2 Corintios 9

1Incꞌaꞌ tento tintzꞌi̱bak e̱riqꞌuin chirix li ma̱tan li te̱takla riqꞌuineb laj pa̱banel aran Jerusalén. 2Ninnau nak chi anchal e̱chꞌo̱l nequeraj xtenkꞌanquileb. Ut xinye e̱resilal reheb laj Macedonia. Xinye chi joꞌcaꞌin: Laj pa̱banel li cuanqueb Acaya chalen jun haber qui-ala saꞌ xchꞌo̱leb xtenkꞌanquileb li rech aj pa̱banelil, chanquin reheb. Ut xban nak la̱ex yo̱quex chixqꞌuebal e̱chꞌo̱l chi tenkꞌa̱nc eb aꞌan teꞌraj ajcuiꞌ tenkꞌa̱nc. 3Ut yo̱quin chixtaklanquileb li herma̱n aꞌin e̱riqꞌuin re nak textenkꞌa chixcauresinquil le̱ mayej re nak ta̱e̱lk chi ya̱l li cꞌaꞌru xinye che̱rix. 4Cui ma̱jiꞌ cauresinbil le̱ mayej nak tincuulak cuochbeneb li herma̱n aj Macedonia, te̱cꞌut inxuta̱n la̱in xban nak ac xinserakꞌi reheb nak cauresinbil le̱ mayej ut te̱cꞌut ajcuiꞌ e̱xuta̱n la̱ex. 5Joꞌcan nak xincꞌoxla nak us xtaklanquileb li herma̱n xbe̱n cua nak toj ma̱jiꞌ ninxic la̱in. Textenkꞌa xcauresinquil li mayej li xeyechiꞌi. Ut nak tincuulak, ac xocbilak e̱ban, re nak ta̱cꞌutu̱nk nak moco minbil ta e̱ru chixqꞌuebal. Xeqꞌue ban xban nak nequeraj xba̱nunquil. 6Cheqꞌuehak retal li naꞌleb aꞌin: li ani caꞌchꞌin narau, caꞌchꞌin ajcuiꞌ li tixkꞌol. Ut li ani nabal narau, nabal ajcuiꞌ tixkꞌol. 7Li junju̱nk tixqꞌue li joꞌ qꞌuial ta̱ala̱k saꞌ xchꞌo̱l xqꞌuebal. Incꞌaꞌ tixqꞌue chi ra saꞌ xchꞌo̱l, chi moco minbilak ta ru xban nak li Ka̱cuaꞌ naxra li ani naxqꞌue chi sa saꞌ xchꞌo̱l. 8Nim xcuanquil li Dios. Ut aꞌan tixqꞌue e̱re chixjunil re nak junelic ta̱tzꞌaklok e̱re li cꞌaꞌak re ru nacꞌanjelac e̱re ut re ajcuiꞌ nak ta̱ru̱k textenkꞌa̱nk riqꞌuin chixjunil li cha̱bil cꞌanjel. 9Joꞌcaꞌin tzꞌi̱banbil saꞌ li Santil Hu:

Li ani naxtenkꞌa li nebaꞌ chi anchal xchꞌo̱l, lix cha̱bilal aꞌan cuan chi junelic. (Sal. 112:9)

10Li Dios junelic naxqꞌue li iyaj re laj acuinel ut naxqꞌue li kacua. Ut aꞌan tixqꞌue ajcuiꞌ li cꞌaꞌru ta̱cꞌanjelak ke. Ut tixqꞌue re̱kaj ut tixtambresi aꞌ yal chanru nocosihin. 11Li Dios junelic naxqꞌue chi nabal li cꞌaꞌru e̱re re nak ta̱ru̱k te̱tenkꞌaheb chi anchal e̱chꞌo̱l li ma̱cꞌaꞌ cuanqueb re. Ut nabaleb ajcuiꞌ li teꞌbantioxi̱nk chiru li Dios riqꞌuin li ma̱tan li xetakla chikix. 12Ma̱cuaꞌ caꞌaj cuiꞌ xtenkꞌanquileb li herma̱n yo̱quex nak nequeba̱nu li usilal aꞌin. Yo̱quex ban ajcuiꞌ xqꞌuebal xlokꞌal li Dios xban nak eb li herma̱n nequeꞌbantioxin chiru li Dios e̱ban la̱ex. 13Ut nequeꞌxqꞌue ajcuiꞌ xlokꞌal li Dios xban nak cau e̱chꞌo̱l la̱ex saꞌ le̱ pa̱ba̱l. Moco caꞌaj cuiꞌ ta riqꞌuin nak nequeye nak nequexpa̱ban nak nacꞌutun le̱ pa̱ba̱l. Nacꞌutun ban ajcuiꞌ xban nak nequeqꞌue e̱chꞌo̱l chixtenkꞌanquileb li ma̱cꞌaꞌ cuanqueb re. Ut chi joꞌcan nequetenkꞌa chixjunileb laj pa̱banel. 14Teꞌxqꞌue retal nak lix nimal rusilal li Dios cuan e̱riqꞌuin. Joꞌcan nak la̱ex raro̱quex xbaneb li herma̱n ut teꞌtijok che̱rix. 15Bantiox re li Dios nak quixqꞌue ke li ma̱tan li kꞌaxal numtajenak xlokꞌal. Ut li ma̱tan aꞌin, aꞌan li Ka̱cuaꞌ Jesucristo.

Currently Selected:

2 Corintios 9: kek

Highlight

Copy

Compare