Hechos 16

Laj Timoteo co̱ chirixeb laj Pablo ut laj Silas

1Laj Pablo quicuulac saꞌ eb li tenamit Derbe ut Listra. Ut aran quixtau jun aj pa̱banel aj Timoteo xcꞌabaꞌ. Lix naꞌ, aꞌan jun aj pa̱banel aj judío ut lix yucuaꞌ, aꞌan aj griego. Ma̱cuaꞌ aj judío. 2Cha̱bil nequeꞌxye chirix laj Timoteo eb laj pa̱banel li cuanqueb Listra ut Iconio. 3Laj Pablo quiraj xcꞌambal laj Timoteo chirix. Joꞌcan nak quixba̱nu li circuncisión re. Incꞌaꞌ quiraj nak teꞌchꞌina̱nk xchꞌo̱leb laj judío li cuanqueb saꞌ eb li naꞌajej aran xban nak chixjunileb queꞌxnau nak lix yucuaꞌ laj Timoteo ma̱cuaꞌ aj judío. 4Ut nak yo̱queb chi numecꞌ saꞌ li junju̱nk chi tenamit, yo̱queb chixyebal reheb laj pa̱banel nak tento teꞌxba̱nu li cꞌaꞌru queꞌxcꞌu̱b ru eb li apóstol joꞌqueb ajcuiꞌ laj cꞌamol be li cuanqueb aran Jerusalén. 5Joꞌcaꞌin nak yo̱queb chi qꞌui̱c laj pa̱banel saꞌ xpa̱ba̱leb. Ut rajlal cutan yo̱queb chi ta̱mc.

Jun li cui̱nk aj Macedonia quicꞌuteꞌ chiru laj Pablo saꞌ visión

6Li Santil Musikꞌej quixcꞌut chiruheb nak incꞌaꞌ teꞌxic chixchꞌolobanquil resil li colba-ib saꞌ li naꞌajej Asia. Joꞌcan nak queꞌco̱eb Frigia ut queꞌnumeꞌ ajcuiꞌ saꞌ li naꞌajej Galacia. 7Nak queꞌcuulac Misia, queꞌraj raj xic Bitinia. Abanan li Santil Musikꞌej incꞌaꞌ quixcanabeb re teꞌxic aran. 8Joꞌcan nak yal queꞌnumeꞌ Misia ut co̱eb Troas. 9Nak cuanqueb aran saꞌ jun li kꞌojyi̱n quicꞌuteꞌ jun li visión chiru laj Pablo. Jun li cui̱nk aj Macedonia xakxo chiru nak quiril. Yo̱ chixtzꞌa̱manquil chiru ut quixye re: —Cha̱lkat saꞌ katenamit Macedonia ut choa̱tenkꞌa, chuꞌux re nak quiril. 10Ut nak ac xcꞌuteꞌ li visión chiru laj Pablo, saꞌ junpa̱t quikacauresi kib la̱o chi xic Macedonia. Kanau chi tzꞌakal nak li Dios yo̱ chi takla̱nc ke aran chixyebal resil li colba-ib reheb li cuanqueb aran.

Lix Lidia quipa̱ban nak laj Pablo quixchꞌolob xya̱lal aran Filipos

11Co-el aran Troas ut ti̱c co̱o chiru haꞌ toj Samotracia. Ut cuulajak chic cocuulac Neápolis. 12Chirix aꞌan co̱o Macedonia saꞌ li nimla tenamit Filipos. Li tenamit aꞌan cuan xcue̱nt Roma. Cocuan cuib oxib cutan saꞌ li tenamit aꞌan. 13Ut saꞌ li hiloba̱l cutan co̱o chire li tenamit cuan cuiꞌ jun li nimaꞌ saꞌ li naꞌajej li nequeꞌtijoc cuiꞌ eb laj judío. Cocꞌojla ut co-oc chixyebal resil li colba-ib reheb li ixk li queꞌchꞌutla aran. 14Jun reheb li ixk aꞌan xLidia xcꞌabaꞌ. Tiatira xtenamit. Aꞌan nacꞌayin cha̱bil tꞌicr. Naxpa̱b li Dios ut yo̱ chi abi̱nc xban nak li Dios quixcꞌut chiru nak tixqꞌue retal li yo̱ chixyebal laj Pablo. 15Quixcꞌul li cubi haꞌ rochbeneb chixjunileb li cuanqueb saꞌ rochoch, ut quixye ke: —Cui nequepa̱b nak la̱in xinpa̱b li Ka̱cuaꞌ chi anchal inchꞌo̱l, naru nequexcana chi hila̱nc saꞌ li cuochoch, chan ke. Ut quirelaji ku chi cana̱c.

