicꞌameꞌ xban li Dios re nak ta̱cꞌojla̱k saꞌ lix nim ukꞌ ut quiqꞌueheꞌ xcuanquil. Ut quiqꞌueheꞌ li Santil Musikꞌej re xban li Dios. Ut quixqꞌue ajcuiꞌ ke la̱o li Santil Musikꞌej joꞌ quiyechiꞌi̱c ke. Aꞌan aꞌin li yo̱quex chirilbal ut chirabinquil anakcuan. 34Li rey David incꞌaꞌ quicꞌameꞌ saꞌ choxa joꞌ nak quicꞌameꞌ li Cristo saꞌ choxa. Abanan quixye chi joꞌcaꞌin:
Li Dios quixye re li Ka̱cuaꞌ: Cꞌojlan saꞌ lin nim ukꞌ,
35toj tinqꞌueheb li xicꞌ nequeꞌiloc a̱cue rubel la̱ cuanquil. (Sal. 110:1)
36Chenauhak che̱junilex la̱ex aj Israel nak li Jesús li queqꞌue la̱ex chiru cruz, aꞌan li quiqꞌueheꞌ chokꞌ Ka̱cuaꞌ ut chokꞌ Cristo xban li Dios, chan laj Pedro. 37Nak queꞌrabi aꞌan li chꞌutchꞌu̱queb aran, queꞌyotꞌeꞌ xchꞌo̱leb ut queꞌxye re laj Pedro joꞌ ajcuiꞌ reheb li apóstol li jun chꞌol chic: —Ex kas ki̱tzꞌin, ¿cꞌaꞌru takaba̱nu? chanqueb. 38Laj Pedro quichakꞌoc ut quixye reheb: —Chiyotꞌekꞌ e̱chꞌo̱l ut jalomak e̱cꞌaꞌux ut ta̱cubsi̱k e̱haꞌ chi junju̱nkalex saꞌ xcꞌabaꞌ li Jesucristo re nak tixcuy e̱ma̱c li Dios ut tixqꞌue e̱re li Santil Musikꞌej. 39Yechiꞌinbil e̱re la̱ex li ma̱tan aꞌin, ut yechiꞌinbil ajcuiꞌ reheb le̱ ralal e̱cꞌajol ut reheb ajcuiꞌ li ma̱cuaꞌeb aj judío. Yechiꞌinbil reheb chixjunileb li joꞌ qꞌuialeb teꞌbokekꞌ xban li Ka̱cuaꞌ li kaDios, chan. 40Ma̱cuaꞌ caꞌaj cuiꞌ aꞌan li quixye laj Pedro reheb. Quixchꞌolob ban ajcuiꞌ xya̱lal chiruheb riqꞌuin nabal chi a̱tin ut quixqꞌue xnaꞌlebeb. Quixye reheb: —Chenauhak xcolbal e̱rib chiru li tojba ma̱c li ta̱cha̱lk saꞌ xbe̱neb li incꞌaꞌ useb xnaꞌleb, chan. 41Ut chixjunileb li queꞌpa̱ban re li ra̱tin queꞌcubsi̱c xhaꞌ. Oxib mil tana li queꞌpa̱ban saꞌ li cutan aꞌan ut queꞌoc chokꞌ xcomoneb.
Chanru nak queꞌcuan chi junaj xchꞌo̱leb li xbe̱n aj pa̱banel
42Cauheb xchꞌo̱l chixpa̱banquil li tijleb li quichꞌoloba̱c chiruheb xbaneb li apóstol. Junaj xchꞌo̱leb nak cuanqueb ut saꞌ comonil queꞌtijoc ut queꞌcuaꞌac re xjulticanquil lix camic li Jesucristo. 43Chixjunileb sachso̱queb xchꞌo̱l xban li milagro ut li sachba chꞌo̱lej li yo̱queb chixba̱nunquil li apóstol. 44Ut eb li queꞌpa̱ban junaj xchꞌo̱leb ut chixjunil li cꞌaꞌru cuan reheb, reheb saꞌ comonil. 45Queꞌxcꞌayi lix chꞌochꞌeb ut chixjunil li cꞌaꞌru cuan reheb ut queꞌxjeqꞌui lix tzꞌak reheb chixjunileb aꞌ yal chanru ta̱cꞌanjelak chiruheb li junju̱nk. 46Rajlal cutan queꞌxchꞌutub ribeb saꞌ li templo chi lokꞌoni̱nc. Ut saꞌ eb li rochoch queꞌcuaꞌac saꞌ comonil chi sa saꞌ xchꞌo̱leb ut chi junaj xchꞌo̱leb. 47Queꞌxlokꞌoni li Ka̱cuaꞌ Dios ut queꞌqꞌueheꞌ xcuanquil xbaneb chixjunileb li tenamit. Ut rajlal cutan li Dios quixtenkꞌaheb chi qꞌuia̱nc laj pa̱banel.
Currently Selected:
Hechos 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.