2 Tesalonicenses 3
3
Laj Pablo naxtzꞌa̱ma chiruheb nak teꞌtijok chirix
1Ut anakcuan ex inherma̱n, cuan cuiꞌchic cꞌaꞌru nacuaj xtzꞌa̱manquil che̱ru. Nintzꞌa̱ma che̱ru nak textijok chikix re nak ta̱yema̱nk li ra̱tin li Ka̱cuaꞌ Jesucristo yalak bar ut cheꞌxqꞌue xlokꞌal ut cheꞌpa̱ba̱nk taxak joꞌ nak quexpa̱ban la̱ex. 2Chextijok ajcuiꞌ chikix re nak li Dios ta̱colok ke chiruheb li cui̱nk li incꞌaꞌ useb xnaꞌlebeb ut nequeꞌba̱nun re li ma̱usilal xban nak moco chixjunileb ta nequeꞌpa̱ban re li Dios. 3Aꞌut li Ka̱cuaꞌ Jesucristo, aꞌan ti̱c xchꞌo̱l ut junelic naxba̱nu li cꞌaꞌru naxye. Aꞌan ta̱qꞌuehok xcacuil e̱chꞌo̱l ut aꞌan ajcuiꞌ ta̱colok e̱re chiru laj tza. 4Ut cꞌojcꞌo kachꞌo̱l saꞌ e̱be̱n la̱ex saꞌ xcꞌabaꞌ li Ka̱cuaꞌ Jesucristo nak yo̱quex chixba̱nunquil li xkajultica che̱ru ut nakanau nak te̱ba̱nu li bar cuan takaye e̱re. 5Aꞌ taxak li Ka̱cuaꞌ Jesucristo chitenkꞌa̱nk e̱re chixnaubal nak raro̱quex xban li Dios ut chicua̱nk taxak e̱riqꞌuin li cuyuc li naxqꞌue li Cristo.
Tento nak totrabajik re nak cua̱nk cꞌaꞌru ke
6Ut nakajultica che̱ru ex herma̱n, saꞌ xcꞌabaꞌ li Jesucristo nak cherisi e̱rib riqꞌuineb li herma̱n li yal subuc cutan nequeꞌxba̱nu ut incꞌaꞌ nequeꞌxpa̱b le̱ tijbal qꞌuebil e̱re kaban. 7La̱ex ac nequenau ajcuiꞌ chanru xkaba̱nu nak xocuan e̱riqꞌuin. Cheba̱nu joꞌ xkaba̱nu la̱o. Incꞌaꞌ xosubuc cutan nak xocuan e̱riqꞌuin. 8Incꞌaꞌ xocuaꞌac yal chi ma̱tan. Incꞌaꞌ xkacꞌul katenkꞌanquil nak xocuan saꞌ e̱ya̱nk. Xkatacuasi ban kib chi cꞌanjelac chi kꞌek chi cutan re nak ta̱cua̱nk cꞌaꞌru ke re xnumsinquil li cutan junju̱nk ut ma̱ ani xkachꞌiꞌchꞌiꞌi saꞌ e̱ya̱nk. 9Moco xban ta nak ma̱cuaꞌ ta kacꞌulub xcꞌulbal katenkꞌanquil nak xkaba̱nu aꞌan. Xkaba̱nu chi joꞌcan yal re nak te̱tzol e̱rib kiqꞌuin. 10Ut nak toj cuanco chak e̱riqꞌuin, xkajultica lix ya̱lal aꞌin che̱ru: li ani incꞌaꞌ naraj trabajic, incꞌaꞌ ta̱qꞌuehekꞌ xcua. 11Nakaye aꞌin e̱re xban nak xkabi resil nak cuan junju̱nk saꞌ e̱ya̱nk yal subuc cutan yo̱queb. Junes moloc a̱tin nequeꞌxba̱nu ut incꞌaꞌ nequeꞌraj trabajic. 12Saꞌ xcꞌabaꞌ li Ka̱cuaꞌ Jesucristo, ninye reheb li incꞌaꞌ nequeꞌraj trabajic nak tento teꞌtrabajik saꞌ xya̱lal re nak ta̱cua̱nk cꞌaꞌru reheb re xnumsinquil li cutan junju̱nk. 13Ut la̱ex, ex herma̱n, incꞌaꞌ taxak textitzꞌk chixba̱nunquil li us. 14Cui ut cuan junak saꞌ e̱ya̱nk incꞌaꞌ naraj xpa̱banquil li a̱tin aꞌin li xkatzꞌi̱ba e̱re saꞌ li hu aꞌin, cheqꞌuehak retal aꞌan. Ut me̱rochbeni e̱rib riqꞌuin re nak ta̱xuta̱na̱k. 15Abanan incꞌaꞌ xi̱cꞌ te̱ril. Cheqꞌuehak ban xnaꞌleb joꞌ nak naqꞌueheꞌ xnaꞌleb junak li i̱tzꞌinbej.
Laj Pablo naxchakꞌrabiheb
16Aꞌ taxak li Ka̱cuaꞌ Jesucristo li naqꞌuehoc tuktu̱quil usilal, chiqꞌuehok e̱re li tuktu̱quilal chi junelic riqꞌuin yalak cꞌaꞌru nequecꞌul. Aꞌ taxak li Ka̱cuaꞌ Jesucristo chicua̱nk e̱riqꞌuin che̱junilex. 17La̱in laj Pablo. Riqꞌuin cuukꞌ yo̱quin chixtzꞌi̱banquil lin cꞌabaꞌ joꞌ cꞌaynakin chixba̱nunquil rajlal nak nintzꞌi̱ba li hu. Aꞌan retalil nak la̱in xintaklan re li hu aꞌin. Ut yo̱quin chixtaklanquil xsahil e̱chꞌo̱l. 18Aꞌ taxak li usilal li naxqꞌue li Ka̱cuaꞌ Jesucristo chicua̱nk e̱riqꞌuin che̱junilex. Joꞌcan taxak.
Currently Selected:
2 Tesalonicenses 3: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.