Laj Pablo ut laj Silas queꞌqꞌueheꞌ saꞌ tzꞌalam aran Filipos

16Saꞌ jun li cutan yo̱co chi xic chi tijoc nak kacꞌul jun li xkaꞌal aj kꞌe. Cuan ma̱us aj musikꞌej riqꞌuin. Aꞌan jun mo̱s ut naxsicꞌ nabal xtumin lix patrón riqꞌuin kꞌehi̱nc. 17Li xkaꞌal aꞌan yo̱ chikata̱kenquil. Japjo re chixyebal: —Eb li cui̱nk aꞌin aꞌan xmo̱seb li nimajcual Dios. Yo̱queb chixchꞌolobanquil chiku chanru nak ta̱ru̱k tocolekꞌ, chan. 18Nabal cutan quixba̱nu chi joꞌcan. Nak ac xtitzꞌ chirabinquil, laj Pablo quixxakab rib, ut quiril li xkaꞌal, ut quixye re li ma̱us aj musikꞌej: —Saꞌ xcꞌabaꞌ li Ka̱cuaꞌ Jesucristo, tinye a̱cue: Elen riqꞌuin li xkaꞌal aꞌin, chan. Ut saꞌ ajcuiꞌ li ho̱nal aꞌan, li ma̱us aj musikꞌej qui-el riqꞌuin. 19Nak queꞌxqꞌue retal lix patrón li xkaꞌal nak incꞌaꞌ chic ta̱ru̱k tixsicꞌ xtumineb, queꞌxchap laj Pablo ut laj Silas ut queꞌxcꞌam saꞌ po̱pol chiruheb laj rakol a̱tin. 20Nak queꞌxxakab chiru laj rakol a̱tin, queꞌxye: —Eb li cui̱nk aꞌin, aꞌaneb aj judío ut yo̱queb chikachꞌiꞌchꞌiꞌinquil saꞌ li katenamit. 21Yo̱queb chixcꞌutbal jalan naꞌleb saꞌ li katenamit. La̱o incꞌaꞌ naru nakacꞌul chi moco naru takaba̱nu li nequeꞌxye xban nak la̱o aj Roma, chanqueb. 22Ut queꞌxtu̱b rib li tenamit chixjitbaleb. Eb laj rakol a̱tin queꞌxkꞌichi li rakꞌeb laj Pablo ut laj Silas ut queꞌxtakla xsacꞌbaleb riqꞌuin cheꞌ. 23Nak ac xeꞌtacuasi̱c chi us, queꞌqꞌueheꞌ saꞌ tzꞌalam. Ut eb laj rakol a̱tin queꞌxye reheb laj ilol tzꞌalam nak teꞌril chi us laj Pablo ut laj Silas re nak incꞌaꞌ teꞌe̱lelik. 24Ut nak quiyeheꞌ chi joꞌcan, queꞌcꞌameꞌ ut queꞌqꞌueheꞌ saꞌ tzꞌalam saꞌ jun li naꞌajej li cuan toj chi saꞌ ut queꞌnatꞌeꞌ li rok saꞌ cheꞌ. 25Tuktu chic kꞌojyi̱n nak laj Pablo ut laj Silas yo̱queb chi tijoc ut yo̱queb chi bicha̱nc re xlokꞌoninquil li Dios. Ut eb li cuanqueb chi pre̱xil yo̱queb chi abi̱nc. 26Ma̱cꞌaꞌ saꞌ xchꞌo̱leb nak quichal jun nimla hi̱c. Qui-ecꞌasi̱c chi cau li tzꞌalam, ut quilajeꞌteli lix puertil. Ut quilajeꞌhiteꞌ li cadena li bacꞌbo̱queb cuiꞌ li pre̱x. 27Ut nak qui-aj ru laj ilol tzꞌalam, quiril nak teto lix puertil li tzꞌalam. Quixchap lix chꞌi̱chꞌ ut oc raj re chixcamsinquil rib. Saꞌ xchꞌo̱l aꞌan nak xeꞌe̱lelic chixjunileb li pre̱x. 28Ut laj Pablo quixjap re chi cau ut quixye: —Ma̱camsi a̱cuib. Chikajunilo cuanco arin, chan. 29Ut laj ilol tzꞌalam quixpatzꞌ lix xam ut qui-oc chi saꞌ li tzꞌalam chirilbal. Nasicsot xban xxiu nak quixcut rib chi rokeb laj Pablo ut laj Silas. 30Laj ilol tzꞌalam quirisiheb xjuneseb laj Pablo ut laj Silas ut quixye reheb: —¿Cꞌaꞌru us tinba̱nu re nak tincolekꞌ? 31Eb aꞌan queꞌxye: —Pa̱b li Ka̱cuaꞌ Jesucristo. Tatcolekꞌ la̱at joꞌqueb ajcuiꞌ li cuanqueb saꞌ la̱ cuochoch, chan laj Pablo. 32Ut quixchꞌolob xya̱lal li ra̱tin li Ka̱cuaꞌ chiru aꞌan joꞌ ajcuiꞌ chiruheb li joꞌ qꞌuial li cuanqueb saꞌ li rochoch. 33Ut saꞌ ajcuiꞌ li ho̱nal aꞌan laj ilol tzꞌalam quirisiheb saꞌ tzꞌalam laj Pablo ut laj Silas. Quixchꞌaj ru lix tochꞌoleb xban nak queꞌsaqꞌueꞌ. Ut ticto quicubsi̱c xhaꞌ laj ilol tzꞌalam rochbeneb chixjunileb li cuanqueb saꞌ li rochoch. 34Quixcꞌameb laj Pablo ut laj Silas saꞌ rochoch ut quixqꞌueheb xtzacae̱mk. Cꞌajoꞌ nak quisahoꞌ saꞌ xchꞌo̱l nak quixpa̱b li Dios rochbeneb li cuanqueb saꞌ rochoch. 35Nak quisake̱u, eb laj rakol a̱tin queꞌxtakla xyebal re laj ilol tzꞌalam nak tixcanabeb chi xic eb li cui̱nk aꞌan. 36Laj ilol tzꞌalam quixye reheb: —Eb laj rakol a̱tin xeꞌxtakla chak xyebal nak tex-achꞌaba̱k. Joꞌcan nak ayukex chi ma̱cꞌaꞌ e̱cꞌaꞌux, chan. 37Laj Pablo quixye reheb: —Incꞌaꞌ. Xosaqꞌueꞌ chiruheb li tenamit chi ma̱jiꞌ queꞌxrak a̱tin saꞌ kabe̱n. Xoeꞌxqꞌue saꞌ tzꞌalam usta la̱o aj Roma. Ut anakcuan, teꞌraj toeꞌrisi chi mukmu. Incꞌaꞌ naru chi joꞌcan. Cha̱lkeb ban aꞌan ut choeꞌrisihak, chan. 38Ut eb li takl queꞌco̱eb chixyebal re laj rakol a̱tin li cꞌaꞌru quixye laj Pablo. Cꞌajoꞌ nak queꞌxucuac nak queꞌrabi nak laj Pablo ut laj Silas, aꞌaneb aj Roma. 39Nak queꞌcuulac, queꞌxkꞌunbesiheb ut queꞌxtzꞌa̱ma chiruheb nak teꞌe̱lk saꞌ li tenamit. 40Nak queꞌel saꞌ tzꞌalam laj Pablo ut laj Silas, coxeꞌocak saꞌ rochoch lix Lidia. Nak ac xeꞌril ruheb laj pa̱banel, queꞌxqꞌue xcacuilal xchꞌo̱leb ut queꞌco̱eb.

Currently Selected:

Hechos 16: kek

Highlight

Copy

Compare